1. Rariso Yahwe myam snonkaku ḇena sneḇerun sya? Fasnaiḇair pan.

YAHWE iswar snonkaku ḇena sneḇerun sya. Ḇefasnai kaku sneḇerun sya si monda na sḇebati fanam kuker I. Imbape, ”isampum ḇemararessya”. (1 Ptr. 5:5) Kokam komarisen fa kofrur Yahwe imarisen ma fyanam faro ko. Iso ḇefnai kosewar fa kona sneḇerun.

2. Rosai na kawos ro farkarkor ineni?

² Ro farkarkor ine na kokarem fakfuken rikyor anskoine: (1) Rosaiso sneḇerun ya? (2) Rosai ḇefnai fandun fa kona sneḇerun ya? (3) Fafisu risai na samswen fa kofasnai sneḇerun pdef? Ma nari komam, rofyor kona sneḇerun, kofrur Yahwe imarisen ma nun fainda ḇebor faro mankunko.​—Ams. 27:11; Yes. 48:17.

3. Rosaiso sneḇerun ya?

³ Snonkaku ḇena sneḇerun na ipok kyara ima iba syadi ro ḇesesya ḇa, ma darareri ḇa. Refo fyasnaiḇair snonkaku ḇena sneḇerun na ifawi kaku Allah Yahwe iso iba syadi kaku ro i. Dakfawi kako snonkaku ḇesesya roi sifrur na napyum syadi ro i.​—Flp. 2:3, 4.

4-5. Rosai ḇefnai fa sneḇerun ima roi snonkaku smam ro simkasna monda ḇa?

⁴ Ono sisya komam si ido, rya sna sneḇerun. Imbude simamyai ma sfasasise. Ḇaido sifasnai syowi ma sifrur pyum ḇesesya snaro sinan sesya sfarkor si fa sifrur rariri. Ḇape kaku ya, ro sisnesna sararer kaku si. Fasaw ke roba, rosai ḇero sisnesna nari nefasnaibos kaku.​—Luk. 6:45.

⁵ Siya wer, simkak ḇa ḇaido simsik fa sawos ro ḇarpon kawasa, mboi ine kyurfasnai ḇa sima sararer si. (Yoh. 1:46, 47) Ḇape, snonkaku ḇeradirya iḇyekada sisasorsi  insama sikyar faro samambraḇ mankun sena awer isof sararersi. Komamyai ḇaido komkak ḇa ke, kokame koḇesewar kaku fa kona sneḇerun ya.

6. Imnis ḇefasnai ro 1 Korintus 15:10, rosai na kofarkor ro Manwawan Paulus farfyar ḇyeja?

⁶ Kokarapan Manwawan Paulus farfyar ḇyeja. Yahwe ḇyuk swaf ḇebor ḇe i fa ḇyawes sidang-sidang ro mnu oso syadibur ḇesesya. Imbude ḇyaryas ro mnu ḇeba nabor syadi ro Yesus manwawan ḇyesi ḇesesya. Ḇape, Paulus kyara ima ipyum syadi ro naek ḇyesi ḇa. Mboi, kuker sneḇerun ikofen kaku radine, ”Aya ine Manseren manwawan ḇyedi ḇesma anonef. Aya ine sipok sap aya ḇe manwawanḇa, snar yaḇewayam Allah jemaat ḇyena kwar.” (1 Kor. 15:9) Mura, Paulus doḇe ismai kyaremso ro Yahwe snar Allah ḇaḇenaḇye Ḇyedi, mboi snar samambraḇ mankun ḇyedi ma roi ifrur kwar na ḇa. (Wasya 1 Korintus 15:10.) Paulus wos ḇyena fyas ḇe sidang Korintus anna, nfasnaiḇair Paulus irun kaku sneri. Ro fyor ya, naek srar ḇeḇeso ro sidang Korintus sawos sasurem i, mboi ibriwarek mankundi ḇa kuker dararer roi ifrur kwar na.​—2 Kor. 10:10.

