1. Rariso wos ḇero 2 Korintus 3:1-3 nafnoḇek ko fa kokofen kasumasa faro syowi ḇeba koḇena fa kofarkor Refo ḇe snonggaku oso isof dakḇebaptis? (Mam sonin ḇero ḇarpon.)

MOḆSA ḇaḇir rai fyor mam ḇefarkor Refo oso ro sidang Bedi dakḇebaptis? Na wamarisen kaku ḇae. (Mat. 28:19) Ma Au iso ḇebuk farkarkor Refo ḇe i ido, na wamarisen syadi fyor mam dakḇebaptis! (1 Tes. 2:19, 20) Snonggaku ḇebaptis babo ansi simnis ra roi Refo dap ḇe syapram rekomendasi faro snonggaku ḇebuk farkarkor Refo ḇe si monda ḇa, mboi naek srar ro sidang syakam kako.​—Wasya 2 Korintus 3:1-3.

2. (a) Fakfuken ḇefandun rosai nari kawos na, ma rosai ḇefnai ya? (b) Farkarkor Refo ido rosairirya? (Mam fasfas kasun.)

² Taun rifyak ḇarpur ine, komarisen kaku kukro komam ro paik ḇe paik ro supswan ine ḇesiper, manbaryas sya sifrur farkarkor Refo * nasyadi ro 10.000.000. Ma ro swaf taun anya, snonggaku sisyadi ro 280.000 sakḇebaptis. Moḇsa kofnoḇek snonggaku ḇebor ḇefarkor Refo kaker sya fa sakḇebaptis? Yahwe ikḇaḇ kaker fa byuk swaf ḇe si fa sakḇe manfamyan faro Yesus i. Inja kosewar fa kofnoḇek si insama sisur pdef ro rur ma sakḇebaptis. Oras ya nabor wer ḇa!​—1 Kor. 7:29a; 1 Ptr. 4:7.

3. Ro farkarkor ine, rosai nari kawos ḇekur kofarkin farkarkor Refo ya?

³ Kirine fandun fa kofarkor snonggaku sya fa sḇe manfamyan. Inja, Raryur Naek Ḇefarkin sor kantor cabang  sisewar fa sifawi moḇsa kofnoḇek ḇefarkor Refo sibor syadi fa sisur ro rur ya isof sakḇebaptis. Ro farkarkor ine ma farkarkor ḇerama ya, nari komam rosai kofarkor ro perintis, misionaris, ma pengawas wilayah sya. * (Ams. 11:14; 15:22) Sikofenḇair rosai fandun fa ḇebuk farkarkor ma ḇefarkor Refo sufrur insama farkarkor Refo nambran kuker payamyum ma nbuk bon ḇepyum. Ro farkarkor ine, nari kawos ḇefarkor Refo fandun fa sifrur roi ririm insama sisur pdef isof sebaptis.

4. Farkarkor ro ḇarpon kedwa ima nyan ḇepyum fa kobukifnoḇek ḇefarkor Refo sya isof sebaptis ke?

⁴ Naek ma srar ḇebor sya sbuk farkarkor Refo ro ḇarpon kedwa. Ine nyan ḇerandak fa kofnoḇek ḇerower sya insama simarisen pdef fa kawos wos Refo ya. Imbape, awawos ḇeradinema kawan ḇa ma samswen fa kofrur na ro minggu nakam. Naek srar ono sor nomor telfon sena mura setelfon ḇaido se-sms mnuk oso ḇaido anun ḇeknam ro Refo insama simarisen sfarkor pdef. Awawos ḇeknampu ḇeradirya imbude nambran paik riḇeḇeso, mboi sfarkor mnis Refo ḇaim. Mboi, ḇefarkor Refo oso iso nyan ḇeradine monda fa fyarkor Refo ido, nari isur pdef isof ḇyebaptis ke? Na oroḇa.

