ḆAḆERARMOMEN RO KINA MA SIDIF KUKER RARMOMEN FA SIFRUM SI: Perserikatan Bangsa-Bangsa ikofenḇadir, ”Oser ro bin rikyor ro fafisu ono ro kankenem ḇyedi ismai susa snaro ḇaḇerarmomen ma sumin ya idafdif i fa ifrum i.” Ḇefrur saswar syadi iso, ”Smam boi ro supswan ḇesiper, oser ro bin ririm nari isma susa snar seraroi ḇaido imbe seraro i.”

PAKPAKPIK RO ḆANDI: Sikofenḇair, raryur ḇaḇerarmomen syadi ro 30.000 siso snonkaku ḇefrur roi ḇeḇarḇor ro Amerika Serikat. Ro Amerika Latin, fanam ḇe oser ro snonkaku rikyor ḇye korban ro ḇaḇerarmomen.

MAMUNMUN: Snonkaku fanam ḇe peser riyuta seḇemun ro 2012, sibor syadi buro ḇemar ro mamamun ya. Afrika ḇar wamires ma Amerika Tengah barbor ro mamunmun ya ikaki syadi, kali rifyak ḇeba syadi ro supswan ḇesiper. Ro taun oser monda, syadi ro snonkaku ri 100.000 ro Amerika Latin ma snonkaku ri 50.000 ro Brasil sebemun. Nyan ya isya ke insama ḇaḇerarmomen ya imnai?

Rosai ḇefnai fa ḇaḇerarmomen ya nasur pdef? Roi ḇeḇefnai ya: snar ḇaḇesisye ro sosial ma ekonomi ḇefrur fa snonkaku sya sfamfabri yae, smamkyof kankenem ro snonkaku ḇese sya, sḇuk sasar narkoba ma simarsarser, romawa sya smam ker ḇeba sya sifrur roi ḇerarmomen, ma snonkaku ḇefrur radirya sisma samamyai ḇa.

Kaku ya, sup ḇeba ḇeḇeso sisewar kaku kwar fa sifrur ḇaḇerarmomen ya fa dado. Ro São Paulo, Brasil, mnu ḇefo kuker kawasa ḇebor, barbor ro mamunmun ya dado 80 persen ro swaf taun risamfur. Ḇape, roi ḇeḇarḇor kam kuker ḇaḇerarmomen ya naisya nabor kaker ro mnu ani, ma barbor ro snonkaku ḇeḇemun sya siso 10 ro snonkaku ri 100.000. Inja, rosai nari sifrur ya fa sifrur mnai ḇaḇerarmomen ya?

Nyan fa sifrur mnai ḇaḇerarmomen ya ḇyefesepen kuker kenem ma rari snonkaku oso. Snonkaku ḇeḇarḇor sya bisa fa sfadwer kenem sena rofyor simarisen sisawen rari ḇemnis ararer, nambri, fandun mankun, ma sifadwer na kuker rari ḇepyum imnis saswar, syowi, ma sfandun snonkaku ḇesesya.

Rosai na ḇefrur fa snonkaku oso ifrur fararwe ḇeba kaku? Kwarapan rosai Refo fyarkorna:

• ”Snar, koswar Allah inja koḇeuser sasoser ḇyena.”​—1 Yohanes 5:3.

• ”Makakak faro Yahwe iso kayin roi ḇeḇarḇor na.” *—Amsal 8:13.

Saswar faro Yahwe ma makakak fa sifrur Yahwe imarisen ḇa iso samambraḇ ḇeḇedif snonkaku ḇeḇarḇor sya fa sifadwer kenem sena—fararwe  kermkun monda ḇa ḇape fararwe kenem sena ḇesiper. Na kaku ndarirya ke?

Alex * ismai ro bui fafisu taun ri 19 ro Brasil snar ifrur roi ḇemun ḇeḇeso. Fyarkor Refo ramnai, ḇye Saksi Yahwe ro taun 2000. Fyadwer kenem ḇyeja kwar ke? Imbo, ma Alex fyafko kaku snar ifrur roi ḇeḇyeḇa ro fafisu iwara. Ikofen, ”Yaswar kaku Yahwe I ma yaḇaḇir Ipyos kwar sasar ayena. Ḇaḇesyowi ma saswar ḇe Yahwe nafnoḇek aya fa yafadwer nyan ayedi.”

