1. Rosai imbesrar koḇesi sifrur faro organisasi kwar, mboi ḇebor sya samswen rosai sismai na? (Mam sonin ḇero ḇarpon.)

KOMARISEN kaku kukro imbesrar koḇesi sibor sfararur marḇak ro sidang kwar! Imnis raris, sakso ro fananjur ma ḇaḇebaryas ya. Imbesrar ono sisya sifnoḇek fararur fadaduru Balai Karajan ma sfasnai sawarwar faro naek srar ḇesesya. Kakuḇae, samswen sena naisya nabore. Sia smamfaduru sinan sesi. Sia wer, kina sesi sidwarek si. Ḇese wer, semir sfaduru roma inai sesi ma siso ḇesewar fandandun sena.

2. Rosai ḇefnai fa kosewar insama kosambraḇser imbesrar koḇesi?

² Rosai ḇefnai fa kosewar insama kosambraḇser imbesrar koḇesi? Snar snonggaku ḇero dunya ine sesyowi ma sifrur pyum bin sya ḇa ker. Oso wer ido, Refo danun ḇe ko fa kosambraḇser imbesrar sya. Imnis raris, Manwawan Paulus dor sidang ḇero Roma fa sisaser pyum srar Febe ma ’sifnoḇek i rofyor ḇyefandun fafnoḇek ro si’. (Rm. 16:1, 2) Randak iwara Paulus ima snonggaku Farisi. Farisi sine smam bin sya sima sismai roi oḇa ma smamkyof si. Imbepe fafisu Paulus dakḇe Kristen kwar, dakfrur ra Yesus moḇ ifur pyum bin sya raya.​—1 Kor. 11:1.

3. Moḇsa Yesus fyasnai syowi faro bin sya rai, ma rariso myam bin ḇefrur Allah marisen Ḇyena?

³ Yesus fyasnai syowi faro bin syakam. (Yoh. 4:27) Myam bin sya raris manfarkin agama Yahudi ḇero fafisu ḇyedi ḇa. Syap ḇekur Refo oso doḇe, ”Yesus ikofen wos oso ḇaḇeri ḇefasnai ḇyesyowi bin sya ḇa.” Imbape, Yesus ḇyesyowi kaku bin ḇefrur Kmari marisen Ḇyena. Fafisu Yesus dapḇair mansei myam ḇe kina ḇyedi, dap snon ma bin syakam.​—Mat. 12:50.

4. Rosai na kawos ro farkarkor ineni?

 ⁴ Yesus imarisen ifnoḇek bin ḇefarmyan ḇe Yahwe I ḇesya kwar. Ḇyesyowi si ma iḇriwarek si. Nari kawos moḇsa koso Yesus nyan ḇyena fa kofrur pyum imbesrar koḇesi raya.

5. Rosai ḇefrur fa imbesrar ḇeḇeso samswen fa sḇebati kuker ḇesesya?

⁵ Naek ma srar koine kam, kofandun bati ḇepyum. Imbape fyorno ido bar imbesrar sya samswen fa sakḇebati kuker ḇesesya. Kukro? Korower rosai sikofen na. Imbesrar oso snori Yulia *, doḇe, ”Yafarḇuk ḇa, inja swaf ono yakmom mansei na yana ḇe bati, ma yakara sfandun aya ḇa ro sidang ya dori.” Perintis oso ḇenir ḇe Kristin, rya ḇe moḇ ḇese fa ifrur nabor syadi ro ḇaḇebaryas. Doḇe, ”Korama babo ro sidang oso ido, na koḇaḇir rya kokain ro manggunko.” Sia sḇarekus kina ḇena kakyar oser ḇa, inja skara samswen fa sfanam kuker si ma naek srar sya kako. Imbesrar ono sisya sḇaḇir sḇarek ro manggunsi kukro siduf ma jadi fa sra ḇe bandi ḇa, ḇaido smamwarek kina sesi ḇeduf sya. Srar ḇenir ḇe Aneta doḇe, ”Yana swaf oḇa fa yakain kayam kuker naek srar sya kukro yakain yamamwarek awin yedi.”

