FARFYAR RO KANKENEM
Yahwe Ḇyebarakas Kaku Snemuk Ayena
Fafisuya taun 1939. Nkokḇok ro romfawru ma nkofrar kuker oto fafisu swaf oras rioser syadi ḇe Joplin, kota kasun ḇero barat daya Missouri, AS. Ro diwa, nkorir fasis syapram na ro kedwa ya ḇaḇdi ro rum na oser-oser. Nkofrur na raposa, nkosun ro oto yadori ma nkofrar wer fa nkosrow raryur ḇesena. Kirine arwo prim kwar. Mboi, rosai ḇefnai fa nkoḇaryas rofyor ori ya dek ḇaim ma nkobur fasaw ro moḇ ani? Na yafar ḇe Au.
AWIN kyapar aya ro 1934. Sinan ayesuya, Fred ma Edna Molohan, suyakḇe Siswa-Siswa Alkitab (Saksi-Saksi Yahwe) ro swaf taun ri 20 kwar. Yakofen kasumasa kaku snar sufarkor aya kwar fa yaswar Yahwe I. Nkoḇarek ro Parsons, kota kasun ḇero bar tenggara Kansas. Naek srar ḇebor ro sidang nkoḇedi siso ḇesmai ramrem sirya. Kina nkoḇedi nkoso fananjur ma ḇaḇeḇaryas ya pdef. Ro ras Sabtu arkok ya nkora ker fa nkoḇaryas ro sampak na, kirine sap na ḇe ḇaḇeḇaryas ro moḇ kawasa ḇebor. Fyorno ido nkomor, mboi nkoḇaryas ramnai na Mansar kyoḇes es krim fa nkan na.
Sidang nkoḇedi ibaḇa mboi moḇ fa nkoḇaryas ro ya iba kaku. Ro moḇ nkoḇaryas anna, kota kasun isi ma moḇ sifrur yaf ma sfaduru rofanfan sya nabore. Fyor nkoḇuk publikasi nkoḇena, ḇena yaf ansya na sḇuk kumpan ḇa mboi sḇuk wei, pnor sun babo, ḇaido mankoko sya. Mansar ḇyuk farsarser kumpan faro publikasi anna kwar, inja roḇean nane bisa nkakna ḇe nanan nkoḇena.
ḆAḆEḆARYAS ḆEBA KAKU
Sinan ayesu suna fonograf fa nkoḇukiḇaryas. Yasambraḇ fa yuni ḇa, mboi yamarisen yafnoḇek Kamam ma Awin su fa yaḇein Naek Rutherford faya ḇyeja serekam kwar anna fa nafnak ro rarama kaḇer ma farkarkor Refo.
Aya, Kamam, ma Awin nkoro ḇarpon oto ḇerok nkoḇedi
Mansar ryir speaker ḇeba oso ro oto Ford 1936 nkoḇedi boya. Inja, ifrur oto nkoḇedi ḇye oto ḇerok. Ine ipyum kaku fa nkoḇukiḇaryas. Rasras, randak ya nkoḇein sonker fa ifnak, mura nkoḇein faya Refoya wer. Ramnai, nkoḇuk publikasi ḇe snonkaku ḇemarisen sya.
Ro kota kasun Cherryvale, Kansas, Mansar dun oto ḇerok ani fa isun ḇe taman kota, snonkaku ḇemnaisu ro ras Minggu sibor ro diwa. Mura, polisi srama ma sikofen ḇe Mansar i ḇo soḇe jadi fa dun oto anya syun ro taman yadori ḇa. Mansar dun oto anya ḇe sampak ḇero taman ani ḇar ya, inja snonkaku sya srower pyum
kaker na. Yamarisen kaku yana swaf ḇeradine kuker Mansar i ma eba yedi, Jerry i.Fafisu taun-taun anya, nkofrur ḇaḇeḇaryas ḇeba kaku ro moḇ snonkaku ḇero diansya sisampampum. Raris yakofen ḇepon kwar anya, na nkokḇok ro romfawru ma nkorir fasis syapram ma brosur na ro kedwa ya ḇaḇdi ro rum sena oser-oser. Ramnai, na nkoryur ro kota anya bande ya fa nkomam polisi sya sfor ono ke roḇa.
