1. Rosai ḇefrur fa kokyar koisya kokenem ro ”ras-ras ḇepupes”?

AUMA ḇeaḇen ro taun 1914 ḇebo ido, kyurfasnai Ausya wakenem ro ’ras ḇepupes’ dunya ine. (2 Tim. 3:1) Kokame korower kwar ḇardadi Yesus ikofen ḇekur ras-ras ḇepupes na. Imnis raris, mamamun, basbiser, tatawai, dafduf, ḇaḇeḇarḇorna naba syadi, ma sewayam Yahwe kawasa Ḇyesi. (Mat. 24:3, 7-9, 12; Luk. 21:10-12) Komam kako moḇ snonkaku sikenem raya imnis raris rosai Paulus ḇyardina. (Mam kotak ”Snonkaku ro Baboine Moḇ Sikenem Raya”.) Yahwe manfamyan Ḇyesi koine, kokyar koisya kokenem ro ”ras-ras ḇepupes”.​—Mi. 4:1.

2. Fakfuken risai fandun fa kokarem na?

² Snar kobur 1914 fyoro kwar, kakuḇae na kokyar kirinema kokenem ro papupes ”ras-ras ḇepupes”. Snar papupes dunya ine fyanam kwar, fandun fa kofawi kankarem ro fakfuken risuru suine: Sarisa rosai na ḇeḇesya ro papupes ”ras-ras ḇepupes” ya? Isof ro fafisu sarisa anna nejadi, rosai Yahwe imarisen fa kofrur ya?

3. Imnis ḇardadi ḇero 1 Tesalonika 5:1-3, kafkofenḇadir rosai manfarkin dunya sikofen ya?

³ Wasya 1 Tesalonika 5:1-3. Komam kada Paulus dapḇair ’ras Yahwe’. Ro mnuk naine, ’ras Yahwe’ kyurfasnai ḇe ariswaf rofyor simkok ”Babilon Ḇeba” isoine agama ḇekakuḇa ḇero supswan inekam, isof ro ras Armagedon ya. (Why. 16:14, 16; 17:5) ”Ras” ani ḇyerak ḇaim, manfarkin dunya sya nari sikofenḇadir, ”Aski ma payamyum!” Fyorno ido, manfarkin dunya sḇuk wos ḇemnis  radirya fyor sawos ḇekur moḇsariso sifrur wis sena kuker er ḇesesya fa napyum kaḇer. * Ḇape, kafkofenḇadir ”aski ma payamyum” Refo ikofen anya nari iḇese. Rosai ḇefnai ya? Snaro fafisu sikofen kafkofenḇadir anya, snonkaku ḇebor sya nari skara manfarkin dunya ine sifrur kwar dunya ine fa kyain kuker payamyum syadi. Ḇape kaku ya, ”fasaw kaku ḇaḇeraroya kyur si” fafisu kandera ḇeba ḇyerak.​—Mat. 24:21.

4. (a) Rosai kofawi ḇaim ḇekur kafkofenḇadir ”aski ma payamyum”? (b) Rosai kofawi kwar ḇekur kafkofenḇadir anya?

⁴ Roi ono kofawi ḇekur kafkofenḇadir ”aski ma payamyum” ani. Mboi, ono wer kofawi ḇaim na. Kofawi ḇa rosai nari ḇewar fa manfarkin dunya sikofenḇadir roi anya ma moḇsa sikofenḇair na rai. Kofawiḇa kako nari kafkofenḇadir riḇeso naisya ke ḇaido oser monda. Rosairirya wer na ḇeḇesya ya, kofawi monda roi ine: Manfarkin dunya sipok sun aski faro dunya ine ḇa. Inja kokyar awer roi sikofen na. Refo ikofenḇair kwar ḇeko ḇekur kafkofenḇadir anya. Ine ḇyeḇair ’ras Yahwe’ nari ḇyerak!

5. Ro 1 Tesalonika 5:4-6, rosai fandun fa kofrur ya insa kofasos mankunko faro ’ras Yahwe’?

⁵ Wasya 1 Tesalonika 5:4-6. Paulus ikofenḇair ḇe ko rosai fandun fa kofrur ya insa kofasos mankunko faro ’ras Yahwe’. Iḇye kada ”kenef awer imnis kawasa ḇese”. Fandun fa ”koḇaḇir ma kowaren”. Imnis raris, kowaira mun oso ḇa ma kosasor ko insama kakso warpu awer fararur polotik ḇero dunya ine. Kofrur na ḇa ido, nari ’supswan ine i ḇena konya’. (Yoh. 15:19) Kofawi Karajan Allah monda na ḇeyun aski faro dunya ine.

