1. Rariso snonggaku ḇekyar smam Yahwe I rai?

YAHWE nya kina isoine ḇesyom I sya. Ro nanggi, sisoine Yesus, ”ḇepon ro roi ḇeḇor ḇefrur kwarna”, ma malaikat sya. (Kol. 1:15; Mz. 103:20) Rofyor Yesus ikenem ro supswan, fyasnaiḇair snar snonggaku ḇekyar na sap Yahwe I ḇe Kma sedi. Fyor Yesus dawos kuker manfamyan ḇyesi, dap Yahwe I ḇe ”Mami ma Kma mko ḇedi.” (Yoh. 20:17) Fafisu kobuk kenem koḇena faro Yahwe ma koḇe baptis, koryur kuker naek srar koḇesi ḇe kina oser ḇeswar yae.​—Mrk. 10:29, 30.

2. Rosai na kawos ro farkarkor ine?

² Ono sḇaḇir samswen fa smam Yahwe ḇe Kma ḇesaswar. Sia sifawi ḇa kako moḇsa sfasnai saswar sena ḇe naek srar sya raya. Ro farkarkor ine, nari kawos farkarkor riḇeso ma Yesus nyan ḇepyum fyasnai na insama komam Yahwe I ḇe Kma ḇesaswar ma ḇepyandam fa kofanam I. Nari kofarkor kako rariso kosofarari Yahwe nyan ifrur pyum naek srar koḇesi.

3. Rariso nadi Yesus byukfarkor na nafrur kofanam kuker Yahwe I?

³ Yahwe ima Kma ḇesaswar. Yesus myam Yahwe ima Kma ḇeabaḇen, ḇesaswar, ma ḇepyan fa sfanam I, ima manḇepoik ḇemasasor dirya ḇa. Yesus imarisen komam Yahwe imnis rarirya kako. Kofawi roi ine ro rosai Yesus fyarkor ḇe manfamyan ḇyesi fa sikofen fyor senadi. Ḇyerandak nadi anna kuker ikofen radine: ”Kma nkoḇedi.” (Mat. 6:9) Inja, Yesus bisa dor fa kor Yahwe I kuker apap ”Ḇepoik Syadi”, ”Manḇefrur”, ḇaido ”Raja Ḇekain Fyoro”, snar Refo kako byuk nasan anna kam faro Yahwe I. (Kej. 49:25;  Yes. 40:28; 1 Tim. 1:17, fasfas kasun) Ḇape, Yesus imarisen kobuk apap ḇefasnai kofanam syadi kuker Yahwe, isoine apap ”Kma”.

4. Rodiso kofawi snar Yahwe imarisen kofanam kuker I?

⁴ Ausya ḇaḇir samswen fa mam Yahwe I ḇe Kma ḇesaswar ke? Ḇeḇeso ro ko sḇaḇir rarirya. Imbude samswen fa kokarauser Kma ḇesaswar koḇedi kukro manggunko kokmasi sifrur pyum ko ḇa. Fafisu bedi imnis rarirya ido, ḇesanekar awer. Yahwe ifawi mnis kaku rosai ḇaḇir na ma rosai ḇefnai fa ḇaḇir rarirya. Imarisen fyanam pdef kuker Au. Roro wos Ḇesren Ḇyedi, doḇe, ”Mkofanam faro Allah, ma nari Allah fyanam faro mko.” (Yak. 4:8) Yahwe iswar Au, ma imarisen ḇye Kma ḇefrur pyum kaku ḇe Au.

5. Imnis Lukas 10:22, rariso Yesus na ifnoḇek ko fa kofanam syadi kuker Yahwe I?

⁵ Yesus na ifnoḇek ko fa kofanam syadi kuker Yahwe I. Yesus myambir kaku Kmari ma iso mnis kaku rari-rari Ḇyena, inja ikofen, ”Mansei ḇemam aya kwar ido, myam Kmaya kwar kako.” (Yoh. 14:9) Ima imnis raris eba ḇefarkor rariso koḇesyowi ma kosouser Kma koḇedi ma rosai kofrur kaku fa imarisen, ḇape fyafko ḇa. Inja, ro Yesus kankenem ḇyedi, kofawi snar Yahwe ima ipyum kaku ma isaswar. (Wasya Lukas 10:22.) Mgorama kawos contoh ḇeḇeso ḇyena.

