1. Indokada taun 95 Masehi, fafisu ḇesamswen rosai ḇekur Manwawan Yohanes i?

INDOKADA taun 95 Masehi, Manwawan Yohanes isya ro fafisu ḇesamswen kaku. Ḇyemansar kaku kwar, sisawen i ḇe myos Patmos, ma rya i monda manwawan ḇekenem kaker ya. (Why. 1:9) Fyawi snonkaku ḇebur napnapes sya sisya sfarkorninyan sidang Kristen ma sifrur fa seoser ḇa. Komam rya snonkaku Kristen ḇekaku sya imbe sisya werḇa kero.​—Yud. 4; Why. 2:15, 20; 3:1, 17.

2. Ro Fasasna 7:9-14, fasasna ḇeba rosai Yohanes myam ya? (Mam sonin ḇero ḇarpon.)

² Ro fafisu ḇesamswen ine, Yohanes myam fasasna ḇeba ḇekur ras naiyama. Ro fasasna ani, malaikat oso iwan ḇe malaikat rifyak fa sidwarekepen wam kandera ḇeba ya isof ro sḇuk kakop aḇyair ḇepupes faro raryur Allah manfamyan Ḇyesi. (Why. 7:1-3) Raryur ine iso snonkaku ri 144.000 nari sḇepoik fnoḇek Yesus ro nanki. (Luk. 12:32; Why. 7:4) Mura, Yohanes dapḇair raryur ḇese ḇo doḇe, ”Ḇarpurya yamam, [raryur ḇeba ro snonkaku] isof snon oso nari kyor dandonek sejaḇa! Sikada snonkaku ro ersya kam, keret, kawasa ma wosna. Ssansun syatu ḇepyoper ma suf srai ram, snonkaku ḇeḇor ansi sores roḇarpon karapesa ḇaḇesasoser ma roḇarpon Rumkun Domba ani.” (Wasya Fasasna faro Yohanes 7:9-14.) Kokarapan kada na Yohanes iryaḇ kaku fyor ifawi ro ras naiyama nari snonkaku ḇebor sisyom Yahwe kuker nyan ḇenapes!

3. (a) Rosai ḇefnai fa fasasna Yohanes myam ya syambraḇser kakyar koḇena? (b) Rosai na kawos ro farkarkor ineni?

³ Fasasna ani syambraḇser kaku Yohanes kakyar ḇyedi. Fasasna ani na syambraḇser ko syadiwer snar komami ryarirya  kwar ro fafisu koḇedine! Komam ido snonkaku syaran ma syaran saksyom ḇe Yahwe ma sna saneraro fa sisasyarbur kandera ḇeba ma sikenem fyoro ro supswan. Ro farkarkor ine na komam, nasyadi ro swaf taun ri 80 naiwara, Yahwe fyasnaiḇair ḇe kawasa Ḇyesi manseiso raryur ḇeba ani. Na kawos kako raryur ine ima (1) iba kaku ma (2) ryama ro er ḇebor kam. Roi nane nari nasambraḇser kakyar snonkaku ḇebor ḇesmai barakas fa saksun mundum ro raryur anine.

4. Kakaku rosai ḇero Refo gereja ḇebor sifawi na ḇa, mboi rosai Siswa-Siswa Alkitab sikyar ya?

⁴ Ro Refo kofarkor kwar ro ras oso snonkaku ḇesouser Allah I sya nari sikenem fyoro ro supswan. Mboi, gereja ḇebor sḇukfarkor kakaku ine ḇa. (2 Kor. 4:3, 4) Baboine, agama ḇebor ḇeyap si ḇe Kristen sfarkor ḇo soḇe snonkaku ḇefrur pyum fyor simar nari sek ḇe nanki. Imbape, Siswa-Siswa Alkitab sakkyar roi ine ḇa. Siso raryur ḇefrur randak syap Watch Tower ro taun 1879. Sifawi Allah nari ifrur kaḇer supswan ine ḇe firdaus, ma snonkaku ḇebor ḇesouser Allah nari sikenem ro supswan ine, mboi ro nanki ḇa. Ḇape, taun nenande mura insape sifawi mnis kaku snonkaku nari ḇekenem ro supswan ansine.​—Mat. 6:10.