7. Rariso naek oso ḇeyuf fararur ḇeḇeso ḇefandun kaku fyasnaiḇair nya sneḇerun?

⁷ Naek Karl F. Klein, oso ro Raryur Naek Ḇefarkin, farfyar ḇyena nasambraḇser Yahwe manfamyan ḇebor Ḇyesi. Ro fawawar ḇyedi, Naek Klein fyasnai sneḇerun fyor ikofenḇair daksmai samswen riḇeḇeso. Imnis ra, fafisu taun 1920 ḇebo, irandak ḇyaryas ro rum ḇe rum. Kyara roi ine syamswen kaku, inja ifrur na werḇa isof swaf taun risuru. Ḇarpur ya, fafisu fyarmyan ro Betel, naek oso ḇyuk wos anun ḇe i raposa imsor kaku naek ani.  Swaf oso iduf snar ḇyestres kaku, ḇape iprei kaḇer. Ḇape, duf fararur ḇeḇeso ḇefandun kaku ma ḇeyun raryaḇ. Naek srar ḇebor sifawi Naek Klein i kwar, mboi imai ḇa fa ikofenḇair bos raryarḇa ḇyena. Ine fyasnaiḇair irun sneri kaku. Naek srar ḇebor sya siswarepen ker Naek Klein i ma siwasya fawar ḇyedi ikofenḇair na kuker kakaku. *

8. Rariso 1 Petrus 5:6 nafnoḇek ko fa kofawi ḇaḇerun sne ya ifrur Yahwe imarisen?

⁸ Roi ḇefnai fandun fa kona sneḇerun ya isoine rari ine ifrur Yahwe imarisen. Manwawan Petrus dakkofen bos roi ine. (Wasya 1 Petrus 5:6.) Ro syap ”Mari Jadilah Pengikutku”, dawosḇair Petrus wos ḇyena ḇo doḇe, ”Ararer ima imnis ra roi ḇemamur. Dun ḇe roi ḇeḇyeḇa kaku. Rari ine ifrur fa snonkaku ḇena samambraḇ ḇeba kaku na ḇye roiyoḇa ro ḇarpon Allah. Imbape, ḇaḇerun sne nafrur fa snonkaku ḇeroiyoḇa na ḇye fainda faro Yahwe. . . . Nari ḇyuk barakas ḇe Au snar ḇaḇerun sne Bena.” * Kokarapan kada, bisa kofrur Yahwe imarisen. Inema ro ḇepyum syadi kosambraḇ fa kofrur na!​—Ams. 23:15.

9. Rosai ḇefnai fa ḇesesya na simarisen sfanam yoḇ ko fyor kofasnai sneḇerun ya?

⁹ Kona sneḇerun ido, na kofrur Yahwe imarisen monda ḇa. Na kaksmai fainda nabor kako. Kona sneḇerun ido, ḇesesya simarisen sfanam yoḇ ko. Rosai ḇefnai ya? Kwarapan, snonkaku ḇemnis rariso wamarisen sya. (Mat. 7:12) Na komewer kofanam kuker snonkaku ḇedif ko fa kofrur roi imarisen na ma imewer ryower ḇesesya. Imbape, na komarisen koḇebati kuker min Kristen koḇesi ḇefasnai ’ḇaḇaḇir oser, siswaryae imnis manḇekanaek ma ḇerun sne’. (1 Ptr. 3:8) Komarisen kofanam kuker ḇeḇerun sne sya. Ma kofasnai sneḇerun ido nari simarisen sakfanam yoḇ ko.

