1, 2. (a) Rariso sneḇaḇir Saksi Yahwe sena faro Refoya? (b) Rosai syap wamarisen kaku ro Refoya?

SAKSI YAHWE koine, komarisen kowasya Refoya. Ḇyuk ḇeko wos sneprei, saneraro ma farkankin na kokyar kakuya. (Rm. 15:4) Inema syap ḇeser kakara ro snonkaku ḇa ḇape ”Allah wos ḇyedi”.​—1 Tes. 2:​13.

² Imbude, komarisen syadi syap ḇeḇeso ro Refoya. Ono sisya simarisen syap Injil snaro fyasnaḇair fababa ro Yahwe rari ḇyena roro Yesus i. (Yoh. 14:9) Ḇese sya simarisen syadi faro syap ḇeser ḇardadi raris syap Wahyu, ḇefasna ”rosai nari ḇerama fasaw na”. (Why. 1:1) Ḇeḇeso sisma sneprei rofyor siwasya syap Mazmur, ma ḇese sya simarisen siwasya ananun ḇepyum ḇero syap Amsal. Inja, Refoya syap faro snonkaku sya kam.

3, 4. (a) Rariso sneḇaḇir koḇena kuker publikasi koḇena? (b) Publikasi koḇena neḇefasos faro manseirirya?

³ Komarisen Refoya ido, kokako komarisen publikasi koḇenakam, snar neknam ro Allah Wos ḇyena. Syap nakam, majalah, ma publikasi ḇesena iso Yahwe fyasos kwar ḇekona. Na nekam nafnoḇek ko fa kofanam pdef ḇe I ma nefaduru kakyar koḇena nasambraḇ pdef.​—Tit. 2:2.

⁴ Publikasi ḇebor neḇefas faro Saksi Yahwe syakam. Imbape publikasi ḇeḇeso nkur ḇe romawa babo ḇaido sinan sya monda. Ḇar ḇeba ro artikel ma vidio ro situs Web koḇedi sfasos monda ḇe Saksi Yahwe ḇa sya. Roi nanekam nfasna Yahwe ifrur mnis asas ḇyena fa ḇyuk farkankin ḇebor ḇe snonkaku sya kam. ​—Yes. 25:6.

5. Rosai Yahwe imarisen ro ko?

⁵ Kokame komarisen koḇuk oras nabor fa kowasya Refo ma publikasi koḇena. Kakuya, na koḇuk oras ḇemniskam ḇa fa kofarkor publikasi kosma kwar na. Ḇape kokyar kaku snar Yahwe imarisen rofyor koḇuk pyum oras koḇena fa kowasya ma kofarkor Refo ma publikasi koḇena. (Ef. 5:​15, 16) Ḇape, roi ḇedwarek naisya fandun fa kopampumna. Rosai rirya?

6. Rosai na ḇefrur fa kosma fainda ḇa ro rosai Yahwe fyasos kwarna?

⁶ Rofyor kosasor ko ḇa ido, na kokara syap ḇeḇeso ro Refo ḇaido publikasi oso nkur ḇe koḇa. Imnis raris, rariso rofyor ḇar oso ro Refo rya imnis kuker fafisu kosmana ḇa? Ḇaido rariso rofyor publikasi oso kyur ḇeri ḇe koḇa? Na kowasya fasaw monda ḇaido komewer kowasya na ke? Rarirya ido, na kosma fainda ḇa ro roi ḇepyum ḇeyun fainda ḇekona. Koswarepen kaku snar farkarkor kosmana kam ḇeramuma ro Yahwe nairi. Ro Refo kowasya, ”Aya iso, Yahwe, Allah mkoḇedi, Mankun ḇeḇuk farkarkor kuker roi ḇeyun fainda ḇe mko.” (Yes. 48:17) Ro artikel ine, na kowawos roi rikyor nari ḇefnoḇek ko fa kosma fainda ro rosai Yahwe fyasos kwar na maroko.

