1. Rosai na snonggaku ḇebaptis kwar sya sifrur pdef ya?

AUSYA ḇebaptis kwar ke? Rarirya ido, fasnai kwar ro ḇarpon snonggaku ḇebor snar Auma wakyar faro Yahwe I ma wamarisen wafarmyan faro I warpu organisasi Ḇyedi. * Kakuḇae, fandun fa faduru kakyar Bena faro Yahwe I fa syambraḇ pdef. Ma fandun fa wakyar nako snar Yahwe ḇye organisasi Ḇyedi ro baboine fa ifrur marisen Ḇyena.

2-3. Moḇsa Yahwe fyarkin organisasi Ḇyedi ro baboine rai? Fansnai na.

² Baboine, nyan Yahwe fyarkin organisasi Ḇyedi nfasnai rari ḇepyum Ḇyena, marisen, ma parenta ḇenapes Ḇyena. Nari kawos Yahwe rari rikyor Ḇyena komam ro organisasi Ḇyedi.

³ Oser ya, Allah Yahwe myamfarfir snonggaku sya ḇa. (Kis. 10:34) Saswar iso ḇewar fa Yahwe iwan Roma Ḇyedi fa imarwarek kokam. (1 Tim. 2:6; Yoh. 3:16) Yahwe ḇye snonggaku sya fa sbaryas angginem faro ḇemarisen ḇerower sya. Rarirya, snonggaku ḇebor syadi saksmai payamyum ro Yesus marmar ḇyedi. Ḇesuru ya, Allah Yahwe imarisen roi ḇenapnap ḇa ma aski. (1 Kor. 14:33, 40) Inja, kokyar manfamyan Ḇyesi sḇeoser sfarmyan pyum ḇe I ma seaski. Ḇekyor ya, Yahwe iso Guru Ḇeba dirya. (Yes. 30:20, 21) Iso ḇefnai fa organisasi Ḇyedi na syewar fa fyarkor Wos Ḇyena ḇe snonggaku sya, ro sidang, ma ro ḇaḇebaryas kako. Rariso sidang Kristen ro abad randak sfasnai Yahwe rari rikyor Ḇyenane? Moḇsa Yahwe kawasa Ḇyesi ḇero baboine sakfasnai na? Ma rariso rur ḇesren ifnoḇek  Au fa wafarmyan warpu Yahwe organisasi Ḇyedi rai?

4. Ro Farfyar 1:8, rosai Yesus iwan ḇe manfamyan ḇyesi fa sifrur ya, ma fafnoḇek rosai nari sismai ya?

⁴ Ro abad randak. Anun Yesus byaryas na naser saneraro faro snonggaku syakam. (Luk. 4:43) Yesus ifrur randak fararur ine ma iwan manfamyan ḇyesi fa sbaryas pdef ”isof supswan pember ya”. (Wasya Farfyar 1:8.) Kakuḇae na sipok simbran fararur ine ro manggunsi ḇa. Sfandun fafnoḇek ro rur ḇesren Yesus ḇyeasas kwar anya.​—Yoh. 14:26; Za. 4:6.

5-6. Moḇsa rur ḇesren ifnoḇek Yesus manfamyan ḇyesi rai?

⁵ Yesus manfamyan ḇyesi sismai rur ḇesren ro ras Pentakosta taun 33 Masehi. Rur ḇesren ya fyarkin si fa sra sbaryas ḇeri ma fasaw monda snonggaku risyaran srower abar ḇepyum ya. (Kis. 2:41; 4:4) Fafisu manfamyan ansi sismai wayam, simgak ḇa ma sisusu ḇa mboi sor fafnoḇek ro Yahwe I. Senadi ma sor ḇe Yahwe I radine, ’Buk faro manfyan Besi ḇri fa inggobuk baryas wos Bedi.’ Mura sismai rur ḇesren ma sbaryas pdef wos Allah kuker makak ḇa.​—Kis. 4:18-20, 29, 31.

⁶ Yesus manfamyan ḇyesi sismai samswen ḇese kako. Imnis raris, ro fafisu anya fasfas Refo naisya nabor ḇa. Sakna syap-syap, vidio ḇefnoḇek si fa sbuk farkarkor Refo raris kona ro baboine ḇa. Mboi fandun fa manfamyan ansi sbaryas ḇe snonggaku ro wos ḇebor. Imbape, siryaḇ pdef fa sifrur roi rya sipok fa sifrur na ḇa. Ro swaf taun ri 20 monda, sbaryas isof moḇ-moḇ nakam ro fafisu ya.​—Kol. 1:6, 23.