5. Rosai Yesus ikofen ro Lukas 14:27-33 na kobukifnoḇek ḇefarkor Refo kuker konsya?

⁵ Yesus fyar fawar oso fa byukifasnai rosai snonggaku oso na ifrur kaku insama dakḇe manfamyan faro i. Dawos ḇekur snonggaku oso imbe ḇyawes menara ma raja imbe ḇera ḇe mamamun. Yesus doḇe snon imbe ḇefrur ḇaḇawes ani fandun fa ”dawof fasasos kumpan” insama ifrur ḇaḇawes ani fa ibro. Raja ani kako fandun fa ”kyain fa kyara ḇepon resari” ma dor wos ananun fa ifawi sordade ḇyesi sisambraḇ fa smamunmun isof papupes ke roḇa. (Wasya Lukas 14:27-33.) Rarirya kako, Yesus ifawi snonggaku oso dakḇe manfamyan faro i ido, ipyum fa myam mnis kaku rosai ifrur kaku na insama bisa iso i. Iso ḇefnai fa na kokofen ḇe ḇefarkor Refo kuker konsya fa sfarkor ro minggu nakam. Moḇsa kofrur na rai?

6. Rosai kosewar fa kofrur kaku insama farkarkor ya imbran pdef?

⁶ Ḇepon ya kofrur farkarkor Refo ro ḇarpon kedwa fa nakwan syadi wer. Fyor  korama kaḇer, bisa kawos mnuk oser awer mboi suru. Ḇena rum ya imarisen wawos ro swaf kawan syadi ido, wafuken i fa imarisen ido mukain ro moḇ oso ma muyawos pdef. Moḇ kyarem raya nfasnaiḇair myam farkarkor Refo fyandun kaku ke roḇa. Insama kofnoḇek i fa isur fasaw ro rur ya, na kofuken i imbude imarisen fyarkor Refo rarwan risuru ro swaf minggu oser. Imbape, roi ono fandun fa ifrur wer.

7. Rariso ḇebuk farkarkor fyasos pyum farkarkor na oser-oser?

⁷ Ḇebuk farkarkor koine, fandun fa kofasos pyum ḇepon faro farkarkor na oser-oser. Kowasya ḇepon ma komam mnuk-mnuk ḇeknam ro farkarkor koḇena. Kosewar fa kofawi pyum knam ro farkarkor na. Kokara judul farkarkor ani, judul kasun na, fakfuken na, mnuk siwan fa kowasya, sonin ḇyena, ma vidio na ḇefnoḇek ko fa kofasnai pyum farkarkor oso. Ramnai kokara pyum moḇsa na kobuk farkarkor kuker nyan ḇepyandam insama bisa ifawi pyum na ma ifrur na ro kenem ḇyena.​—Neh. 8:8; Ams. 15:28a.

8. Rariso Manwawan Paulus wos ḇyena ro Kolose 1:9, 10 nfarkor ko fa konadiwarek ḇefarkor Refo kuker konsya?

⁸ Fafisu kofrur fasasos, konadiwarek ḇefarkor Refo ani ma fandun ḇyena. Kor fa Yahwe ifnoḇek ko insama kobuk farkarkor Refo kuker nyan ḇepyum insama nsun ro sneri. (Wasya Kolose 1:9, 10.) Kosewar fa kokara ḇepon rosai nari samswen fa ifawi na ḇaido ikyar na. Koswarepen ker roi imbe kofrur ya iso komarisen kofnoḇek i isof ḇyebaptis.

9. Rariso ḇebuk farkarkor ifnoḇek ḇefarkor Refo fa ifrur fasasos? Fasnaiḇair.

⁹ Kokyar farkarkor koḇena nambran pyum ido, nari ḇefarkor Refo kuker konsya sesyowi rosai Yahwe ma Yesus sufrur kwar na ma simarisen sifawi nabor syadi wer. (Mat. 5:3, 6) Insama ḇefarkor ani ismai fainda nabor syadi, fandun fa byuk swaruser ḇyena kam faro rosai fyarkor na. Inja, na kokofenḇair ḇe i fandun kaku fa ifrur fasasos faro farkarkor na oser-oser. Nari iwasya ḇepon na ma kyarauser moḇsa ifrur na ro kenem ḇyena rai. Rariso kofnoḇek i fa ifrur fasasos rai? Kofrur fasasos kayam kuker i ma  kofasnai nyan ifrur fasasos raya. * Kofasnai moḇsa ismai kankarem faro fakfuken ḇero farkarkor anya, ma kofasnai moḇsa isrik wos ḇeknam nari ḇefnoḇek i fa iswarepen kankarem ḇyena. Ramnai kor i fa byuk kankarem kuker wos manggun ḇyena. Ifrur na ido, insape na kofawi ifawi pyum farkarkor anna ke roḇaime. Imbape, na kor ḇefarkor ani fa ifrur roi ono wer.

