1. Rosai ḇefnai fandun fa kokunem faro Yahwe?

FANDUN FA kokunem * faro Yahwe snar iso Manḇedaw koḇedi. Eḇedari, iso ḇena hak kaku fa ikofenḇadir rosai fandun fa kofrur ya. (Why. 4:11) Osower ido, fandun fa kokunem faro Yahwe snar nyan ḇyepoik ko raya iso ḇepyum syadi. Komam ro sarisa snonkaku, manḇepoik ḇebor sya sepoik faro ḇesesya. Ḇape, Yahwe iḇese ro si. Ima ifawinanem, isaswar ma ifrur pyum syadi ro manḇepoik ansi.​—Kel. 34:6; Rm. 16:27; 1 Yoh. 4:8.

2. Ro Ibrani 12:9-11, rosai wer ḇewar fa kokunem faro Yahwe?

² Kosouser Yahwe I snar komkak kofrur imarisen ḇa. Ḇape, Yahwe imewer kosouser faro I snar roi ine monda. Roi ḇepon kaku kosouser faro Yahwe snar koswar I ma komam I ḇe Kma ḇesaswar koḇedi. Paulus syapram ḇyedi ḇe snonkaku Ibrani sya fyasnaiḇair ḇe ko fandun fa ”kokunem syadi faroi”, Kma koḇedi, snar ”fyarkor ko faro ḇaḇye mankun koḇena”.​—Wasya Ibrani 12:9-11.

3. (a) Rariso kofasnaiḇair kokunem faro Yahwe? (b) Fakfuken rosai monda nari kokarem ya?

³ Kofasnaiḇair kokunem faro Yahwe kuker koḇesewar kaku fa kosouser I ro kankenem koḇenakam ma komewer kokinfir ro mankunko rosai ḇepyum ma ḇeḇyeḇa na.  (Ams. 3:5) Komambir kaku Yahwe rari-rari ḇepyum Ḇyena ido, nari napyan ḇe ko fa kokunem faro I. Rosai ḇefnai ya? Snar rari Ḇyena kam naiso ḇedif I fa ifrur roi ḇebor kam. (Mz. 145:9) Kofarkor nabor syadi ro Yahwe ido, nari koswar I syadiwer. Ma koswar I ido, na fandun ḇa fa sikofenḇair sasoser oser-oser ḇekur rosai kofrur ma kofrur ḇa na. Na koḇesewar kaku fa kokara ma koḇaḇir imnis Yahwe marisen Ḇyena. Ma kosewar kako fa kokrenbur roi ḇeḇyeḇa na. (Mz. 97:10) Ḇape, rosai ḇefnai fa fyorno ido samswen fa kosouser Yahwe I? Ma rosai na penatua sya sfarkor ro Gubernur Nehemia i? Rosai na kma sya sfarkor ro Raja Daud i? Ma rosai na sna sya sfarkor ro Yesus snari, Maria i? Kankarem faro fakfuken nane nari neḇekarem ro farkarkor ine.

4-5. Ro Roma 7:21-23, rosai ḇefnai samswen fa kokunem faro Yahwe?

⁴ Roi oso ḇefrur samswen ko fa kokunem faro Yahwe isoine snar koinema snonkaku ḇesasar ma ḇenapes ḇa siko. Iso ḇefnai fa fyorno ido kofrur roi Yahwe imarisen ḇa na. Rofyor Adam ma Eva susouser Allah I ḇa kuker suyan aibon Allah idwarek kwar anya, sukinfir ro mankunsu rosai ḇepyum ma ḇeḇyeḇa na. (Kej. 3:22) Baboine, snonkaku ḇebor sya sikako spampum Yahwe ma skinfir ro mankunsi rosai ḇepyum ma ḇesasar na.

⁵ Komambir ma koswar Yahwe I kwar, ḇape kona samswen kaker fa kokunem syadi faro I. Manwawan Paulus ikako ismai samswen ḇerarirya. (Wasya Roma 7:21-23.) Raris Paulus i, komarisen kofrur rosai ḇenapes ro ḇarpon Yahwe I. Ḇape, kona marisen ḇesasar, ma koḇesewar ḇesya kwar fa kopampum na.

6-7. Rosai roi ḇesewer ḇefrur samswen ko fa kokunem faro Yahwe? Fawar farfyar oso.

⁶ Roi ḇesewer ḇefrur samswen ko fa kokunem faro Yahwe isoine nyan kakara ḇero moḇ koba rona nawyae ko. Snonkaku ḇebor kakara sena namnis kuker Allah marisen Ḇyena ḇa. Inja, koḇesewar kaku fa kopampum nyan kakara sena. Komam fawar oso ine.