César, ikako ḇeraker Brasil, ḇyekarawraw ma dun roiebor kuker romamun. Iso nyan kankenem ḇyedi ro fafisu taun ri 15. Rosai ḇefrur fa fyadwer kenem ḇyedi? Rofyor ismai ro bui, isrow kuker Saksi Yahwe, ma fyarkor Refo. César ikofenḇair, ”Insape, yasma tujuan ro kankenem ayedi. Yafarkor rariso yaswar Yahwe I. Aya kako yafarkor yafasna makakak faro I—iso yamkak fa yafrur roi ḇeḇyeḇa werḇa ma yafrur Yahwe sne ḇyedi ḇyefafardun. Yamarisen yafasna yaḇesyowi kaku faro ḇaḇenaḇye ḇyedi. Saswar ma makakak iso ḇefrur fa yafadwer kenem ayedi.”

Farkarkor rosai kun ro fawawar ani? Refo nya papoik fa nafnoḇek snonkaku oso ibur kenem ḇeḇyeḇa ḇyena kuker fyadwer nyan karkara ḇyedi. (Efesus 4:23) Alex, ḇeḇeyap ḇepon ani, ikofen wer, ”Rosai yafarkor kwar ro Refo imnis war ḇesren ḇesbawer ro baken yedi, fyoro mura ido, swaruser ḇemnisḇa napromes. Yakara ḇaḇeri roi nane nafnoḇek aya fa yafadwer kenem ayedi.” Kakubae, rofyor koser swaruser koḇena kuker anun ḇero Refo, nane nari napyos ma nasawen roi ḇeḇyeḇana. Allah Wos Ḇyena nya samambraḇ fa nafrur sren swaruser koḇena. (Efesus 5:26) Bon ya, snonkaku ḇerarmomen ma fyandun mankundi nari fyadwer ḇe snonkaku ḇepyum ma ḇeyun aski. (Roma 12:18) Sḇaḇir ro mankunsi ḇaḇeaski snar sisouser wos ḇefarkin ro Refo.​—Yesaya 48:18.

Saksi Yahwe syadi ro yuta riwar ro sup ḇeba ri 240 sisrow kwar nyan fa sifrur mnai ḇaḇerarmomen. Snonkaku ḇerama ro er syakam, tingkat sosial ma moḇ srama ya neḇesisye ḇape sfarkor kwar fa siswar ma simkak faro Allah, ma siswar yae si, sikenem pyum ḇe kina oser. (1 Petrus 4:8) Kankenem sena nfasnaḇair snar dunya kuker ḇaḇerarmomen ḇa kaku nari isya.

Refo ḇyeasas fyoro werḇa nari Allah ipyosbur ḇaḇerarmomen ro supswan ine. Dunya ḇeḇarḇor ine Allah ikramna ”isof ras ḇaḇemankara ma snonkaku ḇeḇarḇorsya sro”. (2 Petrus 3:5-7) Nari snonkaku ḇeḇarḇor sya sisya werḇa fa sifrur snonkaku ḇesesya sekandera. Rariso na kokyar kaku snar Allah nari ifrur roi oso fa ipyosbur ḇaḇerarmomen na?

Refoya ikofen snar Allah ”dayin manseiso monda ḇeswar faro ḇaḇemamun”. (Mazmur 11:5) Manḇeḇedaw koḇedi iswar kaku ḇaḇeaski ma nanapes. (Mazmur 33:5; 37:28) Iso ḇefnai fa nari myam monda ḇa snonkaku ḇeḇarḇor sya sisya isof fyoro.

Imbo, dunya babo ḇefo kuker aski nari fyafer fasaw. (Mazmur 37:11; 72:14) Wamarisen ke wafarkor nabor wer insama wasma kankenem ro dunya kuker ḇaḇerarmomen ḇa ani?