7. Swaf taun ri 100 naiwara, rosai ḇefasnai Allah Yahwe kawasa Ḇyesi sifawi kwar rosai dor ro si, ma rosai sifrur ya?

⁷ Ro baboine. Allah Yahwe fyarkin ma syambraḇser kawasa Ḇyesi pdef. Ḇepon kaku Yahwe fyarkin si roro Refo ya, sfas na kuker fafnoḇek rur ḇesren. Ro Refo ya dori, kowasya Yesus marandan fararmyan ḇyena ma iwan manfamyan ḇyesi fa sifrur pdef fararur irandak kwar anya. (Mat. 28:19, 20) Syap Baryas ḇesasyar ro paik Juli 1881 naiwara, ikofen radine, ”Yahwe dor inggo ḇa, ḇaido ryem inggo ḇa insama snonggaku sya sesyowi inggo ḇaido fa nggosmai nana nabore, mboi insama nggobuk roi nggosmai nakam fa nggobaryas abar ḇepyum ine.” Sifrur syap Dipercayakan untuk Menginjil, ro taun 1919. Doḇe, ”Fararur nabor naisya fa kofrur na, mboi inema Tuan fararur ḇyenairi, ma nari byuk samambraḇ ḇe ko fa kofrur na.” Kakubos ḇeri, raris snonggaku Kristen ḇero abad randak siwara, naek srar ansine simgak ḇa ma sisewar kaku kukro sikyar rur ḇesren nari ifnoḇek si fa sbaryas faro snonggaku syakam. Inja, kokyar rur ḇesren ifnoḇek ko ro baboine kako.

8-9. Nyan risai Yahwe organisasi Ḇyedi fyasos kwar fa kobukibaryas angginem Karajan?

⁸ Yahwe organisasi Ḇyedi ḇyepake kwar robebor ḇepyum fa sirwas angginem Karajan. Isoine syap-syap na, Drama Foto Penciptaan, fonograf, oto ḇena roi sbukifrur mgarem na fa ndrok naba, siaran radio, ma baboine komputer ma Internet. Organisasi ifrur kako syap ma vidio ro wos ḇebor, nasyadi ro taun-taun naiwara. Kukro? Insama snonggaku ḇebor sakrower abar ḇepyum ro wos manggun sena. Yahwe ima myamfarfir ḇa. Ikofen  kwar snar abar ḇepyum ine nari sbaryas na ”faro er oser-oser, keret, wos, ma kawasa”. (Why. 14:6, 7) Imarisen insama snonggaku syakam srower angginem Karajan.

⁹ Imbape snonggaku ḇeḇarek ro moḇ sidwarek kaku ḇo samswen fa kosrow si ro rum sena ido na rariso? Yahwe ifnoḇek organisasi Ḇyedi fa sbaryas ro moḇ kawasa sibor sisya ro ya. Raris ro taun 2001 ya, Raryur Naek Ḇefarkin sbuk ijin ḇe naek srar ḇero Prancis sya fa sbuk rak beroda ro ḇaḇebaryas. Mura, naek srar ḇero moḇ ḇese sakfrur na. Sismai roi ḇepyum kaku. Ro taun 2011, insape sifrur randak na ro New York City, mnu ḇeba oso ro Amerika Serikat. Ro swaf anya monda, sirwas syap ḇeba ri 102.129 ma syap kasun ri 68.911 ma snonggaku ri 4.701 sor farkarkor Refo! Nasnai kaku, rur ḇesren isya isaramper fararur ine. Inja Raryur Naek Ḇefarkin sḇe fa koso nyan ḇeradine fa kobukibaryas ro supswan ine ḇesiper.

10. Rosai na kofrur fa kokir syadi ro ḇaḇebaryas ya?

¹⁰ Roi bisa wakfrur na. Ro fananjur ari koḇena, Yahwe fyarkor ko moḇsa kobaryas rai. Kosewar fa koso pyum na. Kosowarpu ḇaḇebaryas ro raryur koḇena. Nari naek srar sifnoḇek ko fa kokir syadi kobaryas ma kobuk farkarkor, ma fawar ḇepyum sena nsambraḇser ko. Samswen naisya, mboi kobaryas pdef. Mnuk faro farkarkor ine nbuk swarapepen ko, kofrur Yahwe marisen Ḇyena kukro samambraḇ koḇena ḇa mboi papoik rur ḇesren ya. (Za. 4:6) Kokyar Yahwe nari byuk samambraḇ ḇe ko kukro koisya kofrur fararur Ḇyena.

