1. Rosai ḇefrur fa Yahwe monda isyus fa ismai samsyom ro ko?

YAHWE isyus fa kosyom monda ḇe I, snar Iso ḇefrur ko ma ḇeḇuk kankenem ḇe ko. (Why. 4:11) Koswar ma kosyom ḇe Yahwe I. Mboi kosasor ko ḇa ido, roi ḇesena bisa komam na ḇe roi ḇefandun syadi ro kankenem koḇena rawo kosyom ḇe Yahwe kuker sne ḇesiper werḇa. Fandun fa kofawi moḇsa roi nane ndrariri. Ḇape, randak ya mkorama kawos rosai knam ro kosyom monda ḇe Yahwe I.

2. Imnis Keluaran 34:14 ikofen ya, kosyom monda ḇe Yahwe I ido rosai na kofrur ya?

² Ro Refo, snonkaku ḇesyom ḇe Allah kyur ḇe snonkaku ḇeswar kaku Allah I. Kosyom monda ḇe Yahwe ido, kyurfasnai faro I derer koḇuk farsamyom ya. Komewer manseirirya kako ḇaido roi ono nefadwer Yahwe ro kosnesna.​—Wasya Keluaran 34:14.

3. Rosai monda ḇefrur kofa kosyom ḇe Yahwe I?

³ Roi ḇeknam kaku naisya nafrur fa kosyom ḇe Yahwe I. Komarisen kosyom ḇe I snar komamḇir I kwar. Komanen kaku rari ḇepyum Ḇyena. Kofawi roi imarisen na ma imarisen ḇana, ma kakḇaḇir raris I kako. Kofawi kwar Yahwe imarisen koryaḇ kofarmyan ḇe I isof fyoro. Iso ḇefnai fa kokenem imnis marisen Ḇyena. Kona syowi ḇeba snar ḇyuk swaf ḇe ko fa koḇebati kuker I. (Mz. 25:14) Roi nakam kofawi kwar ḇekur Manḇedaw koḇedine nafrur fa kofanam syadi ḇe I.

4. (a) Rosai monda Ibiris ḇyuk na fa ifrur ko fa kosyom monda ḇe Yahwe werḇa? (b) Rosai na kawos ro farkarkor inena?

 ⁴ Ibiris iso manḇepoik dunya ine. Ma ḇye dunya ine fa ifrur koso marisen baken saprop koḇena syadibur Yahwe marisen Ḇyena. (Ef. 2:1-3; 1 Yoh. 5:19) Rosai imbe ifrur ya? Ibiris imarisen ifrur ko fa kosyom monda ḇe Yahwe werḇa. Mkorama kawos nyan risuru Ibiris ḇyukifrowes ko. Ḇerandak ya, ifrur ko fa kosewar syadi nana arasai na. Ḇesuru ya, syewar fa dawninyan ko insama kokinfir hiburan ḇemnisḇa na.

5. Rosai ḇefnai fandun fa kosasor ko insama ’koḇewomen faro pipi’ awer?

⁵ Kokame na komarisen kan mnis, kosansun pyum ko, ma kona rum ḇemnis fa koḇarek roya. Ḇape, fandun fa kosasor ko insama ’koḇewomen faro pipi’ ma roi kosambraḇ kokoḇes kuker pipi na awer, imnis snonkaku ḇebor ḇero dunya ine. (2 Tim. 3:2) Yesus ifawi imbude saswar faro pipi ine nari nefrowespan manfamyan ḇyesya. Yesus doḇe, ”Snonkaku oser ipok duf farmyan tuan risuruḇa. Snar rofyor rarirya, nari dayin oso ma iswar suminya, roḇa ido ḇyeuser faro oso ḇoi suminya ḇyefandun i ḇa. Mkopok mkoḇe manfyan faro Allah ma faro papus ba.” (Mat. 6:24) Rofyor snonkaku oso isyom ḇe Yahwe mboi ḇyuk oras nabor ma samambraḇ ḇyena insa ismai nana ḇebor syadi ido, rya duffarmyan faro tuan risuru. Isyom ḇe Yahwe monda ḇa.