⁷ Roma inai babo sya sismai dafdif fa sisewar pipi nabore. Imbesrar oso ḇenir ḇe Meri * daksmai samswen ḇeradine. Rofyor fyarkor napnapes ḇekur Yahwe ḇaim, dakfarkor ro rumfarkor ḇepyum kaku ro sup ḇyedi. Meri ismai dafdif ro kina ḇyedi fa syewar fararur ḇepyum insama nya pipi nabore. Meri mankundi imbe ismai fararur ḇeradirya. Ḇape, fafisu fyarkor napnapesya kwar ma iswar Yahwe I, Meri fyadwer aw ḇyedine. Rariryano, Meri ismai samswen fa isouser faro Yahwe I. Doḇe, ”Fyorno ido, yana swaf nabor fa yasmai pipi, mboi yafawi roi anna nari nadwarek fararmyan yena faro Yahwe. Samswen fa yapampum roi ani snar iso nyan kakara ro moḇ yaba rona. Yor fafnoḇek ro Yahwe insamaido yasmai awer fararur nari ḇefrur samswen aya fa yafarmyan ḇe I kuker sne ḇesiper.”​—Mat. 6:24.

8. Rosai nari kawos ya?

⁸ Raris kawos kwar anya, kokunem faro Yahwe ido, nari kosmai fainda. Ḇape, snonkaku ḇena papoik raris penatua, kma, ma sna sya iba syadi fandun fa sikunem faro Yahwe. Siso akurfasnai ro Yahwe ido, snonkaku ḇesesya nari sismai  fainda. Mkorama kawos conto ḇeḇeso ro Refo na ḇefnoḇek ko fa koḇuk pyum papoik koḇena imnis Allah marisen Ḇyena.

9. Samswen rosai Nehemia ismai na?

⁹ Yahwe ḇyuk ḇe penatua sya fakamamar ḇefandun kaku fa smamwarek kawasa Ḇyesi. (1 Ptr. 5:2) Penatua sya na sfarkor nabor ro nyan Nehemia fyarkin Yahwe kawasa Ḇyesi rai. Snar Nehemia ḇyegubernur ro Yehuda, inja dakna papoik ḇeba. (Neh. 1:11; 2:7, 8; 5:14) Kokara kada samswen riḇeḇeso Nehemia ismai na. Myam kwar snonkaku Yahudi sḇuk bait faro roi ḇeyun sanandik faro samsyom ḇe Yahwe I ḇa. Sḇuk farsarser faro snonkaku Lewi sya ḇa raris sasoser Taurat ikofen na. Snonkaku Yahudi sisouser sasoser ḇekur Sabat ya ḇa. Ma snon riḇeso sfarḇuk kuker bin ḇesyom Yahwe I ḇa. Gubernur Nehemia fandun fa ifrur roi ḇesamswen nane fa namnai.​—Neh. 13:4-30.

10. Rosai Nehemia ifrur ya ro fafisu ḇesamswen ani?

¹⁰ Nehemia ḇyuk sasar papoik ḇyena ḇa fa ifrur sasoser ro mankundi ma idif Allah kawasa Ḇyesi fa sisona. Imbape, Nehemia ḇyenadi kuker kakaku dor farkankin ro Yahwe, ma fyarkor kawasa ansi Yahwe sasoser Ḇyena. (Neh. 1:4-10; 13:1-3) Kuker sne ḇerun Nehemia fyararur kayam kuker naek srar ḇyesi. Iba syadi ifnoḇek si fa sḇawes ayar karui Yerusalem.​—Neh. 4:15.

11. Ro 1 Tesalonika 2:7, 8, rariso penatua sya smam naek srar ro sidang sya rai?

¹¹ Penatua ḇero baboine, saksmai samswen ḇemnis Nehemia i ḇa. Ḇape, roi nabor bisa siso ro Nehemia i. Imnis raris, sfararur marḇak fa sifnoḇek naek srar sya. Skara ḇa sima sipyum syadi ro  ḇesesya snar fakamamar sismai na. Mboi sḇeaḇaḇen faro naek srar ro sidang sya. (Wasya 1 Tesalonika 2:7, 8.) Siswar kaku naek srar ma sfasnai sne ḇerun. Eḇedari sawos myaren asuser yoḇ si. Penatua ḇefarmyan fyoro kwar ḇenir ḇe Andre doḇe, ”Yamam mboi naek srar na simarisen syadi rofyor penatua sya simyaren asuser ma sifrur pyum si. Nari simarisen fa sifararur kayam kuker penatua sya.” Toni, ḇeyakfarmyan ḇe penatua fyoro kwar, dakkofen radine, ”Yaḇesewar fa yaso anun ḇero Filipi 2:3 fa yamam snonkaku ḇesesya sikaki syadi ro aya. Ine nafnoḇek aya fa yafrur raris manḇepoik ḇa.”

