1. Rosai Yesus dor faro mandaswan rifyak, ma moḇsa sberai?

YESUS manfamyan rifyak ḇyesi isoine Petrus, Andreas, Yakobus ma Yohanes sima mandaswan sirya. Kowasenpan kada, na skandor kaku fafisu Yesus dor si fa siso i ḇe mandaswan snonggaku. * Inja moḇsa sberai? Refo doḇe, ’Fafisu ya beri sibur pam sena ma siso i.’ (Mat. 4:18-22) Roi sifrur nane nari nfadwer kenem sena ḇeri. Inja kirine sisewar in wer ḇa mboi sisewar snonggaku. (Luk. 5:10) Baboine kako, Yesus dor snonggaku ḇena sne ḇenapes sya ma ḇeswar kakaku ya fa sakḇe manfamyan faro i. (Mat. 28:19, 20) Wakso Yesus fararyor ḇyenane kwar ke?

2. Rosai wafrur ḇepon rofyor wun snemuk ḇaim fa wakḇe mandaswan snonggaku, ma rosai ḇefnoḇek Au fa wun snemuk ine?

² Imbude Auma farkor myaren Refo ya kwar ma fadwer kenem Bena kwar. Mura wun snemuk fa wakḇe manbaryas abar ḇepyum. Wakyar manggun ḇa imbe waso Yesus fararyor ḇyenane ido, besaneso awer. Imbude wamgak kaker kukro wafawi inema snemuk ḇefarfnak risya ḇa. Mboi, Refo doḇe Petrus ma bati ḇyesya sibur pam sena ḇeri. Inja sun snemuk fasawsaw ḇo skara ḇepon ḇa ke? Oroḇa. Ro swaf paik riwonem kwar, sifawi ma sikyar Yesus ima Mesias dirya. (Yoh. 1:35-42) Rarirya kako, imbude wafarkor fa wafawi pyum kwar Yahwe ma Yesus su, ma swewar pdef fa fanam ḇe Yahwe I. Mboi fyor wun snemuk  fa wakḇe manbaryas ḇaim, fandun fa kwara pyum kaku roi ine resari. Rosai ḇefnoḇek Petrus, Andreas ma ḇesesya fa simarisen siso Yesus fararyor ḇyenane?

3. Rari rosai ḇefrur fa komarisen koso Yesus fararyor ḇyena?

³ Yesus manfamyan ḇyesi sima siryaḇ kaku, sifawi pyum, simgak ḇa, ma sfasos pyum si fafisu sfararur kaker ḇe mandaswan. Rari ḇepyum nane nafnoḇek si rofyor sḇe mandaswan snonggaku. Ro farkarkor ine, nari kawos moḇsa kofasnai rari-rari nane. Rarirya nari kombran pyum fararur ḇaḇebaryas ma kobuk farkarkor.

4. Rosai ḇefnai fa Petrus imarisen dakḇe mandaswan?

⁴  Petrus syewar fandun ro ras-ras faro kina ḇyesi kuker fyararur ḇe mandaswan. Petrus myam ine ḇe fararur monda ḇa, mboi ine roi imarisen ifrur nairi. (Yoh. 21:3, 9-15) Ḇarpur mura, dakryaḇ kako fyararur ḇe mandaswan snonggaku. Petrus ḇyekir syadi ro fararur ine kukro Yahwe isaramper i.​—Kis. 2:14, 41.

5. Imnis wos ro Lukas 5:​8-​11, rosai ḇefnai fa Petrus imgak, ma rosai ḇefnoḇek ko insama komgak ḇa?

⁵ Roi ḇedif kaku ko fa koryaḇ kora kobaryas iso snar koswar Yahwe I. Saswar nane nafnoḇek ko fa komewer kokara koma kosyus kofrur fararur ine ḇa. Yesus dor Petrus i fa ḇye mandaswan snonggaku mura ikofen ḇe i, ’Wamgak awer.’ (Wasya Lukas 5:8-11.) Petrus ima imgak ḇa faro roi nari ḇekur i kukro dakḇe manfamyan faro Yesus i. Insape myam ro manggundi Yesus ifrur mujisat  fa smun in sibor kaku. Mboi mujisat Petrus myam nane nafnai fa kyara ima isyus fa fyararur kayam fnoḇek Yesus i ḇa. Raris Petrus i, imbude na wamgak kukro kwara ḇepon rosai na wafrur fa wakḇe manfamyan faro Kristus i. Iso moḇ ḇaḇir raya ido, swambraḇser saswar Bena faro Yahwe I, Yesus i, ma min Bansi. Rarirya, nari waryaḇ kaku fa waso Yesus fararyor ḇyena fa wakḇe mandaswan snonggaku.​—Mat. 22:37, 39; Yoh. 14:15.

6. Rosai wer na ḇefrur fa koryaḇ kobaryas?

⁶ Roi ḇese na ḇefrur fa koryaḇ kobaryas iso kosouser Yesus parenta ḇyenane: ’Mgora mura, mgofarkor er sya kam ḇe manfamyan ayesi.’ (Mat. 28:19, 20) Kora kobaryas kako kukro imbe kofnoḇek snonggaku ḇembrus ma ḇekandera sya. (Mat. 9:36) Fandun kaku fa sifawi kakaku ḇekur Karajan Allah. Yahwe imarisen snonggaku syakam sismai fawawi ḇekaku ma sismai fasaspar​—1 Tim. 2:4.

7. Imnis wos ro Roma 10:​13-​15, rosai ḇefnai fa fararur ḇaḇebaryas ima roi ḇefandun kaku?

⁷ Kokara mura faro payamyum nari kosmai na kada, nari koryaḇ fa kobaryas. Bisa kofnoḇek snonggaku sya fa sismai fasaspar Mandaswan sya nari san ḇaido sboḇ in sismai kwar na. Imbape, snonggaku kosrow ro ḇaḇebaryas sima kofnoḇek si fa sismai fasaspar​—Wasya Roma 10:13-15; 1 Tim. 4:16.

8-9. Roi risai monda mandaswan oso fandun fa ifawi na, ma ifawi na kukro?

⁸ Ro Yesus fafisu ḇyedi, mandaswan ḇero Israel sya imbe sra sraswan ido, na sisewar fa sifawi in risai monda ḇero moḇ imbe sipyar ro ya. (Im. 11:9-12) Fandun fa sifawi kako moḇ risaiso in sya sibore. In sya na sisya ro moḇ roḇean na naisya ma sro war ḇefamfnom ḇa. Mandaswan sya ipyum fa sifawi swaf ḇesrow fa sra sraswan. Kokarapan fawar ro Saksi oso ḇeraker aimando Pasifik. Ras oso, dor misionaris fa sura suraswan. Misionaris ani doḇe, ”Meser arwo kusrow ku ro oras siw ya in.” Mboi naek ani doḇe, ”Bo naek na jadi ḇa. Kura ro oras kumarisen na awer mboi kura kumun pam ro oras na kusmai in sya sibore.”

⁹ Mandaswan snonggaku ro awar randak siwara kako sra ḇe moḇ nari sisrow snonggaku sibor. Sisewar kako fa sifawi oras ḇepyum fa na sisrow si. Imnis raris, Yesus manfamyan ḇyesi sra sbaryas ro bait, rum ari, pasar, ma ro rum ḇe rum. (Kis. 5:42; 17:17; 18:4) Rarirya kako, fandun fa kofawi snonggaku ḇero moḇ kobaryas ro ya, roi sifrur ro ras-ras na. Komarisen kofadwer oras ma moḇ kobaryas raya insama kosrow snonggaku sibor syadi.​—1 Kor. 9:19-23.

10. Rosai Yahwe organisasi Ḇyedi fyasos kwar fa ḇefnoḇek ko?

¹⁰ Mandaswan oso na fyandun robebor ḇesrow ma ifawi moḇsa ḇyepake na rai. Rarirya kako, kofandun robebor ḇesrow fa kobukibaryas ma kofawi kaku moḇsa koḇepake robebor anna rai. Yesus fyasnai ḇe manfamyan ḇyesya kwar nyan fa sbaryas abar ḇepyum ya rai. Ikofenḇair rosai monda sun na, moḇ risai sbaryas ro na, ma rosai nari sawos ya. (Mat. 10:5-7; Luk. 10:1-11) Ro baboine, Yahwe organisasi Ḇyedi fyasos kwar Roi fa Kobukifarkor ḇeser vidio ma syap-syap ḇepyum kaku ḇefnoḇek ko rofyor kobaryas ma kobuk farkarkor. * Ma organisasi fyarkor ko kwar  nyan koḇepake pyum na. Mura, komgak wer ḇa ma kokir syadi ro fararur ḇesren ine.​—2 Tim. 2:15.