6. Fawarpan rariso Yahwe ryower Yesus nadi ḇyena?

⁶Yahwe ryower romawa Ḇyesya. Kwarapan kada: Ro supswan, Rumkun rak Ḇyedi ḇyenadi ker. Nadi ḇyenakam Yahwe ryower kaku na. (Luk. 5:16) Imnis ra, Yahwe ryower fafisu Yesus ḇyenadi rofyor ifrur snemuk ḇefandun kaku ḇaim, oser ya fyor imbe kyinfir manwawan ri 12 ḇyesya. (Luk. 6:12, 13) Yahwe ryower kako Yesus i ras ḇyenadi fa ikofenḇair roi ḇero sneri na. Fyor Yesus sḇoḇ i ḇaim, ḇyenadi dor kaku faro Kmari, snar kniko wer nari ismai fafrowes ḇemarḇak kaku.  Yahwe ryower Yesus i monda ḇa, ḇape fyarem malaikat kako fa syambraḇser Romawa iswar ani.​—Luk. 22:41-44.

7. Rariso ḇaḇir raya snar wafawi Yahwe ryower nadi Bena?

⁷ Baboine, Yahwe ryower kaker nadi ro manfamyan Ḇyesi, ma kyarem si ro oras ḇesrow kaku ma kuker nyan ḇepyum kaku. (Mz. 116:1, 2) Mampan fawar imbesrar oso ro India. Ḇyesewar fa isawen makakak ḇesyadadi ḇyena. Ḇyenadi ḇeri dor kaku fa Yahwe ifnoḇek i. Bon ya? Fyas ḇo doḇe, ”Munara JW Broadcasting^® paik Mei 2019, kuker nyan kofrur mnis makakwarek ma ḇaḇeḇirḇar, isrow kaku ḇe aya. Nama kankarem ro nadi yenairi.”

8. Kuker nyan risai monda Yahwe fyasnaiḇair saswar Ḇyena faro Yesus i?

⁸ Yahwe iswar ma fyandun ko, imnis raris iswar ma fyandun Yesus fafisu ifrur fararur ḇemarḇak ḇyena ro supswan. (Yoh. 5:20) Yahwe fyasos Yesus fandandun rur ḇyedi, fandandun ḇaken saprop, ma fandandun ḇese ḇyena kam. Yahwe I kako imgak ḇa fa fyasnaiḇair snar iswar ma imarisen faro Romawa Ḇyedi. (Mat. 3:16, 17) Snar Yesus ifawi Kmari iswar ma ikyar i kaku, rarirya Yesus nari kyara ḇaḇeri demir ro manggundi ḇa.​—Yoh. 8:16.

9. Rosai ḇefasnai kaku Yahwe iswar ko?

⁹ Raris Yesus i, kokam koḇaḇir ro manggunko kwar snar Yahwe iswar kaku ko. Kwarauser pan: Yahwe dun ko kwar fa koḇebati kuker I ma byuk naek srar ḇebor ḇeswar ko. (Yoh. 6:44) Na sifrur komarisen ma kosmai sneprei rofyor koḇesanekar. Yahwe fyasos anan rur ya kako insama kakyar koḇena nsambraḇ pdef. Ma, fyamfon fandandun rasras koḇena. (Mat. 6:31, 32) Fyor kokarauser Yahwe saswar Ḇyena faro ko ido, nari koswar kaku I.

10. Rariso kosofarari Yahwe I ro nyan ifrur pyum naek srar koḇesi?

¹⁰ Yahwe iswar naek srar koḇesi. Ḇape koma, fyorno ido samswen ḇe ko fa koswar ḇaido kofasnai sawarwar koḇena faro si, snar budaya ma moḇ korama ya namnis kam ḇa. Osower ido, bisa kofrur sasar ḇefrur snonggaku ḇese simsor ma sfafko. Rarirya, kokam koḇesewar fa koswar syadi kina rohani koḇesi. Nyan ya rarso? Kosofarari Kma koḇedi nyan ḇepyum Ḇyena. (Ef. 5:1, 2; 1 Yoh. 4:19) Mgorama kawos rariso Yahwe fyasnai saswar Ḇyena faro naek srar koḇesi.

11. Rariso Yesus iso farari Yahwe ”ḇaḇenaḇye” Ḇyena?

¹¹Yahwe fyasnai ”ḇaḇenaḇye”. (Luk. 1:78) Snonggaku ḇenaḇye myam monda ḇa snonggaku ḇesesya sekandera. Nari syewar nyan kaku fa ifrur manan kandera snonggaku ani ma byuk sneprei ḇe i. Rarirya, Yesus isofarari Yahwe ḇaḇenaḇye Ḇyena kuker ifrur pyum snonggaku sya. (Yoh. 5:19) Rofyor myam raryur snonggaku sya, ”sneri dek kuker sawarwar faro si, snar simor ma ssoninyan imnis domba ḇena manfarandowsḇa”. (Mat. 9:36) Yesus fyasnai sawarwar ḇyena monda ḇa. Ḇape, ifrur roi oso faro si. Byuk pararei ḇe ḇeduf sya ma byuk sneprei ḇe snonggaku ”ḇemor ma ḇembrus ma ḇeḇekandera”.​—Mat. 11:28-30; 14:14.

