1-2. Rariso kofawi wos ḇero Pengkhotbah 11:6 kyur kako ḇe fararur ḇaḇebaryas ya?

RO SUP ḇeba ḇeḇeso, kawasa ḇebor sya simarisen faro abar ḇepyum kobaryas na. Naiso roi siwaf kawan kwar fa srower na! Ro sup ḇese wer ido, fafisu kawosḇair Allah ḇaido Wos Refo ya, snonggaku ḇebor spapum kaku na. Ro moḇ Bedi ryariso? Simarisen ke roḇa ke, Yahwe imarisen insama kora kokofenḇair na pdef isof kofrur fararur ine imnis moḇ imarisen raya.

² Allah Yahwe dap kwar ras risai fararur ine na imnai. Isoine isof papupes ya ryama. (Mat. 24:14, 36) Imboi ro swaf kowaf kaker isof ras anya ryama, moḇsa na ’komam monda awer bramin koḇena imnaisu’ rai? *​—Wasya Pengkhotbah 11:6.

3. Rosai nari kawos ro farkarkor ine?

³ Ro farkarkor ḇepon ya, kawos kwar roi rifyak kofrur na kaku insama fararur ḇaḇebaryas koḇena nambran pyum. (Mat. 4:19) Ro farkarkor ine, nari kawos roi rikyor wer na ḇefnoḇek ko fa kobaryas pdef ro fafisu ḇesamswen. Nari kofarkor rosai ḇefnai fa (1) komam monda faro fararur ḇaḇebaryas, (2) kokaḇaḇaḇ, ma (3) komamwarek kakyar koḇena nsambraḇ.

4. Rosai ḇefnai fa komam monda faro fararur Yahwe byuk ḇe ko na?

⁴ Yesus ikofen ḇepon kwar sarisa na ḇejadi ma moḇ snonggaku sikenem raya ḇyeḇair ḇe ras-ras ḇepupes.  Yesus ifawi roi nane nari nafnai fa manfamyan ḇyesi sifrur fararur ine wer ḇa. Inja ikofen yoḇ si fa siwaren pdef. (Mat. 24:42) Ro fafisu Nuh ikenem ya, roi nabor naisya nafrur fa kawasa sya simewer srower swarapepen ikofen anya. Baboine kako moḇryairi. (Mat. 24:37-39; 2 Ptr. 2:5) Iso ḇefnai fa komarisen komam monda faro fararur Yahwe byuk ḇe ko na.

5. Rosai Farfyar 1:6-8 ikofen ḇekur ḇe moḇ kobaryas ro na?

⁵ Ro baboine, fandun fa kokara ḇe fararur ḇaḇebaryas abar ḇepyum Karajan. Yesus doḇe marmar ḇyedi posa kwar ido, nari manfamyan ḇyesi sifrur fararur ine pdef ro moḇ ḇebor ma ro swaf kawan syadi wer. (Yoh. 14:12) Rofyor Yesus imar, manfamyan sia skaḇer fa sraswan. Fafisu Yesus ikenem kaḇer, ras oso ifrur mujisat fa sismai in sibore. Ramnai, Yesus ikofenbos ḇe si wer ḇo doḇe sra sbaryas ma sfarkor snonggaku ḇese fa sakḇe manfamyan nama fararur ḇefandun syadi ro fararur ḇesena. (Yoh. 21:15-17) Fanam Yesus imbe dek ḇe nanggi, fyasnai ḇe manfamyan ḇyesi fararur irandak kwar anya nari sifrur na rawo sup Israel pember ya. (Wasya Farfyar 1:6-8.) Taun riḇeso mura, Yesus byuk fasasnai ḇe manwawan Yohanes fa byukiḇair rosai na ḇejadi ro ”Manseren ras ḇyedi”. * Fasasnai ḇeba isoine Yohanes myam malaikat oso nya angginem ḇepyum ḇekain fyoro ma byaryas faro er, keret, wos, ma kawasa kam. (Why. 1:10; 14:6) Nasnai kaku, ro baboine Yahwe imarisen insama kobaryas ro supswan ine ḇesiper isof namnai.

