Allah Ima Manseiri?
Sino soḇe kofrur sasar ido, na Allah ḇyemankara ko kuker masasor. Ḇesesya soḇe Allah ima isawarwar ma ḇyuk ampun faro sasar rosai monda kofrurna. Sia soḇe Allah iswar ko ḇa, ḇyinkwanbur ko, ma kopok komambir I ḇa. Snonkaku ḇebor sikofen sifawi Allah, ḇape rofyor sifuken manseiso Allah I, kankarem sena nesisyeyae.
Kofanam syadi Allah ima nefandun ke? Imbo, nefandun ḇae. Snaro komambir kaku Allah ido, nari koḇeaski. (Farfyar ro Manwawansya 17:26-28) Na iswar ma ifnoḇek ko. (Yakobus 4:8) Ma, ibasyadi wer iso kosmai kankenem fyoroya.—Yohanes 17:3.
Rariso komambir kaku Allah I? Nwa bati ḇefanam kuker Au ke? Randak ya, rariso muḇebati yae? Imbude fandun fa wafawi snori, rari-rari ḇyena, rosai imarisen ma imarisen ḇa na. Rosai ifrur ro fafisu iwara ma rosai na imbe ifrur ro ras ḇarpon iyama. Snar wafawi roi nabor kwar kuker bati bedine, roi nane naiso ḇefrur fa fanam kuker I.
Rarirya kako, na kofanam syadi ḇe Allah rofyor kofawi:
Syap ine sifrur fa nḇuk kankarem faro fakfuken anna. Nari nafnoḇek Au monda ḇa fa farkor manseiso Allah, ḇape rariso nwa payamyum ya fyor ḇebati kuker Allah I.
Wamarisen Ido Mam Ine Kako
BARYAS
Allah Snonsnon Ḇyediso?
Wafawi ke roba Allah snonsnon Ḇyedi fyasnabair rari-rari ḇepyum Ḇyena?