10. Rosai ḇefnai fa ḇefarkor Refo fandun fa iwasya Refo ras ḇe ras, ma rariso na ismai fainda nabor syadi ro ḇaḇewasya anya?

¹⁰ Ḇefarkor ya na fyarkor ro minggu nakam monda ḇa. Imbape, na ismai fainda fafisu ifrur roi ḇeḇeso ro manggundi, isoine fandun fa ḇyenadi ḇe Yahwe I. Moḇsa ifrur na rai? Manggundi ryower ma dawos faro Yahwe I ro nadi. Ryower Yahwe I kuker iwasya Refo ras ḇe ras. (Yos. 1:8; Mz. 1:1-3) Kofasnai ḇe i rariso iso ”Jadwal Ḇaḇewasya Refo” ḇero jw.org. * Kakuḇae, imbe kofnoḇek i fa ismai fainda nabor ro ḇaḇewasya Refo ido, kanun ḇe i fa kyarauser roi Refo ikofen ḇekur Yahwe I ma moḇsa iso rosai fyarkor kwar na ro kenem ḇyedi.​—Kis. 17:11; Yak. 1:25.

11. Rariso ḇefarkor Refo oso ifawi moḇsa ḇyenadi rai, ma rosai ḇefnai fandun fa ḇyenadi faro Yahwe ras ḇe ras?

¹¹ Kanun ḇefarkor Refo kuker konsya fa sawos ḇe Yahwe I ro nadi ras ḇe ras. Konadi kuker sne ḇesiper ro randak ma papupes farkarkor na oser-oser, ma kap sisnosna ro nadi koḇena. Fafisu srower nadi koḇena, na sakfawi nyan senadi kuker sne ḇesiper ḇe Yahwe I roro snonsnon Yesus Kristus. (Mat. 6:9; Yoh. 15:16) Kokarapan rariso ḇefarkor Refo iwasya Refo ras ḇe ras (ryower Yahwe I) ma ḇyenadi (dawos kuker Yahwe I) nafnoḇek i fa fyanam syadi faro Yahwe I! (Yak. 4:8) Ifrur rarirya pdef ido, nari isur pdef isof byuk kenem ḇyeja faro Yahwe I ma dakḇebaptis.

12. Rariso ḇebuk farkarkor ifnoḇek ḇefarkor Refo ya fa ḇyebati kuker Yahwe I?

¹² Ipyum ya farkarkor na nsun ro swaruser ḇyena monda ḇa, mboi nsun kako ro sneri. Komarisen ḇefarkor Refo kuker  ko fyarkor fa myambir Yahwe I. Imbape roi fyarkor na nsun ro sneri ido, na imarisen ifrur na ro kenem ḇyena. Yesus farkarkor ḇyena nsun ro snonggaku sya swaruser sena, inja simarisen sfarkor ro i. Imbape simarisen siso i kukro roi fyarkor ḇe si na nsun ro sisnesna. (Luk. 24:15, 27, 32) Ḇefarkor Refo kuker ko fandun fa myam Yahwe ima isya kaku, inja bisa ḇyebati kuker I, myam I ḇe Kma, Allah, ma Bati ḇyedi. (Mz. 25:4, 5) Ro farkarkor koḇena, na kofnoḇek i fa myam Yahwe ima Allah ḇefrur pyum kaku. Kofnoḇek i fa ḇyesyowi Yahwe rari ḇepyum Ḇyena raris saswar, syowi, ma sawarwar. Yesus doḇe, ”Waswar Manseren, Allah ḇedi,  . . . Ine sasoser ḇepon ma ḇeba syadi.” (Mat. 22:37, 38) Inja, swewar fa wafnoḇek ḇefarkor Refo kuker Au insama iswar Yahwe I ro sneri.

