1. Rosai monda na Yahwe ifrur ya insama marisen Ḇyena ndarirya?

YAHWE na ḇye rosai monda fyandun na fa ifrur marisen Ḇyedi. Imnis raris, ḇye Mankorari, Kma ḇeḇuk sneprei, ma Manḇaryas abar ḇepyum. (Yes. 48:17; 2 Kor. 7:6; Gal. 3:8) Ḇape, Yahwe ḇye snonkaku sya kako fa ifrur marisen Ḇyedi. (Mat. 24:14; 28:19, 20; 2 Kor. 1:3, 4) Yahwe na ḇyuk fawawinanem ma samambraḇ insama koḇe rosai monda fyandunna fa ifrur marisen Ḇyena ndarirya. Ine isrow kuker knam ro snonsnon Yahwe, ma manḇefawinanem sya kako sakfawi roi ine.

2. (a) Rosai ḇefnai fa fyorno ido kokorwanan koḇefainda faro Yahwe ke roḇa? (b) Rosai na kowos ro farkarkor ineni?

² Kokame na komarisen insama koḇeḇefainda faro Yahwe. Ḇape, ono sisya sikorwanan sḇefainda faro Yahwe ke roḇa. Rosai ḇefnai ya? Snar skara jadi fa sifrur nabor werḇa kukro sesinan kwar, samswen sismai ro kankenem sena ḇaido samambraḇ sena nabor werḇa. Osower ido, ḇeḇeso sya skara sifrur roi nabor kwar ro fararmyan sena, ma skara roi sifrur kwar anna nasrow kwar. Ro farkarkor ine, na kawos moḇsa Yahwe ḇyuk rosai monda kofandun na fa kofrur marisen Ḇyena. Ramnai, nari kofarkor ro farfyar riḇeso ḇero Refo ḇekur Yahwe manfamyan ma binfamyan Ḇyesi. Yahwe ḇyuk samambrab ma marisen ḇe si fa sifararure. Pupes ya nari kawos moḇsa na koḇuk mankunko insama Yahwe ḇye ko fa kofrur marisen Ḇyena.

3. Imnis ḇeḇeyap ro Filipi 2:13, rariso Yahwe ḇyuk marisen fa kofararure?

³ Wasya Filipi 2:13 [NW]. * Yahwe ḇyuk ḇe ko marisen fa kofararure. Moḇsa ifrur na rai? Imbude kofawi ro sidang ono sisya sfandun fafnoḇek ḇaido roi oso fandun fa kofrur ya. Ḇaido penatua oso iwasya syapram ḇeramaker kantor cabang ḇeḇair ḇeko moḇ oso fyandun fafnoḇek. Rofyor korower roi ine kwar, imbude kofuken mankun ko, ’Fafnoḇek rosai bisa yaḇuk na?’ Ḇaido imbude sor ko fa kofrur fararur ḇesamswen ma kokara kosambraḇ fa kofrur na ke roḇa. Ḇaido fafisu kowasya mnuk oso ro Refo raposa na kofuken mankunko, ’Rariso yaso mnis mnuk ine fa yafnoḇek snonkaku ḇesesya rai?’ Yahwe ipok idif ko ḇa fa kofrur rosai riryakam. Ḇape, fafisu Yahwe myam koisya kokara rosai imbe kofrur na ido, na ḇyuk marasrisen fa kofrur kaku rosai kokara anna.

4. Rariso Yahwe ḇyuk samambraḇ fa kofararure?

⁴ Yahwe ḇyuk kako samambraḇ fa kofararure. (Yes. 40:29) Ifrur na kuker ḇyuk rur ḇesren Ḇyedi ifnoḇek ko fa kokir syadi. (Kel. 35:30-35) Roro organisasi Ḇyedi, Yahwe fyarkor ko nyan moḇsa kofrur fararur ono ndraya. Kofawi ḇaim nyan kofrur fararur oso ido, kor farfnoḇek ro snonkaku ḇese. Osower ido, komkak awer fa kor samambraḇ ḇeba syadi ro Kma koḇedi ḇero nanki. (2 Kor. 4:7; Luk. 11:13) Refo iser farfyar ḇebor ro snon ma bin, Yahwe ifnoḇek si kwar kuker ḇyuk marisen ma samambraḇ fa sifararure. Fyor kawos farfyar sena, kwarapan moḇsa Yahwe ḇye Au fa wafrur fararur ḇemnis kuker rosai sifrur na.