7. Rosai ḇefnai fandun fa kowasya Refo kuker swaruser ḇebas?

⁷ Wawasya kuker swaruser ḇeḇas. Kaku ḇae, ḇar ḇeḇeso ro Refo neḇefas faro snonkaku oso ḇaido raryur oso. Ḇape, Refoya ikofenbos snar ”fasfas ḇeḇor ḇeramuma ro Allah nbefainda kaku”. (2 Tim. 3:​16) Iso ḇefnai fa fandun fa koḇas swaruser koḇena rofyor kowasya Refo. Naek oso ikofen snar rofyor fyarkor Refo, na farkarkor ḇebor bisa fa ismana ro ḇar oso. Ine nafnoḇek i fa myam farkarkor risai ḇefasnabos ḇaim. Inja rofyor kowasya ḇaim Refoya, fandun fa kor ḇe Yahwe I fa ḇyas swaruser koḇena ma ḇyuk fawawinanem insama kofawi pyum rosai kofarkor na.​—Ezr. 7:​10; wasya Yakobus 1:5.

8, 9. (a) Rofyor kowasya Refo, fakfuken rosai na kofuken ro mankun ko? (b) Ro rosai Yahwe dor ro penatua sya rosai kofarkor kuker I?

⁸ Buk fakfuken. Rofyor wasya Refoya, wamnai fasaw ma wafuken ro mankundaw, ’Ro wawasya nane farkarkor rosai yasmana kuker Yahwe I? Rariso na yaḇukna ro kankenem ayedi? Rariso na yaḇukna fa yafnoḇek snonkaku ḇese sya rai?’ Rofyor kowasen fakfuken nane, na kosma fainda ḇebor ro wawasya Refo koḇena. Mam contoh ḇeuser ine. Refoya fyasnaḇadir rosai Yahwe dor ro penatua Kristen sya. (Wasya 1 Timotius 3:​2-7.) Ḇebor ro ko ḇe penatua ḇa, inja na kokara kosma fainda ḇa ro ananun nane. Ḇape, mkorama koḇuk fakfuken rikyor ani fa komam rosai Yahwe dor ro penatua sya nḇefainda ḇe kokame.

⁹ ”Ro wawasya nane farkarkor rosai yasmana kuker Yahwe I?” Yahwe ikofenḇadir  ḇeko rosai dor ro penatua sya. Nya sasoser ḇekaki syadi faro snon ḇemam faduru sidang sya. Ine kyurfasna snar sidang ḇemaeja kaku ro mamam Yahwe I. Refoya ikofen snar ikoḇes sidang ya ”kuker rik ro mankundi Romawa Ḇyedi”. (Kis. 20:28) Inja Yahwe imarisen penatua sya sḇuk farari ḇepyum, ma nari Yahwe dor ro si faro nyan rariso sifrur naek srar ḇero sidang sya rai. Imarisen kosma payamyum ro baḇ fadadiren sena. (Yes. 32:​1, 2) Rofyor kowasya akurfasna nane, kofarkor snar Yahwe iswar kaku ko.

10, 11. (a) Rofyor kowasya rosai Yahwe dor ro penatua sya, rosai fainda ya ḇeko? (b) Rariso na koḇuk ananun nane fa kofnoḇek snonkaku ḇese sya rai?

¹⁰ ”Rariso ananun nane yaḇukna ro kankenem ayedi?” Penatua risaw ido, mam kaḇer pdef syarat na ma ḇensewar pdef fa wafrur mnis kenem bedi. ”Ḇemarisen nasan manfarkin ro jemaat” ido, fandun fa waso mnis rosai Yahwe dor na. (1 Tim. 3:1) Ḇape snonkaku Kristen syakam nari sisma farkarkor ro rosai Yahwe dor nane. Imnis raris, Yahwe dor ro kokam fa kona sneḇefafir ma koḇuk karkara ḇepyum. (Flp. 4:5; 1 Ptr. 4:7) Snar penatua sya ’sḇefarari ḇepyum ḇe domba sya’, na kofarkor ro si ma ’kofarari kakyar sena’.​—1 Ptr. 5:3; Ibr. 13:7.