6.Imnis fawar ro Lukas 10:38-42, rosai Yesus ifrur fa ifnoḇek Marta ma Maria su?

⁶ Yesus nya swaf fa kyainus bin ḇeyuffarmyan sya ma sna i ḇe bati ḇekaku. Kokarapan ḇyebati kuker Maria ma Marta su. Bin suine sufarḇuk ḇa. (Wasya Lukas 10:38-42.) Rosai Yesus ikofen ma ifrur na, nun sneprei kaku faro su. Kofawi roi ine kukro Maria imgak ḇa fa kyain fanam Yesus wemin ḇyesuya ma dakfarkor. * Oso wer ido, fafisu Marta fyafayaf faro Maria i kukro dakfnoḇek i fa fyasos anan ḇa, Marta imgak ḇa ḇo dawos ḇeri ḇe Yesus roi kyara na. Yesus byuk swaf anya fa fyarkor su roi ḇefandun kaku. Fyasnai iswar kaku su ma ḇedar suḇedi, Lazarus i. Kofawi roi ine kukro Yesus rya myamfar sko ro ras ḇese kako. (Yoh. 12:1-3) Iso ḇefnai fa rofyor Lazarus iduf marḇak kaku, Maria ma Marta sufawi bisa suyor fafnoḇek ro Yesus i.​—Yoh. 11:3, 5.

7. Rosai nyan oser fa kosambraḇser imbesrar koḇesi?

⁷ Imbesrar ḇeḇeso smam fananjur ya ḇe swaf ḇepyum fa skayam kuker naek srar sesya. Inja, komarisen kobuk pyum swaf ro fananjur ine fa koser si, kawos kuker si, ma kofasnai kofandun si. Srar Yulia ḇeyap insandi, doḇe, ”Yasmai sneprei kaku rofyor ono sikofen kasumasa faro kankarem yabuk ro fananjur ya, sor aya fa yabaryas kayam kuker si, ḇaido sfasnai sawarwar faro aya.” Ipyum fa kofasnai koswar kaku si. Imbesrar ḇenir ḇe Kia, doḇe, ”Fafisu yaso fananjur ya ḇa, nari naek srar ono se-sms ḇaido setelfon aya fa sifawi yaro payamyum ke roḇa. Inja, yafawi naek srar sya siswar aya.”

8. Rariso koso Yeus nyan ḇyena rai?

⁸ Raris Yesus i, komarisen kobuk swaf fa koḇebati kuker imbesrar koḇesya. Imbude bisa kor si fa sanan kayam ro rum koḇena ḇaido kombran farma kuker si. Kofrur na ido, na kona swaf fa kofarfyar insa  kosambraḇser ko. (Rm. 1:11, 12) Penatua fandun fa sfasnai Yesus kakara ḇyena. Yesus ifawi ḇefarḇuk ḇa sya na sismai samswen. Mboi, ikofen sfarḇuk ke sfarḇuk ḇa yo bisa sismai aski ḇekain fyoro ro kenem sena. (Luk. 11:27, 28) Snar aski kosmai ine ḇyeknam ro kofarmyan ḇe Yahwe I ma komam na ḇe roi ḇefandun syadi ro kenem koḇena.​—Mat. 19:12.

9. Rosai monda penatua sifrur fa sikfnoḇek imbesrar sya?

⁹ Penatua siso ḇepon kaku ḇefasnai frur pyum ḇe imbesrar sya. Smam si ḇe srar sesi ḇaido sisnasi. (1 Tim. 5:1, 2) Sisewar swaf fa sawos kuker si fyor fananjur imbran ḇaim ḇaido imnai kwar. Srar Kristin insandi doḇe, ”Penatua oso myam mboi yana fararur nabor kaku, inja imbe ifawi moḇsa yafasos oras ayena rai. Yakofen kasumasa kaku kukro syewar fa ifawi samswen ayena.” Fafisu penatua sna swaf fa sawawos kuker imbesrar sya, sfasnai sifandun kaku si. * Srar Aneta ḇeyap ḇepon ani ikofenḇair payamyum ismai na. Doḇe, ”Yamambir pyum syadi si wer, sakmambir pyum aya kako. Rarirya fyor yasmai samswen, yamgak ḇa fa yor fafnoḇek ro si.”