12. Rosai ḇefnai fandun fa penatua sfasnai sne ḇerun ya?

¹² Penatua fandun fa sfasnai sne ḇerun, raris Yahwe I. Yahwe iso Manḇepoik ḇekaki syadi ro farsyos ḇeba ine, mboi imarisen ”ikunem fa . . . ikanow snonkaku ḇeryarḇa ro roref”. (Mz. 18:35; 113:6, 7) Ḇape, Yahwe dayin kaku snonkaku ḇeararer sya.​—Ams. 16:5.

13. Rosai ḇefnai fandun fa penatua oso ”fyarmku ramar ḇyedi”?

¹³ Penatua ḇekunem faro Yahwe fandun fa ”fyarmku ramar ḇyedi”. Ifrur na ḇa ido, nari dawos asuser ḇa yoḇ snonkaku ḇesyowi i ḇa. (Yak. 1:26; Gal. 5:14, 15) Andre, ḇeyap ḇepon anya, doḇe, ”Fafisu ono sisya sesyowi aya ḇa, imbe yawos asuser yoḇ si ḇa. Ḇape, fyor yakarauser farfyar ro snon ḇesoasuser ro Refo sya, yaḇaḇir fandun kaku fa yafasnai myaren asuser ma sne ḇerun.” Imbo, penatua sya sfasnai sikunem faro Yahwe kuker sawos myaren ma aḇaḇen ḇe snonkaku ḇero sidang sya, penatua ḇesesya kako.​—Kol. 4:6.

14. Fakamamar rosai Allah ḇyuk faro kma sya, ma rosai Allah imarisen insama sifrur ya?

¹⁴ Yahwe kyur kma sya fa sḇe bukor ro kina. Ma Allah imarisen insama sfarkor, sfarkin, ma sisonek romawa sesi. (1 Kor. 11:3; Ef. 6:4) Ḇape, kma sya na sḇuk famfnom papoik sena ḇa. Yahwe iso ḇedaw kina ya, inja kma sya nari skarem ḇe Yahwe nyan moḇsa myam faduru kina sesi rai. (Ef. 3:14, 15) Kma sya sifasnai sikunem faro Yahwe kuker sḇuk pyum papoik sena fa namnis Allah marisen Ḇyena. Na sifarkor nabor ro Raja Daud fawawar ḇyedi.

15. Rariso Raja Daud fyasnai nyan ḇepyum faro kma sya?

¹⁵ Yahwe kyur Daud i fa ḇye bukor kina  ḇyesi ma er Israel ḇesiper. Snar ḇye raja, Daud nya papoik ḇeba. Ro swaf ḇeḇeso, Daud ḇyuk sasar papoik ḇyena ma ifrur sasar ḇeba kaku. (2 Sam. 11:14, 15) Ḇape, fyasnai ikunem faro Yahwe kuker imarisen ryower rofyor Yahwe isonek i. Ikofenḇair roi ḇero sneri ḇe Yahwe roro nadi ya. Ma syewar kaku fa isouser Yahwe ananun Ḇyena. (Mz. 51:1-4) Osower ido, sne ḇerun efnai fa imarisen ryower ananun ḇepyum ismai ro snon sya monda ḇa, mboi bin sya kako. (1 Sam. 19:11, 12; 25:32, 33) Daud dun farkarkor ro sasar ifrur kwar na, ma ifakapon fararmyan faro Yahwe ro kankenem ḇyedi.

16. Farkarkor rosai kma sya sun ro Raja Daud i?

¹⁶ Kma sya na sfarkor roi riḇeḇeso nane ro Raja Daud: Buk sasar awer papoik Allah ḇyuk ḇe Au na. Wakofen kaku sasar Bena, ma rwower anun ḇeknam ro Refo wasmai ro snonkaku ḇese. Wafrur na ido, kina Bedi na ḇyesyowi Au snar nwa sne ḇerun. Fafisu ḇenadi fnoḇek kina bansi, wakofenḇair monda rosai ḇero snembri ḇe Yahwe. Rarirya ido, kina Bedi na myam Auma wakyar kaku faro Yahwe. Ḇesyadiya, wafakapon fararmyan faro Yahwe ro kankenem Bedi. (Ul. 6:6-9) Nyan ḇepyum wafasnai na nama hadiah ḇepyum kaku buk ḇe kina Bedi.

