1-2. (a) Kerower kafkofenḇadir rosai nari manfarkin er-er sya sikofen na? (b) Fakfuken rosai nari kawos na?

WAWASENPAN manfarkin er-er sya insape sikofen kafkofenḇadir ’aski ma payamyum’. Imbude soḇo dunya ine kyain kuker payamyum kwar. Sisewar fa sifrur snonkaku sya sikyar sima sisambraḇ fa sifrur mnai samswen ro dunya inekam. Ḇape, sisambraḇ ḇa fa sidwarek roi nari ḇeḇesya wer! Rosai ḇefnai ya? Snar imnis ḇardadi ro Refo ”fasaw kaku [farmakakok] kyur si” ma sipok sikrenbur i ḇa.​—1 Tes. 5:3.

² Fakfuken riḇeso ḇefandun kaku naisya na kawos ya: Rosai nari ḇeḇesya ro fafisu ”kandera ḇeba” ya? Ro fafisu anya, rosai Yahwe imarisen fa kofrur ya? Ma moḇsa kofasos mankunko ro kirine insama kosoasuser pdef ro fafisu kandera ḇeba ya?​—Mat. 24:21.

3. Imnis ḇekofen ro Fasasna faro Yohanes 17:5, 15-18, moḇsa Allah myunpres ”Babel Ḇeba”  ya rai?

³ Wasya Fasasna faro Yohanes 17:5, 15-18. ”Babel Ḇeba” nari ḇyeḇemkok! Imnis ḇeyap ḇepon kwar anya, er-er nari sisamḇrab ḇa fa sidwarek roi nari ḇeḇesya wer ro fafisu anya. Rosai ḇefnai ya? Snaro ”Allah ifrur sisnesna fasifrur Allah aw ḇyena”. Isoine imbe myunpres agama ḇekakuḇa nakam, ma kako agama ḇeyap si  ḇe Kristen. * Moḇsa ifrur na rai? Allah nari idif ”knapur risamfur” ro ”aiwan [ḇeyan ḇepek] ḇerik ḇesak” anya fa sifrur rosai imarisen na. ”Aiwan [ḇeyan ḇepek]” kyurfasnai ḇe Perserikatan Bangsa-Bangsa. Knapur risamfur ḇyena nkurfasnai ḇe pamarenta ḇesonemser organisasi ani kam. (Why. 17:3, 11-13; 18:8) Rofyor pamarenta syakam smunpres agama ḇekakuḇa ya, ineiso randak ro kandera ḇeba ya. Kawasa ḇero supswan ine syakam nari sikandor ma simkak fafayaḇa.

4. (a) Imbude rosai na er-er sya sikofen ḇekur roi ḇefrur si fa smun Babilon Ḇeba ya? (b) Ḇeso ro agama ḇekakuḇa sya rosai nari sifrur ya?

⁴ Kofawi ḇa rosai na er-er sya sikofen ḇekur roi ḇefrur si fa smun Babilon Ḇeba. Imbude soḇe agama ḇero dunya sifrur dunya ḇyeaski ḇa ma sakso warpu ro polotik ya. Ḇaido sikofen snar agama anna siryur nana arasai nabor syadi. (Why. 18:3, 7) Rofyor er-er sya smun agama ḇekakuḇa, ḇeso agama sine smun si ḇa, ḇesyaḇo agama nakam. Agama annakam napromes kwar ramnai, ḇeso si sya nari sifawi kaku manfarkin agama sya sifrowes si kwar ma nari sisewar fa sḇinkwanbur si.

5. Rosai Yahwe ḇyeasas kwar ḇekur kandera ḇeba ya, ma rosai ḇefnai ya?

⁵ Refo fyasnaiḇair ḇa swaf riḇeso nari farmakakok Babilon Ḇeba ḇyejadi. Ḇape roi kofawi swaf ya na kawan ḇa. (Why. 18:10, 21) Yahwe ḇyeasas nari ḇyuk fafisu kandera ḇeba ya fa ”iknampu” insama agama ḇekaku ya ma ”snonkaku kyinfir kwarsya” sisya pdef. (Mrk. 13:19, 20) Ḇape ro swaf kandera ḇeba ḇyerak isof ro mamamun Armagedon myun, rosai Yahwe imarisen fa kofrur ya?

6. Rosai wer fandun fa kofrur na rofyor kosasyarbur Babilon Ḇeba ya kwar?

⁶ Imnis kawos ro farkarkor ḇepon ya, Yahwe imarisen ḇesyom I sya sisasyarbur  Babilon Ḇeba ya. Ḇape, isof ro dia monda ḇa. Fandun fa kosewar kaku fa kosyom pdef ḇe Yahwe I. Mkorama komam nyan risuru fa kofrur na.