¹¹ ”Rariso na yaḇukna fa yafnoḇek snonkaku ḇese sya rai?” Na bisa fa koḇuk ananun faro penatua Kristen sya fa kofnoḇek ḇefarkor Refo sya ma snonkaku ḇemarisen ḇerower sya fa sfawi snaro penatua sya siḇesebur kuker manfarkin agama sya. Ananun nane kako na nafnoḇek ko fa koswarepen fararur marḇak ro penatua sya ro sidang koḇedi. Ma ine kako, ḇefnoḇek ko fa kosyowi kaku naek ḇe penatua sine. (1 Tes. 5:​12) Koḇesyowi kaku si ido, na siryaḇ syadiwer ro fararur sena.​—Ibr. 13:17.

12, 13. (a) Kuker koḇuk rosai fyasos kwar ḇekona, riset rosai na kofrur ya? (b) Buk contoh oser rariso latar belakang mnuk oso nari nafnoḇek ko fa kofawi roi kofawi ḇaimna.

¹² Wafrur riset. Rofyor wafarkor Refo, na kosewar kankarem faro fakfuken ḇeḇeuser nane:

• Manseiso ḇefas mnuk-mnuk ro Refo ine?

• Rodiso ma fafisu risai sifasna?

• Sarisa ḇefandun kaku risai ḇeḇejadi rofyor syap ine ḇyeḇefas ya?

Informasi anna na nafnoḇek ko fa kosma fainda ro farkarkor kofawi ḇaimna.

¹³ Imnis raris, Yehezkiel 14:13, 14 ikofen, ”Rofyor er oso sifrur sasar ḇe aya kuker —sisoasuserḇa ido, aya kako, na yakanow bramin yedi faro si ma yapankar ankyon-ankyon moḇ sikaf mamami ḇemnis sarak ma na yafarem ḇasḇiser ḇeba faro si ma myun snonkaku ma aiwan rofanfan sena. ’Ma snon rikyor sine sisya rofandu si rariryano​—Nuh, Daniel, ma Ayub​—snar ḇaḇenapnapes sena, nari sfaspar jiwa mankunsi monda,’ rarirya wos ro Tuan Ḇepoik Syadi Yahwe I.” Kofrur riset ḇeḇeso ido, na kofarkor snar Yehezkiel fyas wos nane ro taun ri 612 SM. Nuh ma Ayub sumar ro swaf taun utin kwar, ḇape Yahwe iswarepen kaker sasoasuser suḇena. Fafisu ya, Daniel ikenem kaker. Rya ḇyeumur taun ri 20 rofyor Yahwe ikofen ima snonkaku ḇenapes ḇemnis raris Nuh ma Ayub su. Rosai na kofarkor ya? Yahwe myam ma ḇyesyowi manfamyan ḇesoasuser ḇyesi, romawa babo sya kako.​—Mz. 148:12-​14.

14. Rariso syap sfasos ḇe romawa babo sya nafnoḇek si, ma rariso kosma fainda ya kako? (Mam sonin ḇerandak.)

¹⁴ Syap faro romawa babo sya. Kofarkor kwar snar na kosma fainda ro syap nakam ḇero Refoya. Rarirya kako, na kosma fainda ro publikasi koḇenakam. Kokarapan contoh ine. Taun barpur ine, Yahwe fyasos kwar informasi nabor ḇe romawa babo sya. ^[1] (Mam fasfas ḇepupes.) Informasi nane nafnoḇek si fa sifrur mnis farawrowes sisma ro rumfarkor ya ma roi ḇesamswen ḇeḇekur romawa babo sya. Ḇape rariso kokam kosma fainda snar kowasya artikel ma syap nanekam? Kowasya na ido, na kofawi roi ḇesamswen romawa babo sismana ma koḇekir syadi fa kofnoḇek si ma kosambraḇser si.