6. Rosai na kofrur insama kokara monda faro ­fararur ḇaḇebaryas ya?

⁶ Kokara pyum rosai Yahwe ifrur kwar  fa ifnoḇek ko ido, nari kokara monda faro fararur ḇaḇebaryas. Imnis raris fyasos anan rur nabor roro syap sifrur kwar ma eḇe elektronik, audio, ma vidio serekam kwar, ma JW Broadcasting na. Kokarapan: Situs web koḇena naser anun ḇepyum nasyadi ro wos ri 1.000 kwar! (Mat. 24:45-47) Snonggaku ḇero dunya ine sḇesisye kukro fararur polotik, agama, ma ono senana syadi ono wer sakna roi oḇa. Mboi Allah kawasa Ḇyesi ro supswan ine ḇesiper sisyadi ro yuta riwar sisya sḇeoser. Rupa ra komam ro ras Jumat tanggal 19 April 2019 aniwara, Saksi Yahwe ḇero supswan ine ḇesiper seoser fa sawawos mnuk ro Refo faro ras ani. Ro ras anya roḇ ya, kawasa ri 20.919.041 siryur fa sifrur Munara Swarapepen fa sikswarepen Yesus marmar ḇyedi. Kokara pyum syowi ḇeba koḇena fa komam ma kaksun ro nyan ḇepyum ine ido, nari kokara monda faro fararur Karajan ya.

7. Moḇsa Yesus nyan ḇyena nafnoḇek ko rai?

⁷ Nyan ḇese insama komam monda faro fararur ḇaḇebaryas iso koso raris moḇ Yesus imbran raya. Imewer roi ono nadwarek i fa byaryas kakaku ro Refo ya. (Yoh. 18:37) Pyampum Ibiris fafrowes ḇyena rofyor Ibiris fyasnai ’roi bebor kam ro supswan ine kuker payamyum ḇyena’. Imewer kaku fyor snonggaku sya imbe skanow i ḇe raja. (Mat. 4:8, 9; Yoh. 6:15) Kyara ḇaḇeri fa imbe daksmai nana nabor ḇaido nasan ḇekaki. (Luk. 9:58; Yoh. 8:59) Koswarepen Paulus anun ḇyena ma koso pyum na kada, na kores nako pdef rofyor roi ono naisya nafrowespan kakyar koḇena. Danunepen snonggaku Kristen sya fa siso Yesus nyan ḇyena insama sisambraḇ ma kakyar sena namuk ḇa!​—Ibr. 12:3.

8. Rosai ḇefnai fa ro kirine fandun kaku kokaḇaḇaḇ?

⁸ Fandun fa kokḇaḇ ro fafisu sairirya monda. Na komarisen insama samswen oso imnai ḇaido kowaf kawan kwar fafisu ḇepyum ya ryama. Nabi Habakuk iwaf kawan kaku fa roi ḇeḇarḇor ro Yehuda napromes. (Hab. 1:2) Yesus manfamyan ḇyesi sikyar Karajan Allah nari ryama fa fyaspar si ro ḇaḇepapoik Romawi. (Luk. 19:11) Komarisen kaku kowaf ras Karajan Allah nari ipyos roi ḇeḇarḇor ma ifrur supswan ine ifo kuker snonggaku ḇesouser faro Allah. (2 Ptr. 3:13) Imbape, fandun fa kokḇaḇ kowaf isof oras Yahwe dap kwar ryama. Kokarapan nyan riḇeso Yahwe fyarkor ko fa kokaḇaḇaḇ.

9. Fawar rosai ḇefasnai Yahwe ima kyaḇaḇ?

⁹ Allah Yahwe iso ḇepon kaku ḇefasnai kaḇaḇaḇ. Byuk swaf ḇe Nuh i fa ḇyawes wai ḇeba ma iwan i fa ikofenḇair swarapepen yoḇ kawasa sya. (2 Ptr. 2:5; 1 Ptr. 3:20) Fafisu Abraham ifakfuken ker moḇ Yahwe imbe byuk samamyai ḇe mnu Sodom ma Gomora, Yahwe ryower pyum i. (Kej. 18:20-33) Ro swaf taun ḇe taun, Yahwe ikḇaḇ kaku faro er Israel sya kukro sisoasuser ḇa. (Neh. 9:30, 31) Ro baboine komam kako Yahwe fyasnai kaḇaḇaḇ kuker byuk swaf ḇe snonggaku sya fa sakfanam faro I. (2 Ptr. 3:9; Yoh. 6:44; 1 Tim. 2:3, 4) Yahwe nyan Ḇyena nadif ko fa kakfasnai kaḇaḇaḇ fyor kora kobaryas ma kobuk farkarkor. Yahwe fyarkor ko kako kuker byuk wos sarḇer ḇepyum ro Refo.