10. Kona sneḇerun ido, rosai ḇefnai nari napyan ḇe ko fa kombran pdef fafisu kosmai roi ḇefrur fa komarisen ḇana?

¹⁰ Kona sneḇerun ido, na napyan fa kokamar roi ḇefrur komarisen ḇana. Fyorno ido, komam sifrur pyum ḇesesya ḇa ḇaido koiso sifrur pyum ko ḇa. Raja Salomo ḇefawinanem ya ikofen kwar roi ine, doḇe, ”Yamam manfyan sya sek kuda,  mboi ḇeḇarara sya simbran imnis manfyan.” (Pkh. 10:7) Fyorno ido, snonkaku ḇekir syadi sya na sḇuk wos sandik ḇe si ḇa, ḇesyaḇo sḇuk wos sandik faro ḇena fawawi noḇa sya. Rariryano, Salomo ikofen kaku ipyum ya komam monda roi ḇeḇesya nane ndrarirya ma kofafayaf awer faro roi ḇeḇyeḇa ḇekur ro kankenem ya. (Pkh. 6:9) Kona sneḇerun ido, nari napyan ḇe ko fa kombran pdef fafisu kosmai roi ḇefrur fa komarisen ḇana.

11. Rosai ḇefnai fandun fa kofasnai sneḇerun fafisu sḇuk ananun ḇe ko?

¹¹ Ras ḇe ras kona swaf fa kofasnai sneḇerun ya. Kokarapan fafisu ḇeuser nane. Fafisu sḇuk ananun ḇe ko. Koswarepen, snonkaku oso kyara fandun fa isonek ko ido, imbude snar kofrur sasar ḇeba syadi ro kokara na. Fyor sḇuk ananun ḇe ko, imbude kopampum beri ananun anna. Kawos sasurem snonkaku ḇeḇuk ananun na ḇaido nyan sawos yoḇ ko raya. Ḇape, kona sneḇerun ido, na kosewar fa korower pyum ananun sḇuk na.

12. Raris Amsal 27:5, 6 ikofen ya, rosai ḇefnai fandun fa kokofen kasumasa faro snonkaku ḇeḇuk ananun ḇe kona? Buk wos sarḇer.

¹² Kona sneḇerun ido, na koḇesyowi ananun sḇuk ḇe kona. Kwarapan wos sarḇer ine: Ausya ro fananjur. Wawos kuker naek srar ḇeḇeso ro sidang ra posa, oso iyer Au fa fanam ḇe i ma ikofen ḇe Au roḇean ker naisya nasef kaker ro nakor Bedi. Kakuḇae na wamai ra, mboi na wakofen kasumasa snar ikofen ḇe Au kwar. Iba syadi imbude kwara ro ḇepon ya, snonkaku oso ikofen fasaw naḇe Au kada! Rarirya kako, fyor min koḇesi oso ḇyuk wos anun kofandun na, fandun fa kofasnai sneḇerun ma kokofen kasumasa ḇe i. Komarisen komam i ḇe bati mboi mbroḇ risyaḇa.​—Wasya Amsal 27:5, 6; Gal. 4:16.

13. Rariso kofasnai sneḇerun fafisu snonkaku ḇesesya sismai fakamamar ro sidang?

¹³ Fafisu snonkaku ḇese ismai fakamamar ro sidang. Penatua oso ḇenir ḇe Yason ikofen kaku, ”Fafisu yamam snonkaku ḇese ismai fakamamar ro sidang, na yakara sai ḇefnai fa skur aya ḇa.” Wakḇaḇir rarirya ro ras oso ke? Kosewar fa kosmai fakamamar ro sidang ima roi ḇesasar ḇa. (1 Tim. 3:1) Ḇape, fandun fa kosasor koro roi kokara na. Kosasor ko ḇa ido, ḇaḇeararer na nasur ro kosnesna. Imnis raris, snon Kristen oso na kyara  i monda isrow syadi fa duf fararur oso ro sidang. Ḇaido binswa Kristen oso imbude kyara ḇo doḇe, ’Swa yedi isrow syadi ro manbesrar ani fa duf fakamamar ro sidang!’ Kona sneḇerun ido, na kopok kona kakara ḇeradirya ḇa.