7. (a) Rosai fandun fa kofrur ya insama kokenem imnis kaku Yahwe marisen Ḇyena? (b) Imnis ḇefas ro Ibrani 10:24, 25, rosai ḇefnai fa koso ro fananjur ima fyandun kaku, syadi wer ro kirine?

⁷ Ḇepon ya, fandun fa kokenem imnis kaku Yahwe marisen Ḇyena. Komewer kokenem imnis nyan ḇeḇyeḇa ro dunya ine. Imnis raris, komewer kofrur fararur farḇuk, raris farḇakḇuk snon kuker snon ma bin kuker bin ḇaido nyan sikenem raya. (Mat. 19:4, 5; Rm. 1:26, 27) Ḇesuru ya, fandun fa koso fananjur ya pdef fnoḇek naek srar kobansya. Na kofrur naro moḇ risai monda, ro Balai Karajan ke, rum, ḇaido ro moḇ snonkaku sya sfawi ḇana. Rosai monda ḇeḇesya ya, na kopok koḇinkwanbur fananjur na awer. Ḇesyadi ya, fandun fa komyaren koso fananjur ya pdef snar ”kofawi mboi fyoroḇa wer nari Manseren ryama”.​—Wasya Ibrani 10:24, 25.

8. Ro fafisu kandera ḇeba ya anun rosai na koḇaryas ya?

⁸ Ro fafisu kandera ḇeba ya, na koḇaryas abar ḇeḇese. Kirine koḇaryas ankankinem ḇeḇye Karajan Allah ma kosewar kaku kofarkor snonkaku sya fa sakḇe Kristus manfamyan ḇyesi. Ḇape, nari koḇaryas anun raris mekem karui ḇemarḇak isoine anun samamyai. (Why. 16:21) Na kokofenḇair kerower Setan dunya ḇyedine nari ḇyeḇemkok. Ro fafisu ya, na kofawi mnis anun rosai ma nyan rariso koḇaryas na rai. Imbude, na koḇuk nyan ḇemnis ro ḇaḇeḇaryas raris kofrur kwar na ro fafisu swaf taun utin oser ine. Oroḇa ido, na koḇuk nyan ḇesena kako. Nyan risai monda koḇuk na, kona syowi ḇeba kaku fa kokofenḇair anun samamyai ro Yahwe I!​—Yeh. 2:3-5.

9. Fafisu kokofen anun koḇaryas ya rosai er-er sya sifrur yoḇ ko, ḇape rosai na kokyar ya?

⁹ Anun koḇaryas ya imbude nafnai er-er sya siḇe sifrur fa komnai koḇaryas isof fyoro. Inja, nari ro ḇaḇeḇaryas koḇena fandun fa kosnefer ḇe Yahwe I, imnis kofrur kwar ro kirine. Kokyar Yahwe nari ḇyuk samambraḇ ḇe ko fa kofrur marisen Ḇyena.​—Mi. 3:8.

10. Imnis ḇardadi ro Lukas 21:25-28, rofyor snonkaku sya smam roi sikyarna nḇe roi ḇekain fyoro neḇekakok moḇsa sḇerai?

¹⁰ Wasya Lukas 21:25-28. Ro fafisu kandera ḇeba ya, snonkaku sya nari sikandor kaku rofyor smam mboi roi sikyar na nḇe roi ḇekain fyoro neḇekakok. Imnis raris polotik, farḇaḇyan, ma roi ḇese ḇero dunya ine. Nari simkakwarek syadi kankenem sena, snaro sro fafisu ḇeḇyeḇa kaku ro sarisa kankenem snonkaku sya. (Zef. 1:14, 15) Ro fyor ya, Yahwe kawasa Ḇyesi koine kankenem koḇena na nsamswen syadiwer. Snar dunya ine nya koḇa na kosmai samswen nabore. Imbude na kosmai roi kofandun ro rasras naḇa.

11. (a) Rofyor agama ḇekakuḇa seḇemkok kwar, rosai ḇefnai fa snonkaku ma manfarkin dunya sya smamepen monda Saksi-Saksi Yahwe sya? (b) Rosai ḇefnai fa kopok komkak awer ro swaf kandera ḇeba ya?

