Rofyor wamarisen fa mambir pyum snonkaku oso ido, rosai fandun fa wafrur ya, fandun fa wasewar ḇepon rosai snonkaku ani ifrur kwar na. Rarirya kako, insama mambir pyum Allah ido, Au kako fandun fa wasewar ḇepon rosai Allah ifrur kwar na. Na kwandor kaku rofyor wafawi rosai Allah ifrur kwar ro randak iwara ma ro ras ḇarpon iyama nun fainda ḇe Au.

Allah Yahwe iso Manḇedaw ḇesyadi kaku. Ḇraur ḇramin Ḇyedi ḇepyum kaku nefasnai snar iswar kaku ko. Inja, ”Bisa komam ro komkasna [Allah] imnis rariso rofyor supswan ine ḇeḇefrur . . . . snaro roi anine bisa komamna ro Braur bramin Ḇyena.” (Roma 1:20) ”Iso ḇefrur supswan kuker papoik Ḇyena, ḇefrur saprop ḇedufen kuker fawawinanem Ḇyena, berir nanki kuker fawawi Ḇyena.”​—Yeremia 10:12.

Imnis raris, snonkaku ima Allah ḇraur ḇepyum Ḇyena, snar ’ifrur ko fa komnis I’ (Kejadian 1:27) Ine kyurfasnai konapes ḇa, mḇoi bisa koso rari-rari Ḇyena. Allah I kako ḇyuk ḇe ko samambraḇ fa kofawi rosai imarisenna ma kokenem imnis kuker wos ḇefarkin Ḇyena. Inja, rofyor kofrurna ido, kenem koḇena na neaski ma iba syadi wer, na koḇebati kuker I. 

Bisa komam ma koḇaḇir Allah saswar Ḇyedi ro ḇraur ḇramin Ḇyena ro supswan ine. Manwawan Paulus doḇe, ”I mewerḇa fa fyasnai mankundi kuker frur pyum nabor, isoine ḇyuk mekem ro nanki ma wampasi wambarek ḇeḇuksur pyum rokaker ḇe mko. Ḇyuk sneprei faro mko kuker nanan ma raryaḇ.” (Farfyar ro Manwawansya 14:17) Allah ḇyuk ḇe ko roi nabor syadiḇuro roi kofandun na. Allah ifrur roi nabor insama kokenem kuker marisen. Mboi roi nabor naisya kaker na Allah ḇyuk ḇe ko.

 Yahwe ifrur supswan ine insama snonkaku sya bisa sikenem ro dia isof fyoro-fyoro. Refo doḇe, ”Supswan ine ḇyuk kwar ḇe snonkaku sya.” Ma, ”ifrurna fa ḇyeḇei monda ḇa, ḇape ifurna fa koḇarek roro na.” (Mazmur 115:16; Yesaya 45:18) Snonkaku ḇemnis rariso na ḇebarek ro supswan ine ma isof fafisu rosai? ”Snonkaku ḇenapes siso nari ḇena supswan ine ma nari sḇarek rodiwa isof fyoro-fyoro.”​—Mazmur 37:29.

Ramnai, Yahwe ifrur snon ma bin ḇerandak isoine, Adam ma Eva. Mura, ryir su ro firdaus ḇero supswan fa ’sumom ma sufaduru na’. (Kejadian 2:8, 15) Allah ḇyuk ḇe su fararur ḇepyum kaku, ikofen ḇo doḇe, ”Mukapar romawa ma kpu isof sibor syadi ma mufrur fo supswan ma mukafyo na.” (Kejadian 1:28) Adam ma Eva su kako suna saneraro fa sukenem isof fyoro-fyoro ro supswan. Faḇye kaku, susoasuser Allah I ḇa. Ḇarpur mura, jadi fa suḇe ”snonkaku ḇenapes”, ”nari ḇeḇarek ro supswan” ine ḇa. Ḇape, rosai Allah Yahwe imarisenna nfadwer ḇa snaro sasar sufrur kwar na. Mkorama kawos roi ḇese Allah ifrurna ro fafisu iwara.

Rosai ḇefnai fa Yahwe ḇyuk Refo ḇe ko? Alasan ḇerandak ya iso insama komambir kaku Allah ma kofanam syadi kuker I. (Amsal 2:1-5) Iso ḇefnai fa Refo sifawina ḇe Allah Wos Ḇyena. Kakuḇae, syap oso ḇaḇeri na bisa ḇyuk kankarem faro fakfuken kuker Allah. (Pengkhotbah 3:11) Mboi, fasfas ḇero Refo ya na nafnoḇek ko fa komambir Allah. Na komambir pyum Allah I rofyor kowasya rariso ifrur pyum snonkaku sya, ḇaido kuker kowasya rosai imarisen ma imarisen ḇa na. (Mazmur 15:1-5) Na kowasya kako mamam Ḇyedi kuker samsyom, moral, ma nana arasai. Ko kako bisa komambir pyum Allah I ro Yesus wos ma fararur ḇyena.​—Yohanes 14:9.

Osower ido, Yahwe ḇyuk ḇe ko Refo insama kofarkor fa kokenem kuker aski. Ro dia kako na kofarkor nyan rariso insama kona kenem ḇeaski, komarisen faro rosai kosmaina, nyan insama komkakwarek syadi ḇa. Na syap ine ḇyuk kankarem ro fakfuken-fakfuken ḇefandun imnis ra: Rosai ḇefnai fa koḇekandera? Nari fafisu iyama kenem koḇena imnis rariso? Ma rosai na Allah ifrur insama marisen Ḇyena ndarirya?

Refo iso syap ḇepyum kaku snaro ḇeḇefas iso snon ri 40 ma ro swaf taun ri 1.600 syadi. Ḇape ḇepyum kaku yaiso tema ya imnis ro randak isof pupes. Rosai ḇefnai ya? Snaro ḇena kakara ḇero dorina iso Allah mankundi. (2 Timotius 3:16) Bukti manuskrip kuno naisya nabor fasnaiḇair snar Refo ima imnis kaku ḇaido akurat. Snonkaku ḇeḇarbor sya sisewar kaku fa srap Refo, sidwarek snonkaku sya fa siwasya Refo, sidwarek si fa sefararwei Refo na, ma ḇesena. Ḇape, Refo naisya pdef isof ro kirine ma ḇye syap ḇeḇor kaku ḇeḇerwas kwar ro supswan. Ine fyasnai, ’Allah Wos Ḇyena naisya pdef isof fyoro-fyoro.’​—Yesaya 40:8.

Allah ifrur roi oso ḇepyum kaku insama marisen Ḇyena ndarirya. Allah imarisen insama snonkaku koine bisa kokenem isof fyoro ro supswan. Ḇape snar Adam isoasuser ba ma ifrur sasar, inja na ismai kankenem fyoro ya ḇa. Romawa ḇyesi koine kokam kosasar. ”Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar.” (Roma 5:12) