1. Rosai sasoser ḇeḇeso ḇero Refo, ma rariso kosouserna na nun fainda ḇeko rai?

RO REFOYA, Yahwe ḇyuk ḇeko sasoser ḇefasnabos kaku rosai imarisen fa kofrurna. Imnis raris, ikofen ḇeko pok fa kosyom amfyainir, kokarawraw, komasarser, ḇaido kofrur farḇakḇuk famfnom awer. (1 Kor. 6:​9, 10) Yesus i kako ḇyuk parenta ḇe manfamyan ḇyesi, ”Inja mkora mura, mkofarkor er sya kam ḇe manfamyan Ayesi ma mkoḇuk masi sren faro si kuker snonsnon Kma ya ma Rumkun ya ma Rur Ḇesren ya, ma mkofarkor si fa sifrur roi ḇeborkam raris yaḇeasas kwar faro mko. Ma mkofawi, Aya ine nari yarous mko besya kwar isof awar ḇepupes.” (Mat. 28:19, 20) Rosai Yahwe ma Yesus suyor na kam fa kofrurna nḇuk fainda ḇe mankunko. Imnis raris fyarkor ḇeko rariso kofaduru mankunko ma kina koḇesi ma ḇefnoḇek ko fa kosma pararei ma marasrisen. Ḇefandun kaku ya, rofyor kosouser Yahwe parenta ḇyena kam imnis raris parenta fa koḇaryas, na imarisen ma ḇyeḇarakas ko.

2, 3. (a) Rosai ḇefnai fa Refo ḇyuk sasoser faro fafisu oser-oser ro kankenem koḇena ḇa? (b) Fakfuken rosai na kowawos ro artikel ine? (Mam sonin ḇerandak.)

 ² Ḇape, Refo ḇyuk ḇeko farkankin faro fafisu oser-oser ro kankenem koḇena ḇa. Raris, na kosma farkankin ḇefasnabos kaku ḇero Refo ḇa kuker nyan rariso kosansun ko rai. Ine nefasna Yahwe fawawi nanem ḇyedi. Snonkaku ḇero dunya ḇesiper ine nyan sisansun si rai ḇeḇesebur oso ma ḇese sya, model sansun sena nefararwe ro ras ḇe ras, ḇape Refoya pok fa ḇye fararwe ḇa. Refoya kako, iser farkankin oser-oser ḇa kuker rosai fararur ḇaido hiburan bisa fa kokinfirna ḇaido nyan fa kofaduru pararei koḇena. Yahwe ryir ko oser-oser ma ḇebukor ro kina sya fa sifrur snemuk kuker roi nane.

³ Inja rofyor kofrur snemuk ḇefandun kaku nari nawyaye kankenem koḇena ma kosrow sasoser noḇa ro Refo kuker roi nane, imbude na kofuken, ’Yahwe fyandun ḇa faro snemuk yun nane ke? Nari imarisen kuker rosai yakinfir fa yafrur na rofyor yaso mnis sasoser ḇero Refoya ke? Rariso na yakyar kaku nari imarisen faro rosai yakinfirna rai?’

4, 5. Rariso snemuk kofrurna na nawyaye ko ma snonkaku ḇese sya rai?

⁴ Snonkaku ḇeḇeso skara ḇo soḇe bisa fa sifrur rosai monda simarisen na. Ḇape komarisen kofrur rosai Yahwe imarisen na. Inja rofyor kofrur snemuk ḇaim, fandun fa kokara ḇepon rosai Refo ikofenna ma ramnai kosouserna. Imnis raris, Refoya fyarkor ḇeko rosai Allah mamam ḇyedi kuker rik ya, ma kosouser rosai ikofenna. (Kej. 9:4; Kis. 15:28, 29) Na koḇenadi ḇe Yahwe I fa ifnoḇek ko fa kofrur snemuk ḇeyun marisen ḇe I.

⁵ Snemuk koḇena na nawyaye kankenem koḇena. Snemuk ḇepyum kun na nafnoḇek ko fa kofanam ḇe Yahwe I. Ḇape snemuk ḇemnis ḇa kofrurna nafrur fa kofanam kuker I werḇa. Snemuk kofrurna kako na nawyaye snonkaku ḇese sya. Komewer kofrur roi oso ḇefrur fafayaf naek srar kobesi ḇaido kofrur kakyar sena nasambraḇ werḇa. Kokako komewer kofrur roi ḇesamswen ro sidang. Inja fandun fa kofrur snemuk ḇepyum kaku.​—Wasya Roma 14:19; Galatia 6:7.

