Sna wos oser kako fa sifrur organisasi babo sniri ḇe Liga Bangsa-Bangsa [LBB]. Soḇe organisasi ani na ”ikanowser fararur kayam ma dun ḇaḇeaski ma payamyum ro supswan ḇesiper”. Gereja ḇebor sisaramper LBB ine. Majelis Nasional ro Gereja-Gereja Kristus ḇero Amerika sikofen snar LBB inema ”fasasna polotik ro Karajan Allah ḇero supswan”. Majelis ansi sisaramper LBB kuker siwan snonkaku ḇeḇeso fa sakso ro Konferensi Perdamaian Paris. Oso ḇeyakso ya ikofen kankain anya ”iso randak ro sarisa ḇebabo ro fawar dunya”.

Sarisa ḇebabo irandak ro taun 1919, mboi ḇyefes kuker konferensi perdamaian ani ḇa. Ro taun ani Yahwe kawasa Ḇyesi sna sarisa ḇebabo ro fararur ḇaḇeḇaryas. Yahwe ifrur fa siryaḇ sḇaryas ḇe snonkaku ḇebor syadi ro sifrur ro ḇepondi. Ḇape ḇepon ya, Siswa-Siswa Alkitab fandun fa sifrur fararwe ḇeba oso.

Sap kwar ras na skinfir dewan direksi Lembaga Alkitab ma Risalah Menara Pengawal isoine ras Sabtu, 4 Januari 1919. Ḇape, Joseph F. Rutherford, ḇefarkin organisasi ro fafisu ya, fnoḇek naek rifik sismai ro bui kaker snar skursof famfnom si. Sisun si ḇe bui ḇero Atlanta, Georgia, AS. Ḇar naek sya fandun fa sun snemuk nari ḇesmai ro bui ansine sikanow kaḇer si ke sifadwer si.

Fafisu Naek Rutherford isya ro bui kaker imkakwarek moḇsa organisasi ine imbran pdef rai. Ifawi naek ono skara fandun fa skinfir oso ḇese ḇe presiden Lembaga. Iso ḇefnai fa fyas syapram ḇe naek ḇefrur rapat ansya ma kyur Evander J. Coward ḇe presiden ya. Naek Rutherford ikofen Naek Coward ima ”ḇyeaḇaḇen”, ”ifawinanem”, ma ”isoasuser faro Tuan”. Ḇape, naek ḇebor sya sna kakara ḇese. Simarisen paik riwonem wer insape sifrur pemilihan dewan direksi. Tim kuasa hukum ḇeyawoswarek naek riwar ḇesmai ro bui ansya sakmarisen roi nane.  Rofyor sawawos kuker rosai na sifrur ya, naek ḇeḇeso simasasor.

Mura ido roi oso ḇyejadi, Richard H. Barber fyar ḇo doḇe naek oso syewar kaku fa ifrur mnai masasor anya. Naek ani doḇe, ”Ayama yafawinanem ro hukum na ḇa, ḇape yafawi rosai snonkaku ḇesoasuser fandun fa sifrur ya. Allah imarisen insama kosoasuser. Yakara ido, nyan ḇepyum kofasnai soasuser koḇena faro Allah isoine kofrur pemilihan ro kirine beri ma kokinfir kaḇer Naek Rutherford ḇe presiden ya.”​—Mz. 18:25.

Ḇarpur mura, A.H. Macmillan, ḇesmai ro bui fnoḇek Rutherford, fyawar ro meserdi, Naek Rutherford iknuk ander ro sim ḇyedi ma ikofen, ”Ḇe ḇramsi muma.” Mura Rutherford ḇyuk telegram ḇe i. Macmillan myam anun ḇeknampu ani ma ifawi ḇeri rosai knam ḇyeja. Ḇesun ro dewan direksi syakam skinfir kaḇer si. Osower, skur wer Joseph Rutherford, ma William Van Amburgh fa suḇe ḇemamwarek. Inja, Naek Rutherford na ḇye presiden Lembaga pdef.

Rofyor naek riwar ansya sismai ro bui, Siswa-Siswa Alkitab ḇesoasuser sor snonkaku sya fa spanepen syapram fararyor ḇe pamarenta insama simkeibur naek ansya ro bui. Naek srar ḇebri ansine sismai snonkaku ri 700.000 syadi ḇepanepen syapram ani. Rofyor sḇuk syapram ani ḇe pamarenta ḇaim, Naek Rutherford fnoḇek naek rifik simkei kwar ro ras Rabu, 26 Maret 1919.

Fafisu imkei kwar Naek Rutherford dawos ḇe snonkaku ḇesaser i sya ḇo doḇe, ”Yakyar rosai ḇekur koinema nfasos ko faro fafisu ḇesamswen syadi wer. . . . Sasewar mkoḇenane snar imbe mkomkei naek mkoḇansi ḇesmai bui sya ḇa. Ima fandun ro fararur mkoḇena risyaḇa. . . . Sasewar mkoḇena snar imbe mkoḇuk ḇaryas Napnapes ya, ma snonkaku ḇefrur roi nane sismai kwar barakas ḇeba kaku.”