6. Farkarkor rosai kun ro Yesus ananun ḇyena faro sidang jemaat ḇero Laodikia ya?

⁶ Fafisu fanam ḇe taun 100 Masehi, snonkaku Kristen ḇero sidang Laodikia  sya sikofen, ”Nko ḇekayan ma nana nko ḇena namnis; nkananjar royo ḇa.” Ḇape, ro Yahwe ma Yesus mamam suḇena, sima ’sesaḇarar ma sifrur saneso, sḇaḇer, ma sparyaref’. Yesus ḇyuk ananun ḇe si snar nana sena ḇa, mboi snar siswar syadi nana sena rawo nafrur wis sena kuker Yahwe namuk. (Why. 3:14-17) Fyor komam mboi koswar faro pipi ya kwar, fandun fa kofadwer fasaw kakara koḇena. (1 Tim. 6:7, 8) Oroḇaido, kosnesna na nroro roi ḇese ma Yahwe imarisen samsyom koḇena ḇa. Yahwe imarisen insama koswar I ”kuker sne ḇesiper”. (Mrk. 12:30) Rariso pipi na nḇe roi ḇefandun syadi ro kenem koḇena rai?

7-9. Farkarkor rosai kun ro penatua ḇenir ḇe David, farfyar ḇyedi?

⁷ Komam kada David, penatua ḇeryaḇ ḇero Amerika Serikat, farfyar ḇyedi. Fyar ḇo doḇe randak iwara ima imyaren fa fyararure. Eḇedari, ismai nasan ḇepyum ro kantor ḇyedi ma sifawi i ḇe snonkaku oso ḇefararur pyum ḇero sup ani ḇeisper. David doḇe, ”Fyor ya, yakara roi nanekam nama barakas ro Yahwe nairi.” Ḇape, kaku rarirya ke?

⁸ Mura ido David ifawi fararur ḇyena na nafrur fa wis ḇyedi kuker Yahwe imuk. Doḇe, ”Fafisu yaso fananjur ma ḇaḇeḇaryas ya kako, yakara ker samswen ro moḇ yafararur roya. Sḇak aya kuker ḇaḇyak ḇekaki, ḇape fyoro mura bruri idufe, ma yasmai samswen ro farḇakḇuk ayedi.”

⁹ David ifawi kaku fandun fa myam kaḇer rosai kyara ḇe roi ḇefandun syadi ya. Ikofen, ”Yun snemuk fa yafrur mnis kankenem yedi.” David imbe ifrur  jadwal ḇebabo faro fararur ḇyedi, ma ikofenḇair na ḇe ḇena fararur anya. Rosai bon ya? Sisasyar David i ro moḇ fyararur roya! Rosai ifrur ya? Doḇe, ”Ro meser ya, yaser beri formulir fa yakḇe perintis ekstra pdef.” Insama fyamfon fandun suḇena, David swar su sufararur fa sufrur sren aidoram ḇebana. Fyoro ḇa ramnai, David dakḇe perintis biasa, mura swari dakḇe perintis fnoḇek i. Imbeswa ansuine sukinfir fararur snonkaku sya smamkyof na. Imbape, fararur suḇenane nḇe roi ḇefandun syadi ḇe su naisyaḇa. Pipi susmai na nabor ḇa kaku raris randak ya, mboi namnis faro fandun suḇena ro paik nakam. Sufakapon Yahwe marisen Ḇyena, ma suḇaḇir kaku Yahwe isya myamfaduru snonkaku ḇesewar ḇepon Allah Karajan Ḇyedi.​—Mat. 6:31-33.

10. Moḇsa na kofaduru kosnesna rai?

¹⁰ Kona pipi nabor ke nabor ḇa yo, fandun fa kofaduru kosnesna. Moḇsa kofrur na rai? Kosasor ko insa koswar syadi nana arasai na awer. Ma kopok korir awer fararur koḇena nḇe roi ḇefandun syadi ro fararmyan ḇe Yahwe I. Rariso insama wafawi mnis roi nane naisya ro Au ke roḇa? Kwarapan fakfuken riḇeḇeso nane: ’Fyor yaso fananjur ḇaido yara yaḇaryas, yakara ker fararur yena ke? Yamkakwarek ker nari pipi yena nasrow faro ras-ras naiwama ke? Pipi ma arasai na nafnai samswen ro farḇakḇuk yedi ke? Yamai ḇa fa yafrur fararur snonkaku smamkyof na insama yana oras nabor fa yafarmyan ḇe Yahwe ke?’ (1 Tim. 6:9-12) Rofyor kokarauser fakfuken nane ido, koswarepen snar Yahwe ima iswar ko ma ḇyeasas roi ine faro snonkaku ḇesyom faro I sya: ”Nari yarir aw ḇa ma nari yabur aw ḇa.” Iso ḇefnai fa Paulus fyas, ”[Mkoswar] pipi awer.”​—Ibr. 13:5, 6.