12. Rariso kofasnai ḇaḇenaḇye ya rai? Buk contoh.

¹² Infa kofasnai ḇaḇenaḇye faro naek srar koḇesi, fandun fa kofawi ḇepon samswen risai sisya sismai na. Imnis ra,  imbesrar oso ḇesmai dafduf ḇemarḇak kaku. Rariryano isnurem ḇaḇeri dafduf ḇyena, ḇape imarisen kaku fyor oso isya ifnoḇeki. Kokarapan rariso fyasos manggundi ma kina ḇyesi raya. Na kofnoḇek i kuker kofasos anan ḇaido kofrur sren rum ḇyedi ke? Contoh ḇese: Naek oso imbude nya fararur noḇa kwar. Kuker kap kosnosna ḇa, bisa kobuk pipi kermgun ḇe i fa fyamfon fandandun ḇyena isof nya fararur ḇese ke?

13-14. Rariso kosofarari Yahwe snemura Ḇyedi?

¹³Yahwe ima ḇye snemura. (Mat. 5:45) Fyasnai saswar Ḇyena faro ko kuker fyasos rosai kofandun na, syadi wer fyor kor ḇaim. Imnis ra, ifrur oriya isnai ro ras ḇe ras faro snonggaku syakam, inema faro snonggaku ḇekofen kasumasa sya monda ḇa. Kaku koswar Yahwe I ḇae, snar ifrur pyum kaku ma fyasnai snemura ya! Inja, raris Yahwe I, manggun koiso ḇerama ḇefnoḇek naek srar koḇesi ḇefandun fafnoḇek ya. Nari kowaf ḇaḇeri isof ro srama sor fafnoḇek.

¹⁴ Naek srar ḇebor sisofarari Kma koḇedi ro nanggi ḇefasnai snemura. Imnis ra, ro taun 2013, Topan Super Haiyan isya myun ro Filipina, doḇer ḇeba ine kyakok dawdiwer roi ebor nakam. Naek srar ḇebor koḇesi sna rum wer ḇa ma arasai sena napromes. Mboi, kina rohani sesi ro supswan ḇesiper sifnoḇek si ḇeri. Ono sisya sbuk pipi, ma sia kako siso ro fararur ḇaḇawes ḇeba kaku na. Bon ya, indokada rum ri 750 sifrur mnis kaḇer na ḇaido siḇawes kaḇer na swaf syadi ro taun oser ḇa! Osower ido, rofyor pandemi COVID-19, Saksi sya sifararur marḇak fa sifnoḇek naek srar sesya. Rofyor kosamberen fa kofnoḇek kina rohani koḇesine ido, kofasnai kaku snar koswar si.

15-16. Imnis kuker Lukas 6:36, rariso kosofarari Kma koḇedi ro nanggi?

¹⁵Yahwe isawarwar ma imarisen byuk ampun. (Wasya Lukas 6:36.) Ro ras nakam, Kma koḇedi ro nanggi byuk ampun ḇe ko. (Mz. 103:10-14) Yesus i kako imnis raris Kmari. Isawarwar faro snonggaku  ḇenapes ḇa ḇeso i sya ma imarisen byuk maf ḇe si. I kako imarisen imarwarek ko insama sasar koḇena neḇepyos. (1 Yoh. 2:1, 2) Snar Yahwe ma Yesus sufasnai sawarwar ma sumarisen subuk ampun ido, ine nari idif Au fa wakfanam faro su ke?

¹⁶ Kosambraḇser wis saswar ro kina rohani koḇena fyor ’koḇuk ampunyae faro ko’. (Ef. 4:32) Fyorno ido, kobuk ampun ḇe ḇesesya ima nsamswen kaku. Inja, koḇesewar fa kofrur kaku na. Imbesrar oso ismai fafnoḇek ro farkarkor Menara Pengawal ḇeḇejudul, ”Ampunilah Satu Sama Lain dengan Lapang Hati”. * Fyas ḇo doḇe, ”Rofyor yafarkor farkarkor ine ramnai, mamam ayena napyum syadi kuker kobuk ampun. Rodia fyasnaibos snar kobuk ampun ima kyurfasnai ḇa komarisen faro sasar sifrur na ḇaido komamkyof na. Imbape, ima kyurfasnai kosawen masasor inja kosmai aski ya.” Rofyor kobuk ampun kuker sne ḇesiper ḇe naek srar koḇesi, kofasnaiḇair koswar si ma koso Kma koḇedi, Yahwe nyan Ḇyena.

