1, 2. (a) Moḇsa koḇaḇir rai rofyor roi ono kokara ḇa na nefararwei ro kankenem koḇena? (Mam sonin ro randak artikel ine.) (b) Ro Mazmur 131, rosai na ḇefnoḇek fa kofaduru swaruser ḇepyum?

ROFYOR Lloyd ma Alexandra sufarmyan ro Betel ro swaf taun ri 25 kwar, sor su fa suyuffarmyan ḇe bandi. Randak ya suḇesaneso. Lloyd doḇe, ”Yamam Betel ma fararur ayena ro diwa naiso nyan kankenem yenairi. Ro swaruser yena, yafawi ma yaḇesyowi roi ḇewar fa sifrur fararwei nane. Mboi minggu ḇe minggu ma paik ḇe paik muniwara, fyorno ido yaḇaḇir sifandun aya ḇa.” Fafisu ono Lloyd nya swaruser ḇepyum faro fararwei ani, mboi fafisu ḇesena wer ḇyesanekar.

² Ro marandan koḇena, nari roi ono kokara ḇa na nefararwei ro kankenem koḇena, ma nane na nafnai fa koḇeḇirḇar syadi ma kokara samswen. (Amsal 12:25) Rofyor  fararwei anna nsamswen fa koso na ido, rosai na ḇefnoḇek ko fa kofaduru swaruser ḇepyum ya? (Wasya Mazmur 131:1-3.) Mkorama komam rariso Yahwe manfamyan Ḇyesya ḇepon siwara ma ro baboine, sfaduru swaruser ḇepyum rofyor kankenem sena nefararwei ḇeri.

3. Rosai ḇekur Yusuf i ḇefrur fa kankenem ḇyedi ḇyefararwei ḇeri?

³ Kokarapan roi ḇekur Yusuf i. Yakub ḇyemanmin syadi Yusuf ro romawa ḇyesi kam. Nane nafnai fa Yusuf naek ḇyesi sfafayaf kaku. Fafisu Yusuf ḇyeumur 17, naek ḇyesine sḇoḇ i fa ḇyewomen. (Kejadian 37:2-4, 23-28) Ḇyekandera kaku ro Masir indokada ro swaf taun ri 13, randak ya ḇyewomen, mura sisun i ḇe bui. Yusuf kmari iswar kaku i, mboi ḇyarek ḇinkwan ro kmari. Kakuḇae, rosai ḇekur i nane bisa nafrur i fa iḇor iḇerari ma imsor. Mboi rarirya ḇa. Rosai ḇefnoḇek i?

4. (a) Rosai Yusuf ifrur fafisu ryo bui? (b) Rariso Yahwe kyarem Yusuf nadi ḇyena rai?

⁴ Fafisu Yusuf ryo bui, kyara monda moḇsa Yahwe na ifnoḇek i rai. (Kejadian 39:21; Mazmur 105:17-19) Imbude kyara kako mafafu ḇeser ḇardadi ismai ro fafisu ḇyabo anya ma ikyar Yahwe isya ryous i. (Kejadian 37:5-11) Na ḇyenadi ḇesya kwar ma ikofenḇair rosai ḇero sneri faro Yahwe I. (Mazmur 145:18) Ma Yahwe kyarem Yusuf nadi ḇyena kuker ḇyuk kakyar ḇe i rosai monda ḇekur Yusuf i nari ryous i.​—Farfyar 7:9, 10. * (Mam fasfas kasun ro sop.)

5. Rariso ”saswar-ḇaḇye ro Allah” na nafnoḇek ko rai?

⁵ Samswen rosai monda ḇekur ko, na kona ”saswar-ḇaḇye ro Allah” ḇekadaunwarek ”kakara” koḇena ma nafrur fa koknon. (Wasya Filipi 4:6, 7.) Fafisu koḇeḇirḇar ma kokara marḇak kaku, ”saswar-ḇaḇye ro Allah” na nasambraḇser ko fa kofarmyan ḇe Yahwe I pdef ma kosusu ḇa. Mkorama kofarkor ro naek srar ḇeḇeso ḇero baboine ḇesmai fafisu ḇeradine.