11. Rosai ḇefnai fa mandaswan snonggaku sima simgak ḇa?

¹¹ Mandaswan sima simakakak ḇa kukro sifawi mnis ḇa na soren nerisen ke roḇa. Fafisu ono ido na sra sraswan rawo roḇ kaku. Mandaswan snonggaku koine kako kopok komgak awer. Fafisu kora kobaryas ma kokofenḇair ḇe snonggaku ḇese koma Saksi Yahwe siko ido, imbude nari kosmai samswen imnis ra risen ḇeba. Rupa ra, kina koḇesya simsor ko, bati koḇesya skoryae ko, ma sisya spampum angginem kobaryas na. Imbape, kopok kokandor ḇa. Yesus ikofen ker ḇe manfamyan ḇyesi kwar nari sismai roi ḇesamswen fafisu sra sbaryas.​—Mat. 10:16.

12. Rariso wos ḇero Yosua 1:7-9 nafnoḇek ko fa komgak ḇa?

¹² Rosai wafrur kaku insama wamgak ḇa? Ḇepon ya, wakyar kaku Yesus isya fyarkin fararur ine ro nanggi mumfes. (Yoh. 16:33; Why. 14:14-16) Oso wer ido, wakyar kaku Yahwe ḇyeasas kwar nari fyasos rosai wafandun na. (Mat. 6:32-34) Kakyar Bedi syambraḇ ido, nari wamgak ḇaḇeri. Petrus ma bati ḇyesya sna kakyar ḇesambraḇ kaku, inja sibur fararur sena ma siso Yesus i ḇeri. Au  kako fasnai kwar kakyar ḇemnis rarirya. Imnis raris, wamgak ḇa fa wakofenḇair ḇe kina Bansi snar wafarkor Refo kuker Saksi Yahwe ma waso fananjur ya kwar. Fadwer kako rari ma nyan kenem Bena kwar insama wafrur Yahwe imarisen. Wakyar ma wamgak ḇa ḇesyandari wafrur roi nane kwar. Kirine kako, Ausya swewar kaker fa wamgak ḇa. Wakyar Yahwe nari ryous Au ḇesya kwar.​—Wasya Yosua 1:7-9.

13. Rariso benadi ma wawasenkara roi Yahwe ifrur ro fafisu naiwara nafnoḇek Au fa wamgak ḇa?

¹³ Rosai wer na wafrur fa wamgak ḇa? Benadi wor Yahwe I fa isaramper Au insama wamgak ḇa. (Kis. 4:29, 31) Yahwe na kyarem nadi Bena ma isaramper Au ḇesya kwar. Wawasenpan fafisu naiwara moḇsa Yahwe fyaspar manfamyan Ḇyesi rai. Imnis raris, Yahwe irwas Soren Ḇerik fa ḇye suru insama er Israel sismai ḇaḇye. (Kel. 14:13) Yahwe fyaspar kawasa Ḇyesi ro fafisu naiwara, inja nari dakfnoḇek ko ro baboine kako. Oso wer ido, kwara moḇsa Yahwe ifnoḇek Au kwar fyor wasmai samswen ma ifnoḇek Au fa fadwer kenem Bena. Wakyar faro Yahwe I raris manfasfas Mazmur. Doḇe, ”Yahwe isya ro bar yedi; yapok yamgak ḇa. Rosai na snonggaku sya sifrur faro aya?”​—Mz. 118:6.

14. Farkarkor rosai kun ro imbesrar Masae ma Tomoyo fawar suḇena?

¹⁴ Yahwe ifnoḇek snonggaku ḇemamyai fa simgak wer ḇa. Kokara moḇ Yahwe ifnoḇek si kada, nari komgak ḇa. Komam fawar ro imbesrar oso snori Masae. Ima imamyai ma kyara na jadi ḇa fa byaryas ḇe snonggaku ifawi ḇaim sya. Doḇe ine imnis ra ayar karui ḇekaki ipok fa dek ro na ḇa. Inja moḇsa byerai? Syewar fa iswar syadi Yahwe I ma snonggaku ḇese. Kyara ker fararur ḇesren ima fyandun kaku ro ras-ras ḇepupes ine. Ḇyenadi ḇo dor fa Yahwe ḇye i fa nya marasrisen fa rya byaryas. Ḇarpur mura, imamyai wer ḇa ma dakfarmyan ḇe perintis biasa. Yahwe na ifnoḇek kako manbaryas ḇebabo sya fa simgak ḇa. Iso imbesrar oso snori Tomoyo roi dakḇaḇir na. Rofyor iso randak ro ḇaḇebaryas, snonggaku isrow randak ya dar naba i ḇo doḇe, ”Saksi Yehova mgorya e, yamewer yawos kuker mgo!” Mura snonggaku ani ḇyaserpum kedwa ya. Mboi, srar Tomoyo imgak ḇa ḇoi ikofen ḇe imbesrar ḇewarpu i ḇo doḇe, ”Yawos ḇaim mboi ifawi kwar ayaine Saksi Yahwe. Yamarisen kaku!” Kirine srar Tomoyo ifarmyan ḇe perintis biasa.