17. Imnis Matius 5:16, rariso kofrur Kma koḇedi ro nanggi sisandik I?

¹⁷ Syowi ḇeba kaku koisya ro fandu manḇekanaek ro supswan ḇesiper ḇeswaryae. Komarisen snonggaku ḇebor sakso warpu fa sisyom Yahwe I kuker ko. Inja, fandun fa kosasor ko insama kofrur rosai rirya awer fa ḇefrur snonsnon ro Kma koḇedi ro nanggi ḇaido kawasa Ḇyesi naḇyeḇa. Ko kako komarisen komamuser kenem koḇena insama snonggaku sya simarisen faro abar ḇepyum ya.​—Wasya Matius 5:16.

18. Rosai na ḇefnoḇek ko fa kobuk kesaksian kuker makak ḇa?

¹⁸ Fyorno ido, sanonef ḇaido sewayam ko snar kosouser faro Kma koḇedi ro nanggi. Fyor komgak fa kofawar kakyar koḇena faro snonggaku ḇesesya ido na rariso? Na koswarepen snar Yahwe  ma Romawa Ḇyedi nari sufnoḇek kaku ko. Yesus byuk kakakyar ḇe manfamyan ḇyesi snar simgak awer kuker ’rariso ma rosai nari sawos ḇesyan na’. Rosai ḇefnai i? Ikofen ḇo doḇe, ”Snar nari mkoiso ḇeyawos mko ya ḇa, ḇoi Kma mko ḇedi Rur Ḇyedi; iso nari ḇeyawos pyan ro mkosḇam na.”​—Mat. 10:19, 20.

19. Fawarpan pengalaman ro naek oso ḇebri fa ḇebuk kesaksian.

¹⁹ Mampan fawar ro Robert ḇerama ro Afrika Selatan. Rofyor insape fyarkor Refo ya, randak ya pyampum fa isun ro dinas militer ma sun i ḇe pengadilan. Fawawi ismai ro Refo kermgun kaker, ḇoi ḇyebri fa fyasnaibos ro persidangan snar iwaira ḇar oso ḇa kukro iswar naek srar ḇyesi. Robert doḇe ryo kina rohani Yahwe Ḇyedi ima roi ḇepyum kaku dirya! Ro persidangan, oser ro ḇemankara ifuken kanandor i, ”Mansei naek bansi?” Robert kyara ḇaḇeri nari sifuken i rarirya. Ḇape, iswarepen ḇeri mnuk ro ras anya ro Matius 12:50: ”Mansei ryawer ḇefrur Mami marisen Ḇyena ro boiyaswa, ikada naek ma srar Ayedi ma sna Ayedi”. Robert insape fyarkor Refo kaker, mboi Yahwe byuk rur ḇesren Ḇyedi inja kyarem fakfuken insandi ma fakfuken ḇeḇeso ḇese kyara ḇa na. Yahwe na imarisen kaku faro Robert i! Ma Yahwe I kako imarisen faro ko fyor kokyar kaku I ma koḇebri fa kobuk kesaksian ro fafisu ḇesamswen na.

20. Rosai snemuk koḇena? (Yohanes 17:11, 15)

²⁰ Iḇye kada kokofen kasumasa faro barakas kosmai na snar koro fandu kina rohani Yahwe Ḇyedi. Kona Kma ḇepyum syadi, ma ko kako kona naek srar ḇebor ḇeswar ko. Inja, kopok kokara awer snar ine roi ḇefandun ḇa dirya. Setan ma ḇeso i sya simarisen sifrur koḇeḇirḇar faro Kma koḇedi ro nanggi saswar Ḇyena, ma simarisen simeruk ḇaḇeoser koḇena. Ḇape, Yesus ḇyenadi warek ko kwar. Dor Kmari fa imamwarek ko insama kina koḇedi na ḇyeoser pdef. (Wasya Yohanes 17:11, 15.) Yahwe kyarem Yesus nadi ḇyena. Imnis raris Yesus i, kopok fa koḇeḇirḇar awer snar Kma koḇedi ro nanggi iswar ko ma isaramper ko ḇesya kwar. Mgorama kun snemuk fa kofanam syadi wer kuker kina rohani koḇesi.