Bebe fyanam kaku kuker kmari. Karier ma bati ḇyesi sḇuk wos sneprei ḇe i, ḇape Bebe ḇyabir wos sena nḇuk sneprei ḇe i ḇa boi nafrurfa ḇyesneso. Dawos ro mankundi bo ikofen, ”Marmar ḇyedi iso roi ḇepyum ḇaḇeri.” Taun-taun ḇyenande ramnai, Bebe fyas kaḇer sarisa ani ro syap oso. Ro fasfas ḇyeja, nasnaibos kaku snar ḇyefafardun kaker.

Raris komam ro Bebe i, na fasaw ḇa fa snonkaku oso imnai ro fafardun ḇyedi, iḇye syadiwer rofyor snonkaku ḇemar kwar ani iso snonkaku iswar kaku. Ro Refo, marmarya sapna ḇe ”mbroḇ ḇepupes”. (1 Korintus 15:26) Pok fa kokandenbur marmar ya ḇa, ma bisa fa nḇejadi ro fafisu nakam ma dun bur snonkaku koswar kaku sya. Inja kaku ya ine nafrur fa na koḇefafardun ma kofawi ḇa rariso kokren buro marmarya ma roi ḇeḇewari ya.

Imbude na wakara: ’Fafisu risai sne ḇefafardun ine na ḇyenande? Rariso snonkaku oso na ifrur mnis fafardun ḇyedi? Rariso na yaḇuk sneprei ḇe snonkaku ḇefafardun sya? Saneraro ḇepyum isya faro snonkaku koswar ḇemar kwar sya ke?’