1. Rofyor umur koḇena nek muryas, rosai na kofrur kaku ya?

ROFYOR umur koḇena nek muryas, imbude koḇeḇirḇar snar koḇaḇir sifandun ko wer ḇa kwar ro Yahwe organisasi Ḇyedi. Ḇape, kosambraḇ imnis randak ya ḇa kwar raryano, fawawinanem ma pengalaman koḇena na komarisen kobukifarkor ḇebabo syadi sya. Rarirya, sbuk na fa sisaramper Yahwe organisasi Ḇyedi ma nfasos si fa sifrur fararur ḇebor sismai na. Penatua ḇefyoro kwar oso doḇe, ”Jadi fa yafrur nabor raris randak iwara ḇa snar yaḇemansar kwar. Ḇape, yakofen kasumasa kaku kukro naek ḇebabo sya sisya na ḇefadwer fararur ayena.”

2. Rosai nari kawos ro farkarkor ine?

² Ro farkarkor ḇepon ya, kawos kwar rosai fainda sismai ya fyor naek srar ḇebabo sya sebati kuker ḇeḇesinan kwar sya. Ro farkarkor ine, nari kawos rariso naek srar ḇeḇesinan kwar sya sfasnai sne ḇerun, sifawi ḇaḇeraryar ḇa sena, sesyowi fafnoḇek sbuk na, ma sfasnai snemura. Rarirya, na sifarur kayam kuker ḇebabo syadi sya, ma sidang ya kam nari sismai barakas ya.

3. Ro Filipi 2:3, 4 ya, imnis rariso snonggaku ḇena sne ḇerun sya, ma fainda rosai kosmai na fyor kofasnai sne ḇerun?

³ Naek srar ḇeḇesinan kwar fandun fa sfasnai sne ḇerun fyor simarisen sifnoḇek ḇebabo syadi sya. Snonggaku ḇena sne ḇerun kyara snonggaku ḇese sikaki syadi ro i. (Wasya Filipi 2:3, 4.) Naek srar ḇeḇeumur kwar sya sifawi nyan nabor nasya fa sifrur roi oso, ma ḇebuk bon ḇepyum kako ma imnis farkankin ḇero Refo. Inja, na sor nabor ro snonggaku ḇesesya ḇa fa sbuk raris si imnis randak iwara. (Pkh. 7:10) Kaku, ḇeḇesinan kwar sya sna fawar  ḇepyum na sfawar ḇe romawa babo sya. Imbape, sifawi snar fafisu dunya ine isya fyararwe inja fandun fa sifrur fararwe kako.​—1 Kor. 7:31, fasfas kasun.

4. Rariso pengawas wilayah siso farari ro snonggaku Lewi sya rai?

⁴ Naek srar ḇeḇesinan kwar ḇena sne ḇerun sine sifawi snar umur sena, na jadi fa sifrur nabor raris randak iwara ḇa. Imnis ra ḇe pengawas wilayah sya. Rofyor seumur 70 kwar, sor si fa sifrur fararur ḇesena. Fararwe nane napyan ḇe si ḇa, snar simarisen kaku sifarmyan naek srar sya ḇe pengawas wilayah. Simarisen fararur ani, ma simewer simnai ro fararur ine. Ḇape, sifawi kaku snar ipyum syadi sbuk fararur ani ḇe ḇebabo syadi sya. Mamam sena imnis kuker snonggaku Lewi ḇero Israel fafisu iwara. Fafisu seumur taun ri 50 kwar, snonggaku Lewi na simnai kwar fa sifarmyan ro tabernakel. Ḇape, raryaḇ sena ndrama ro fararur sena ḇa. Simarisen sifrur fararur risai monda ma sḇesewar kaku fa sifnoḇek ḇebabo syadi sya. (Bil. 8:25, 26) Kirine, naek randak iwara ḇe pengawas wilayah sya, kaku sra ḇe sidang oso monda. Ḇape, sfasnai kaku sima sḇebarakas ḇeba kaku faro sidang ani.

5. Rosai wafarkor ro Dan ma Katie fawar suḇena?

⁵ Mampan Dan fawar ḇyena, duffarmyan ḇe pengawas wilayah syadi ro taun ri 23. Rofyor ḇyeumur 70, i ma swari  Katie i, suna fararur ḇebabo ḇe perintis istimewa. Sumarisen faro fararur ḇebabo susmai ine ke? Imbo, Dan doḇe snar kirine imarisen kukro ifrur nabor syadi ro ḇepon naiwara. Ismai fakamamar nabor ro sidang, ifnoḇek naek sya fa sḇe hamba pelayanan, ma byuk farkarkor ḇe manbaryas sya kako insama sbaryas ro kota ḇeba na ma sbaryas ro bui. Inja, naek srar ḇeḇesinan kwar mgoya, mgoisya mgofarmyan ro fararur ḇesren ro oras nakam ke roḇa ke, roi nabor nasya bisa mgofrur fa mgofnoḇek snonggaku ḇesesya. Mgosewar kaku fa mgoryaḇ pdef kuker fafisu mgoḇena ro kirine, mgap roi imbe mgofrur wer na, ma mgomam monda faro rosai na mgofrur na.