5. Rosai Siswa-Siswa Alkitab sifawi ḇekur snonkaku ri 144.000 sya?

⁵ Kakuḇae, Siswa-Siswa Alkitab sfawi ro Refo ya kwar snonkaku ono sisya ”sḇakwarek faḇemkei ro supna” fa sḇepoik fnoḇek Yesus ro nanki. (Why. 14:3) Raryur anine iso snonkaku Kristen ri 144.000 ḇeryaḇ ma ḇeḇuk kankenem sena kwar fa sfarmyan ḇe Yahwe. Fafisu sikenem kaker ro supswan ine, sisoasuser pdef ḇe Allah. Rariso kuker raryur ḇeba ya?

6. Rosai Siswa-Siswa Alkitab sifawi ḇekur raryur ḇeba ya?

⁶ Ro fasasna ani, Yohanes myam raryur ḇeba ani ”sores roḇarpon karapesa ḇaḇesasoser ma roḇarpon Rumkun Domba ani”. (Why. 7:9) Wos anane nafnai fa Siswa-Siswa Alkitab skara ḇo soḇe, raris 144.000 ansya, raryur ḇeba nari sikenem ro nanki. Mboi, raryur risuru ansuine sukenem kayam ro nanki ido, rosai ḇefrur fa suḇese? Siswa-Siswa Alkitab skara raryur ḇeba ansine sima snonkaku Kristen ḇesouser kuf faro Allah ḇa fafisu sikenem ro supswan. Sikenem imnis rosai Refo ikofen na, mboi ḇebor ro si sisun ro gereja kaker. Siswa-Siswa Alkitab skara ḇo soḇe raryur ine siswar Allah I, mboi saswar sena naba kuf ḇa. Inja, sisyus fa separenta fnoḇek Yesus i ḇa. Iso ḇefnai fa fafisu sikenem ro nanki, raryur ḇeba na ’sores roḇarpon karapesa ḇaḇesasoser’ monda, mboi sakkain ro karapesa ya ḇa.

7. (a) Siswa-Siswa Alkitab soḇe, mansei na ḇekenem ro supswan ro fafisu Ḇaḇepapoik Taun Syaran Oser Kristus ḇyedi? (b) Skara ḇo soḇe, snon ḇeḇeso ḇesoasuser ḇemar fyor Yesus ryama ḇe supswan ḇaim, rosai na sismai ya?

⁷ Rirya ido, mansei nari ḇekenem ro supswan ya? Siswa-Siswa Alkitab sikyar ḇeḇe 144.000 ma raryur ḇeba seḇefanjur ro nanki kwar ramnai, snonkaku syaran ma syaran ḇesesya nari sḇe si fa sakkenem ro supswan ma saksmai barakas ro Ḇaḇepapoik Taun Syaran Oser Kristus ḇyedi. Siswa-Siswa Alkitab soḇe snonkaku ḇebor ansine sfarmyan ḇaim ḇe Yahwe ro fafisu Kristus ḇyeparenta ḇaim. Ro fafisu Ḇaḇepapoik Taun Syaran Oser anya, insape sfarkor ḇekur Yahwe nyan Ḇyena. Mura, ḇesouser Yahwe I sya nari sikenem fyoro  ro supswan, ma ḇesouser ḇa sya nari seḇemun pres. Siswa-Siswa Alkitab skara kako snonkaku ḇeḇeso ḇe ’manfarkin’ ro supswan ro swaf taun syaran oser anya, ma kako snon ḇeḇeso ḇesoasuser ḇemar fyor Yesus ryama ḇe supswan ḇaim, imbude nari sek ḇe nanki rofyor Ḇaḇepapoik Taun Syaran Oser imnai.​—Mz. 45:16.

8. Raris Siswa-Siswa Alkitab skara na, raryur rikyor rosai nari ḇesmai barakas ro Allah ro ras naiyama?

⁸ Inja, Siswa-Siswa Alkitab skara raryur rikyor anskoine skoisya: (1) ḇeḇe 144.000 ḇeparenta fnoḇek Yesus ro nanki sya; (2) raryur ḇeba snonkaku Kristen ḇesouser kuf faro Yahwe I ḇa sya, nari ḇeyores ro ḇarpon karapesa ḇaḇesasoser ma roḇarpon Rumkun Domba ro nanki; ma (3) snonkaku syaran ma syaran nari sfarkor Yahwe nyan Ḇyena ro fafisu Ḇaḇepapoik Taun Syaran Oser Kristus ḇyedi. * Mboi ḇarpur ya, Yahwe ifnoḇek kawasa Ḇyesi fa sifawi mnis roi ine.​—Ams. 4:18.