Ro fafisu semankara naek koḇansine, nasnai bos kaku Yahwe isya ifnoḇek si. Ro 14 Mei 1919, pengadilan banding ifrur wos snemuk radine: ”Ḇesmai safsof ro parkara ine . . . semankara mnis si ḇa, sna hak sena ḇa, iso ḇefnai fa roi sḇukikursof si siyer kaḇer na.” Ima wos snemuk ḇepyum kaku. Rosai ḇefnai ya? Skursof naek ansi sifrur roi ḇeḇarḇor kaku kwar. Sḇuk ampun monda ḇe si ḇaido sekaruk swaf sismai ro bui na ido, na sifawi si pdef ḇe snonkaku ḇefrur ḇarḇor. Ḇape, snar safsof sḇukikursof si siyer kaḇer na ma roi ḇese fa sḇukikursof si naisya werḇa, inja fasfas kriminal sena neḇepyos. Bon ya, Hakim Rutherford bisa dawoswarek Yahwe kawasa Ḇyesi wer ro ḇarpon Mahkamah Agung Amerika Serikat. Ifrur na rarwan riḇeḇeso fyor imkei kwar ro bui.

Naek Macmillan doḇe, ”Nkomewer nkokain monda ḇo nkofrur roinoḇa fafisu nkowaf Tuan inankow nko ḇe nanki. Nkokara fandun fa nkofrur roi oso insama nkofawi rosai Tuan imarisen kaku na.”

Ḇape, naek ḇefararur ro kantor pusat sya jadi fa sifrur beri fararur sifrur fyoro kwar ani ḇa. Rosai ḇefnai ya? Snar fafisu naek riwar ansi sismai ro bui, simkokpres plat cetak nakam sḇukifrur publikasi na. Nane nafnai fa naek sya sesanekar, ma naek ḇeḇeso skara ker fararur ḇaḇeḇaryas ya imnai kwar ke.

Snonkaku ḇemarisen ḇerower abar ḇepyum Karajan Siswa-Siswa Alkitab sḇaryasna sisya kaker ke? Infa sifawi na Naek Rutherford dun snemuk fa dawos faya oso. Sor snonkaku syakam fa srama sakrower faya ani. Naek Macmillan doḇe, ”Fyor ono srama ḇa ido, kyurfasnai fararur ḇaḇeḇaryas imnai kwar.”

Inja ro ras Minggu, 4 Mei 1919, iduf marḇak kaku rariryano Naek Rutherford dawos faya oso judul ḇyeja ”Harapan bagi Umat Manusia yang Menderita” ro Los Angeles, Kalifornia. Snonkaku indokada se 3.500 srama, ma snonkaku riutin jadi fa sisun ḇa snaro moḇ fa skain nower ḇa. Ro meserdi, snonkaku ri 1.500 sakrama wer. Naek sya insape sifawi snonkaku sya simarisen kaker!

Ramnai, naek sya sifrur roi oso ḇesaramper fararur ḇaḇeḇaryas Saksi-Saksi Yahwe sifrur isof ro kirinena.

The Watch Tower 1 Agustus 1919 ikofenḇadir snar ro randak paik September, na sifrur munara kebaktian umum ro Cedar Point, Ohio. Siswa Alkitab ḇebabo oso ḇeraker Missouri snori Clarence B. Beaty, ikofen, ”Snonkaku syakam skara fandun fa sakso ro  munara ani.” Naek srar ri 6.000 syadi srama ro munara anya. Inema nasyadi ro roi skarana. Roi ḇepyum syadi ro kebaktian ani iso snonkaku ri 200 sebaptis ro Danau Erie ḇefanam moḇ sifrur kebaktian ya.

Ro 5 September 1919, ras ḇerim ro kebaktian ani, fyor dawos faya ḇejudul ”Imbauan bagi Sesama Pekerja”, Naek Rutherford ikofenḇadir syap ḇebabo sisae randak ya isoine The Golden Age. * Syap ine ”iser abar ḇebabo ḇekur sarisa ḇefandun kaku na ma fyasnaiḇair ro Refo rosai ḇefnai fa sarisa anna naisya”.

Sor Siswa-Siswa Alkitab syakam fa sḇaryas kuker makakḇa kuker syap ḇebabo ine. Syapram ḇefasnaiḇair moḇsa sḇaryas rai, ikofen, ”Snonkaku ḇeḇuk farsamyom [ḇebaptis] fandun fa siswarepen sima sna syowi ḇeba fa sakfarmyan, ma fandun fa sḇuk pyum swaf ine ma sisewar kaku fa sḇaryas faro dunya.” Manḇaryas ḇebor sya siryaḇ fa sḇaryas! Ro paik Desember, manḇaryas sya sismai fararyor ri 50.000 ro snonkaku ḇemarisen ḇesmai ker syap The Golden Age.

Ro pupes taun 1919, Yahwe kawasa Ḇyesi seḇefasos pyum kaḇer ma siryaḇ syadi wer. Osower ido, ḇardadi ḇeḇeso ḇefandun kaku ḇekur ras-ras ḇepupes na ndarirya kwar. Imnis raris ḇardadi ro Maleakhi 3:1-4 ḇekur Allah kyukeḇ ma ifrur sren kawasa Ḇyesi, imnis kwar. Yahwe kawasa Ḇyesi simkei kwar ro ḇaḇewomen ”Babel Ḇeba”, ma Yesus ryem kwar ’manfamyan ḇeḇesyowi ma ḇefawi nananem’. * (Why. 18:2, 4; Mat. 24:45) Fafisu ya, Siswa-Siswa Alkitab sḇeḇefasos kwar fa sifrur fararur Yahwe ḇyuk ḇe sina.