5. Rosai kofarkor ḇekur rariso ma fafisu risai Yahwe ḇye Moses i fa imkei er Israel sya?

⁵ Yahwe ḇye Moses i fa imkei er Israel sya. Ḇape, fafisu risai Yahwe ḇyuk fararur ani fa duf ya? Rofyor Moses kyara isyus kwar snar ”ḇyeḇefarkor kuker fawawi ḇeḇor ro kawasa Masir” ke? (Farfyar 7:22-25) Oroḇa. Yahwe ḇyuk fararur ani ḇe Moses i rofyor fyarkor i kwar fa nya sneḇerun ma sne ḇemayar. (Farfyar 7:30, 34-36) Yahwe ḇyuk ḇaḇebri ḇe Moses fa dawos ḇe manḇepoik ḇekaki syadi ro sup Masir. (Kel. 9:13-19) Rosai kofarkor ḇekur rariso ma fafisu risai Yahwe ḇye Moses i fa ifrur marisen Ḇyedi? Snonkaku ḇefasnai rari ḇepyum Ḇyena ma ḇekyar kaku faro samambraḇ Ḇyedi, si monda Yahwe ḇye si fa suf fararur ono.​—Flp. 4:13.

6. Rosai kofarkor ro nyan Yahwe ḇye Barzilai fa ifnoḇek Raja Daud i?

⁶ Taun riutin mura ido, Yahwe ḇye Barzilai fa fyasos pyan rosai Raja Daud fyandun na. Ras oso, Daud ma ḇefnoḇek i sya sibiser, simbrus ma simbrower, fyor sifrarbur Daud romawa ḇyedi Absalom i. Barzilai ḇemansar kwar anya ma snonkaku ḇeḇeso simarisen simarwarek Daud ma ḇeso i sya. Barzilai dakkara ḇa ima ḇyemansar kwar inja ḇyeḇefandun faro Yahwe werḇa. Imbape, kuker snemura ḇyuk rosai monda ismai na fa ifnoḇek Allah manfamyan Ḇyesi ḇefandun fafnoḇek sya. (2 Sam. 17:27-29) Rosai farkarkor ya ḇeko? Kobabo ḇaido  koḇesinan kwar ke, Yahwe na ḇye kofa kofnoḇek naek srar ḇefandun fafnoḇek sya, ḇero moḇ koḇedi roḇaido sup bondi na. (Ams. 3:27, 28; 19:17) Imbude jadi fa kofnoḇek si beri ḇa, mboi bisa koḇuk farser kumpan faro fararur ro supswan ḇesiper. Kofrur na ido, na naek srar ḇero supswan ḇesiper sismai roi sfandun na.​—2 Kor. 8:14, 15; 9:11.

7. Fakamaman rosai Yahwe ḇyuk ḇe Simeon i, ma moḇsa farfyar ḇyena nasambraḇser ko rai?

⁷ Simeon ḇyarek ro Yerusalem, ima ḇyemansar kwar mboi isoasuser pdef. Yahwe ḇyeasas nari myam Mesias insape imar. Asas ine syambraḇser kaku Simeon i snar iwaf Mesias ro swaf fyoro kwar. Yahwe ḇyebarakas kakyar ma kaḇaḇaḇ ḇyedi. Ras oso, ’rur ḇesrenya ḇyedifer i’ fa ryama ḇe bait. Ro diwa, myam Yesus ḇeḇekapira kaker. Mura, Yahwe ḇye Simeon i fa ikofenḇair ḇardadi ḇekur romawa ani, iso nari ḇye Kristus. (Luk. 2:25-35) Rya Simeon imar fyor Yesus irandak fararmyan ḇyena ḇaime, mboi ḇyesyowi fakamaman ḇeba ismai ya. Ma ro fafisu iyama, nari ismai barakas nabor syadi! Ro dunya babo, snon ḇesoasuser anine nari myam ro mankundi moḇsa Kristus ḇaḇepapoik ḇyedi ḇyuk barakas faro snonkaku syakam ḇero supswan. (Kej. 22:18) Kakḇesyowi kako snar Yahwe ḇyuk fakamaman ḇebor ro fararmyan koḇena ḇe I.