10. Rosai na ḇefrur fa imbesrar koḇesi simarisen?

¹⁰ Snon ma bin koine kam, na komarisen ḇesesya sifawi roi kosambraḇ fa kofrur na ma sesyowi fararur koḇena. Imbape, sesyowi fararur koḇena ḇa ido, na koḇesaneso. Imbesrar ḇefarḇuk ḇa ḇenir ḇe Abigail, doḇe naek srar sya smambir i ḇa. Doḇe, ”Sifawi monda srar ayesi ḇaido sinan ayesuya. Ayama sfandun aya ḇa.” Korower rosai srar Peni dakkofen ya. Srar ine fyarḇuk ḇaim ma duffarmyan ḇe misionaris. Mura, kyaḇer ḇe rum ḇyedi fa myamfaduru sinan ḇyesuya. Kirine ḇyeumur taun ri 70 kwar mboi ḇye perintis kaker. Srar Peni doḇe, ”Roi ḇefrur fa yasambraḇ kaku iso fyor ono sikofen ḇe aya sesyowi roi yafrur kwar na.”

11. Rariso Yesus fyasnai ḇyesyowi kaku bar bin ḇefnoḇek i ro fararmyan?

¹¹ Fafisu Yesus ifarmyan ro supswan ine, bar bin ḇesouser faro Yahwe I sya sifnoḇek i kuker nana arasai sena. Yesus ḇyesyowi kaku fafnoḇek sbuk anna. (Luk. 8:1-3) Yesus byuk syowi ḇeba faro si ma ikofenḇair fawawi ḇefandun kaku ro Refo ḇe si. Imnis raris, ikofen ḇe si ḇo doḇe nari imar ma ikḇok kaḇer. (Luk. 24:5-8) Fyasos bin ansine ma manwawan ḇyesi faro farawrowes nari ḇekur si na. (Mrk. 9:30-32; 10:32-34) Komam kada rofyor sfor Yesus i, manwawan sya sifrar sibur, mboi bin ḇeḇeso sisya sisambraḇser i fafisu ḇyekandera ro ai kandera ya.​—Mat. 26:56; Mrk. 15:40, 41.

12. Yesus ikyar bar bin sya fa suf fararur rosai?

¹² Yesus ikyar bar bin sya fa suf fararur ḇefandun. Imnis raris, bin ḇesouser faro Yahwe I sya siso ḇemam ḇepon Yesus kaḇakḇok ḇyedi. Ramnai, Yesus iwan bin sya fa sikofen ḇe manwawan sya snar ikḇok ro marmar ya kwar. (Mat. 28:5, 9, 10) Ro ras Pentakosta taun 33 Masehi, rya bar bin sya sisya fyor rur ḇesren isabu mumfes. Rarirya bar bin ḇesmai ramrem rur ḇesren ansine sifawi sawos ro wos ḇese ma sbaryas Allah fararur ḇeba Ḇyena.​—Kis. 1:14; 2:2-4, 11.

13. Rosai bar imbesrar sifrur ro baboine, ma moḇsa kofasnai koḇesyowi roi sifrur kwar rai?

¹³ Imbesrar koḇesi sisyus fa kokofen kasumasa ḇeri fa srower kukro sifrur roi nabor ro fararmyan ḇe Yahwe I kwar. Imnis ra sakso ro fararur ḇaḇawes ma fadaduru Balai Karajan, sisaramper raryur ḇeyawos wos ḇese, sifnoḇek fa sifrur syap-syap ro wos ḇese, ma sifarmyan ḇe perintis ma misionaris. Raris bar naek sya, imbesrar sya kako sakso ro farkarkor perintis, Farkarkor faro Manbaryas Karajan, ma Farkarkor Gilead. Oso wer ido, bar binswa sya kako sisaramper siswasi kukro sfararur marḇak faro sidang ma organisasi. Bar naek ansine suf pyum fararur sena kukro siswasi sisaramper si. (Ef. 4:8) Kwara ido moḇsa na waksambraḇser imbesrar koḇesine rai?