9. (a) Raryur ḇeba na sores ’roḇarpon karapesa ḇaḇesasoser ma roḇarpon Rumkun Domba ani’, rosai knam ya? (b) Rosai ḇefnai fa fawawi koḇena ḇekur Wahyu 7:9 nsun kaku ro kakara?

⁹ Ro 1935, Saksi-Saksi Yahwe sifawi snai kaku manseiso raryur ḇeba ḇero Yohanes fasasna ḇyedi. Sifawi raryur ḇeba fandun ḇa fa sikenem ro nanki insa sores ”roḇarpon karapesa ḇaḇesasoser ma roḇarpon Rumkun Domba ani”. Inja, sores kaku beri ro nanki ḇa. Raryur ḇeba nari sikenem ro supswan, imbape na sores ”roḇarpon karapesa” kuker skarem Yahwe iso Manḇepoik farsyos ma supswan ma sisouser faro I. (Yes. 66:1) Na sores ”roḇarpon Rumkun Domba ani” kako snar sikyar faro Yesus farsarser fasaspar ḇyedi. Ro Refo mnuk ḇese isya ḇefnoḇek ko fa kofawi mnis wos sarḇer ḇero Wahyu 7:9. Ro Matius 25:31, 32 dapḇair er sya kam nari ”seḇefanjur ro ḇarpon” Yesus karapesa ḇyedi. Snonkaku ḇeḇarḇor sya sisya kako rofandu si. Nasnai kwar, snonkaku ansine sro nanki ḇa, mboi sro ro supswan. Fawawi ḇesnai bos nane nsun kaku ro kakara. Iso eḇedari Refo ikofen ḇa raryur ḇeba nari sek ḇe nanki. Ḇeḇe 144.000 sya monda siso ḇesmai asas fa sikenem fyoro ro nanki. Nari ”ssḇuk sasoser imnis [raja] ro supna” fnoḇek Yesus i.​—Why. 5:10.

10. Fyor Ḇaḇepapoik Taun Syaran Oser imbran ḇaim, rosai ḇefnai fandun fa raryur ḇeba ansi sfarkor ḇekur Yahwe ma sisyom I kwar?

¹⁰ Ro 1935, Saksi-Saksi Yahwe sifawi mnis kwar snar raryur ḇeba ḇero Yohanes fasasna ḇyedi kyur ḇe raryur snonkaku Kristen ḇesoasuser ma nari sikenem fyoro ro supswan. Insama sisasyarbur kandera ḇeba ya, fandun fa sfarkor ḇekur Yahwe ma sisyom I kwar fyor Ḇaḇepapoik Taun Syaran Oser imbran ḇaim. Fandun fa sna kakyar ḇesambraḇ insa ’sḇukfaspar si ro roi ḇeḇor ḇeḇesya’ rofyor Ḇaḇepapoik Taun Syaran Oser Kristus ḇyepoik ḇaime.​—Luk. 21:34-36.

11. Rosai ḇefnai fa Siswa-Siswa Alkitab skara ḇo soḇe na snonkaku ḇeḇeso seḇekanow ḇe nanki rofyor Ḇaḇepapoik Taun Syaran Oser imnai kwar?

¹¹ Rariso roi skara ḇekur snonkaku ḇeḇeso ḇena kenem ḇepyum kaku ro supswan nari seḇekanow ḇe nanki fyor Ḇaḇepapoik Taun Syaran Oser imnai kwar? Rya fawawi ine ḇyeknam ro roi sfas ro The Watch Tower 15 Februari 1913. Sino skara ḇo soḇe, ’Rofyor Yesus ryama ḇaim, Allah manfamyan ḇebor ḇesoasuser sya sisya. Rosai ḇefnai fa na sikenem ro supswan  monda, ḇesyaḇo snonkaku Kristen ḇesoasuser kuf ḇa siso ḇekenem ro nanki ya?’ Mboi, skara rarirya snar sna fawawi ḇesasar kaker. Oser ya, skara raryur ḇeba nari sikenem ro nanki. Ḇesuru ya, skara ḇo soḇe raryur ḇeba sima snonkaku Kristen ḇesoasuser kuf faro Yahwe I ḇa.