6. Rosai na ḇefarkin ko fa kofrur snemuk ro mankun ko?

⁶ Rariso na kofrur snemuk ḇepyum rofyor Refo ikofenḇadir mnis kaku ḇeko ḇa kuker rosai fandun fa kofrur ya? Pok fa kofrur rosai komarisen monda awer, ḇape kokara mnis fafisu mankun koḇedi ma kun snemuk ḇeyun marisen ḇe Yahwe I. Inari kokyar kaku Yahwe ifnoḇek ko fa kosma bon ḇepyum ro rosai kofrur na.​—Wasya Mazmur 37:5.

7. Rofyor sasoser Refo naisyaḇa ido, rariso na kofawi rosai Yahwe imarisen fa kofrurna ro fafisu oso?

⁷ Ḇape rariso na kofawi nyan fa kofrur Yahwe imarisen rai? Efesus 5:​17 ikofen ḇeko, ”Mkoḇesewar insa mkofawi Manseren [Yahwe, NW] marisen ḇyedi.” Fafisu sasoser ḇefasna bos kaku naisyaḇa ro Refoya, fandun fa kofawi pyum rosai Yahwe imarisen fa kofrur na ro fafisu kosmana. Rariso kofrurna rai? Fandun fa koḇenadi ḇe I ma iḇye kada rur ḇesren ya fyarkin ko.

8. Contoh rosai ḇefasnaḇair snar Yesus ifawi kaku rosai Yahwe imarisen na?

⁸ Yesus ifawi rosai Yahwe imarisen fa ifrurna. Imnis raris, swaf risuru rofyor kawasa ḇesoi sya sibiser, Yesus ḇyenadi ma kuker mujisat ḇyuk nanan ḇesi. (Mat. 14:17-​20; 15:34-​37) Ḇape rofyor demir ibiser ro moḇ ḇeursḇa ma Setan iwani fa fadwer karui na ḇe mamami, Yesus imewer. (Wasya  Matius 4:​2-4.) Yesus myambir kaku Kmari, inja rofyor ḇyuko rur ḇesren faro fandandun mankun ḇyedi ifawi nari Yahwe imarisen ḇa. Ikyar kaku nari Kmari fyarkin i ma ḇyuk roḇean ḇe i rofyor ifandun na.

9, 10. Rosai na ḇefnoḇek ko fa kofrur snemuk ḇepyum ya? Buk contoh.

⁹ Raris Yesus i, na kofrur snemuk ḇepyum rofyor kokyar faro Yahwe farkankin ḇyena. Refo ikofen, ”Wakyar faro Yahwe kuker snembri ḇesiper ma wakyar awer faro kakara mankun bena. Ro nyan bena kam, buk swaruser ma kakara bedi faro i, nari ifrur mnis nyan bena kam. Ḇefawi nanem ro mamam mankun bedi awer. Wamkak faro Yahwe ma binkwan bur roi ḇeḇarḇor.” (Ams. 3:​5-7) Rofyor kofarkor kuker nyan kakara Yahwe ḇyedi ido, nari kofawi kaku rosai imarisenna fa kofrur ro fafisu ḇesamswen oso. Snar kofawi nabor wer nyan kakara Yahwe ḇyedi ido, nari napyan ḇeko fa kofrur snemuk ḇeyun marisen ḇe Yahwe I. Kofrur rarirya ido, nari komarisen kosouser I pdef.​—Mz. 119:11, 12.

¹⁰ Wawasen kada, binswa oso rya kyaḇkoḇes ma myam sepato ḇepyum kaku. Ḇape ḇaḇyak ya nek kaku. Swa ḇyedi iso kuker i ḇa, ḇape ifawi rosai nari swa ḇyedi kyarana rofyor ḇyoḇ pipi sya fa sibro. Rariso ifawi na? Fyarḇuk fyoro kwar kuker i, inja ifawi kaku nyan rariso swa ḇyedi imarisen fa suḇuko pipi suḇena rai. Rarirya kako, rofyor kofarkor kuker nyan kakara Yahwe ḇyedi ma rosai ifrurna ro fafisu naiwara, nari kofawi rosai imarisen fa kofrurna ro fafisu nakam.

11. Fakfuken rosai na kofuken ro mankun ko rofyor kowasya ḇaido kofarkor Refo? (Mam kotak ” Rofyor Wafarkor Refo, Wafuken Ro Mankundaw”.)