Roi ḇese ḇefrur fa nkomarisen ro ḇaḇeḇaryas iso sap na ḇe ”barisan informasi”. Na nkombranyar kota ḇo nkun papan ḇeba ya. Yaswarepen fafisu oso, naek srar srama ḇe kota nkoḇedi ma soresyar ḇo sun papan ḇefas ”Agama Adalah Jerat dan Penipuan”. Sirandak marandan sena ro rum nkoḇedi, simbranyar kota ro swaf kilometer peser rioser raposa skaḇer ḇe rum nkoḇedi wer. Nkomarisen oso ḇedwarek si ḇa, mboi snonkaku sibor siḇe sifawi rosai ḇeḇesyanya.
MUNARA KEBAKTIAN YASO RO FAFISU YABABO KAKER
Kina nkoḇedi nkora ker ḇe Texas fa nkoso munara kebaktian. Mansar fyararur ro perusahaan kereta api, inja na nkek kereta ḇo nkoḇak ḇa fyor nkora ḇe kebaktian ma nkorakaki karyer nkoḇesya. Awin eba ḇyedi, Fred Wismar, ma swari, Eulalie, suḇarek ro Temple, Texas. Imem dakfarkor kakaku ro taun-taun ḇerandak ro 1900 fyor ḇyabo kaker, mura ḇyebaptis. Dakfawar rosai fyarkor na ḇe kasun ḇyesi, Awin i kako. Naek srar ḇero Texas smambir pyum Imem i snar duffarmyan ker ḇe hamba zona (kirine sap na ḇe pengawas wilayah). Ima ifrur pyum, iraryaḇ, ma imyaren ma ḇyuk farari ḇepyum ḇe aya.
Ro 1941, nkofrur marandan kuker kereta ḇe St. Louis, Missouri, fa nkoso kebaktian ḇeba oso. Sor romawa syakam fa skain fanam ro panggung fa srower faya ro Naek Rutherford, judul ḇyeja ”Anak-Anak Sang Raja”. Ro papupes faya ḇyedi, romawa babo se 15.000 sikam sikandor fafayaḇa. Naek Rutherford ma ḇefnoḇek i sya skoḇuk syap ḇebabo Children faro roma inai babo nko oser-oser.
Ro April 1943 nkoso Munara Kebaktian ”Seruan untuk Bertindak” ro Coffeyville, Kansas. Ro diwa, nkorower kafkofenbadir nari sidang syakam sna farkarkor ḇebabo, Sekolah Pelayanan Teokratis. Nkosmai kako syap oso ḇeser wos farkor ri 52 faro farkarkor anya. Taun oser mura, yun faya ḇerandak yedi. Yapok yaḇefnder munara kebaktian ani ḇa, snar aya fnoḇek ḇeḇeso sya, nkoḇebaptis ro sawon ḇepnunek fanam ḇe moḇ sifrur yaf na.
YAMARISEN FA YAKFARMYAN RO BETEL
Yamnai yafarkor ro SMA ro 1951 ma yun snemuk rosai imbe yafrur ro kenem yedi. Eba yedi Jerry i, dakfarmyan ro Betel kwar. Yamarisen kaku fa yakfarmyan ro Betel, inja yafarem syapram fararyor yedi. Fyoro ḇa ramnai, sor aya fa yafarmyan ro Betel ro 10 Maret 1952. Ine snemuk ḇepyum kaku ḇefnoḇek aya fa yafrur nabor syadi ro fararmyan ḇe Allah.
