Ro fafisu oso mam snonkaku ḇefanam au sefafardun snar snonkaku siswar ya imar ke? Wakmom rosai fandun fa wakofen ḇaido wafrur ya⁠—inja wakofen ma wafrur royoḇa. Ḇape roi ḇepyum ḇese naisya, bisa fa wafrur na.

Imbude, roi sifandun syadi ya iso rarama bedi ma wakofen monda ”Aya kako yaḇesneso.” Ro budaya ḇeḇeso, for ḇaido pan monda ro erdai sena ine nyan ḇepyum kako ḇefasnaḇair waswar si. Ro-fyor snonkaku ḇefafardun imarisen dawos ido, fandun fa rwower pyum kaku i. Ipyum syadiwer, wafrur roi oso ḇe kina ḇefafardun sya, imbude wafrur fararur pok fa sifrur ḇa na, imnis wakankun pyan roḇean ḇesi, mamwarek romawa sesi, ḇaido fandun ido wafnoḇek ro fararur karamram ya. Wafrur rarirya ido, ima ipyum syadi ro wawos nabor monda.

Ro fafisu ḇepyum ya, na wakofen kuker rari-rari ḇepyum ḇyena ḇaido fawawar ḇepyum ro snonkaku ḇemar kwar ani. Wawawos ḇeradine na nafrur fa snonkaku ḇefafardun ya imarisen. Imnis raris, Pam​—snonswa ḇyedi Ian, imar ro taun ri wonem kwar​—ikofen, ”Snonkaku sya sfawar ḇe aya kuker roi ḇepyum Ian ifrur kwarna ḇoi yafawi ḇaim na, ma nane nafrur fa sne yedi imarisen.”

Peneliti sya sikofen snonkaku ḇebor ḇefafardun sya sisma farfnoḇek ḇape fandandun sena fasawdam seḇefnderna snaro bati sesya skaḇer fa sifrur fararur sena oser-oser. Rarirya ido, fandun fa wasewar swaf fa wasrow pdef kuker bati ḇefafardun oso rofyor karamram ya posa. * Snonkaku ḇebor ḇefafardun sya sesyowi kaku fafisu ḇeradine fa siprei ro sne ḇefafardun sena.

Kwarapan contoh ro Kaori i. Inkbor oso ro Jepang ḇefafardun kaku snaro snari imar, ramnai paik ri 15 ḇyenande srar ḇyedi kako ryoe. Ḇape ipyum kaku snar bati ḇyesi sisambraḇser i. Oser ya snori Ritsuko, ḇyeumur syadi ro Kaori ma imarisen ḇyebati ḇe i. Kaori ikofen, ”Kaku ya, yamewer yarowerna. Yamewer snonkaku oso fyadwer Awin ayedi, ma yakara boi snonkaku osobaḇeri imnis raris i ḇa. Ḇape, snaro Awin Ritsuko ifrur pyum aya, inja ḇarpur ya yafanam kuker i. Ro minggu ḇe minggu nufararur kayam ro ḇaḇeḇaryas ya. Ma nura kayam ḇe fananjur Kristen ya. Dor aya fa nuyinem tei, dun roḇean ḇe aya, ma fyas syap ram ma kartu ḇe aya. Awin Ritsuko i frurpyum ḇyena nḇuk bon ḇepyum ro kankenem ayena.”

Taun samfur ses’r disuru ḇyenande kwar rofyor Kaori snari imar, ma kirine i kuker swa ḇyedi sufarmyan ro oras nakam. Kaori ikofen, ”Awin Ritsuko fyasna ker saswar ḇyedi ḇe aya. Rofyor yakaḇer ḇe rum ayedi, yarakaki ḇe i ker ma nusamḇraḇser yaye.”

Contoh ḇese ro snonkaku oso ḇesma fainda snar sisonem pdef iso Poli, Saksi Yahwe oso ro Siprus. Poli nya swa ḇefrur pyum, snori Sozos, ima farari ḇepyum ḇye manfarandows Kristen oso, snar imarisen ryakaki ḇe naek srar ḇe awak param ma kabom sya ro rum sena fa ḇyebati ma danan kuker si. (Yakobus 1:​27) Ḇape faḇye kaku, rofyor ḇyeumur 53 taun, Sozos imar snar dafduf tumor otak. Poli ikofen, ”Nufarḇuk ro swaf taun ri 33 kwar, ḇape kir ine swa ḇefrur pyum ayedine ryoḇur aya kwar.”

Karamram ya ramnai, Poli kuker romawa snon ḇyedi ḇeumur 15 taun, Daniel i, sura suḇarek ro Kanada. Ro diwa suryur kayam kuker sidang Saksi-Saksi Yahwe. Poli fyawar, ”Bati ḇero sidang ḇebabo sine sifawi pyum ḇaḇeri roi ḇesamswen ḇeḇekur nu. Ḇape simnai ḇa fa sfanam kuker nu ma sisamḇraḇser nu kuker sḇuk wos ḇeyun sneprei ma sifnoḇek nu. Inema farfnoḇek ḇepyum kaku snar fafisu ya romawa ayedi fyandun kaku kmari! Naek ḇefarkin ro sidang sya sfasna siswar Daniel i.  Ine iso roi ḇefrurfa Daniel imarisen fa ḇyebati kuker naek srar sya ḇaido ifnak bola kuker si.” Kirine, awin kuker romawa ḇyedine sukain kuker payamyum.

Kaku ya, nyan ḇebor naisya fa kofnoḇek ma koḇuk sneprei faro snonkaku ḇefafardun sya. Refoya kako ḇyuk wos sneprei ḇeko kuker ḇyuk saneraro ḇepyum ro fafisu naiwama.