¹¹ Rariso na kofawi kakara Yahwe ḇyena  rai? Roi ḇefandun kaku fa kofrur ya ido kowasya ma kofarkor Refoya ras ḇe ras. Rofyor kofrur roi ine, kofuken ro mankun ko, ’Rosai roi naine nḇuk farkarkor ḇe aya kuker Yahwe I? Rosai ḇefnai fa ifrur rarirya?’ Ma raris Daud i, kokako fandun fa kor ḇe Yahwe fa ifnoḇek ko insama komambir pyum kaku I. Daud fyas, ”Wakofenḇadir nyan-nyan bena ḇe aya, sye Yahwe; farkor aya nyan-nyan ḇena. Wafrur aya fa yambran ro napnapes bedi ma farkor aya, snaro auso Allah ayedi ḇeḇuk fasaspar. Faro au yakyar kaku ro ras nakam.” (Mz. 25:​4, 5) Rofyor kofarkor roi oso kuker Yahwe I, na kokara user ro fafisu risai na koḇuk ananun naine. Bisa fa koḇukna ro kina koḇedi, moḇ kofararur roya, ro rumfarkor ḇaido ro fararmyan koḇena ke? Rofyor kowasen na, nari napyan ḇeko fa kofawi nyan rariso Yahwe imarisen fa koḇuk ananun nane.

12. Rariso publikasi ma fananjur koḇena nafnoḇek ko fa komambir pyum kaku nyan kakara Yahwe ḇyena faro roi nakam?

¹² Nyan oso ḇese fa kofawi nyan kakara Yahwe ḇyedi iso komam mnis rosai organisasi ḇyedi fyarkor ḇeko ro Refoya. Imnis raris, rofyor kun snemuk, syap Indeks Publikasi Menara Pengawal ma Panduan Riset untuk Saksi-Saksi Yehuwa na nafnoḇek ko fa kofawi nyan kakara Yahwe ḇyedi. Kokako na kosma fainda ro fananjur Kristen rofyor korower pyum kaku, koḇuk kankarem ma rofyor kowasen rosai farkarkor kosma na. Ine na nafnoḇek ko fa kokara mnis kuker Yahwe nyan ḇyedi. Bon ya iso, nari ḇisa fa kun snemuk ḇeyun marisen ḇe I ma ḇyebarakas ko.

13. Buk contoh oso kuker rariso kofrur snemuk ḇepyum rofyor kowasen rosai Yahwe kyara na.

¹³ Mkorama komam contoh oser rariso kofrur snemuk ḇepyum rofyor kowasen ḇepon nyan kakara Yahwe ḇyena. Imbude na wamarisen ḇeperintis. Wafrur fararwe ro kankenem ḇena kwar insama buk oras nabor ro fararmyan ya. Ḇape ḇeḇirḇar kaker nari wakenem pyum ke roḇa kuker pipi ma robor kermkun wasmana. Kakuya, Refo ikofenḇadirḇa fandun fa koḇe perintis. Bisa fa kofarmyan kuker sasoasuser ḇe I pdef ḇe manḇaryas. Imbape, Yesus ikofen Yahwe na ḇyebarakas snonkaku ḇeḇuk kankenem ḇyedi faro Karajan Allah. (Wasya Lukas 18:29, 30.) Refoya kako ikofen snar Yahwe imarisen rofyor kofrur roi nakam kuker samambraḇ koḇena fa kosandik I, ma imarisen kofarmyan ḇe I kuker raryaḇ. (Mz. 119:108; 2 Kor. 9:7) Koḇenadi ma kokara user kuker roi nane ido, na kofrur snemuk ḇepyum ro fafisu kosmana ma nari Yahwe ḇyebarakas ko.

14. Rariso na kofawi snar Yahwe imarisen ke roḇa faro model sansun kokinfir na?

¹⁴ Contoh osower ido: Wamarisen kaku fa wasansun kuker sansun model oser, ḇape wafawi naek srar ḇeḇeso ro sidang nari simarisen ḇa snar wasansun radiya. Refo fyasnaḇair ḇaḇeri kuker model oso. Inja rariso na kofawi rosai kakara Yahwe ḇyena faro roi nane? Refoya ikofen ḇeko, ”Rarirya kako binsya. Bin ansi sḇemaris faḇaḇye si mboi kuker syowi, ma snonburyam sena nbekapyai — kapyai awer, semaris awer si kuker karamas brawen roḇa mustika roḇa kako sansun ḇekakur, ḇape ḇyemaris i kuker fararur ḇeḇye, imnis bin ḇesyus faro ḇaḇeariya.” (1 Tim. 2:​9, 10) Kaku, ananun ine ḇyuk ḇe manfamyan Yahwe ḇyesi kam, snon sya kako. Komarisen koso ananun ine ido, na kokara resari rosai snonkaku skarana kuker sansun kokinfir fa kosansun na. Ma snaro koswar naek srar koḇesi, na komewer kofrur sfafayaf. (1 Kor. 10:23, 24; Fil. 3:​17) Rofyor kowasen rosai Refo ikofenna ma kakara Yahwe ḇyena, na kofrur snemuk ḇepyum ḇeyun marisen ḇe Yahwe I.