Yamarisen yafararur ro percetakan fa yafnoḇek yafrur majalah ma publikasi ḇesena. Mboi, sor aya fa yafararur ro dia ḇa. Imbape, sor aya fa yafasos roḇean ma ḇarpur ya yafararur ro dapur. Yamarisen faro fararur ine ma yafarkor nabore. Ro ras oser na nkofararur fadadwer, inja yana swaf fa yamnaisu ro arkok ya. Yaraker ḇe perpustakaan Betel ma yawasya syap ḇebor fa yaḇukifarkor Refo ro mankundaya. Ine syambraḇser kakyar ma ḇaḇebati yena kuker Yahwe I. Nane nafrur fa yakara kaku fa yafarmyan ḇe Yahwe ro Betel kawan syadi wer. Jerry isae ro Betel taun 1949 ma fyarḇuk kuker Patricia. Suḇarek ro Brooklyn fanam ḇe Betel, inja sufnoḇek ma susambraḇser aya fafisu yafarmyan babo ro Betel.
Fyoro ḇa fyor yasun ro Betel, naek sya sisewar ma sfasepen naek ḇefararur ro Betel fa sakḇe manfaya faro Betel. Naek ḇefasepen ansine na sor si fa sraḇe sidang-sidang isof ro sidang kawanwan ya kilometer ri 320 ro Brooklyn. Ro diwa, na sḇuk faya faro kawasa kam ma sfararur kayam fnoḇek sidang ro ḇaḇeḇaryas. Ayaino oser rofandu naek skinfir ansine. Yaradadai
mboi yarakaki ḇe sidang anya ma yun faya yedi. Fafisu ani faya faro kawasa kam sawos na ro oras rioser. Yaraker ḇe sidang kuker yek kereta api. Yaswarepen pyum kaker ras Minggu mandira oso, fafisu ḇepnunek ro 1954. Yek kereta fa yakaḇer ḇe New York ma yakara na yafyafer ro Betel ro roḇ ya. Mboi ro marandan ya, wam doḇer myun ma mekem salju nasabu. Mesin listrik ḇero kereta jadi fa imbran ḇa, ma ras Senin oras ririm arwo insape yafyafer ro New York City. Yaraḇe stasiun kereta ma yek kereta ḇefrar ro saprop diwarbaḇ ḇe Brooklyn ma yara fasaw fa yafararur ḇeri ro dapur. Yaryar kermkun ma yambrus kaku snar jadi fa yenef ro roḇ anya ḇesiper ḇa. Mboi raryaḇ yasmai snar yafarmyan ro sidang-sidang anna ma yasrow randak kuker naek srar sya nama napyum syadi ro roi nakam yafrur kwar na.Nkofasos faro siaran ro studio WBBR
Ro fafisu taun-taun randak yafararur ro Betel, yaksowarpu ro acara farkarkor Refo sawos na ro minggu nakam ro stasiun radio koḇedi, WBBR. Studio ani isya ro lante ḇesuru ro aidoram 124 Columbia Heights. Naek Alexander H. Macmillan, ḇefarmyan fyoro kwar ro Betel, daksowarpu ker ro acara radio nane. Nkor i ḇe Naek Mac. Ima farari ḇepyum faro romawa babo ro Betel nkoine snaro isoasuser pdef ro fafisu ḇesamswen na.
Nkoḇuk syapram nane fa nkoḇukifasnaiḇair WBBR
Ro 1958, sfadwer fararur yedi. Yafararur fa yafnoḇek ḇemnai ro Sekolah Gilead sya. Na yafnoḇek snon ma bin ḇeraryaḇ ansine fa sismai visa ma yafasos pyan marandan sena. Fafisuya, sifrur marandan kuker udara ḇaḇyak na nek kaku, inja ḇeraḇe Afrika ma Asia na siso sandura ḇeba ḇaido wai faduren ḇeyun robebor na. Taun ḇeḇeso ramnai, rofyor ḇaḇyak tiket udara na nek werḇa, misionaris ḇebor sek udara fa sraḇe sup sfarmyan ro na.