10. Imnis wos ro Yakobus 5:7, 8, rosai kofarkor ro snonggaku ḇefrur yaf?

¹⁰ Wasya Yakobus 5:7, 8. Fawar ḇekur snonggaku ḇefrur yaf, ine fyarkor ko  moḇsa koḇekaḇaḇaḇ raya. Imbo, rokaker ono naisya nasur fasaw ḇae. Imbape, rokaker ḇese sfandun swaf kawan syadi fa sisur rawo smarem ḇo sbuk bon. Ḇefrur yaf ḇero sup Israel sya na skaker ro swaf paik riwonem. Skaker mor fafisu rep ya dado randak, isoine paik Oktober faduri. Mura rep ḇepupes ya dado raposa insape sra suf afuf ya, isoine ro paik April faduri. (Mrk. 4:28) Ipyum kaku fa kokḇaḇ raris ḇefrur yaf ansine. Mboi inema roi ḇepyan risya ḇa.

11. Moḇsa kokḇaḇ na nafnoḇek ko ro fararur ḇesren koḇena rai?

¹¹ Snonggaku ḇenapes ḇa koine na komewer kowaf kawan fa kosmai bon ro fararur koḇena. Ḇape komarisen kakna yaf ido, na kokar ai knam na, kobai saprop na, mura koker rokaker na. Fandun fa komam pyum na ker isoine kofrur sren ma koruḇ na insama nasur pyum ma nbuk bon. Imnis rarirya, fandun fa kosewar ro fararur ḇaḇebaryas. Kofandun swaf fa kofnoḇek ḇefarkor Refo sya fa smamfarfir ḇa ma sfasnai saswar. Kokḇaḇ ido na nafnoḇek ko fa koḇesanekar ḇa fafisu sia simewer srower ko. Mboi sia simarisen srower ma sfarkor Refo ido, na kokḇaḇ faro si. Kopok kodif awer si fa sikyar. Fafisu ono ido, Yesus manfamyan ḇyesi sifawi ḇeri roi Yesus fyarkor faro si na ḇa. (Yoh. 14:9) Iḇye kada koswarepen koma koker ma koruḇ monda, mboi Yahwe iso ḇefrur na fa nasur.​—1 Kor. 3:6.

12. Moḇsa kofasnai kaḇaḇaḇ fyor kobaryas ḇe karyer koḇesya rai?

¹² Na kokara samswen fa kofasnai kaḇaḇaḇ fyor kobaryas ḇe karyer koḇesya. Wos farkin ḇero Pengkhotbah 3:1, 7 na nafnoḇek ko. Ikofen, ”Oras naisya . . . fa kofasise ma oras fa kawose.”  Frur pyum koḇena naiso ḇefnai fa simarisen srower angginem kun faro si na. Imboi, kosewar ker swaf fa kawos kakaku ro Refo faro si. (1 Ptr. 3:1, 2) Kobaryas ma kobuk farkarkor kuker raryaḇ nama napyum, mboi ḇefandun syadi iso kofasnai kaḇaḇaḇ faro snonggaku syakam, ma faro kina koḇesi kako.

13-14. Mansei monda ḇefasnai kaḇaḇaḇ fa koso nyan sena?

¹³ Kofawi fa kofasnai kaḇaḇaḇ kuker kofarkor ro snonggaku ḇesoasuser ro fafisu naiwara ma baboine. Habakuk imander kaku ras oso roi ḇeḇarḇor napromes, mboi fyasnai kaḇaḇaḇ ḇo doḇe, ”Nari yores pdef.” (Hab. 2:1) Manwawan Paulus doḇe imbe ifrur posa fararmyan ḇyena. Imboi, kuker kaḇaḇaḇ imyaren pdef fa byaryas abar ḇepyum.​—Kis. 20:24.

¹⁴ Kokarapan fawar ro mambeswa imbeswa oso ḇemnai ro farkarkor Gilead. Sor su fa sufarmyan ro sup oso. Imbape, Saksi Yahwe sisya ro sup anya ḇa ma kawasa ḇebor sima se Kristen ḇa. Ḇemarisen ḇefarkor Refo, sibor ḇa. Imbape, min suḇesi ḇeyakso farkarkor Gilead ḇefarmyan ro sup ḇese, sikofen ḇe su ḇo soḇe sufnoḇek snonggaku sibor kwar fa sfarkor Refo ma sakḇe Saksi Yahwe. Ro moḇ sufarmyan ro ya snonggaku ḇero diwa sya simewer srower, mboi sukaḇaḇaḇ fa subaryas pdef. Taun riwar mura, sumarisen kukro oso ḇefarkor Refo kuker su dakḇebaptis. Rosai kofarkor ro fawar nane? Snonggaku ḇesoasuser faro Yahwe I na siryaḇ pdef ma sipok simor ḇa. Rarirya, Yahwe ḇyebarakas si kukro sfasnai kaḇaḇaḇ kwar. Iḇye kada ’komarisen koso si snar kakyar ma kaḇaḇaḇ sismai rarwas ro Allah asas ḇyedi’.​—Ibr. 6:10-12.