12-13. Rosai snonkaku Kristen ḇesmai ramrem ma raryur ḇeba sya sifawi kaku ḇekur saneraro sismai na?

¹² Kofawi kwar, ro taun 1935 Saksi-Saksi Yahwe sifawi mnis raryur ḇeba ḇero Yohanes fasasna ḇyedi siso snonkaku ḇesasyarbur Armagedon. Nari ”sisasyarbur kandera ḇeba”, ma sisya pdef ro supswan. Nari skaru naba, ”Korer koḇeja ryama ro Allah koḇedi, ḇekain ro karapesa ḇaḇesasoser ḇyedi, ma ro Rumkun Domba ani!” (Why. 7:10, 14) Osower ido, Refo doḇe ḇekenem ro nanki na sismai saneraro ”ḇemnis syadi” ro Allah manfamyan Ḇyesi ḇemar kwar rofyor Yesus ryama ḇe supswan ḇaim. (Ibr. 11:40) Fawawi ḇebabo anna nafrur fa naek srar siryaḇ sor snonkaku ḇebor fa sfarmyan Yahwe ma sna saneraro fa sikenem fyoro ro supswan.

¹³ Raryur ḇeba simarisen kaku kuker saneraro sismai na. Sifawi kaku Yahwe iso na ḇekinfir ro diso manfamyan ḇesoasuser Ḇyesi suffarmyan roya, ro nanki ke ḇaido supswan. Snonkaku Kristen ḇesmai ramrem ma raryur ḇeba sifawi kaku saneraro nari sismai na snar Yahwe saswar Ḇyeja roro Yesus farsarser ḇyedi.​—Rm. 3:24.

14. Taun 1935 raposa, rosai ḇefnai fa sino sisya sifuken kaker moḇsa bardadi ḇekur raryur ḇeba ya nari ndarirya kaku rai?

¹⁴ Yahwe ifnoḇek kawasa Ḇyesi ro taun 1935 fa sfawi mnis ḇekur raryur ḇeba ya raposa, sino sifuken kaker moḇsa raryur ani na iba syadi wer. Imnis raris, Naek Ronald Parkin ḇyeumur taun ri 12 fafisu fawawi ḇekur raryur ḇeba ani isnai kwar. Fyar ḇo doḇe, ”Ro fafisu ya, ro supswan ḇesiper indokada manbaryas ri 56.000 sisya. Ḇebor syadi ro si, sima snonkaku Kristen ḇesmai ramrem sirya. Inja, ro fyor ani, raryur ḇeba rya iba mankun ḇa.”

15. Moḇsa barbor ro raryur ḇeba ya sibor syadi wer rai?

¹⁵ Imbape, swaf taun ḇe taun mura, siwan misionaris sya ḇe sup ḇebor na, ma barbor ro Saksi-Saksi Yahwe sibor syadi wer. Ramnai, ro 1968 sḇuk randak syap Kebenaran yang Membimbing kepada Hidup yang Kekal fa sḇukifarkor Refo. Snar syap ine ikofenḇadir napnapes ḇero Refo  kuker nyan ḇepyan, inja snonkaku ḇebor syadi sfanam ḇe Yahwe. Swaf taun rifyak monda, ḇefarkor babo sisyadi ro syaran ririm sakḇe baptis. Osower ido, ro Amerika Latin ma sup-sup ḇesena sefandun mankun faro Gereja Katolik wer ḇa, ma ro Eropa Timur ma sup ḇero Afrika sidwarek wer ḇa fararur koḇena. Bon ya, snonkaku riyuta syadi sebaptis. (Yes. 60:22) Taun riḇeḇeso ḇarpur ine, Yahwe organisasi Ḇyedi ifrur roi ḇepyanser ko fa koḇukifnoḇek snonkaku fa sfarkor Refo. Baboine, raryur ḇeba snonkaku sya sisyadi ro yuta riwar kwar. Inja nasnai kaku, Yahwe isya fyanjur si.