6. Rosai komarisen kofrur faro snonkaku ḇese, ma rosai ḇefnai ya?

⁶ Komam pyum mankunko monda ḇa insama ”koḇaḇir ma kowaren”, mboi komarisen kako kofnoḇek snonkaku ḇese fa sakfawi ḇardadi ro Refo ḇekur roi nari ḇeḇesya ro dunya ine. Fandun fa koswarepen, rofyor kandera ḇeba ḇyerak snonkaku sya sna swaf werḇa fa siwaira ḇe Yahwe. Iso eḇedari, fararur ḇaḇeḇaryas ro kirine fyandun kaku! *

7. Ro baboine, rosai Yahwe imarisen fa kofrur ya?

⁷ Yahwe ras Ḇyedi ḇyerak ḇaim, swaf kermkun naisya kaker. Ro swaf anya, Yahwe imarisen komyaren pdef fa koḇaryas. Fandun fa komam mnis insa kona roi nabor fa kofrur ro Tuan fararur ḇyena. (1 Kor. 15:58) Yesus ikofen ḇepon  kwar fararur rosai na kofrur ya. Fafisu dawos ḇekur sarisa na ḇeḇesya ro ras-ras ḇepupes na, Yesus doḇe, ”Ḇape Ankankinem Ḇeḇye ya kada nari ḇyeḇe ḇaryas faro er sya kam”. (Mrk. 13:4, 8, 10; Mat. 24:14) Kwarapan: Ro fyor rwa waḇaryas, Ausya wakfrur ḇardadi ro Refo ani fa imnis!

8. Rosai ḇefasnaiḇair fararur ḇaḇeḇaryas iryewen pdef?

⁸ Rosai ḇefasnaiḇair fararur ḇaḇeḇaryas iryewen pdef? Taun ḇe taun, snonkaku ḇerower ankankinem ḇeḇyeya sibor syadiwer. Imnis raris, barbor ro manḇaryas ro supswan ḇesiper nek syadi wer. Ro taun 1914, manḇaryas sya se 5.155 ro sup ḇeba ri 43. Kirine, manḇaryas sya indokada se 8.500.000 ro sup ḇeba ri 240! Rarirya mboi, fararur koḇena namnai ḇaim. Fandun fa kokofenḇair pdef ḇe snonkaku sya snar Karajan Allah monda na ḇefrur mnai samswen sena.​—Mz. 145:11-13.

9. Rosai ḇefnai fandun fa koḇaryas pdef ankinem Karajan ya?

⁹ Fararur ḇaḇeḇaryas koḇena nari nambran pdef isof Yahwe ikofen namnai kwar. Swaf ya nabor kaker ke faro snonkaku sya fa smamḇir Allah Yahwe ma Yesus Kristus su? (Yoh. 17:3) Kofawi ḇa. Imbape, kofawi fyor kandera ḇeba ḇyerak ḇaim, manseirirya ḇena sne ḇemarisen fa ”ḇesma kankenem ḇemnaiḇa” sna swaf kaker fa srower ankinem ḇeḇye ma sakḇe Yahwe manfamyan Ḇyedi. (Farfyar 13:48) Fafisu oras na naisya kaker, moḇsa kofnoḇek si rai?

10. Rosai Yahwe ḇyuk ḇe ko kwar fa koḇukifarkor napnapes faro snonkaku sya?

¹⁰ Roro organisasi Ḇyedi, Yahwe ḇyuk ḇe ko roi ḇebor kofandun na fa koḇukifarkor napnapes faro snonkaku sya. Imnis raris, fananjur minggu fadu fyarkor ko ro minggu nakam. Fananjur ine ifnoḇek ko fa kofawi rosai na kawos ma moḇsa kofrur rarama randak ma rarama kaḇer rai. Fyarkor ko kako nyan kofarkin farkarkor Refo ya rai. Yahwe organisasi Ḇyedi fyasos kwar Roi fa Koḇukifarkor. Syap ma vidio ḇero dorina nafnoḇek ko fa . . .

• korandak awawos na,

• kofrur simarisen srower anun koḇena,

•   kofnoḇek snonkaku sya fa sifawi nabor syadi,

• koḇukfarkor napnapes ro farkarkor Refo, ma

• kor snonkaku ḇemarisen sya fa smam situs web koḇedi ma srama ro Balai Karajan.

Kakuḇae, Roi fa Koḇukifarkor koḇukna kada na nefainda kaku. * Imnis raris, fyor wawos ḇe snonkaku ḇemarisen sya raposa, na buk risalah ḇaido syap ḇe si. Inja, roi ono bisa siwasyana isof ro rwama kaḇer ḇe si. Kokame kona fakamamar fa koḇaryas kuker myaren ro paik nakam.