15. Nyan oser risaiso na kakyar syambraḇser ko fa kobaryas?

¹⁵ Kokyar faro anun kobaryas anya, inja komarisen fa korwas na ḇe snonggaku ḇebor syadi. Kokyar faro Allah asas Ḇyena ro Refo. (Mz. 119:42; Yes. 40:8) Komam kada ḇardadi ro Refo ndarirya kwar. Komam moḇsa snonggaku sya sfadwer kenem sena rofyor sisouser farkankin ro Refo na. Nane nafrur fa kokyar fandun fa snonggaku syakam sifawi abar ḇepyum Karajan ya.

16. Imnis wos ro Mazmur 46:1-3, kokyar faro Yahwe ma Yesus ido moḇsa nsambraḇser ko fa kobaryas rai?

¹⁶ Kokyar kako Yahwe iso Knam ḇebuk angginem fa kokofenḇair na, ma kokyar Yesus iso Yahwe ryem kwar fa ḇye Raja ro Karajan nanggi. (Yoh. 14:1) Rosai monda ḇekur ko na, Yahwe nari syambraḇser ma fyadiren ko pdef. (Wasya Mazmur 46:1-3.) Oso wer ido, kofawi Yesus ryo nanggi mboi kokyar isya fyarkin fararur ḇaḇebaryas ine kukro Yahwe byuk papoik ḇe i kwar.​—Mat. 28:18-20.

17. Rosai ḇefnai fandun fa kobaryas pdef? Fawarpan.

¹⁷ Kakyar nafrur ko fa kokyar Yahwe nari ḇyebarakas sasewar koḇena, fyorno ido ro nyan kokara na ḇa. (Pkh. 11:6) Imnis ra, ro ras nakam snonggaku sesyaran smam syap-syap korir ro rak beroda na. Nyan kobukibaryas ine ipyum ke? Ipyum ḇae! Syapram Fararmyan Koḇena paik November 2014 iser fawar ro inai babo oso ḇefarkor ro universitas. Soḇe imbe fyas fawar ḇekur Saksi-Saksi Yahwe sya. Ifawi Balai Karajan oso ḇa, mboi myam syap koḇena ro rak bero da ro universitas ḇyedi, inja ismai roi fyandun na fa ifrur fasfas ḇyena. Ḇarpur mura, dakḇebaptis ma kirine fyarmyan ḇe perintis biasa. Fawar anine nfasnai snonggaku ḇemarisen ḇerower abar ḇepyum Karajan sisya kaker. Inja komarisen fa kobaryas pdef.

18. Rosai ḇefrur fa kokyar fararur ḇaḇebaryas Karajan nari nambran imnis Yahwe marisen Ḇyena?

¹⁸ Kokyar kaku fararur ḇaḇebaryas angginem Karajan nari namnai ro oras ḇeyap kwar. Kokarapan roi ḇejadi ro fafisu Nuh ikenem ya. Yahwe ifrur fararur nakam imnis oras dap kwar. Swaf taun ri 120 fyor Fabruḇ Ḇeba myun ḇaim, Yahwe dap oras ḇyena kwar. Ḇarpur mura ido, Yahwe iwan Nuh i fa ḇyawes wai ḇeba. Swaf taun ri 40 ḇaido 50 fanam ḇe Faḇruḇ ya, Nuh fyararur pdef. Fafisu Nuh byaryas anun swarapepen ro Yahwe I, kawasa sya simewer srowerndi. Mboi, Nuh byaryas pdef isof ras Yahwe ikofen fa dun aiwan sya ḇo sisun ḇe wai anya dori. Ramnai, ro oras Yahwe dap kwar, kyen kedwa ya.​—Kej. 6:3; 7:1, 2, 16.

19. Koryaḇ pdef ido, rosai na komam ro ras-ras naiwama?

¹⁹ Kero wer Yahwe nari fyasnai fa kofawi fararur ḇaḇebaryas abar ḇepyum Karajan namnai kwar. Ramnai, nari Allah Yahwe kyakok Setan dunya ḇyedine ma dun ko ḇe dunya babo ḇefo kuker snonggaku ḇesouser faro I. Mboi ro swaf kowaf kaker ine, iḇye fa koso nyan ro Nuh i, Habakuk i, ma snonggaku ḇeryaḇ ḇesesya. Rarirya kada komam monda faro fararur ḇaḇebaryas, kokaḇaḇaḇ, ma komamwarek kakyar koḇena fa nsambraḇ faro Yahwe I ma asas Ḇyena.