1. Rosai imbude koḇaḇir ya fyor snonggaku koswar ya ibur kakaku ya?

ḆERO kina ḇaido bati Bedi oso isya sisasyarbur i ro sidang ke? Ausya wasmai roi ani ido, na sne Bedi ikar kaku. Imbesrar oso ḇenir Hilda * doḇe, ”Ras swa yedi imar rofyor nufarḇuk kwar ro taun ri 41, yakara ima roi ḇefrur kar kaku ro kenem ayedi. Ḇape, rofyor romawa yedi ibur kakaku ya, ibur swari ma romawa ḇyesuya, ima roi ḇefrur kar aya syadi wer.”

2-3. Imnis Mazmur 78:40, 41, rariso Yahwe sneḇaḇir Ḇyedi fyor myam manfamyan Ḇyedi oso ibur I?

² Kwarapan moḇsa Yahwe sne Ḇyedi ikar kaku fafisu malaikat ḇero kina Ḇyesi oso isya ibur I. (Yud. 6) Kwarapan kako moḇsa sne Ḇyedi ikar kaku fyor myam snonggaku Israel, kawasa iswar sya, sisampum ker I. (Wasya Mazmur 78:40, 41) Kma ḇesaswar koḇedi ro nanggi kako ḇyesneso kaku rofyor snonggaku koswar ya ibur I. Yahwe ifawi pyum kaku fyor ḇesaneso, ma iswar Au. Inja, nari byuk samambraḇ ḇe Au ma isaramper Au fyor wafandun na.

³ Ro farkarkor ine, nari kawos rosai fandun fa kofrur kaku insa kosmai fafnoḇek ro Yahwe fyor snonggaku koswar ya imnai ifarmyan ḇe Yahwe I. Nari ko kako kofarkor rariso kofnoḇek naek srar ḇesmai samswen ḇeradine. Ḇape ḇepon kaku, mgorama kawos nyan kakara ḇesasar fandun fa kobinggwanbur na.

4. Rariso sinan ḇebor ḇena romawa ḇebur Yahwe I sneḇaḇir sena?

⁴ Rofyor romawa oso imnai ifarmyan ḇe Yahwe, na sinan ḇyesuya sukara ker, ’Ro randak ya yafrur roi ine ḇaido iwa kada, imbude romawa yedi kirine isya kaker ro kakaku ya.’  Naek oso ḇenir Luke, romawa ḇyedi sisasyar i ro sidang, doḇe, ”Yakara ine sasar yenairi. Yamafu famnom kako roi ine ker. Fyorno ido yakanes, ma sne yedi ikar kaku.” Imbesrar ḇese ḇenir Elizabeth, ismai samswen rarirya, doḇe, ”Imbude ayama awin ḇepyum risyaḇa. Yakara, yafarkor pyum kakaku ya fa nsun ḇaim ro romawa yedi sne ḇyedi.”

5. Fyor romawa oso ibur Yahwe I, mansei ḇesasar kaku ya?

⁵ Koswarepen kaku snar ko oser-oser Yahwe byuk fa kokinfir ro manggunko. Inja, na kokinfir nari koḇe kosouser faro I ke roḇa. Romawa babo ono sisya skinfir fa sifarmyan ḇe Yahwe ma sisouser faro I pdef, fafisu sinan ḇyesi sbuk contoh ḇepyum ḇa. Imbape, sinan sya sisewar pyum kwar fa sfarkor kakaku ya ḇe romawa sesi, fama rofyor siba muryas sibur kakaku ya. Inja, romawa ani manggundi ḇeyun snemuk fa ḇefarmyan ḇe Yahwe I. (Yos. 24:15) Rarirya, sinan mgoya, fyor romawa mgoḇesi sibur Yahwe I, mgopok mgokara awer mgoiso ḇesasar ya. Kakara ḇeraryana mgopampum kaku na!

6. Rosai imbude romawa oso ḇyaḇir ya fyor sinan ḇyesi simnai sifarmyan ḇe Yahwe I?

⁶ Kamam ḇaido awin ono sisya kako simnai sifarmyan ḇe Yahwe ma sibur kina sesya. (Mz. 27:10) Ine nafrur romawa ḇyesi sne sena nakar kaku, snar ro rasras romawa oso kyara sinan ḇyesuya suso ḇebuk contoh ḇepyum ḇe i. Esther, ḇena kma ḇe Saksi wer ḇa, doḇe, ”Yakanes ker snar yafawi kamam ayedi ima ifawi kaku byinggwanbur kakaku ya. Ḇape, manggundi ḇeyun snemuk fa ibur Yahwe I. Yaswar i kaku. Ras sisasyar i ro sidang, yakon yawasen ker i. Syadi wer, fyorno ido yabor famfnom.”