Yafasos ijasah ro ḇeyakso Sekolah Gilead rofyor sewisuda ḇaim
MARANDAN ḆE MUNARA KEBAKTIAN
Ro 1960, yafasos fa nkoḇak udara ro Amerika Serikat ḇe Eropa faro munara kebaktian internasional ro 1961. Yaso kebaktian oso anya ro Hamburg, Jerman. Kebaktian ya raposa, naek rikyor ro Betel ma aya, nkoḇak oto oso fa nkofrar ro Jerman ḇe Italia fa nkomam Kantor Cabang ro Roma. Ro diwa mura, nkoraḇe Prancis, nkofrarnuk ḇe Bon-bon Pyrenees, ma nkofyafer ro Spanyol. Sidwarek fararur koḇena ro Spanyol. Nkoḇuk publikasi ḇeḇeso faro naek srar ḇero Barcelona, nkofasos kwar na fa namnis hadiah. Nkomarisen kaku fa nkosrow kuker si! Mura nkofrar ḇe Amsterdam ma nkek udara fa nkokaḇer ḇe New York.
Ro 1962, skur aya fa yafasos marandan faro naek srar ri 583 imbe ḇeyakso pampam munara kebaktian internasional ro supswan ḇesiper. Ine iso Munara Kebaktian ”Kabar Kesukaan yang Kekal” taun 1963. Ḇeyakso sya nari siso kebaktian ro Eropa, Asia, ma Pasifik Selatan, mura ro Honolulu, Hawai, ma ḇepupes ya ro Pasadena, Kalifornia. Na siso tur oso kako fa smamfar Lebanon ma Yordania fa smam moḇ-moḇ ḇeḇeyap ro Refo na. Departemen nkoḇedi fyasos marandan
kuker udara ma fyasos hotel ma visa sifandun na.MIN ḆEBABO ḆEFRUR MARANDAN FNOḆEK AYA
Taun 1963 iso taun ḇefandun kaku ḇe aya snar roi oso ḇese. Ro 29 Juni, yafarḇuk kuker Lila Rogers ḇeramaker Missouri, ifarmyan ro Betel taun rikyor kwar. Swaf minggu oser mura, Lila nuyaksowarpu kuker ḇefrur marandan tur ro supswan ḇesiper sya ma nkoraḇe Yunani, Masir, ma Lebanon. Ro diwa nkoso udara ḇe Yordania. Imbape, sidwarek fararur koḇena ro diwa, ma pamarenta sya simewer sḇuk visa ḇe Saksi-Saksi Yahwe sya. Inja, nkofawi mnis ḇaim rosai nari ḇekur nkonya fyor nkorama ḇe diwa. Kwarapan kada, nkomarisen ma nkokandor kaku rofyor nkomam naek srar ḇeḇeso sores ro terminal bandara ḇekasun ani ḇoya ḇo sun papan ḇeba ḇefas: ”Rarama Ḇeḇye faro Saksi-Saksi Yahwe!” Nkoryaḇ kaku fa nkorakaki ḇe moḇ-moḇ sfas ro Refo na. Nkomam Abraham, Ishak, ma Yakub moḇ skoḇarek ya, Yesus ma manwawan ḇyansi moḇ sḇaryas ro na, ma moḇ snonkaku Kristen siryur randak ya ḇarpurya seryewen ”isof ro supswan pember” ya.—Farfyar 13:47.
Fafisu swaf taun ri 55 kwar, Lila iso min yedi ḇesouser ḇefnoḇek aya ro fararur nuḇena kam. Nuraḇe Spanyol ma Portugal rarwan riḇeso fafisu sidwarek fararur koḇena ro diwa. Nusambraḇser naek srar sya ma nuyun publikasi ḇe si ma roi ḇese sfandun na. Iba syadi wer, nuna swaf fa numamfar naek srar ḇesmai ro bui ro Cádiz, Spanyol. Yamarisen kaku bisa yun faya ḇesambraḇser si.