8. Moḇsa Yahwe ḇye kofa koḇuk sneprei ḇe ḇesesya raris Barnabas i?

⁸ Ro abad randak Masehi, snon oso ḇena snemura ḇenir ḇe Yusuf, Yahwe ḇye i fa ifrur marisen Ḇyedi. (Farfyar 4:36, 37) Rya Yusuf imarisen ḇyuk wos sneprei faro ḇesesya, inja manwawan sya sor i ḇe Barnabas, knam ya iso ”Romawa Sneprei”. Imnis raris, fyor Saul dakḇe Kristen raposa, naek srar ḇebor sya simkak fa sfanam yoḇ i snar randak iwara ḇyewayam snonkaku Kristen sya. Ḇape, Barnabas imarisen ḇyuk sneprei ma ifnoḇek Saul i. Na Saul ḇyesyowi kaku faro Barnabas sneḇenaḇye ḇyedi. (Farfyar 9:21, 26-28) Ḇarpur ya, penatua ḇero Yerusalem sya skara fandun fa sisambraḇser naek srar ro Antiokhia ḇero Siria. Mansei siwan ya? Barnabas! Skinfir sasar i ḇa snar Refo doḇe Barnabas ”ḇyuk swarepen farosi insa skain nadworen faro Manseren”. (Farfyar 11:22-24) Baboine kako, Yahwe ḇye kofa koḇuk sneprei faro naek srar koḇesi. Imnis raris, ḇye kofa koḇuk sneprei faro ḇefafardun sya snar snonkaku siswar sya srobur si. Ḇaido, fyor ono sisya siduf ke sesanekar ke, Yahwe na idif kofa kora komamfar si ḇaido koḇetelfon si. Wamarisen Yahwe ḇye Au fa ḇuk sneprei ḇe ḇesesya raris Barnabas i ke?​—1 Tes. 5:14.

9. Rosai kofarkor ro nyan Yahwe ifnoḇek manbesrar ḇebabo oso ḇenir ḇe Vasily fa ḇye manfarandows ḇepyum ro sidang?

⁹ Yahwe ifnoḇek manbesrar oso ḇenir ḇe Vasily fa fyarmyan ḇe manfarandows ḇepyum ro sidang. Fafisu sikanow Vasily fa fyarmyan ḇe penatua ḇyeumur taun ri 26, kyara isyus ḇa fa ifnoḇek naek srar ro sidang, syadiwer ḇesmai samswen sya. Ḇape, ismai farkarkor ḇepyum ro penatua ḇefarmyan fyoro kwar sya ma farkarkor Sekolah Pelayanan Kerajaan. Vasily syewar kaku fa ḇye penatua ḇepyum syadi. Imnis raris, ifrur daftar roi kasun imbe ifrur na. Fyor ifrur kwar roi oser, ḇyebirbar werḇa. Kirine ikofen, ”Roi ḇefrur fa yaḇebirbar ro randak iwara kirine nafrur fa yaryaḇ kaku. Fafisu Yahwe ifnoḇek aya fa yasrow mnuk ḇesambraḇser  naek ḇaido srar oso ido, yamarisen kaku.” Naek mkoya, rofyor mkoḇuk kenem mkoḇena fa mkofrur Yahwe marisen Ḇyena raris Vasily ido, Yahwe nari ḇyuk samambraḇ ḇe mko fa mkuf fakamamar ḇeba syadi ro sidang.