17. Fakamamar rosai Yahwe ḇyuk ḇe sna sya?

¹⁷ Yahwe ḇyuk faro sna sya fakamamar ḇesyowi ro kina yadori. Imnis raris, Yahwe ḇyuk papoik ḇe si fa sfarkor romawa sesi kako. (Ams. 6:20) Rosai sna oso ikofen ma ifrur na nari nawyae romawa ḇyesi ro ras kankenem sena. (Ams. 22:6) Komampan rosai sna sya sfarkor ro Yesus snari, Maria i.

18-19. Sna mkoya rosai mkofarkor ro Maria i?

¹⁸ Maria myambir kaku Refo ya. Ḇyesyowi kaku Yahwe ma ḇyebati kuker I. Ifawi iso Yahwe marisen Ḇyena ido nari kenem ḇyedi ḇyefararwe beri, mboi kuker sne ḇesiper ikunem faro I.​—Luk. 1:35-38, 46-55.

¹⁹ Sna mkoya oser-oser, bisa waso roi ḇeḇeso ro Maria i. Rosai monda na wafrur ya? Randakya, fandun kaku wafarkor ma ḇenadi ro mankundaw insama ḇebati fanam kuker Yahwe. Ḇesuruya, fandun fa wafrur fararwe ro kenem Bedi fa wafrur Yahwe imarisen. Imnis raris, imbude waba ro sinan ḇemasasor fasawsaw ma ḇeyawos nabor romawa suḇesya. Rofyor wafarkor Yahwe farkankin Ḇyena kwar kako, imbude samswen ḇe Au fa ḇeaḇaḇen  ma ḇekaḇaḇaḇ faro romawa besi. Syadiwer, fafisu wambrus ḇo romawa bansi srawrower Au ḇa. (Ef. 4:31) Ro fafisu ḇerariryana, wafandun syadi fafnoḇek ro Yahwe. Imbesrar oso ḇenir ḇe Lidya doḇe, ”Fyorno ido, yaḇenadi sambraḇ insamaido yarmomen famfnom awer romawa yesi fyor srower ayaḇa. Ro ras oso yamnai yawose ḇo yaḇenadi ro sneri ḇe Yahwe. Nadi ine ifnoḇek aya fa yaknon.”​—Mz. 37:5.

20. Samswen rosai sna ḇeḇeso sya sismai na, ma moḇsa sifrur mnis na rai?

²⁰ Sna sino sisya sismai samswen ḇesewer isoine samswen fa sifasnai sawarwar faro romawa sesi. (Tit. 2:3, 4) Bin ḇebor sya siba ro sinan ḇefanam kuker romawa sesi ḇa. Waksmai roi ḇerarirya ido, bisa wakrenbur nyan ḇesasar ro sinan bansi sifrur na. Sna ḇekunem faro Yahwe na fyarkor nyan risaiso fyasnai sawarwar faro romawa ḇyesi rai. Na napyan faro i ḇa fa fyadwer kakara, sneḇaḇir ma rari ḇyedi. Mboi roi ine bisa ifrur na ḇae. Ifrur na ido, nari mankundi ma kina ḇyesi kam skain kuker payamyum.

21-22. Ro Yesaya 65:13, 14 ya, kokunem faro Yahwe I ido fainda rosai kosmai ya?

²¹ Raja Daud ifawi kankunem faro Yahwe ima ḇyefainda kaku. Fyas ḇo doḇe, ”Yahwe farkankin ḇyenama nkaku, nun marisen sne. Yahwe sasoser ḇyenama nasren, nafrur mkana nasnai. Roi nanekam nḇuk swarapepen ḇe manfamyan bedi, isouser na ido, ismai ḇaḇyak ḇeba.” (Mz. 19:8, 11) Baboine, na komam snonkaku ḇekunem faro Yahwe sima siḇese ro snonkaku ḇemewer ḇerower farkankin Ḇyena. Snonkaku ḇekunem faro Yahwe nari ”sibras snar sisnesna namarisen”.​—Wasya Yesaya 65:13, 14.

²² Penatua, kma, ma sna sya sikunem kuker sne ḇesiper faro Yahwe ido, kankenem sena nari napyum syadiwer, kina sesya skain kuker payamyum, ma ḇero sidang sya seoser pdef. Ḇefandun syadiya, nari sifrur Allah Yahwe sneri imarisen. (Ams. 27:11) Iso ḇefrur fa koryaḇ kaku!