16. Raryur ḇeba ya ryamakero?

¹⁶ Ro Yohanes fasasna ḇyedi, doḇe raryur ḇeba ani ryama ’ro ersya kam, keret, kawasa ma wosna’. Nabi Zakharia kako ikofen bardadi ḇemnis. Fyas ḇo doḇe, ”Ro fafisu ya, snon risamfur ḇeramaker er ma wos nakam nari sufepen nako snonkaku Yahudi oso syatu ḇyedi. Nari sikofen ḇo soḇe, ’Nkomarisen nkoso mko, snar nkorower kwar Allah ryous mko.’”​—Za. 8:23.

17. Rosai Saksi-Saksi Yahwe sifrur faro snonkaku ḇeramaker er ma wos ḇebor kam?

¹⁷ Saksi-Saksi Yahwe sifawi kaku insama snonkaku ḇeramaker er ma wos ḇebor  kam seḇefanjur, fandun fa sḇaryas ankankinem ḇeḇye ro wos ḇebor. Ro swaf syadi taun ri 130, kofrur syap ma vidio fa sḇukifarkor Refo ro wos ḇeḇeso. Ḇape kirine, kofrur na ro wos nasyadi ri 900 kwar, ro wos koḇeja kako. Roi ḇeradine naisya ḇaim ro fafisu iwara. Nasnai kaku, Yahwe isya ifrur mujisat ro baboine fa iryur snonkaku ro er ḇebor kam. Snar roḇean rur naisya ro wos ḇebor syadi, inja raryur ḇeba ḇerameker er ḇebor kam sḇeoser fa sisyom Yahwe. Ma Saksi-Saksi Yahwe sifawi si, snar simyaren ro ḇaḇeḇaryas ma siswaryae si. Roi nane nasambraḇser kaku kakyar koḇena!​—Mat. 24:14; Yoh. 13:35.

18. (a) Raris ḇekofen ro Yesaya 46:10, 11, rosai ḇefnai fa kopok kokandor ḇa snar Yahwe ifrur ḇardadi ani fa ryarirya kwar? (b) Rosai ḇefnai fa snonkaku ḇena saneraro fa sikenem ro supswan skara ḇa Allah fyandun si ḇa?

¹⁸ Na komarisen kaku snar kofawi ḇardadi ḇekur raryur ḇeba ani! Kopok kokandor ḇa snar Yahwe ifrur ḇardadi ani fa ryarirya kwar kuker nyan ḇepyum kaku. (Wasya Yesaya 46:10, 11.) Raryur ḇeba ansikam sikofen kasumasa faro Yahwe snar ḇyuk saneraro ḇe si. Sima sismai ramrem Allah rur ḇesren Ḇyedi ḇa, mboi skara ḇa Allah fyandun si ḇa. Ro Refo, kowasya ḇekur snon ma bin ḇena kakyar Allah rur ḇyedi fyarkin si, ḇape sima saksun ro 144.000 sya ḇa. Oser ya iso Yohanes Ḇemasi. (Mat. 11:11) Ḇeseya wer iso Daud i. (Farfyar 2:34) Su ma snonkaku risyaran ḇesesya nari sismai kaḇakḇok fa sikenem fyoro ro supswan. Sikame ma raryur ḇeba ya kako, nari sna swaf fa sifasnaiḇair soasuser faro Yahwe ma sikunem faro ḇaḇepaoik Ḇyedi.

19. Kofawi kaku knam ro Yohanes fasasna ḇyedi ḇekur raryur ḇeba ido, rosai na kofrur ya?

¹⁹ Ro sarisa snonkaku, ineiso ḇerandak kaku Yahwe iryur snonkaku risyaran ḇeramaker er ḇebor fa sisyom I. Kona saneraro fa kokenem ro nanki ḇaido supswan ke, fandun fa kofnoḇek snonkaku ḇebor syadi fa saksun mundum ro raryur ḇeba ’domba ḇese’. (Yoh. 10:16) Fyoro wer ḇa, raris ḇardadi ya Yahwe nari ḇye kandera ḇeba fa myunpres pamarenta snonkaku ma agama ḇekaku ḇa ḇefrur kandera snonkaku sya. Ḇesun mundum ro raryur ḇeba sna syowi ḇeba kaku fa sfarmyan ḇe Yahwe isof fyoro-fyoro ro supswan!​—Why. 7:14.