6, 7. Rariso nadi koḇena nafnoḇek ko fa kona swaruser ḇepyum kaḇer? Fawar farfyar oso.

⁶ Rofyor Ryan ma Juliette sufawi fararur suḇena ḇe perintis istimewa sementara namnai kwar, suḇesanekar. Ryan doḇe, ”Nuḇenadi ḇe Yahwe I faro roi ine ḇeri. Nufawi inema swaf ḇepyum kaku fa nufasnai kakyar faro I. Ro sidang koḇedi sibor sya insape saksun ro kakaku ya, inja nuḇenadi insama Yahwe ifnoḇek nu fa nufasnai farari ḇepyum ro kakyar ya faro si.”

⁷ Moḇsa Yahwe kyarem nadi suḇena rai? Ryan doḇe, ”Nuḇenadi raposa, kakara ḇesasar ma ḇaḇeḇirḇar nuḇena napromes ḇeri. Saswar-ḇaḇye ro Allah nfaduru sne ma kakara nuḇena. Nufawi nufaduru swaruser ḇepyum ido, nari Yahwe ikyar nu fa nufarmyan pdef ḇe I.”

8-10. (a) Rariso Allah rur Ḇyedi na ifnoḇek ko fafisu koḇeḇirḇar? (b) Komam monda faro fararmyan koḇena ḇe Yahwe ido, moḇsa na ifnoḇek ko rai?

 ⁸ Allah rur Ḇyedi na ifnoḇek ko fa koknon, ma fyarkin ko kako fa kosrow mnuk ro Refo ḇefnoḇek ko fa kofawi roi ḇefandun syadi ro kankenem koḇenane. (Wasya Yohanes 14:26, 27.) Kokarapan roi ḇekur Philip ma Mary, imbeswa ḇefarmyan ro Betel ro fafisu swaf fanam taun ri 25. Ro swaf paik rifyak monda, samswen nabor nkur su. Susnasu ma karyer suḇedi skomar, ma fandun fa sumamwarek Mary kmari, fyananander kukro ḇyesinan kaku kwar.

⁹ Philip doḇe, ”Yakara yafrur samswen na fa namnis kwar, mboi rarirya ḇa. Yawasya Kolose 1:11 yamam ro artikel ḇero syap Baryas faro farkarkor. Yafarmku kwar, mboi yafrur na kuker kakaku ḇaim. Inja, fandun fa ’yafarmku fa yaḇar roi ḇebor kam kuker kbaḇ ma raryaḇ’. Mnuk ine ḇyuk swarapepen ḇe aya raryaḇ ayena ndramuma ro roi ḇekur ayana ḇa, mboi ro Allah rur Ḇyedi ḇefararur ro kankenem ayena.”

¹⁰ Snar Philip ma Mary sumam monda faro fararmyan suḇena ḇe Yahwe I, inja ḇyuk barakas nabor ḇe su. Susrow snonkaku ḇemarisen ḇefarkor Refo ma sifarkor pyum kaku. Ono sisya simarisen sfarkor rarwan riḇeso ro minggu oser. Mary doḇe, ”Siso ḇefrur fa nuryaḇ ma iso nyan Yahwe ikofenḇair ḇe nu insama nuḇeḇirḇar ḇa.”

11, 12. (a) Rosai Yusuf ifrur fa ḇeyun barakas ro Yahwe I? (b) Moḇsa Yahwe ḇyebarakas Yusuf i rai?

¹¹ Fafisu kenkenem koḇena nefararwei ḇeri ido, imbude na koḇeḇirḇar rawo kokara monda samswen ḇekur ko na. Ine bisa ndarirya ro Yusuf i kako. Imbape, kyinfir fa ifrur roi ḇepyum ro fafisu ḇekur i na. Imnis raris, fyararur myaren faro Potifar, ma fyararur marḇak ro bui. Iso ḇewar fa mananir ro bui ḇyuk fararur ḇe i.​—Kejadian 39:21-23.