6. Rosai ḇefnai fa snonggaku ḇefawi ḇaḇeraryar ḇa ḇyena ima fyandun kaku? Buk sarḇer.

⁶ Snonggaku ḇefawi ḇaḇeraryar ḇa ḇyena, ifawi na ifrur roi nabor ḇa. (Ams. 11:2) Ifrur imnis samambraḇ manggun ḇyena. Inja, na ḇyeaski ma imarisen pdef fa ifrur rosai bisa ifrur na. Snonggaku ḇefawi ḇaḇeraryar ḇa ḇyena imnis kuker snonggaku ḇeyun oto ro nyan ḇeḇebame. Fandun fa ḇyeofor gigi fa nsabu syadi insama dek muryas pdef. Ifrar aḇaḇen raryano, nari imbran pdef. Rarirya kako, snonggaku ḇefawi ḇaḇeraryar ḇa ḇyena na ifawi fafisu risai fandun fa ”ḇyeofor gigi” ḇaido ifrur fararwe insama bisa ifarmyan pdef ḇe Yahwe ma ifnoḇek snonggaku ḇesesya.​—Flp. 4:5

7. Rosai ḇefasnaiḇair snar Barzilai ima ifawi ḇaḇeraryar ḇa ḇyena?

⁷ Mgorama komam Barzilai fawar ḇepyum ḇyena. Rofyor ḇyeumur 80, Raja Daud dor i fa ḇyarek ro istana ḇyedi. Ḇape, Barzilai pyampum fararyor byana snar ifawi ḇaḇeraryar ḇa ḇyena. Ifawi jadi fa ifrur nabor syadi ḇa snar ḇyesinan kwar. Inja, Barzilai dor insama sfadwer i kuker Khimham, snon ḇebabo syadi. (2 Sam. 19:35-37) Raris Barzilai, naek ḇeḇesinan ro fafisu ine kako simarisen sbuk swaf faro ḇebabo syadi sya fa suffarmyan ro Yahwe organisasi Ḇyedi.

8. Rosai ḇefasnaiḇair snar Raja Daud ima ifawi ḇaḇeraryar ḇa ḇyena?

⁸ Raja Daud i kako fyasnai nyan ḇepyum kuker ifawi ḇaḇeraryar ḇa ḇyena. Imarisen kaku ḇyawes rum faro Yahwe I. Ḇape, Yahwe ikofenḇair ḇe i snar fararur ine na byuk ḇe Salomo ḇebabo syadi kaker ya. Daud imarisen faro rosai Yahwe ikofen na, ma ḇyesewar fa ifnoḇek fasasos ḇaḇawes ani. (1 Taw. 17:4; 22:5) Daud ima kyara ḇaḇeri snar na iso ḇeḇawes Yahwe bait Ḇyedi kuker pyum kaku snar Salomo ”byabo kaker ma ifawi nabor kuf ḇaime.” (1 Taw. 29:1) Daud ifawi snar fararur anine imbran pyum snar Yahwe I, inema faro ḇeḇesinan kwar ḇaido ḇepengalaman ro snonggaku ḇefarkin fararur ani ḇa. Snar siso Daud nyan ḇyena, ḇeḇesinan kwar sya isof ro kirine fararur sena nefarwe kwar, mboi sifarmyan pdef kaker ḇe Yahwe I. Ma sifawi, Yahwe nari ḇyebarakas romawa babo ḇefadwer pyan fararur sena.

9. Rosai ḇefasnaiḇair snar Shigeo ima ifawi ḇaḇeraryar ḇa ḇyena?

⁹ Ko kako kofarkor ro naek oso ḇenir Shigeo, ḇefawi ḇaḇeraryar ḇa ḇyena. Ro 1976, rofyor ḇyeumur 30, skur i ḇe anggota Panitia Cabang. Taun 2004, ḇye koordinator Panitia Cabang. Ḇarpur mura, ifawi snar isambraḇ ḇa kwar raris randak  iwara ma jadi fa ifrur samberen fararur ḇyena wer ḇa. Inja, ḇyenadi faro roi ine ma kyarauser payamyum ḇyena fyor naek ḇebabo syadi sya sfadwer fa suf fararur ḇyena. Kirine, Shigeo ḇye koordinator wer ḇa, ḇape ifarmyan kaker ḇe anggota Panitia Cabang. Rarirya ido, rosai kofarkor ro Barzilai, Raja Daud, ma Shigeo fawar ḇepyum skoḇena? Snonggaku ḇena sne ḇerun ma ḇefawi ḇaḇeraryar ḇa ḇyena nari myam monda faro rosai na romawa babo sifrur na, ḇape faro rosai jadi fa sifrur na ḇa. Nari myam si ḇe min fararur ḇyedi, ḇape kyara ikaki syadi ro si ḇa.​—Ams. 20:29.