15, 16. (a) Rariso sneḇaḇir Yahwe ḇyedi rofyor kokara ker roi ḇeḇyeḇa? (b) Rofyor kokinfir hiburan oso, rariso kofawi rosai Yahwe imarisen na? (c) Rariso kofrur snemuk ḇefandun kaku rai?

 ¹⁵ Ro Refoya, kofarkor kwar snar Yahwe sne ḇyedi ḇyefafardun ma fyafayaf rofyor snonkaku sya sifrur ma skara roi ḇeḇarḇor na. (Wasya Kejadian 6:​5, 6.) Nane nefasna bos snar Yahwe imewer kaku fa kokara user roi ḇeḇyeḇa ro swaruser koḇena. Imbape, rofyor kokara pdef roi nane, nari ḇarpurya kofrurna ḇeri. Yahwe imarisen kokara roi ḇesren ma ḇepyum. Manfamyan Yakobus fyas snar fawawi nanem ḇerama ro Yahwe ”ikada kyaku, ma ḇyuk aski, fyafir, iso asuser, ifo kuker saswar ma ḇyuk bon ḇeḇye, iwaira mun osoḇa ma dankarkar ḇa.” (Yak. 3:​17) Inja Refo fyarkor ko fa kopampum hiburan nakam ḇefrur fa kokara user ḇaido komarisen roi ḇesren ḇa ma roi ḇeḇyeḇa na. Ma rofyor kofawi pyum rosai Yahwe iswar ma dayinna, nari napyan ḇeko fa kofawi syap ma felem risai, ḇaido game kokinfir na. Fandun ḇa fa kofuken ḇe snonkaku ḇese sya nari rosai kofrur ya.

¹⁶ Fafisu kofrur snemuk koḇena, imbude roi ḇeḇeso naisya fa kokinfir insama kofrur Yahwe imarisen. Ḇape rofyor kofrur snemuk ḇefandun kaku ido, ipyum syadi kor farkankin ro penatua oso ḇaido naek srar ḇemas kwar ro ḇaḇerurya. (Tit. 2:​3-5; Yak. 5:​13-​15) Kakuya, pok fa kor awer snonkaku oso fa ifrur snemuk ḇeko. Ḇape, fandun fa kokara pyum wos ḇefarkin ḇero Refo ma kofrur snemuk ro mankun ko. (Ibr. 5:​14) Manwawan Paulus ikofen, ”Snar snonkaku oser kamnam ḇyena namnis faro i kwar.”​—Gal. 6:5.

17. Fainda rosai kosmana snar kun snemuk ḇefrur Yahwe imarisen?

¹⁷ Rofyor kofrur snemuk ḇefrur fa Yahwe imarisen ido, na kofanam pdef ḇe I ma kosma kyaremso ma barakas ro I. (Yak. 4:8) Ramnai kakyar koḇena ḇe Yahwe I na nasambraḇ kaku. Inja mkorama kokara user rosai kowasya ro Refoya insama kofawi pyum kaku kakara Yahwe ḇyena. Kakuya, nari kosrow ker roi ḇebabo fa kofarkor ro Yahwe I. (Ayb. 26:14) Ḇape rofyor koḇensewar kaku fa kofarkor napnapes kuker Yahwe I ro kirine, nari koḇe snonkaku ḇefawi nanem ma na bisa fa kofrur snemuk ḇepyum. (Ams. 2:​1-5) Kakara ma aw ro snonkaku sya nefararwe ker, ḇape Yahwe pok fa ḇyefararwe ḇa. Manḇefas mazmur ikofen, ”Kakara Yahwe ḇyena nari naisya isof fyoro-fyoro; marisen ḇyena naisya ro syos ḇe syosyos ḇesena.” (Mz. 33:11) Kaku rarirya, na bisa kofrur snemuk ḇepyum rofyor koso mnis nyan kakara Yahwe ḇyena ma kofrur roi imarisenna.