¹¹ Mura ido, kawasa ro agama ḇeḇemkok kwar ansi sfafayaf snar smam mboi Saksi-Saksi Yahwe simbran pdef ro ḇaḇesamsyom sena. Nari sifasnai fafayaf sena roro media sosial na. Er-er sya ma manfarkin sedi, Setan i, nari sayin kaku ko snar agama koḇedi monda ḇesya kaker  ya. Sismai roi simarisen na ḇa isoine smunpres agama ḇero supswan ine kam. Eḇedari smamepen ko monda. Er-er sya nari seoser ma kuker samambraḇ sena ḇesiper siḇe smun Yahwe kawasa Ḇyesi. Ro fafisu ani sap siḇe Gog ro Magog. * (Yeh. 38:2, 14-16) Na komkak kero fyor kokara rosai nari ḇekur ko ro swaf kandera ḇeba, iba syadi snar kofawi nakam ḇa roi nari ḇeḇejadi ya. Ḇape kakuya, kopok komkak awer. Yahwe nari ḇyuk ḇe ko akurfasnai ḇekadaunwarek kankenem koḇena. (Mz. 34:19) Nari ’kokanaw koḇrumna’, snar kofawi kniko monda na kosma fasaspar. *

12. Rariso ’manfamyan ḇeḇesyowi ma ḇefawi nananem’ sfasos ko kwar faro roi nari ḇeḇejadi ro rasras naiwama?

¹² ’Manfamyan ḇeḇesyowi ma ḇefawi nananem’ sfasos ko kwar insama kosoasuser pdef rofyor kandera ḇeba ya. (Mat. 24:45) Sifrur na ro nyan ḇeḇeso. Nyan oser ya iso roro munara kebaktian regional 2016-2018. Munara kebaktian nanekam nafnoḇek ko fa kona rari ḇepyum kofandun na ro fafisu kofanam ḇe Yahwe ras Ḇyedi. Mkorama kawos rari ḇepyum nane.

13. Rosai fandun fa kofrur insama kosoasuser syadiwer faro Yahwe, ma rosai ḇefnai fandun fa kofrur na ro kirine beri?

¹³ Soasuser: Tema kebaktian regional 2016 iso ”Wasouser Pdef faro Yahwe I!” Kebaktian ine fyarkor ko kofanam syadi faro Yahwe ido, na kosoasuser faro I. Kebaktian ine ḇyuk swarapepen ḇe ko na kofanam pdef ḇe Yahwe kuker kofarkor myaren Refo ma koḇenadi kuker kakaku. Kofrur na ido, na kosambraḇ pdef rofyor kosmai samswen. Snar kandera ḇeba fyanam kwar, inja na kosmai samswen ḇebor ḇefrowespan soasuser koḇena faro Allah ma Karajan Ḇyedi. Snonkaku sya imbude na skoryae ker ko. (2 Ptr. 3:3, 4) Ine ryariri snar kowaira mun oso ro dunya Setan ine ḇa. Ro kirine beri, fandun fa kosoasuser syadiwer faro Yahwe insama kosoasuser pdef ro fafisu kandera ḇeba ya.

14. (a) Fararwe rosai naisya ḇekur ḇar naek nari ḇefarkin Allah kawasa Ḇyesi ro supswan? (b) Ro fafisu kandera ḇeba ya, rosai ḇefnai fandun fa kosoasuser pdef?

¹⁴ Ro fafisu kandera ḇeba ya, fararwe naisya ḇekur ḇar naek nari ḇefarkin Allah kawasa Ḇyesi ro supswan. Ine snar ro fafisu ya kako snonkaku ḇesmai ramrem syakam ḇesya kaker ro supswan ine, nari seḇeryur ro nanki fa sakso warpu ro mamamun Armagedon. (Mat. 24:31; Why. 2:26, 27) Ine kyurfasnai Raryur Naek Ḇefarkin isoine ḇesmai ramrem sya, nari sfarkin Allah kawasa Ḇyesi werḇa. Ḇape, raryur ḇeba fandun fa sfasos si pdef. Ḇar naek ḇesyus kwar rofandu domba-domba ḇese, siso nari ḇefarkin Allah kawasa Ḇyesi. Fandun fa kosoasuser faro Yahwe kuker kosonem ḇar naek ansine ma koso akurfasnai Allah ḇyuk faro si. Komarisen kosmai ḇaḇye ido, fandun fa koso mnis akurfasnai sḇuk na!

15. Rosai fandun fa kofrur insama komkuepen pdef, ma rosai ḇefnai fandun fa kofrur na ro kirine beri?

 ¹⁵ Farmkuepen: Tema kebaktian regional 2017 iso ”Wasusu Awer!” Kebaktian ine syambraḇser ko fa komkuepen pdef fafisu kosmai samswen na. Kofarkor kokyar kaku faro Yahwe ido, rosai monda ḇekur kona kosambraḇ fa komkuepen. (Rm. 12:12) Iḇye kada kopok koḇefnder awer Yesus asas ḇyedine: ”Mansei ḇemku epen isof ḇarpur ya kada nari isma aski.” (Mat. 24:13) Ine kyurfasnai fandun fa komkuepen pdef ro samswen rosai monda kosmai na. Kirine komkuepen pdef ro farawrowes kosmai na ido, nari kosambraḇ syadi fyor kandera ḇeba ya ḇyerak ḇaim.