11. Rariso raryur naek ḇefarkin ḇero abad randak siwara sfararur kayam fa smamwarek Allah kawasa Ḇyesi isof sḇeoser pdef?

¹¹ Ro abad randak. Raryur naek ḇefarkin ro Yerusalem sfararur kayam fa smamwarek roi nakam nambran pyum  ma Allah kawasa Ḇyesi sḇeoser. (Kis. 2:42) Rupa ra ro taun 49 Masehi ya, snonggaku Kristen ḇebor sna wos oser ḇa ḇekur snonggaku ḇefarmyan ḇe Yahwe fandun fa ismai sofakfuk ke roḇa. Inja, rur ḇesren fyarkin raryur naek ḇefarkin ansi fa sawos asuser na. Ḇero sidang sna wos oser oḇa ido, nari fararur ḇaḇebaryas nambran pyum ḇa. Manwawan ma penatua ansi sima snonggaku Yahudi sirya, mboi kakara sena ḇaido roi sfarkor ḇe ḇesesya neknam ro rari Yahudi ḇa. Imbape, sisewar farkankin ro Refo ma rur ḇesren fa sna wos oser. (Kis. 15:1, 2, 5-20, 28) Rosai sismai ya? Yahwe ḇyebarakas snemuk sena kuker byuk aski ma sḇeoser. Oso wer ido, fararur ḇaḇebaryas nambran pyum kaku.​—Kis. 15:30, 31; 16:4, 5.

12. Rosai ḇefasnai kaku ḇero Yahwe organisasi Ḇyedi ro baboine simbran pyum ma sḇeoser?

¹² Ro baboine. Organisasi ifnoḇek kwar Allah kawasa Ḇyesi fa simbran pyum ma sḇeoser. Syap Menara Pengawal Zion dan Pengumuman Kehadiran Kristus ḇesasyar ro paik November taun 1895, sfas fawar oso ḇeknam ro 1 Korintus 14:40 judul ḇyeja, ”Dengan Sopan dan Tertib”. Fawar ani doḇe, ”Manwawan sya sfas anun ḇebor faro sidang ḇero abad randak ḇekur simbran kuker awnos . . . Fandun kaku fa koso pyum pdef ’fasfas sfas ḇepon kwar fa nfarkor ko.’” (Rm. 15:4) Raris si, Yahwe organisasi Ḇyedi ro baboine kako sisewar fa sidang Kristen nambran pyum ma sḇeoser. Rupa radine: Waso Farkarkor Baryas ro sidang ḇaido moḇ ḇese ido, na wafawi kwar farkarkor rosai imbe sawos ya ma moḇsa sifrur na rai. Nari waḇor famfnom ḇa! Rur ḇesren iso ḇefrur fa koḇeoser radine.​—Zef. 3:9, fks.

13. Kokarauser Yakobus 3:17 ido, fakfuken rosai na kofuken ḇe manggunko?

¹³ Roi bisa wakfrur na. Yahwe imarisen insama kawasa Ḇyesi smam pyum fa sḇeoser ro kakara insa fyesepen si kuker aski. (Ef. 4:1-3) Inja kofuken  manggunko: ’Yasewar fa sidang ayedi ḇyeoser ma ḇyeaski pdef ke? Yasouser faro naek ḇefarkin sya ke? Naek srar sya bisa sikyar aya ke, isyadi wer fyor yana fakamaman ro sidang? Ayama yakawawur ḇa, yamarisen yafnoḇek ma yafarmyan faro naek srar sya ke?’ (Wasya Yakobus 3:17.) Komam mboi roi naisya bisa kofrur fa napyum syadi ido, kor fafnoḇek rur ḇesren ya. Rur ya ifnoḇek ko fa kofadwer rari ma kenem koḇena. Rarirya, naek srar sibor nari siswar ko ma sesyowi ko.