13. Fawar nyan oso moḇsa kofnoḇek ḇefarkor Refo fa smambir Yahwe rari Ḇyena.

¹³ Kokofenḇair ḇe ḇefarkor Refo ya roi ḇefrur fa manggunko koswar Yahwe I. Nane nafnoḇek i fa ifawi fandun fa dakswar ma dakḇebati fanam kuker Yahwe I. (Mz. 73:28) Imnis raris, ro syap kobukifarkor ani, imbude wos ḇaido mnuk ro Refo naisya nsun kaku ro sneri kukro nbair Yahwe rari Ḇyena raris saswari, fawinanem, nanapes, ḇaido papoik ke? Kapḇair na ḇe i insama ifawi iso oser monda ro roi ḇebor ḇefnai fa koswar kaku Yahwe I. Roi ḇese naisya wer fandun fa ḇefarkor Refo ani ifrur insama dakḇebaptis.

14. Rariso wos ro Ibrani 10:24, 25 nafnoḇek ḇefarkor Refo fa sifawi fananjur nari nafnoḇek si fa sisur ro rur ya?

¹⁴ Kokame komarisen ḇefarkor Refo kuker konsya sisur pdef isof ro sebaptis. Nyan oser bisa kofnoḇek si iso kanun si fa sakso fananjur. Manbaryas ḇefnoḇek snonggaku ḇebor kwar soḇe snonggaku ḇeso ḇeri fananjur sya na sisur fasaw ro rur ya. (Mz. 111:1) Manbaryas sia sikofenḇair ḇe ḇefarkor Refo kuker si ḇo soḇe roi sfarkor ro rum nama kermgun monda, mboi na sfarkor nabor wer ro fananjur. Kowasya Ibrani 10:24, 25 kuker ḇefarkor Refo ya ma kokofen ḇe i payamyum nari ismai fyor dakso ro fananjur. Kofasnai ḇe i fa myam vidio Rosai Sifrur ro Balai Karajan? * Kofnoḇek i fa iso ker  fananjur ari ro minggu nakam ma myam na ḇe roi ḇefandun kaku.

15. Moḇsa kanun ḇefarkor Refo fa dakso fananjur ya pdef?

¹⁵ Rosai na kofrur kaku fyor ḇefarkor Refo kuker ko dakso fananjur ḇa ḇaido ryama ker ḇa? Koryaḇ kokofenḇair ḇe i roi kofarkor babo ro fananjur ya. Fyor myam mboi koryaḇ kukro koso fananjur ido, imbude na dakmarisen fa dakso fananjur kako. Kobuk syap Baryas ḇe i ḇaido Syapram Farkarkor Kankenem ma Fararmyan nari sawos na ro fananjur. Kofasnai ḇe i rosai nari sawos ro fananjur ḇerama ya, ma kofuken i bar risai imarisen kaku na. Fafisu iso randak fananjur ya, insape ifawi roi myam ma ryower na naḇese kaku ro agama ḇesena kam. (1 Kor. 14:24, 25) Nari isrow naek srar ḇefasnai kenem ḇepyum fa iso na ma nafnoḇek i fa isur pdef isof ḇyebaptis.

16. Moḇsa kofrur farkarkor Refo rawo ḇefarkor ya ḇyebaptis, ma rosai nari kawos ro farkarkor ḇerama ya?

¹⁶ Moḇsa kofrur farkarkor Refo rawo ḇefarkor ya ḇyebaptis? Na kofarkor si oser-oser fa sfarkor pyum ro minggu nakam ma sfasos pyum farkarkor na. Komarisen kako kanun ḇe si fa senadi sawos ḇe Yahwe I ro ras nakam ma sna wis ḇepyum kuker I. Komarisen kofnoḇek si fa sakso fananjur na. (Mam ram 12 ” Roi Ḇefarkor Refo Sifrur Kaku fa Sisur Pdef Isof Sebaptis”.) Ro farkarkor ḇerama ya, nari kawosḇair roi ririm wer snonggaku ḇebuk farkarkor Refo na sifrur fa sikfnoḇek ḇefarkor sya insama sisur pyum rawo sebaptis.