16. Rosai na ḇefrur fa koḇebri, ma kirine rosai fandun fa kofrur insama koḇebri syadi?

¹⁶ Ḇaḇebri: Tema kebaktian regional 2018 iso ”Wamkak Awer!” Kebaktian ine ḇyuk swarapepen ḇe ko ḇaḇebri ima ryamuma ro samambraḇ ro mankunko ḇa. Imnis ra farmkuepen, na kona ḇaḇebri ḇekaku ya fyor kokyar kaku faro Yahwe. Rosai fandun fa kofrur insama kokyar syadi faro Yahwe I? Fandun fa kowasya Refo ras ḇe ras ma kokarauser moḇsa Yahwe ḇyuk fasaspar rai ḇe kawasa Ḇyesi ḇepon siwara. (Mz. 68:20; 2 Ptr. 2:9) Fafisu kandera ḇeba ya, er-er sya na siḇe smun ko. Fyor ya kofandun kaku kakyar ma ḇaḇebri ḇeba syadiwer raris ḇepon na ḇa. (Mz. 112:7, 8; Ibr. 13:6) Kirine kokyar kaku faro Yahwe ido, nari komkak ḇa fyor Gog myun ko. *

17. Rosai ḇefnai fa kopok komkak awer faro ras Armagedon ya? (Mam sonin ḇero ḇarpon.)

¹⁷ Imnis ḇeyap ro farkarkor ḇepon ya, ḇebor ro ko koḇeaḇen rofyor dunya ine syun kwar ro ras-ras ḇepupes na. Ḇape, kakna saneraro fa kofasparbur kandera ḇeba ya. Swaf ras-ras ḇepupes ine nari ḇyeḇesisen kuker mamamun ḇeba Armagedon. Mboi, kopok komkak awer. Rosai ḇefnai ya? Snar Yahwe iso na ḇemunwarek ko. (Ams. 1:33; Yeh. 38:18-20;  Za. 14:3) Fyor Yahwe ḇyuk parenta kwar, nari Yesus Kristus fyarkin Allah sordade Ḇyesi fa smamunmun. Nari Yesus myamunmun fnoḇek snonkaku Kristen ḇesmai ramrem ḇeyek ro nanki kwar sya ma malaikat ḇebor syadi. Sikame nari smun Setan, rur ḇemaḇak sya, ma sordade sesi ḇero supswan ine.​—Dan. 12:1; Why. 6:2; 17:14.

18. (a) Rosai Yahwe ḇyeasas kwar ya? (b) Rosai ḇefnai fa Fasasna faro Yohanes 7:9, 13-17 nasambraḇser kakyar Ḇedi faro fafisu iyama?

¹⁸ Yahwe ḇyeasas kwar, ”Romamun rosairirya monda sḇukimun mko na nun bon oḇaḇeri.” (Yes. 54:17) ’Raryur ḇeba’ ro Yahwe kawasa Ḇyesi ḇesoasuser sya nari ”sisasyarbur kandera ḇeba”! Mura, sfarmyan ḇe Yahwe pdef. (Wasya Fasasna faro Yohanes 7:9, 13-17.) Asas ḇefas ro Refo nane nasambraḇser ko fa kokyar ro fafisu iyama na kosmai fasaspar ya! Kofawi kaku ”Yahwe kyadaunwarek snonkaku ḇesoasuser”. (Mz. 31:23) Snonkaku ḇeswar ma ḇesandik Yahwe I syakam na simarisen snar smam Yahwe fyasren snonsnon Ḇyedi kwar.​—Yeh. 38:23.

19. Saneraro ḇepyum kaku rosai kerower nari ndarirya?

¹⁹ Kokarapan, wos ḇero 2 Timotius 3:2-5 nḇeḇair ḇe snonkaku ro dunya babo ḇemkei kwar ro Setan awyae ḇyena ido, rariso mnuk anna ndrok rai. (Mam kotak ”Snonkaku ro Dunya Babo Moḇ Sikenem Raya”.) Naek George Gangas, * ro fafisu iwara daksun kako ro Raryur Naek Ḇefarkin, ikofen, ”Nari nun marisen kaku fafisu snonkaku ḇero supswan ine kam sḇe manḇekanaek ḇesyom faro Yahwe! Kerower, nari waksmai syowi ḇeba kaku fa wakenem ro dunya babo. Nari wakenem fyoro raris Yahwe I. Nari kokenem isof fyoro-fyoro.” Inema saneraro ḇepyum kaku diri!