15. Rariso mandaswan oso fyasnai fyasos pyum manggundi, ma rosai ḇefnai fa kakfrur na kako?

¹⁵ Mandaswan oso imbe ismai in sibor ido, fandun fa fyasos pyum manggundi. Na ikḇok ro romfawru fa rya iraswan, ma soren ya ḇyeriseno na fyararur pdef. Imbo, snonggaku ḇemyaren nari ḇyensewar kaku fa ifrur roi imbe ifrur na ḇae. Ko kako fandun fa kofasos pyum ko insama kosusu ḇa ma kofrur posa fararur koḇena.​—Mat. 10:22.

16. Rariso kofasnai kofasos pyum ko rai?

¹⁶ Snonggaku koine samswen fa kofasos manggunko. Komarisen kofrur monda roi kokara napyan fa kofrur na. Inja insama kofasos pyum ko, fandun fa kofarmku manggunko. Kosewar kaku fa kofrur roi kokara samswen fa kofrur na. Yahwe na isaramper ko roro rur ḇesren Ḇyedi.​—Gal. 5:22, 23.

17. Raris wos ro 1 Korintus 9:25-27, rosai Paulus ifrur kaku insama fyasos pyum manggundi?

 ¹⁷ Manwawan Paulus fyasnai kaku ima fyasos pyum manggundi. Imboi doḇe fandun fa syewar kaku insama bisa ifrur roi ḇekaku na. (Wasya 1 Korintus 9:25-27.) Danun ḇe snonggaku ḇesesya kako fa sakfrur rarirya ma sifrur roi nakam ”kuker syowi ma awnos”. (1 Kor. 14:40) Fandun fa kofasos pyum ko insama bisa kombran pyum fararur koḇena, isoine kobaryas ma kobuk farkarkor.​—Kis. 2:46.

18. Rosai na ḇefrur fa Yahwe myam kofrur fararur koḇena fa napyum kwar?

¹⁸ Soḇe mandaswan ḇepyum ima smam ro in ismai ya sibor ke roḇa. Imbape, fararur ḇaḇebaryas ima iḇese. Smam ko ḇe manbaryas ḇepyum kukro barbor ro snonggaku kofnoḇek fa sakḇe Saksi Yahwe ḇa. (Luk. 8:11-15) Komku fa kobaryas abar ḇepyum ma kofarkor snonggaku ḇese ido, Yahwe na myam kofrur fararur koḇena fa napyum kwar. Kokofen radine kukro? Snar kosouser faro Allah Yahwe ma Yesus su kwar.​—Mrk. 13:10; Kis. 5:28, 29.

19-20. Rosai ḇefnai fa ḇaḇebaryas ima fararur ḇefandun kaku nairi?

¹⁹ Ro sup ḇeba ḇeḇeso, sḇe mandaswan sya fa sisewar in ro swaf paik ono monda. Inja, swaf anya fanam imbe ibro ido, na sisewar kaku fa sismai in sibor syadi. Rarirya kako, mandaswan snonggaku koine. Papupes dunya ine fyanam kaku kwar! Swaf ya nakwan wer ḇa fa kobaryas abar ḇepyum insama snonggaku sya sismai ḇaḇye. Fararur ine fyandun kaku, inja kowafwaf awer ḇaido kokara ḇo koḇo swaf ya isrow resari insape kakso ro fararur ine.​—Pkh. 11:4.

²⁰ Ro kirine ḇeri, waryaḇ syadi fa wabaryas, farkor Refo fa wafawi nabor syadi, wamgak awer, ma fasos pyum Au. Waso fa wakbaryas abar ḇepyum fnoḇek mandaswan snonggaku, sisyadi ro yuta riwar. Na wasmai raryaḇ ḇerama ro Yahwe I. (Neh. 8:10) Swewar kaku fa wakbaryas ḇe snonggaku syakam isof ro Yahwe doḇe fararur ine posa kwar. Ro farkarkor ḇerama ya, nari kawos nyan rikyor moḇsa kosambraḇser snemuk koḇena fa kobaryas abar ḇepyum Karajan.