14. Raris ḇeyap ro Mazmur 68:11 ya, penatua ḇena fawinanem rosai nari sifrur ya?

¹⁴ Penatua ḇena fawinanem na sikyar kaku, imbesrar siso sordade ḇeba ḇefararur kuker sne ḇemarisen. Ma rofandu manbaryas angginem Karajan, imbesrar siso ḇebor syadi. (Wasya Mazmur 68:11.) Inja, penatua na saksmai fainda ro fawar sena kako. Srar Abigail ḇeyap ḇepon ani, imarisen fyor naek ono sifuken ḇe i moḇsa sawos pyum kuker snonggaku sisrow ro ḇaḇebaryas ya rai. Fyar ḇo doḇe, ”Nane nafnoḇek aya fa yafawi  Yahwe byuk fararur ḇe aya ro organisasi Ḇyedine.” Oso wer ido, penatua sifawi imbesrar ḇesoasuser ḇena kakyar ḇenako, sima sisrow kaku fa sifnoḇek imbesrar ḇebabo sya ro samswen sena. (Tit. 2:3-5) Nasnai kaku, fandun fa koḇesyowi imbesrar koḇansine!

15. Fafisu risai na imbesrar sya sfandun ono ḇeyawoswarek si?

¹⁵ Fyorno ido, imbesrar koḇesi sfandun ono ḇeyawoswarek si fafisu roi ḇedwarek naisya. (Yes. 1:17) Imnis raris imbesrar kabom oso, na fyandun oso ḇefrur pyan ma ḇemam pyan snon sya fararur sena. Imbesrar ḇesinan kwar na fyandun oso ḇeyawos pyan ḇe dokter. Ḇaido imbesrar perintis ḇefnoḇek ro fararur ḇesren ḇesena, fyandun ono ḇeyawoswarek i fyor ono sisasurem kukro rya byaryas ker raris perintis ḇesesya ḇa. Moḇsa kofnoḇek imbesrar koḇesine rai?

16. Imnis ḇeyap ro Markus 14:3-9 ya, rariso Yesus dawoswarek Maria i?

¹⁶ Yesus dawoswarek ḇeri bin ḇesouser sya fafisu kawasa sya skara sasar bin ansine. Rupa ra dawoswarek Maria fafisu Marta dawos nabor i. (Luk. 10:38-42) Ro rarwan ḇesuru, dawoswarek Maria wer fafisu ḇesesya simsor i kukro skara ḇo soḇe ifrur roi ḇemnis ḇa kwar. (Wasya Markus 14:3-9.) Yesus ifawi roi Maria kyara ya ma byuk wos sandik ḇe i ḇo doḇe, ”Ifrur fararur ḇepyum oso faro aya kwar. . . . Ifrur roi jadi fa ifrur kwar.” Yesus ikofen kako ḇardadi oso snar rosai Maria ifrur anna nari sap na ker fafisu angginem ḇepyum ya sbaryas na ro supswan ḇesiper. Iso roi kawos ro farkarkor ine. Kokarapan kada, Yesus ikofen angginem ḇepyum Karajan na sbaryas na ro supswan ḇesiper rofyor isya myanen Maria i snar fyasnai kwar fyandun manggundi ḇa. Skara sasar Maria i kwar, mboi Yesus wos ḇyena na nbuk sneprei ḇe i.