15. Rosai ḇefnai fa snonkaku Kristen ḇeba kwar sya fandun fa sifawi informasi faro romawa babo sya?

¹⁵ Snonkaku Kristen ḇeba kwar, pok fa skara awer sfandun ḇa fa siwasya informasi faro romawa babo sya. Snar topik ḇebor sawosna nḇefainda kako ḇe snonkaku Kristen syakam. Imnis raris, kokame fandun fa kawoswarek kakyar koḇena, kodwarek masasor koḇena, kopampum farawrowes ro bati sya, ma kopampum ḇaḇebati ma hiburan ḇeḇyeḇa. Inja publikasi nane neḇefas faro romawa babo sya monda, ḇape informasi ḇyena neknam ro Refo ya, ma kokam na kosma fainda ro na.

16. Rosai fainda ya wer ro syap ḇeḇefas faro romawa babo sya?

¹⁶ Publikasi ḇeḇefas faro romawa babo sya nafnoḇek si insama ḇaḇebati sena kuker Yahwe I nasambraḇ syadiwer. (Wasya Pengkhotbah 12:​1, 13.) Ma snonkaku ḇeba sya kako sisma fainda ya. Imnis raris, syap Sadarlah! April 2009 naser artikel ”Kaum Muda Bertanya . . . Bagaimana Aku Bisa Menikmati Pembacaan Alkitab?” Artikel ani nya anun ḇepyum ma kotak farkarkor naisya kako bisa fa skarukna ma sikram fa sḇuki farkor. Snonkaku ḇeba sya kako sisma fainda ro artikel anna ke? Awin oso ikofen snar wawasya Refo ima roi ḇesamswen kaku ḇe i. Ḇape isouser ananun ḇero artikel na, ma kirine imarisen fa iwasya Refo ya. Ifawi rariso syap-syap ḇero Refo neḇesisyeyae ḇa ma  nḇuk fasasna ḇepyum, ma ikofen wer, ”Yasma marasrisen ro wawasya Refo ḇeradine ḇaim.”

17, 18. Rosai fainda kosmana snar kowasya syap faro kawasa kam? Buk contoh oso.

¹⁷ Syap ḇe kawasa kam. Rofyor taun 2008 komarisen kosma syap Baryas edisi farkarkor. Edisi ine sfas ḇe Saksi Yahwe sya, ḇape kokako kona edisi faro kawasa kam. Rariso kosma fainda ro majalah nane? Mkorama komam contoh oso. Rofyor wor snonkaku oso fa ryama ḇe Balai Karajan ma ryama ido, na wamarisen kaku. Fafisu manfaya dawos fafaya ḇyedi, na waswarepen i. Na wafuken ro mankundaw rariso sneḇaḇir ḇyedi rofyor ryower faya ani ma rosai fainda ismana faro kenem ḇyedi rai. Bon ya, na snemun bedi iprei ma na wasyowi kaku farkarkor ani.

¹⁸ Rarirya kako sneḇaḇir koḇena rofyor kowasya lektur ḇeḇefas faro kawasa kam. Imnis raris, syap Baryas edisi umum ma artikel ḇero jw.org nefasnaḇair Refoya kuker sḇuk wos ḇeḇepyan fa sifawina. Rofyor kowasya artikel nane, fawawi ma saswar koḇena naba syadi wer faro napnapes ḇero Refo. Kokako na kofarkor nyan ḇebabo wer fa kofasnaḇair kakyar koḇena ro ḇaḇeḇaryas ya. Rarirya kako kuker syap Sadarlah! nasamḇraḇser kakyar koḇena snar Manḇeḇedaw koḇedi kaku isya. Ine kako na ḇefnoḇek ko fa koḇri warek kakyar koḇena.​—Wasya 1 Petrus 3:​15.

19. Rariso na kofasna ḇaḇesyowi koḇena faro rosai Yahwe fyasos kwarna?

¹⁹ Kaku ḇae,Yahwe fyasos ananun ma farkankin ḇebor ḇeḇuk fainda ḇeko. (Mat. 5:3) Mkorama kowasya ma kosouser pdef ananun ḇyuk ḇeko kwarna. Kofrur rarirya ido, nari kosma fainda ma kofasna ḇe Yahwe snar koḇesyowi kaku rosai fyasoskam kwar ḇeko.​—Yes. 48:17.