14. Rosai kofarkor ro rosai Moses ifrur ya fafisu snonkaku ḇese sismai fakamamar?

¹⁴ Na kofarkor ro rosai Moses ifrur ya fafisu snonkaku ḇese sismai fakamamar. Moses duf fararur ḇe manfarkin er Israel ma ḇyesyowi kaku na. Moḇsa Moses kyara rai fafisu Yahwe ḇyuk swaf ḇe snonkaku ḇese fa suf fararur ḇeḇeso ro Moses fararur ḇyena? Sneri fyafayaf si ḇa. (Bil. 11:24-29) Rofyor ḇyemankara er Israel sya, fyasnai sneḇerun kuker imarisen snonkaku ḇese sifnoḇek i. (Kel. 18:13-24) Snar snon ḇeḇeso sakḇe mankara kako, inja snonkaku Israel fandun ḇa fa siwaf kawan kaku fafisu sifandun fafnoḇek ro mankara. Moses fyandun syadi snonkaku ḇese payamyum sena ro fakamamar ḇyedi. Fyasnai nyan ḇepyum kaku fa kosona! Koswarepen insama kosmai fakamaman fa kuffarmyan ḇe Yahwe, roi ḇefandun syadi ya iso ḇaḇekir koḇena ḇa mboi sneḇerun ya. ”Yahwe ima ikaki kaku, mboi myamuser snonkaku ḇena sneḇerun sya.”​—Mz. 138:6.

15. Fararwe rosai naek srar sya sismai ro kankenem sena?

¹⁵ Fafisu kankenem koḇena nefararwe. Taun ḇarpur ine, naek srar ḇefarmyan fyoro kwar sya sismai fararur ḇesren ḇebabo. Imnis raris, ro 2014, organisasi dap kwar fakamamar ḇe pengawas distrik ya nower ḇa. Inja sor pengawas distrik ma siswasi fa suffarmyan ro fararur ḇese. Ro taun ani kako, organisasi dap kwar pengawas wilayah ḇyeumur taun ri 70 kwar ido, na duffarmyan wer ḇa ḇe pengawas wilayah. Ma manbesrar ḇyeumur taun ri 80 kwar, nari duffarmyan ḇe  koordinator badan penatua ya wer ḇa. Osower ido, taun riḇeso ḇarpur ine, ḇero Betel ḇebor sya sor si fa sfarmyan ḇe perintis. Siya wer simnai ro fararmyan oras nakam sena snar siduf, smamwarek sinan sesi, ḇaido fandun ḇesena.

16. Rariso naek srar koḇesi sifasnai sneḇerun rofyor kankenem sena nefararwe?

¹⁶ Samswen ḇe naek srar ḇebor ansine fafisu kankenem sena nefararwe. Kakuḇae na siswar kaku fararur sifrur ro ḇeponi, roi sesyowi kaku na ro swaf taun ḇe taun kwar. Ono sisya sisneso fyor sifrur fararwe annane. Ḇape, ḇarpur ya siso fararwe anna kwar. Rosai ḇefnai ya? Ḇepon kaku ya, snar siswar Yahwe I. Sifawi sḇuk kankenem sena fa sfarmyan ḇe Yahwe, faro fararur ḇaido fakamamar oso ḇa. (Kol. 3:23) Simarisen sifarmyan ḇe Yahwe kuker sneḇerun ro fararur sairirya kam. Snar sifawi Allah fyandun kaku si, inja ’sḇuk makakwarek sena kam faro I’.​—1 Ptr. 5:6, 7.

17. Rosai ḇefnai fa kokofen kasumasa snar Refo danunepen ko fa kona sneḇerun?

¹⁷ Kokofen kasumasa kaku snar Refo danunepen ko fa kona sneḇerun. Kona sneḇerun ido, nun fainda faro ko ma snonkaku ḇesesya. Kosambraḇ kako fa kombran pdef fafisu kosmai samswen. Ḇesyadi ya, na kofanam syadi ḇe Kma koḇedi ro nanki. Komarisen kaku snar Yahwe ima ”Allah Ḇekaki Syadi” mboi iswar manfamyan Ḇyesi ḇena sneḇerun sya!​—Yes. 57:15.