7. Rariso Yahwe sneḇaḇir Ḇyedi faro romawa babo ḇena sinan ḇebur kakaku ya?

⁷ Romawa babo mgoya, fyor kamam ma awin mgoḇesi sibur Yahwe, nggoḇe sneso kuker mgo. Mgokyar kaku, Yahwe ifawi mnis kaku saneso mgoḇaḇir na. Iswar mgo ma ḇyesyowi soasuser mgoḇena. Rarirya inggo kako, naek srar mgoḇesya. Mgoswarepen kako, fyor sinan mgoḇesi sifrur snemuk ḇepyum ḇa, ima sasar mgoḇena ḇa. Imnis kawos kwar anya, Yahwe byuk fa manggunko ḇekinfir ya. Inja, snonggaku oser-oser byuk kenem ḇyedi ma ḇyebaptis kwar ido fandun fa ikamar roi ifrur ro manggundi na.​—Gal. 6:5.

8. Rofyor snonggaku koswar sya sisasyarbur si ro sidang, rosai fandun fa kofrur kaku fyor kowaf si fa skaḇer? (Mam kako kotak ” Kwaḇer faro Yahwe I”.)

⁸ Rofyor snonggaku waswar ya ibur Yahwe I, wakyar kaku ras oso nari snonggaku ani kyaḇer. Fyor wawaf ido, rosai fandun fa wafrur kaku na? Fandun fa mamwarek rur Bedi fa syambraḇ pdef. Rarirya, fasnai nyan ḇepyum faro kina ḇesesya ma syadi wer faro snonggaku sisasyar ro sidang ani. Ine iso ḇefrur wafarmku ro roi ḇefrur ḇesanekar ine. Kirine, mgorama kawos rosai monda wafrur kaku na.

9. Kuker nyan risai monda kosmai samambraḇ ro Yahwe I? (Mam kako kotak ” Mnuk-Mnuk Na Ḇesambraḇser Au”.)

⁹ Kofrur roi nakam fa kosambraḇser kakyar koḇena. Wasambraḇser rur bedi pdef ma ḇero kina bansi kako. Moḇsa nyan ya? Kuker wawasya ma wakarauser Allah wos Ḇyena ro ras ḇe ras ma waso fananjur nakam. Bon ya, nari wasmai samambraḇ ro Yahwe I. Joanna, eḇa ḇyedi ibur kakaku ya, doḇe, ”Yaknon syadi rofyor yawasya farfyar ḇero Refo kuker Abigail, Ester, Ayub, ma Yesus sko. Fawar ḇepyum sena nafrur yana kakara ḇepyum syadi, inja nafrur yaḇesanekar manggun ḇa. Aya kako yasmai samambraḇ ro doya-doya koḇedi ḇero JW Broadcasting.”

10. Imnis Mazmur 32:6-8, rosai na ḇefnoḇek ko fa koḇoryae wer ḇa?

¹⁰ Fawar faro Yahwe rosai monda ḇefrur ḇeḇirḇar ya. Rofyor ausya waboryae, wamnai awer fa ḇenadi. Wor fafnoḇek ro Allah ḇesaswar koḇedi insama myam fafisu bedi imnis mamam Ḇyedi. Ḇenadi insama ’fyasnai ḇe moḇ risai fandun fa wamḇran rona’. (Wasya Mazmur 32:6-8.) Kaku, na ḇaḇir marḇak kaku ḇe Au fa wakofen sneḇaḇir bedi ḇe Yahwe I. Ḇape, Yahwe ifawi pyum kaku saneso bena. Iswar kaku Au, ma imarisen dor Au fa wakofenḇair roi ḇero snembri faro I.​—Kel. 34:6; Mz. 62:7, 8.

11. Imnis Ibrani 12:11, rosai ḇefnai fa kokyar snar disiplin ḇerama ro Yahwe ima ipyum kaku? (Mam kako kotak ” Snonggaku Sisasyarbur ro Sidang Nfasnai Kaku Yahwe Iswar Ko”.)