11. Rosai ḇefnai fa sifrur Pelajaran Alkitab Online?

¹¹ Nyan ḇese Yahwe ifnoḇek snonkaku sya fa sifawi napnapes ya isoine Pelajaran Alkitab Online ḇero jw.org^®. Rosai ḇefnai sifrur roi ine wer? Ro swaf paik iser, snonkaku syaran ma syaran ro supswan ḇesiper sisewar farkarkor Refo ro internet. Farkarkor ḇero situs web koḇedi nafnoḇek snonkaku ansi fa sakfarkor kakaku ro Refo. Osower ido, snonkaku kosrow ro ḇaḇeḇaryas sya imbude na simarisen fa sfarkor Refo kuker ko beri ḇa. Rarirya ido, na kofasnai farkarkor ro internet ine ḇe si ro wos sifawi na ḇaido kofarem link ḇyeja. *

12. Rosai monda snonkaku oso na fyarkor ro Pelajaran Alkitab Online?

¹² Pelajaran Alkitab Online naser farkarkor nane: ”Alkitab dan Pengarangnya”, ”Tokoh-Tokoh Utama dalam Alkitab”, ma ”Harapan yang Dijanjikan dalam Alkitab”. Rofyor snonkaku oso myam farkarkor nane ido, na fyarkor . . .

• Refo na ḇyuk fainda ḇe i,

• manseiso Yahwe, Yesus, ma malaikat sya,

• rosai ḇewar fa Allah ifrur snonkaku sya, ma

• rosai ḇefnai fa kandera ma ḇaḇeḇarḇor naisya

Farkarkor anna kako na nefasnaiḇair moḇsa Yahwe nari . . .

• ipyos kandera ma marmar ya,

• ḇyawes snonkaku ḇemar sya, ma

• ḇye Karajan Ḇyedi fa ḇyepoik fadwer pamarenta ḇepyumḇa ro snonkaku sya.

13. Farkarkor ro internet fyadwer farkarkor Refo kuker Saksi oso ke?

¹³ Farkarkor ro internet ani fyadwer ḇa farkarkor Refo kuker Saksi oso. Yesus ḇyuk syowi ḇeba fa kofarkor snonkaku sya fa sakḇe manfamyan. Kokyar nari snonkaku simarisen smam farkarkor ro internet ine, simarisen rosai sfarkorna, ma siḇe sifawi nabor syadi wer. Rarirya, imbude na simarisen sfarkor Refo kuker Saksi oso. Ro pupes pelajaran online iser-iser, sanun ḇe ḇewasya fa sor farkarkor Refo kuker oso ḇefnoḇek si. Ras ḇe ras organisasi ismai fararyor ri 230 ro snonkaku ḇemarisen ḇefarkor Refo ro supswan besiper! Snaro ḇepyum ya ono ḇefnoḇek si fa sfarkor Refo kada!

14. Imnis Yesus parenta ḇyena ro Matius 28:19, 20, rosai fandun fa kofrur ya, ma rosai ḇefnai ya?

¹⁴ Wasya Matius 28:19, 20. Fafisu koḇuk farkarkor Refo ya, fandun fa kosewar kaku ’kofrur snonkaku sya fa sakḇe Yesus manfamyan ḇyedi’ ma ’kofarkor si fa sifrur roi ḇeḇor kam raris  Yesus ḇyeasas kwar’. Ipyum ya kofnoḇek si fa sifawi kaku fandun fa siwaira ḇe Yahwe ma Karajan Ḇyedi. Inja, fandun fa kofnoḇek si insama sifrur roi sfarkor kwar na, sḇuk kankenem sena fa sfarmyan ḇe Yahwe, ma sḇebaptis. Sifrur rarirya ido, insape nari sfasparbur Yahwe ras Ḇyedi.​—1 Ptr. 3:21.

15. Komewer kofnak oras koḇena faro rosai, ma rosai ḇefnai ya?

¹⁵ Imnis ḇeyap kwar anya, kona swaf nabor ḇa. Dunya ine kerower na ḇyenande. Iso ḇefnai fa komewer kofnak oras koḇena fa koḇuk farkarkor Refo faro snonkaku ḇemarisen mankun ḇa fa sakḇe Yahwe manfamyan Ḇyedi. (1 Kor. 9:26) Fararur koḇenane fandun fa kofrur fasawna! Snonkaku sibor sisya kaker fandun fa srower ankinem ḇeḇye ro swaf ḇedawer ine.