10. Rosai Abigail ifrur na, ma farkarkor rosai kun ro i?

¹⁰ Ras oso, Raja Saul iyawuser Daud ma ḇeso i sya, inja sifandun fafnoḇek. Ḇeso Daud ansine sor roḇean kermkun ro snon Israel ḇenana oso snori Nabal. Simkak ḇa fa sor roḇean ro Nabal i snar smamwarek kwar rofanfan ḇyesi ro maper abrisna. Ḇape, snar fyandun mankundi, Nabal imewer ḇyuk roḇean ḇe si. Inja, Daud imsor fafayaḇa ma imbe myun Nabal fnoḇek snon syakam ḇero kina ḇyesi. (1 Sam. 25:3-13, 22) Nabal bin ḇyuk ya snori Abigail. Ima idoser kaku ma ifawawinanem. Kuker bri rya ḇe Daud i, kyainwepur ro barpon ḇyeja ma dor kaku Daud i fa myunsu Nabal i awer insama ḇye nyaki rik ḇa. Abigail dawos myaren asuser ḇe Daud ḇo ikofen ikyar faro Yahwe fafnoḇek Ḇyedi. Kenem ma wos ḇefasnai sne ḇerun nane nsun kaku ro Daud sneri. Ifawi kaku Yahwe iso ḇewan Abigail i. (1 Sam. 25:23-28, 32-34) Abigail nya rari-rari ḇefrur i fa ḇyeḇefainda faro Yahwe. Rarirya kako, imḇesrar Kristen ḇefawawinanem ma ḇefawi dawos kuker myaren asuser na Yahwe ḇye si fa sisambraḇser kina sesya ma snonkaku ḇese ro sidang.​—Ams. 24:3; Tit. 2:3-5.

11. Rosai Syalum inai ḇyansi sifrur ya, ma mansei ḇeso nyan sena ro baboinena?

¹¹ Swaf abad-abad ḇenande mura, Yahwe ḇye Syalum inai ḇyesi fa sakfrurmnis ayar karui ḇero Yerusalem. (Neh. 2:20; 3:12) Kma sedi ima manḇepoik dirya, rariryano Syalum inai ḇyansine simarisen sifrur fararur ḇemarbak ma bisa nun roi ḇemun ḇe si. (Neh. 4:15-18) Sima siḇesebur snon ḇena nasan ḇeraker Tekoa sya snar ”simewer sirun mankunsi” fa suf fararur anya! (Neh. 3:5) Syalum inai ḇyansine na simarisen kaku fyor ḇaḇawes ayar karui anna namnai ro swaf ras ri 52 monda! (Neh. 6:15) Ro baboine, imbesrar ḇebor sya sḇuk kankenem sena fa sifrur fararur ḇesren oso ḇese faro Yahwe I. Imnis raris, ono sisya siso ro fararur ḇaḇawes ma fadaduru moḇ fa sḇukisyom Yahwe rona. Fararur anna nambran kuker payamyum snar fafnoḇek ro imbesrar ḇekir, ḇeryaḇ, ma ḇesoasuser ansine.

12. Raris Tabita i rariso Yahwe ḇye ko fa kofrur marisen Ḇyedi kako?

¹² Yahwe idif Tabita fa ifrur ’roi ḇeḇye nabor ma ḇyuk farsarser’, ḇesyadiya faro kabom sya. (Farfyar 9:36) Snar fyasnai snemura ma sneḇenaḇye, fafisu Tabita ryoe snonkaku sya sesnesno kaku. Mboi mura, Manwawan Petrus ḇyawes i fa ikenem kaḇer. Snonkaku ansi simarisen fafayaḇa. (Farfyar 9:39-41) Farkarkor rosai kun ro Tabita i? Koḇe sinan kwar ke kobabo kaker ke, snon ḇaido bin, kokame bisa kofrur roi oso fa kofnoḇek naek srar koḇansya.​—Ibr. 13:16.