¹¹ Wasaramper penatua sya snemuk sena. Yahwe iso ḇefrur fasasos fa sisasyar snonggaku oso ro sidang. Disiplin  byuk na kuker saswar ani inema faro payamyum snonggaku sya kam, ine kako faro ḇefrur sasar ya. (Wasya Ibrani 12:11.) Imbude, snonggaku ono sisya sifuken snemuk penatua sya sun na ma sawos ḇe ḇesesya. Ḇape, snonggaku ḇerarirya sima sfawar parkara anya nakam ḇa insama ḇefrur sasar ya smam ḇeḇyeḇa awer i. Koswarepen, kofawi fawar anna kam ḇa. Inja, kokyar snar penatua ḇefrur mnis parkara ani sḇesewar kwar fa siso wos farkin ḇero Refo ma Yahwe byuk si fa semankara pyan ḇe I.​—2 Taw. 19:6.

12. Ro Elizabeth ma Mark farfyar suḇedi, rosai fainda ḇyena fyor kosaramper disiplin ḇerama ro Yahwe I?

¹² Wasaramper snemuk penatua sena, inema nafrur snonggaku koswar sya skaḇer ḇe Yahwe I. Elizabeth, ḇeḇeyap ḇepon ani, fyawar sneḇaḇir ḇyedi rofyor romawa snon ḇyedi ḇeba kwar sisasyar i: ”Samswen kaku ḇe aya fa wis ayena kuker i namuk. Imbape fyor kyaḇer ḇe Yahwe, manggundi ikofen ḇo doḇe ipyum mura sisasyar i ro sidang. Ma doḇe, ismai farkarkor ḇepyum nabor. Yafawi disiplin ḇerama ro Yahwe ima kaku napyum.” Swari, Mark i, ikofen kako, ”Ḇarpur ya, romawa nuḇedi doḇe roi oser ḇefrur fa kyaḇer ya iso suyawos kuker i ḇa. Ikofen kasumasa kaku snar Yahwe ifnoḇek nu fa nusouser pdef.”

13. Rosai na ḇefnoḇek Au fa ḇesanekar ḇa?

¹³ Wakofenḇair sneḇaḇir bena faro bati ḇefawi pyum Au. Bebati kuker naek srar ḇemas ro rur ya, na ḇefnoḇek Au fa nwa kakara ḇepyum. (Ams. 12:25; 17:17) Joanna, ḇeḇeyap ḇepon ani, doḇe, ”Yakara yaḇero manggundaya. Ḇape, yasmai fafnoḇek snar yafawar na ḇe bati yakyar kaku.” Inja, rariso fyor snonggaku ono ro sidang sawos wos ḇefrur ḇesanekar kaku?

14. Rosai ḇefnai fa ’kokḇaḇyae ko ma koḇuk ampunyae’?

¹⁴ Wamasasor fasawsaw awer kuker naek srar sya. Waswarepen, snonggaku syakam bisa sawos sasar. (Yak. 3:2) Kokam konapes ḇa. Inja, wakandor awer fyor ono sisya sifawi ḇa ḇo sawos rosai ḇaido wos sena nafrur ḇesanekar. Manwawan Paulus danun ḇe ko, ”Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi.” (Kol. 3:13) Imbesrar oso ḇena romawa sisasyarbur ro sidang doḇe, ”Yahwe ifnoḇek aya fa yabuk maf ḇe naek srar ḇekara ḇa fa ḇefrur duf aya ḇoi sifrur duf aya kwar.” Inja, rosai na kofrur kaku ḇe sidang oser fa kofnoḇek si ḇena kina ḇebur kakaku ya?

15. Rosai na kofrur kaku fa kofnoḇek naek srar koḇesi ḇena kina insape sisasyarbur ro sidang?

¹⁵ Swewar fa fanam kina sibur sya, ma ḇebati kuker si. Imbesrar oso ḇenir Miriam ikofen ḇo doḇe fyor ya kyara  samswen fa ryama ḇe fananjur rofyor eknik ḇyedi sisasyari. ”Yaḇeḇirḇar kuker rosai imbude snonggaku sya sikofen na. Ḇape raryaḇa, naek srar ḇebor ono sisya sakḇe saneso kako, ma sikofen roi ḇepyum ḇa kuker eknik ayedi sisasyar ani ḇa. Yafawi snar aya monda ḇesaneso ḇa.” Imbesrar ḇese doḇe, ”Rofyor romawa snon nuḇedi sisasyar i ro sidang, bati ḇeswar nu sya srama fa sbuk wos sneprei ḇe nu. Ḇeḇeso ro si soḇe sifawi rosai siḇe sawos ya ḇa. Ono skanes kuker aya ḇaido sfas wos ḇesambraḇser aya. Rosai sifrur nane nafnoḇek kaku aya!”