16. Imnis ḇekofen ro Fasasna faro Yohanes 18:2, 4, 5, 8, rosai fandun fa kofrur ya? (Mam kako fasfas kasun.)

¹⁶ Wasya Fasasna faro Yohanes 18:2, 4, 5, 8. Mnuk-mnuk naine nakofenḇair roi ḇese Yahwe imarisen fa manfamyan Ḇyesi sifrurya. Snonkaku Kristen ḇekaku sya fandun fa smam mnis mankunsi insama sisowarpu ro Babilon Ḇeba ya ḇa. Fyor sifawi napnapes ḇaim, ḇefarkor Refo oso imbude daksun kwar ro agama ḇekakuḇa na. Dakso ro ḇaḇeari ḇaido fararur sena. Oroḇaido, ḇyuk kumpan ḇe farsarser faro agama ani. Ḇape, insama ḇefarkor Refo ani isyus fa dakḇe manḇaryas ḇebaptis ḇaim, fandun fa isasyarbur agama ḇekakuḇa nakam. Fandun fa fyas syapram ḇekofenḇair isusu kwar ro gereja ḇaido organisasi agama ḇena fasfes kuker agama ḇekakuḇa. *

17. Fararur rosai fandun fa snonkaku Kristen sikrenbur na, ma rosai ḇefnai ya?

¹⁷ Snonkaku Kristen ḇekaku fandun fa smam mnis insama fararur sena ro rasras sna fasfes kuker Babilon Ḇeba ya ḇa. (2 Kor. 6:14-17) Imnis raris, na komewer kofararur ro gereja. Osower, kofararur faro snonkaku ḇese ido, na komewer kofrur fararur nabor ro aidoram agama ḇekakuḇa sḇukiari rona. Kona bisnis ro mankunko ido, na kopok kosewar awer fa kosmai fararur ḇaido koḇe kosaramper fararur ḇefes kuker Babilon Ḇeba ya. Rosai ḇefnai fandun fa kofrur kaku roi ine?  Snaro komewer koso farkarkor ḇekaku ḇa ro Babilon Ḇeba ma sasar sena, kukro Allah myamna ḇe roi ḇesren ḇa.​—Yes. 52:11. *

18. Rariso naek koḇedi isouser faro Yahwe sasoser Ḇyena ḇekur fararur ya?

¹⁸ Ro swaf taun naiwara, penatua oso ḇefararur ḇe sukan ai ismai fararur ro kontraktor oso fa dakfararur ro rumari ḇero moḇ ḇyedi. Ifawi naek koḇanine na imewer fyararur ro rumari. Mboi, kontraktor ani iḇor famfnom mansei na ḇefrur fararur ani. Rariryano, naek ine isouser Allah parenta Ḇyena ma pyampum fararur anya. Swaf minggu ḇeramaya, koran ḇero moḇ ya fyasnaiḇair sonin ro sukan ai ḇekaf aprop ro rumari ani. Naek koḇedine ismai fararur anya ido, sonin ḇyeja iso ḇepom ro koran ya. Ine nari nafrur naek ani snonsnon ḇyedi iḇyeḇa ro ḇarpon naek srar sya! Ma nafrur fa Yahwe ḇyesneso kaku.

19-20. (a) Rosai monda kofawi kwar na? (b) Rosai wer fandun fa kofawi na?

¹⁹ Imnis ḇardadi ro Refo, sarisa ḇeba kerower nari ḇejadi ro dunya ine isoine manfarkin er-er sya na sikofenḇadir ”aski ma payamyum”. Snar Yahwe fyarkor ko kwar, inja kofawi er-er sya nari sipok sifrur kaku aski ma payamyum ro dunya ḇa. Rofyor kafkofenḇadir anna sikofenna ḇaim ma farmakakok ḇekur kanandor dunya ine ḇyejadi ḇaim, rosai fandun fa kofrur ya? Yahwe imarisen insama komyaren pdef fa koḇaryas ma kosewar fa kofnoḇek snonkaku ḇebor fa sakḇe manfamyan faro Kristus. Osower ido, koḇinkwanbur agama ḇekakuḇa nakam. Kofrur na kuker komewer kaksun ro agama ḇekaku ḇa ma koḇinkwanbur fararur ḇefes kuker Babilon Ḇeba.

²⁰ Sarisa ḇeḇeso naisya nari ḇeḇesya ro papupes ”ras-ras ḇepupes”. Sarisa sairiri? Ma rosai Yahwe imarisen fa kofrur wer? Rariso kofasos ko faro roi kerower nari ḇejadi ya? Fakfuken nane nari neḇekarem ro farkarkor ḇeuserya.