Rofyor wasrow kuker snonkaku oso, na wafuken ḇepon, ”Snombriso?” Wafuken Allah ido, rosai na ikofen ya?

”Ayaine Yahwe. Iso snonsnon Ayedi.”​—Yesaya 42:8.

Snonsnon ani ḇyefandun faro Allah mankundi. Osoḇaberi ḇebuk snonsnon ani ḇe Allah I ḇa; Yahwe mankundi ḇekinfir snonsnon ani faro I. Yahwe ikofen, ”Isoine snonsnon Yedi isof fyoro-fyoro, ma [roro] snonsnon ine fandun mkoswarepen aya ro syos ḇe syos nayama.” (Keluaran 3:15) Ro Refo, Allah snonsnon Ḇyedine sapna nabor syadi ro nasan Ḇyedi, raris Manḇepoik Syadi, Kma, Manseren, ḇaido Allah. Sap na nabor syadi ro snonsnon ḇesena, raris Abraham, Moses, Daud, ḇaido Yesus. Osower ido, Yahwe imarisen snonsnon Ḇyedi sifawina. Refoya ikofen, ”Insama snonkaku sya sifawi snar Au, ḇenir ḇe Yahwe, Au monda Ḇekaki Syadi ro supswan ḇesiper.”​—Mazmur 83:18.

Snonsnon ani ḇyefandun kaku faro Yesus. Ro Yesus nadi fyarkor ḇe manfamyan ḇyesya, fyarkor si wos ine, ”Kma nkobedi ro boiyaswa, Nkofasren Snombri kada.” (Matius 6:9) Yesus mankundi ḇyenadi faro Allah, ”Mami Snombri isma baba!” (Yohanes 12:28) Baba ro Allah snonsnon Ḇyedi iso roi ḇefandun kaku ro Yesus kankenem ḇyeja. Inja ro nadi ḇyedi, ikofen roi ine, ”Yaḇuk baba faroi kwar, ma nari yaḇuk baba faroi wer!”​—Yohanes 17:26.

Fandun kaku fa kofawi Allah snonsnon Ḇyedi. Allah kawasa Ḇyesya ro fafisu iwara sifawi fadadiren ma fasaspar sismai na nefesepen kuker  Allah snonsnon Ḇyedi. ”Yahwe snonsnon Ḇyedi ima kaderen ḇenako kaku. Snonkaku ḇenapes sifrar ḇediwa fa sisma fadadiren.” (Amsal 18:10) ”Ma faro mansei riryawer ḇeyor Yahwe snori nari ismai slamat.” (Yoel 2:32) Refo ikofenḇair kawasa ḇeḇuk Allah snonsnon Ḇyedi nafrur fa siḇesebur kawasa ḇefarmyan ḇe I ḇa sya. ”Snar snonkaku oser oser nari siso allah sedi oser-oser, Ḇape nkoma nari nkoso Yahwe, Allah nkobedi, isof fyoro-fyoro.”​—Mikha 4:5; Farfyar ro Manwawansya 15:14.

Snonsnon ḇepyum ani kyur ḇe Allah mankundi. Sarjana ḇebor sya sikofen knam ro Yahwe snonsnon Ḇyeja isoine, ”Iso Ḇefnai Ḇedar fa Ndarirya.” Yahwe fyasnaiḇair knam ro snonsnon Ḇyedi fafisu fyasnaiḇair mankundi ḇe Moses i, ”Nari Yaḇerosai monda Yamarisenna.” (Keluaran 3:14) Inja snonsnon Ḇyedi ikofenḇair monda ḇa ḇe ko snar ima manḇedaw roi nakam. Snonsnon Ḇyedi kako ikofenḇair ḇe ko kuker samamḇraḇ Ḇyedi ḇe Manḇedaw fa ifrur rosai riryakam insama marisen Ḇyena ndarirya. Allah nasan Ḇyedi fyasnaiḇair papoik, ma karapesa Ḇyeja. Ḇape Allah snonsnon Ḇyedi, Yahwe, fyasnaḇair rari-rari Ḇyena.

Snonsnon Ḇyeja fyasnaiḇair snar ima iswar ko. Snonsnon Ḇyedi ḇefesepen kuker saswar ma soasuser faro ḇraur ḇramin ḇyesya kam ma ko kako. Ḇefandun syadi ya, imarisen insama kofawi snonsnon Ḇyedi snaro imarisen komambir pyum I. Iḇasyadi, ikofenḇadir ḇepon Snori fyor kofuken ḇaime. Inja nasnaibos kaku Allah imarisen komam I ḇe Dewa ḇa ma Allah ḇeḇinkwanbur ko ḇa, ḇape mankun bisa kofanam syadi wer.​—Mazmur 73:28.

Koḇuk Allah snonsnon Ḇyedi fyasnaiḇair koswar I. Kwarapan kada, imbude wor bati bedi fa dor au imnis kuker snonsnon bedi. Mboi imewer dor au imnis kuker snonsnon bedi. Moḇsa kwara rai? Imbude na kwara snonkaku ine imarisen fyanam kuker aya ke roḇa. Rarirya kako kuker Allah. Yahwe ikofenḇair snonsnon Ḇyedi kwar ḇe kawasa Ḇyesya, ma danun ḇe ko fa kakbuk snonsnon Ḇyeja. Rofyor kofrurna ido, kofasnaiḇair komarisen kofanam syadi ḇe I. Iḇa syadi wer, myamepen kaku faro snonkaku ”ḇeswarepen snonsnon Ḇyedi”!​—Maleakhi 3:16.

Kofawi Allah snonsnon Ḇyedi ima nyan ḇepon kaku fa komambir I. Ḇape komnai awer ro dia monda. Fandun fa kofawi kakaku ro snonsnon ani. Fandun fa kofawi rosai imarisenna.