Rosie doḇe, ”Yamkakwarek kankenem ayena ker snar yakara ker roi ḇeḇyeḇa.” Mnuk ro Refo risai ḇefnoḇek i? Oser ya iso Matius 6:34, ”Mkomkakwarek awer meserdi, snar meserdi nya ananjar ḇardi. Ananjar ro ras-ras imnis faro ras ani.” Rosie ikofen ḇo doḇe Yesus anun ḇyenane nafnoḇek i fa nya makakwarek werḇa kuker rosai nari ḇekur i ro ras meserdi. Ikofen wer, ”Samswen ḇekur aya nabor kwar. Inja yamewer yasmai samswen ḇese wer kuker yamkakwarek rosai ḇekur aya ḇaim ma imbude na nkur aya ḇa ḇesyaḇo yakain yakara ker na.”

Yasmine i kako dakmkakwarek kankenem ḇyena ker. ”Ro minggu oser monda, yakanes ker. Ma fafisu ono, yaḇe yenef ro roḇ mboi jadi ḇa. Kakara ḇeḇyeḇa nafrur aya fa yaknon ḇa.” Mnuk risai ḇefnoḇek i? Dapḇair 1 Petrus 5:7, ”Mkoḇuk makakwarek mkoḇena kam faro Allah, snar i ḇefaduru mko.” Yasmine doḇe, ”Yaḇenadi ker ḇe Yahwe I, ma kyarem nadi ayena. Yaḇaḇir ḇoi roi ḇemarḇak ro erdai yedi neḇekanowbur aya. Fafisu ono, yana kaker kakara ḇeḇyeḇa, mboi fafisu ine yafawi rariso yana kakara ḇemnis faro samswen ḇekur aya.”

Inai inkbor oso ḇenir ḇe Isabella doḇe, ”Rya kenem ḇeyaryar ima ḇyewaris kwar nairi, snar kma yedi dakradiri. Ayama yayaryar ker fa yaḇukifrur roi ḇefandun ḇa ḇoi roi ḇefandun nama yafrur ḇepon na ḇa. Rupa ra yakain monda ḇaido yamam televisi. Kenem ḇeradine nun royoḇa. Nari koḇrusna naduf syadi ma kofrur pyum fararur koḇena ḇa.” Wos farkankin ḇefnoḇek i isya ro 2 Timotius 2:15, ”Besewar kaku insa ḇe snonkaku ḇefrur marisen faro Allah, ḇe manfararur ḇemai ḇa faro bon ro fararur marḇak ḇyena”, Kitab Suci Terjemahan Dunia Baru (NW). Isabella doḇe, ”Yamewer Yahwe imai faro bon ro fararur ayena snar yayaryar ker monda.” Fafisu ine, nya kakara ḇepyum syadi kwar.

Kelsey dakradiri. Doḇe, ”Fararur naisya ido, na yayaryar ker rawo fafisuya iḇe ibro kwar insape yafrurna. Nafrur fa yakanes ker, yenef mnis ḇa, ma yana makakwarek. Nane naḇyeḇa ḇe aya.” Mnuk ḇefnoḇek i iso Amsal 13:16, ”Snonkaku ḇefawinanem ifararur kuker fawawi, ḇape snonkaku ḇefawi royoḇa fyasnaiḇair fawawiḇa ḇyena.” Kelsey ikofenḇair rosai fyarkor ro mnuk anine, ”Fandun fa kokara pyum kaku ma kofasos rosai iḇe kofrur ro rasras iwama. Fafisu ine, syap ḇeser jadwal faro fararur ayena isya ro meja ayedi. Nane nafrur fa fararur ayena nambran pyum ma yayaryar fararur ayena ḇa rawo fafisuya iḇe ibro kwar insape yafrurna.”

Kirsten doḇe, ”Swa yedi ibur aya, roma rikyor ayeskoya, ma inai oser ayedi”. Wos farkankin ro Refo risai ḇefnoḇek i? Amsal 17:17 doḇe, ”Bati ḇekaku isawarwar ro fafisu nakam ma ḇye naek rofyor samswen isya.” Kirsten dor fafnoḇek ro bati ḇyansi ḇeyaksyom faro Yahwe I kako. Rosai ismai ya? ”Sifnoḇek aya kuker nyan oser monda ḇa! Sino srir roḇean ma pampen ro ḇarpon kedwa rum ayedi. Kali rikyor, bati ayesi sifnoḇek aya ma roma inai ayesi fa nkobur ḇe rum ḇebabo nkoḇedi. Bati oser ayedi ifnoḇek aya fa yasewar fararur. Bati ayesi sino sisya sfasos ker fa sifnoḇek aya.”

Delphine, insandi kowasya ḇepon ani, dakḇaḇir demir monda. Fafisu roi ḇemun ḇeḇeso nkur i raposa, doḇe ḇyesneso snar myam snonkaku ḇesesya sna kina ḇeaski, mboi ima demir monda ma daksmai aski ḇa. Mnuk oser ḇefnoḇek i iso Mazmur 68:6, ”Allah ḇyuk rum faro snonkaku ḇekain ro mankunsi.” Ikofen, ”Mnuk ine kyur ḇe rum koḇarek ine ḇa. Mboi yafawi snar inema Allah ḇyuk rum rurya ḇe ko. Ro moḇ anya, na kokain kuker payamyum ma kona wis ḇepyum kuker snonkaku ḇese ḇeswar faro Yahwe I. Ḇape yafawi snar insama yafanam kaku faro si, fandun fa yafanam kaku faro Yahwe I resari kada. Mazmur 37:4 ifnoḇek aya fa yafrur roi nane, ’Ḇe Yahwe I fa ḇye knam ro aski ḇeba bedi, ma nari ḇyuk rosai snembri imarisen na.’”

Delphine kyarauser na, ”Yafawi snar fandun fa yafanam kaku faro Yahwe I. Ima Bati ḇepyum syadi. Yafrur jadwal faro fararur ayena kako insama bisa yaḇebati kuker snonkaku ḇeswar faro Yahwe I sya kako. Yafarkor fa yamam roi ḇepyum ro si ma yamam ro sasar sena ḇa.”

Kakuḇae, bati ḇyansine saksyom Yahwe I mboi sinapes ḇa kaker. Raris snonkaku ḇesesya, Saksi-Saksi Yahwe sya kako saksmai samswen nabore. Ḇape, snonkaku ḇefarkor Refo sima nari sismai dafdif fa sifnoḇek snonkaku ḇesesya imnis samambraḇ sena. Fandun fa koḇebati kuker snonkaku ḇeradine sya. Imbape, wos farkankin ro Refo bisa ifnoḇek ko fa koḇukimam pyum samswen ḇekur ko ro fafisu ine raris dafduf ma saneso ya ke?