14. Imnis wos ro Kolose 1:9, 10, moḇsa Yahwe fyarkor kawasa Ḇyesi ro abad randak ansi rai?

¹⁴ Ro abad randak. Yahwe iryaḇ kaku fyarkor kawasa Ḇyesi. (Mz. 32:8) Imarisen insama smambir I, siswar I, ma sakna kankenem fyoro. Iso ḇefnai fa Yahwe fyarkor si insama roi nane ndarirya. (Yoh. 17:3) Ro abad randak, Yahwe fyarkor kawasa Ḇyesi roro sidang. (Wasya Kolose 1:9, 10.) Raris Yesus ikofen kwar, rur ḇesren ifnoḇek manfamyan ḇyesi kako. (Yoh. 14:16) Rur ḇesren ifnoḇek manfamyan sya fa sifawi Allah Wos Ḇyena, ma ḇye si fa siswarepen roi ḇebor Yesus ikofen ma ifrur kwar na, mura sfas na ro syap Injil. Roi nane nafnoḇek snonggaku Kristen ansi fa sna kakyar ḇenako, siswar syadi Allah, Roma Ḇyedi, ma min sesi.

15. Rariso Yahwe ifrur ḇardadi ḇero Yesaya 2:2, 3 na fa ndarirya kwar?

¹⁵ Ro baboine. Yahwe ikofen ḇepon kwar ro papupes rasras ḇepupes, snonggaku ḇeraker er syakam nari sek ḇe bon Ḇyedi fa sfarkor nyan-nyan Ḇyena. (Wasya Yesaya 2:2, 3.) Komam kada, ḇardadi ani ryarirya kwar. Samsyom ḇekaku ikaki syadi ro agama ḇekaku ḇa nakam. Ma Yahwe fyasos roḇean rur nabor kaku!  (Yes. 25:6) Yahwe ḇye ”women ḇesouser ma ḇefawinanem” fa sfasos anan rur nabor kaku ro nyan ḇebor. Imnis raris, na kowasya syap, korower faya, ma komam vidio karton ma vidio ḇesena. (Mat. 24:45) Kakḇaḇir raris Ayub bati ḇyedi, Elihu i, ikofen radine: ”Guru mansei ḇeba syadi ro [Allah]?”​—Ayb. 36:22.

16. Rosai na kofrur kaku fa kosmai fainda ro rosai Yahwe fyasos kwar na?

¹⁶ Roi bisa fa wakfrur na. Allah rur Ḇyedi nari ifnoḇek Au fa wafrur rosai wawasya ma wafarkor kwar ro Refo na. Benadi imnis manfasfas Mazmur ḇeyoḇe, ”Sye Yahwe, farkor nyan Bena ḇe aya. Nari yambran ro nyan ḇekaku Bena. Ḇe aya fa yaḇesyowi snonsnon Bedi kuker sne ḇesiper.” (Mz. 86:11) Inja, kosewar pdef fa kowasya ma kofarkor Refo ma roi nakam Yahwe fyasos kwar roro organisasi Ḇyedi. Kakuḇae, imbe kosmai fawawi monda ḇa. Komarisen kokyar faro kakaku ro Refo ma kosouser na ro kenem koḇena. Yahwe rur Ḇyedi na ifnoḇek ko fa kofrur na. Kofandun naek srar sya kako fa sisambraḇser ko. (Ibr. 10:24, 25) Kukro? Sima kina koḇesirya. Koḇenadi kor ḇe Yahwe fa byuk rur ḇesren Ḇyedi ifnoḇek ko fa kobuk kankarem kuker sne ḇesiper ma fyor kun faya ro fananjur. Rarirya kofasnai ḇe Yahwe ma Yesus koswar kaku domba-domba suswar kaku sya.​—Yoh. 21:15-17.

17. Moḇsa kofasnai kosouser faro Yahwe organisasi Ḇyedi?

¹⁷ Kero wer, nari organisasi oser monda isya ḇesmai farkankin ro rur ḇesren Allah ro supswan ine. Inja koryaḇ fa kofararur kayam kuker Yahwe organisasi Ḇyedine. Raris Allah, kofasnai koma komamfarfir ḇa kuker kobaryas abar ḇepyum Karajan faro mansei monda kosrow sya. Koso nyan Ḇyena kuker komam insama nakam nambran pyum ma koḇeoser pdef ro sidang. Korower Yahwe farkarkor Ḇyena kuker kobuk pyum rosai fyasos kwar na. Rarirya, fafisu Ibiris dunya ḇyedine ipromes, na komgak ḇaḇeri. Imbape, kokayamyam fnoḇek min koḇesi ḇo kokyar nako fa kofarmyan warpu Yahwe organisasi Ḇyedine.