Fnoḇek Patricia ma Jerry Molohan ro marandan nkoḇena faro Kebaktian ”Aski ro Supswan” 1969
Ro taun 1963 ḇebo, yafasos kwar marandan faro munara kebaktian internasional ro Afrika, Amerika Tengah, ma Selatan, Australia, Eropa, Hawai, Puerto Riko, Selandia Baru, ma Timur Jauh. Lila nuso kebaktian ḇebor nuswarepen kaker na, raris ro Warsawa, Polandia taun 1989. Naek srar ḇebor ḇeramaker Rusia sakso kako munara kebaktian ḇeba ine. Ine iso kebaktian ḇerandak kaku insape siso na! Nusrow naek srar ḇesmai ro bui fyoro kwar ro Uni Soviet snar kakyar sena.
Fararur ḇese ḇeyun raryaḇ kaku ya iso yarakaki ma yasambraḇser kina ro Betel ma misionaris ḇero supswan ḇesiper. Ro fafisu nurakaki ḇe Korea Selatan, nusrow naek ri 50 ḇesmai bui ro Suwon. Sna swaruser ḇepyum ma smam muraḇe fafisu nari sakfarmyan ḇe Yahwe I kuker roi ḇedwarek ḇa. Kakyar sena nasambraḇser kaku nu!—Roma 1:11, 12.
BON ḆEPYUM NUN DORYAḆ
Yamam kwar rariso Yahwe ḇyebarakas kawasa Ḇyesi ro swaf taun ḇe taun. Rofyor yaḇebaptis ro 1943, manḇaryas sya barbor seja indokada se 100.000. Kirine sisyadi ro 8.000.000 sifarmyan ḇe Yahwe ro sup ḇeba ri 240. Fararur marḇak naek srar ḇemnai ro Sekolah Gilead sḇuk
fafnoḇek ḇeba kaku faro bon ḇepyum nane. Yaryaḇ kaku fa yafararur kayam kuker naek srar ḇeḇe misionaris ansine ma yafnoḇek si fa sraḇe sup ḇeba na suffarmyan ro ya.Yakofen kasumasa kaku snar rofyor yababo kaker, yun snemuk fa yafarmyan ḇe Yahwe I ma yafarem syapram fararyor ḇe Betel. Yahwe ḇyebarakas kaku aya ro fafisu taun-taun anane. Fararmyan ro Betel nun barakas nane monda ḇa, mboi Lila numarisen nuḇaryas fnoḇek sidang-sidang ḇero Brooklyn ro swaf taun ri 50 ma nusmai bati ḇekaku sya sibore.
Yafarmyan pdef ro Betel ma Lila isaramper aya ro ras nakam. Kirine yaḇeumur 84 kwar, mboi yamarisen kaku yasambraḇ kaker fa yafrur fararur ḇeyun fainda ma yafnoḇek faramrem surat ḇe Kantor Cabang.
Aya ma Lila ro fafisu ine
Syowi ḇeba kaku yakro Yahwe organisasi ḇepyum Ḇyedi ma yamam wos ḇero Maleakhi 3:18 nkaku, ḇekofen, ”Nari mkomam wer roi ḇesisye rofandu snonkaku ḇenapes ma ḇeḇarḇor sya, rofandu snonkaku ḇefarmyan ḇe Allah ma ḇefarmyan ḇe I ḇa sya.” Ras ḇe ras komam mboi Setan dunya ḇyedi iḇyeḇa syadi wer ma snonkaku sya sna saneraro ḇa ma siryaḇ ro kankenem sena ḇa. Mboi, iba syadi ro fafisu ḇesamswen ine, snonkaku ḇeswar ma ḇefarmyan ḇe Yahwe I sya sna marasrisen ro kenem sena, sna saneraro ḇekaku faro fafisu iyama. Kona syowi ḇeba kaku fa kokofenḇair ankankinem ḇeḇye faro ḇesesya! (Matius 24:14) Karajan Allah nari kero wer fyadwer dunya ḇeḇyeḇa ine ḇe firdaus ḇepduk kaku. Komander kaku ras ani ryama! Rarirya snonkaku ḇero supswan na siduf werḇa, sismai aski ma nari sikenem fyoro.