11. Rosai snonkaku oso ismai ro hiburan kyinfir ya?

¹¹ Yahwe imarisen kosmai marasrisen ro kankenem ya. Refo doḇe ”roi ḇepyum syadi faro snonkaku isoine sanan ma sinem, ma sisma marasrisen ro fararur marḇak sena”. (Pkh. 2:24) Oso ḇeyun marasrisen ḇe ko iso hiburan. Ḇape, hiburan ḇebor ḇero dunya ine nun roi ḇeḇyeḇa ḇe ko. Hiburan anna nafrur fa snonkaku sayin roi Allah dayin na ḇa, ḇesyaḇo simarisen syadi na.

12. Imnis ḇekofen ro 1 Korintus 10:21, 22, rosai ḇefnai fa kokinfir pyum hiburan na?

 ¹² Komarisen kosyom monda ḇe Yahwe ido, kopok kan ro ”[Yahwe] meja ḇyedi” ma kako ro ”ibiris meja ḇyedi” ḇa. (Wasya 1 Korintus 10:21, 22.) Snonkaku oso dan kayam kuker oso ḇese ido neḇeḇair suma suḇebati yae su. Hiburan ḇefasnai mamamun, ḇena mon, fararur farḇuk, ḇaido fararur ma marasrisen ḇeḇyeḇa na, Allah mbroḇ Ḇyesi siso ḇefasos na. Inja, kokinfir hiburan ḇeradine imnis ra kan kam kuker si. Bon ya, na nun roi ḇemun ḇe ko ma wis koḇena kuker Yahwe namuk.

13-14. Imnis ḇeyap ro Yakobus 1:14, 15, rosai ḇefnai fandun fa kosasor ko fyor kokinfir hiburan na? Fasnaiḇair pan.

¹³ Kokarapan roi ḇeḇeso ḇefrur fa hiburan imnis ra roḇean. Fafisu kane, na kokinfir rosai imbe kosun na ḇe swadon koḇena. Ḇape, fyor koren roḇean na kwar, nutrisi ḇyena nsun beri ḇe baken koḇena. Kan roḇean ḇepyum ido, baken koḇena na naprei. Ḇape, kan roḇean ḇepyum ḇa ido na kodufe. Nane nefasnai beri ḇa, mboi swaf riḇeso insape na neḇemam ya.

¹⁴ Rarirya kako, fyor kokinfir hiburan koisya kokinfir rosai imbe kosun na ro swaruser koḇena. Ḇape, mura ido hiburan kokinfir anna na nawyae nyan kakara koḇena ma kosnesna. Hiburan ḇemnis nun sneprei ko, mboi hiburan ḇemnisḇana nun roi ḇeḇyeḇa ḇe ko. (Wasya Yakobus 1:14, 15.) Hiburan ḇemnisḇa na nawyae beri ko ḇa, mboi fawawas na neḇemam bos. Iso ḇefnai fa, Refo ḇyuk swarapepen ḇe ko, ”Mkoḇor awer! Allah myam monda mankundi ḇo ḇyeḇekoryae ḇa. Snar rosai snonkakusya sker ma skekef na nari sinekna.” (Gal. 6:7, 8) Fandun fa kopampum hiburan nakam ḇefrur snonkaku simarisen faro roi Yahwe dayin na!​—Mz. 97:10.