¹² Ras oso, skur Yusuf i fa myamwarek snonkaku risuru ḇesmai ro bui. Suma sufarmyan ro Firaun istana ḇyedi. Yusuf ifrur pyum su, inja sumkei fa sufawar rosai sumkakwarek na ma mafafu susmai ro roḇ ḇepon ya. (Kejadian 40:5-8) Yusuf ifawi ḇaḇeri awawos skoḇenane ḇarpur ya nun ḇaḇemkei ḇe i. Taun risuru mura, isae ro bui ma nya  papoik ḇeba fa ḇyepoik ro Masir. Firaun i monda ḇepoik syadi ro Yusuf i!​—Kejadian 41:1, 14-16, 39-41.

13. Koro fafisu ḇesamswen sairirya monda, rosai na kofrur ya insama kosmai barakas ro Yahwe I?

¹³ Raris Yusuf i, imbude koro fafisu jadi fa kokrenbur na ḇa. Mboi kokaḇaḇaḇ ma kosewar fa kofrur roi ḇepyum ido, Yahwe nari ḇyebarakas ko. (Mazmur 37:5) Iba syadi fyor kokarsosen ma koḇeḇirḇar ido, nari kopok ’kokmom’ ḇa, ḇaido koḇoryae ḇa. (2 Korintus 4:8) Yahwe nari ryous ko, syadi wer rofyor komyaren pdef ro fararmyan koḇena.

14-16. Rariso Filipus myam monda faro fararmyan ḇyena pdef fafisu kankenem ḇyedi nfararwei?

¹⁴ Filipus, manḇaryas ro abad randak iso farari ḇepyum ro snonkaku ḇemam monda faro fararmyan fafisu kankenem ḇyedi ḇyefararwei. Ro fafisu oso, imarisen ismai fararur ḇebabo ro Yerusalem. (Farfyar 6:1-6) Mura roi nakam nefararwei. Fafisu smun Stefanus i raposa, sewayam kaku snonkaku Kristen sya, ma sifrarbur Yerusalem. Snar Filipus imyaren pdef ro fararmyan ḇyena faro Yahwe I, inja ryaḇe mnu Samaria ma ḇyaryas ankankinem ḇeḇye snar snonkaku ḇero diansya fandun fa sakrower na.​—Matius 10:5; Farfyar 8:1, 5.

¹⁵ Filipus imarisen dakra ḇe moḇ risai Allah rur Ḇyedi fyarkin i fa ryayoḇ na. Inja, Allah ḇye Filipus i fa ḇyaryas ro moḇ snonkaku srower ankankinem ḇeḇye ya ḇaim. Snonkaku Yahudi ḇebor sya smamkyof snonkaku Samaria ma sifrur pyum si ḇa. Ḇape Filipus myamfarfir si ḇa, ma imarisen ḇyaryas ankankinem ḇeḇye ḇe si. Snonkaku Samaria ”sikam sesne oser simarisen rosai ḇyaryasna”!​—Farfyar 8:6-8.

¹⁶ Ramnai, Allah rur Ḇyedi fyarkin Filipus i fa ḇyaryas ro mnu-mnu ḇero Asdod ma Kaisarea, snonkaku Kafir sisya sibor ro dia. (Farfyar 8:39, 40) Mura Filipus kankenem ḇyedi nfararwei wer. Ḇyarek mura, fyarḇuk ma nya romawa ro diwa. Rarirya mboi, imyaren pdef ro fararmyan ḇyena, ma Yahwe  ḇyebarakas i ma kina ḇyesi ḇesya kwar.​—Farfyar 21:8, 9.

17, 18. Fafisu roi ono nafnai fa kankenem koḇena nefararwei, rariso komam monda faro fararmyan nari nafnoḇek ko rai?