17. Fawar farfyar oso ḇefasnai fafisu risai na kawoswarek imbesrar oso.

¹⁷ Rofyor imbesrar sya sfandun fafnoḇek Bedi ido, na wamarisen wafnoḇek si ke? Kwarapan fawar ine. Manbaryas ḇeḇeso smam imbesrar oso, swari dakḇe Saksi Yahwe ḇa. Imbesrar ine isaryar ker ryama ḇe fananjur ma ibur ḇeri fyor fananjur ya imnai. Smam fafisu ono imbesrar ine dun romawa ḇyesi kako. Inja sisasurem i bo soḇe dor kaku swari kada insama dun ker romawa ḇyesi fa siso fananjur. Imbape, sifawi ḇa ḇo imbesrar ine syewar kaku kwar. Nya samambraḇ oḇa fa ifrur roi nakam imnis oras ḇyena. Oso wer ido, ifawi derer monda na ḇemamwarek romawa ḇyesi ḇa. Fafisu rwower roi ḇeradine ido, moḇsa na berai? Swewar kaku insama sisasurem famfnom imbesrar ani awer kuker wamanen frur pyum ḇyena. Ma wakofenḇair ḇe snonggaku ḇesasurem ansya ḇo woḇe imbesrar ani fyararur marḇak kwar.

18. Rosai monda na kofrur fa kokfnoḇek imbesrar koḇesi?

¹⁸ Kofasnai sawarwar faro imbesrar koḇesya kuker kobuk fafnoḇek sifandun na. (1 Yoh. 3:18) Srar Aneta, ḇemamwarek snari doḇe, ”Naek srar ḇeḇeso na srama fa smamwarek pyan awin i insama yafrur fararur ḇesena. Sun roḇean ḇe awin nu. Roi nane nafrur fa yafawi naek srar sya siswar ma sifandun aya.” Srar Yulia daksmai fafnoḇek ḇemnis kako. Mambesrar oso ikofen fa myam pyan oto ḇyeja fa imbran pyum pdef. Doḇe, ”Yamarisen yafawi naek srar sya siswar aya  ma simewer roi ḇeḇyeḇa kyur aya fyor yun oto.”

19. Rosai wer nyan fa penatua sifnoḇek imbesrar sya?

¹⁹ Penatua sya kako sisewar fa smam fandun ro imbesrar sya. Sifawi inema roi Yahwe imarisen fa sifrur ḇe imbesrar sya nairi. (Yak. 1:27) Inja siso Yesus fa sfasnai kakara ḇemnis faro si. Penatua na sipok sor nabor ro imbesrar ansi ḇa, mboi ipyum fa sfasnai frur pyum. (Mat. 15:22-28) Penatua ḇesewar ḇepon fa sbuk fafnoḇek ido, imbesrar sya na sḇaḇir Yahwe ma organisasi Ḇyedi siswar si. Rofyor ḇemamwarek ro kelompok ḇyedi ifawi Kia imbe rya ḇyarek ro rum ḇese, byuk fafnoḇek ḇeri. Kia fyar ḇo doḇe, ”Nane nafnai fa yakara samswen syadi ḇa. Yamam roi penatua sikofen ma sifrur fa sifnoḇek aya, nasnai kaku sifandun aya ma yakamar samswen ayena ro manggundaya ḇa.”

20-21. Moḇsa kofasnai koḇesyowi kaku imbesrar koḇesya kam?

²⁰ Komam ro sidang ḇero baboine ido, na kosrow imbesrar sibor simyaren ro fararmyan. Fandun fa kosambraḇser si. Kofarkor ro Yesus nyan ḇyena kwar, na kofnoḇek si kuker kobuk swaf fa kokainus si ma komambir pyum si. Kofasnai koḇesyowi rosai sifrur kwar ro fararmyan ḇe Yahwe I. Ma kawoswarek si rofyor sfandun fafnoḇek ro ko.

²¹ Ro syapram Manwawan Paulus fyas ḇe sidang ro Roma, bar ḇepupes ya dapḇair bin ḇesoasuser risiw snonsnon sena. (Rm. 16:1, 3, 6, 12, 13, 15) Manwawan Paulus byuk anun saswar ḇe si ma myanen si. Kakuḇae, na bin ansine simarisen srower na. Komarisen kako kosambraḇser imbesrar koḇesya kam ro sidang koḇedi. Rarirya, kofasnai koḇesyowi kaku si ma komam si ḇe kina koḇedi.