10. Rariso naek srar ḇeḇesinan kwar sya smam romawa babo ro sidang sya rai?

¹⁰ Naek srar ḇeḇesinan kwar smam ḇebabo syadi sya ḇe hadiah ḇepyum ḇerama ro Yahwe I, ma sesyowi si. Sikofen kasumasa snar fafisu samambraḇ sena nasyaḇa kwar, romawa babo sisya ḇemarisen ma ḇesambraḇ fa ḇeyuf fararur ro sidang na.

11. Raris Rut 4:13-16 ya, rosai barakas Naomi ismai na snar imarisen ismai fafnoḇek ro Rut i?

¹¹ Ro Refo, fawar ḇepyum oso isya ro Naomi i. Ima bin ḇeḇesinan kwar ḇoi ḇyesyowi fafnoḇek ro ḇebabo syadi sya. Randak ya, rofyor romawa ḇyedi imarbur i, Naomi iwan Rut imbikin ḇyedi fa kyaḇer ḇe kina ḇyesi. Ḇape, Rut dor fa iso warpu Naomi fa subur ḇe Betlehem. Naomi imarisen kaku snar Rut imbe iso kuker i, ma imarisen fafnoḇek Rut byuk na. (Rut 1:7, 8, 18) Snar snemuk dun ine, Rut ma Naomi susmai barakas ḇeba kaku! (Wasya Rut 4:13-16.) Ro fafisu ine, naek srar ḇeḇesinan kwar ḇena sne ḇerun sya na  simarisen kaku siso farari Naomi nyan ḇepyum ḇyena.

12. Rariso Manwawan Paulus fyasnaiḇair snar ima ḇyesyowi fafnoḇek ismai na?

¹² Manwawan Paulus ḇyesyowi fafnoḇek ismai na. Imnis ra, ikofen kasumasa faro snonggaku Kristen ḇero Filipi faro fafnoḇek sfarem na. (Flp. 4:16) I kako ikofen kasumasa snar Timotius ifnoḇek i kwar. (Flp. 2:19-22) Oso wer ido, Paulus ikofen kasumasa faro Allah kukro naek srar sya srama sisambraḇseri fafisu isya ro marandan ḇyena ḇe Roma moḇ sidwareki. (Kis. 28:15) Paulus ima snonggaku ḇesambraḇ dirya. Imbran isof ro moḇ ḇebinggwan kaku fa byaryas ma syambraḇser sidang-sidang na. Rariryano, imai ḇa fa ismai fafnoḇek ro naek srar sya.

13. Rariso naek srar ḇeḇesinan kwar mgofasnaiḇair mgoḇesyowi fafnoḇek ro romawa babo sya?

¹³ Naek srar ḇeḇesinan kwar, bisa mgofasnaiḇair snar mgoḇesyowi fafnoḇek mgosmai ro romawa babo ro sidang mgoḇedi. Imnis ra, fyor simarisen sunpyan mgo, sikaḇkoḇes pyan ḇe mgo, ḇaido sbuk fafnoḇek ḇese ido, mgopampum awer na. Mgoswarepen, fafnoḇek sena iso nyan oser Yahwe fyasnai saswar Ḇyena faro mgo. Ma ḇarpur ya, imbude mgoḇebati kuker romawa babo ansya. Mgofnoḇek si ḇesya kwar fa sifanam kaku kuker Yahwe I. Mgokofenḇair ḇe si snar mgomarisen mgomam romawa babo sya sifrur nabor fa sifarmyan ro sidang. Ma, mgobuk swaf fa mgoḇe kayam kuker si fa mgofawar pengalaman mgoḇena. Rarirya, mgofasnaiḇair kasumasa mgoḇena snar Yahwe dun romawa babo sine kwar ḇe sidang yadori.​—Kol. 3:15; Yoh. 6:44; 1 Tes. 5:18.