¹⁷ Ḇefarmyan ro oras nakam sibor sya sikofen ḇo soḇe smam monda faro fararmyan sena naine nafnoḇek si fa sḇeaski ma sna swaruser ḇepyum fafisu kankenem sena nefararwei. Imnis raris, imbeswa ro Afrika Selatan, Osborne ma Polite, rofyor susae ro Betel, sukara na napyan fa susmai fararur ma moḇ fa suḇarek ya. Mboi Osborne doḇe, ”Kawan fa nusmai fararur raris rosai numarisen na.” Polite doḇe, ”Ro swaf paik rikyor nusmai fararur ḇaime, ma nukram pipi noḇa. Ine roi ḇesamswen kaku ḇe nu.”

¹⁸ Rosai ḇefnoḇek Osborne ma Polite ro fafisu ḇesamswen ine? Osborne doḇe, ”Nuḇaryas fnoḇek sidang, ine nafnoḇek kaku nu fa nuna swaruser ḇepyum ma numam monda faro roi ḇefandun syadi ya.” Sukain monda ro rum ḇo suḇeḇirḇar ḇa mboi sumyaren pdef ro fararmyam suḇena. Roi sufrur nane nun doryaḇ ḇeba kaku faro su! Osborne ikofen wer, ”Nusewar yaryar fararur na, ḇarpur mura nusmai fararur.”

19-21. (a) Rosai nari ḇefnoḇek ko fa kofaduru pdef swaruser ḇepyum? (b) Rariso na kosmai fainda rofyor fararwei kokara ḇa na ndarirya ro kankenem koḇena?

¹⁹ Raris kofarkor kwar, rosai monda nkur ko mboi kosewar fa kofrur roi ḇepyum ma kokyar faro Yahwe I kuker sne ḇesiper ido, na kosambraḇ fa kofaduru pdef swaruser ḇepyum. (Wasya Mikha 7:7.) Muniwara, na kofawi kaku nyan komam fararwei na nasambraḇser ḇaḇebati koḇena kuker Yahwe I. Polite fyasnaiḇair rofyor isaebur Betel, ismai farkarkor ḇepyum isoine fandun fa ikyar faro Yahwe I kuker sne ḇesiper  iba syadi wer ro fafisu ḇesamswen na. Doḇe, ”Ḇaḇebati ayena kuker Yahwe I syambraḇ syadi wer.”

²⁰ Mary, ḇeyap ḇepon anya, myamwarek kmari ḇesinan kwar ma ḇye perintis kaker. Doḇe, ”Yafarkor kwar rofyor yaḇeḇirḇar ido, fandun fa yamnai koper, yaḇenadi ma yamnaisu. Yafarkor fandun fa yarir roi nakam ro Yahwe ḇrasi, ma ine nari fyandun kaku ro rasras ḇerama ya.”

²¹ Lloyd ma Alexandra sukofenḇair fararwei ro kankenem suḇena neḇefrowesbir kakyar suḇena kuker nyan sukara na ḇa. Ḇape, sumam moḇsa roi nane nafnoḇek kaku su kwar raya. Kirine sufawi kakyar ḇesambraḇ suḇena nbuk sneprei faro su fafisu susmai samswen, ma suḇaḇir suḇe snonkaku ḇepyum syadi wer.

22. Kosewar fa kofrur roi ḇepyum syadi ro fafisu kosmai na ido, rosai na kokyar ya?

²² Ro dunya ine, kankenem koḇena na fasaw fa nefararwei ḇeri. Imbude kaksmai fararur ḇebabo ro fararmyan ḇe Yahwe, kodafduf, ḇaido fandun fa komamwarek kina koḇesya. Mboi, rosai monda ḇekur Au, wakyar Yahwe ima fyandun kaku Au ma nari ifnoḇek Au ro fafisu ḇemnis ya. (Ibrani 4:16; 1 Petrus 5:6, 7) Kirine, ipyum syadi swewar fa wafrur roi ḇepyum syadi ro fafisu Bena. Konadi ḇe Yahwe, Kma koḇedi ma kokyar kuker sne ḇesiper faro I. Rarirya ido, fararwei rosai monda kosmai na, nari kona swaruser ḇepyum ḇeramuma ro Yahwe I ḇesya kwar.