13. Rariso Yahwe ḇye imbesrar ḇemamyai oso fa ifrur marisen Ḇyena, ma rosai ikofen ya?

¹³ Imbesrar oso ḇenir ḇe Ruth ima imamyai mboi imarisen dakḇe misionaris. Fyor ibaḇa kaker, iryaḇ fa irwas syapmkun ro rum ḇe rum. Ikofen imarisen kaku fararur anya. Ḇape, samswen kaku ḇe i fa dawos ro ḇarpon kedwa  ma ikofenḇair ḇe snonkaku ḇese ḇekur Karajan Allah. Imamyai raryano, daksun ro fararur perintis biasa fafisu ḇyeumur taun ri 18. Ro 1946, Ruth dakso ro Farfarkor Sekolah Gilead Menara Pengawal ma ḇarpur mura fyarmyan ro Hawaii ma Jepang. Yahwe ḇye i fa ḇyaryas ankankinem ḇeḇye faro snonkaku ḇebor ro sup ḇeba ansuya. Ifarmyan indokada swaf taun 80 raposa, Ruth doḇe, ”Yahwe syambraḇser aya ḇesya kwar. Ifnoḇek aya fa yamamyai wer ḇa. Yakyar kaku Yahwe na ḇye mansei monda ḇekyar faro I sya fa sifrur marisen Ḇyena.”

14. Imnis ḇeḇefas ro Kolose 1:29, rosai fandun fa kofrur ya insama Yahwe ḇye ko fa kofrur marisen Ḇyedi?

¹⁴ Ro marandan sarisa snonkaku, Yahwe ḇye manfamyan Ḇyesya ro nyan ḇebor fa sifrur marisen Ḇyedi. Au ido na rariso? Ine ndramuma ro mankundaw, wamarisen wafararur marḇak ke roḇa. (Wasya Kolose 1:29.) Fyor wamarisen buk kenem Bena ido, nari Yahwe ifnoḇek Au fa wakḇe manḇaryas ḇeraryaḇ, guru ḇekir ro buk farkarkor, min Kristen ḇebuk sneprei, ḇekir ro fararur bedi, ḇebati ḇepyum, ḇaido rosai monda fyandun na fa ifrur marisen Ḇyena fa ndarirya.

15. Imnis ḇeḇekofen ro 1 Timotius 4:12, 15, naek ḇebabo sya fandun fa sor fafnoḇek rosai ro Yahwe?

¹⁵ Naek ḇebabo insape ḇeba muryas mkoya, rariso kuker mko? Kirine, sidang Kristen fyandun snon ḇeraryaḇ sya fa sfarmyan ḇe hamba pelayanan. Ro sidang ḇebor na, penatua sya sibor syadi ro hamba pelayanan sya. Naek ḇebabo mkoya na mkomarisen mkofrur nabor syadi ro sidang ke? Fyorno ido, manbesrar ono sisya soḇe, ”Yakara yafarmyan ḇe penyiar biasa monda ima imnis kwar.” Naiso roi wakḇaḇir na ido, wor Yahwe ifnoḇek Au insama nwa marasrisen fa wakfarmyan ḇe hamba pelayanan ma ḇyuk samambraḇ ḇe Au fa wafrur nabor syadi ro fararmyan ḇe I. (Pkh. 12:1) Nkofandun fafnoḇek Bedi!​—Wasya 1 Timotius 4:12, 15.

16. Rosai fandun fa kor ro Yahwe I, ma rosai ḇefnai ya?

¹⁶ Yahwe bisa ifrur Au fa ḇe rosai monda fyandun na fa ifrur marisen Ḇyena fa ndarirya. Inja, wor Yahwe fa ḇyuk marisen ḇe Au fa wafrur fararur Ḇyena. Ramnai wor samambraḇ wafandun na. Wababo kaker ke ḇe sinan kwar ke, buk oras, samambraḇ ma roiebor Bena fa ḇukisyom Yahwe ro kirine. (Pkh. 9:10) Mam monda awer makakwarek Bena ḇaido ḇaḇir wasambraḇ ḇa nafrur fa rwir swaf ḇepyum fa buk roi ḇepyum faro Yahwe I. Inema syowi ḇeba nairi!