15. Rosai roi ḇepyum Yahwe ḇyuk ḇe ko?

¹⁵ Yahwe manfamyan Ḇyesi ḇebor sya simarisen smam stasiun telefisi koḇedi ḇero Internet isoine JW Broadcasting^®. Imbesrar ḇenir ḇe Marilyn doḇe, ”JW Broadcasting nafrur fa yaḇeaski kaku. Yamam roi ḇero dorina kam snar nakam nun fainda ḇe aya. Fyor yaḇaḇir yaḇero mankundaya ḇaido fyor yaḇesanekar, yamam faya ḇaido munara Ibadah Pagi ḇeḇuk samarawraw. Ine nafrur fa yafanam syadi ḇe Yahwe ma organisasi Ḇyedi. JW Broadcasting fyadwer kaku kankenem yedi.” Wasmai fainda kwar ro roi ḇepyum Yahwe ḇyuk ḇe ko ine ke? Paik ḇe paik JW Broadcasting iser roi ḇebabo wer. Isoine vidio ma audio serekam na, ma kako doya-doya ḇesambraḇser. Nanekam napyan fa komam ḇaido korower na ro fafisu sairirya monda.

16. Rosai ḇefnai fandun fa kosasor ko ro swaf koḇuk faro hiburan na?

¹⁶ Kosasor ko monda ḇa ro kokinfir hiburan ḇemnis rosai, mboi kosasor ko kako ro swaf koḇuk faro hiburan na. Kofrur na ḇa ido, na kofnak oras koḇena fa nabro ro hiburan syadibur koḇukifarmyan Yahwe. Ḇebor sya skara samswen ḇe si fa smam mnis kawanwan ro oras sḇukimam hiburan na. Imbesrar ḇeumur taun ri 18 snori Abigail ikofen, ”Yamnai ro fararur ro ras ḇesiper raposa, na yamnaisu ḇo yamam telefisi. Mboi yasasor aya ḇa ido, yafnak oras nabor fa yakain ro ḇarpon telefisi.” Manbesrar ḇebabo snori Samuel doḇe, ”Fyorno ido, yamam  vidio ḇeknampu ḇebor syadi ḇero Internet. Randak ya yamam oser monda, yafawi ḇa mboi, yafnak oras rikyor ḇaido fyak kwar fa yamam vidio na.”

17. Rariso kosasor ko insama koḇuk oras nabor syadi awer faro hiburan na?

¹⁷ Rariso wasasor Au insama buk oras nabor syadi awer faro hiburan na? Ḇerandak ya, fandun fa wafawi swaf riḇeso buk kwar ya. Wafrur pan fasfas faro swaf minggu oser. Fasepen swaf riḇeso buk kwar fa mam telefisi, internet, ma wafnak game ro HP ḇaido tablet. Mam mboi buk oras nabor syadi faro roi anna ido, wafrur jadwal. Fasos ḇepon oras faro roi ḇefandun syadi na, insape oras ḇedawer na buk faro hiburan na. Mura, wor Yahwe ifnoḇek Au fa waso mnis jadwal wafrur kwar anya. Rarirya ido, na wasmai oras ma samambraḇ nabor syadi fa wafarkor Refo ro mankundaw, nadi ro kina, fananjur, ma rwa waḇaryas ma buk farkor snonkaku sya. Na waksmai marasrisen ḇeba syadi ro oras buk faro hiburan na snar wafawi swewar ḇepon Yahwe marisen Ḇyena kwar.

18-19. Moḇsa kofasnaiḇair koma kosyom monda ḇe Yahwe I rai?

¹⁸ Fyor Manwawan Petrus fyasḇair Setan dunya ḇyedi nari ipromes ma dunya babo nari ryama, ramnai ikofen, ”Naek srar yaswar kaku, rofafisu mkowafwaf roi ḇeḇor nane kam, iḇye syadi mkoḇesewar, insa sisma mkofarorewḇa ro Allah ḇarpon ḇyedi kuker ḇaḇeaski ro Allah.” (2 Ptr. 3:14) Kosouser anun ani ma kosewar kaku fa kokenem ma kosyom Yahwe imnis marisen Ḇyena ido, kofasnaiḇair koma kosyom monda ḇe Yahwe I.

¹⁹ Setan ma dunya ḇyedine na sisewar ker fa sifrur kofa kofandun roi ḇesena syadibur Yahwe. (Luk. 4:13) Ḇape, samswen rosai kosmai na, komewer manseirirya kako ḇaido roi ono nefadwer Yahwe ro kosnesna. Kun snemuk fa koḇuk roi Yahwe isyus fa ismai ya isoine kosyom monda ḇe I!