16. Rariso sidang syambraḇser pdef kina ani rai?‵

¹⁶ Swambraḇser kina ani pdef. Ro fafisu ḇerarya na, sifandun kaku syadi saswar ma wos sneprei ro Au. (Ibr. 10:24, 25) Fyorno ido, skara sidang sbinggwanbur si, imnis ra sisasyarbur si ro sidang kako. Komewer skara rarirya! Romawa babo ḇena sinan ḇesae ro kakaku ya kako sfandun kaku wos sandik ma fafnoḇek bena. Maria, swari ḇesae ro kakaku ya ma ḇebur kina ḇyesine, doḇe, ”Naek srar ḇeḇeso srama ḇe rum ma sikanggun pyan ḇe nggo. Sifnoḇek nggo kako fa nggofrur farkarkor ro kina. Sḇesneso kuker aya ma sikanes kuker aya. Rofyor ono sisya sfawar pampam aya, si kako simarisen sawoswarek aya. Sbuk wos samarawraw kaku ḇe aya!”​—Rm. 12:13, 15.

17. Rariso penatua sya sbuk sneprei ḇe naek srar ḇeboryae sya?

¹⁷ Penatua mgoya, mgobuk swaf mgoḇena fa mgosambraḇser naek srar ḇena kina ḇebur Yahwe sya. Mgona fakamaman ḇepon syadi fa mgobuk sneprei ḇe si. (1 Tes. 5:14) Rofyor fananjur ya ḇaim ḇaido posa kwar, wor naek srar ansi fa wafarfyar kuker si. Warama yoḇ si ma ḇenadi faro si. Mgo kako mgobaryas kayam kuker si ḇaido ras oso mgor si fa siso nadi ro kina mgoḇedi. Mgoḇe manfarandows rohani ido, fandun fa mgomam kaku domba-domba ḇeboryae Yahwe Ḇyesi ma mgofasnai ḇaḇenaḇye ma mgoswar si.​—1 Tes. 2:7, 8.

18. Imnis 2 Petrus 3:9, rosai Allah iwaf ro snonggaku ḇefrur sasar sya?

¹⁸ Yahwe ”imewer oso ryo, mboi insa snonkaku kam simbror ma skaḇer”. (Wasya 2 Petrus 3:9.) Imbape snonggaku oso imbude ifrur sasar ḇeba kwar, kankenem ḇyedi ḇyemaeja kaku ro Allah ḇarpon Ḇyedi. Kwarapan: Yahwe byak naba kaku kwar fa fyaspar snonggaku ḇesasar sya, isoine kuker byuk kankenem romawa Ḇyedi iswar kaku. Kuker ḇaḇenaḇye byuk ḇramin Ḇyedi ma iwaf insama snonggaku ḇesasar imarisen kyaḇer faro I. Iso ḇewar fa kofarkor ro sarḇer Yesus ḇyedi kuker romawa ḇeḇor. (Luk. 15:11-32) Snonggaku ḇebor randak ḇebur kakaku ya ḇarpur mura skaḇer ḇe Yahwe, Kma ḇesaswar sedi ro nanggi. Ma sidang kako simarisen sisaser pyum si. Elizabeth, ḇeḇeyap ḇepon ani, imarisen kaku snar romawa ḇyedi ḇarpur ya ḇye Saksi Yahwe kaḇer. Doḇe, ”Yakofen kasumasa kaku snar randak iwara, naek srar ḇebor sisya sbuk wos samarawraw ḇe nggo insama nggokyar pdef.”

19. Rosai ḇefnai fa kokyar pdef faro Yahwe I?

¹⁹ Kokyar ḇesya kwar faro Yahwe I. Na byuk ḇaḇeri akurfasnai ḇeyun roi ḇepyum ḇa ḇe ko. Ima Kma ḇefasnai snemura ma ḇenaḇye. Wakyar kaku, Yahwe nari ipok ibur Au ḇaḇeri ras wasmai samswen. (Ibr. 13:5, 6) Mark doḇe, ”Yahwe ipok ibur nggoḇaḇeri, ifnoḇek nggo ḇesya kwar ras nggosmai samswen.” Yahwe nari byuk ḇe Au ”baba papoik” ḇesya kwar. (2 Kor. 4:7) Inja, rofyor snonggaku waswar ya ibur Yahwe ido, bisa wasouser pdef ma wakyar ḇesya kwar.