14. Rosai ḇefasnaiḇair snar Raja Daud ima fyasnai snemura?

¹⁴ Rari ḇese ḇefandun kaku fa naek srar ḇeḇesinan kwar sna na iso snemura. Ine na kofarkor ro Raja Daud fawar ḇepyum ḇyena. Byuk ḇar eḇa ro arasai ismai na fa byukisonem ḇaḇawes bait ya. (1 Taw. 22:11-16; 29:3, 4) Kokara ido, bait ani nari sap i ḇe bait Salomo. Fyor kosambraḇ wer ḇa kwar fa koso ro fararur ḇaḇawes ya, bisa kosonem kaker kuker kobuk farsarser kosmai na imnis samambraḇ koḇena oser-oser. Ko kako bisa kobuk pengalaman kosmai kwar ro taun ḇe taun fa kofnoḇek naek srar ḇebabo syadi sya.

15. Rosai Paulus irwas ḇaido byuk ḇe Timotius i?

¹⁵ Insama fasnai snemura ya, mampan kako Manwawan Paulus fawar ḇepyum ḇyena. Fafisu ifarmyan ḇe misionaris, dor Timotius ḇebabo syadi fa ifnoḇek i, ma kuker snemura irwas nyan byukibaryas ma byukifarkor na ḇe i. (Kis. 16:1-3) Snar farkarkor ismai ro Paulus i, Timotius ḇyekir fa byaryas angginem ḇeḇye. (1 Kor. 4:17) Ma ḇarpur ya, Timotius dakfarkor ḇesesya wer kako imnis farkarkor ismai ro Paulus i.

16. Rosai ḇefnai fa Shigeo byuk farkarkor ḇe snonggaku ḇesesya?

¹⁶ Ro fafisu koḇedine, naek srar ḇeḇesinan kwar simarisen sfarkor ḇebabo syadi sya. Simgak ḇa nari sepake si ḇa fyor fararur sena ḇebabo syadi sya suf fadwer na. Imnis ra, Shigeo ḇeḇeyap ḇepon anya byuk farkarkor ḇesya kwar ḇe anggota Panitia Cabang ḇebabo syadi sya. Ifrur roi anine ro taun ḇe taun, snar faro i, ḇefandun kaku iso fararur Karajan imbran pdef ro sup ifarmyan ya. Ḇarpur ya, rofyor ḇye koordinator wer ḇa kwar,  naek ḇesesya sisya kwar fa ḇefadwer i. Kirine, Shigeo ḇye anggota Panitia Cabang syadi ro taun ri 45 kwar, ma fyawar pengalaman ḇyena pdef ḇe ḇebabo syadi sya. Naek ḇemnis Shigeo sya sḇe barakas faro Allah kawasa Ḇyesi!

17. Imnis wos ḇero Lukas 6:38, rosai na naek srar ḇeḇesinan kwar sifrur kaku ya?

¹⁷ Naek srar ḇeḇesinan kwar mgoya, mgoiso ḇefasnai kaku snar fararmyan ḇe Yahwe kuker souser ima nyan kenem ḇepyum kaku. Snar mgofasnai nyan ḇepyum, nggokyar kaku snar kofarkor farkankin ḇero Refo ma kosouser na ido nun fainda. Mgona pengalaman nabor kwar fa mgobuk nyan nono fa mgofrur mnis roi oso, ḇape mgomarisen kaker fa mgofrur fararwe snar mgofawi fafisu ine fyararwe pdef. Naek srar ḇeḇesinan kwar ḇebaptis babo mgoya, mgona roi nabor fa mgorwas kako. Bisa mgofawar roi ḇefrur mgoryaḇ snar mgomambir Yahwe I fafisu mgoḇe sinan kwar. Naek srar ḇebabo syadi na simarisen kaku srower fawar mgoḇena ma farkarkor mgosmai na. Fyor mgona fawar nabor ma mgomarisen ’mgobuk pdef’ ido, Yahwe I kako nari byuk barakas nabor ḇe mgo.​—Wasya Lukas 6:38.

18. Rariso naek srar ḇeḇesinan kwar ma ḇebabo syadi bisa sisaramper yae si?

¹⁸ Ḇeḇesinan syadi mgoya fyor mgoḇebati kuker ḇebabo syadi sya, na mgosaramper yae mgo. (Rm. 1:12) Inja, ḇeḇesinan kwar sya ma romawa babo sya sna roi ḇepyum oser-oser. Ḇeumur kwar mgoya mgona fawawinanem ma pengalaman snar mgofawi nabor kuker kankenem ine. Ḇape, ḇebabo syadi mgoya, mgosambraḇ ma bisa mgofrur roi nabore. Rofyor kokam kofararur kayam ma kofanam yae ko, Kma ḇesaswar koḇedi ro nanggi nari sisandik I, ma sidang ya kam nari ismai payamyum.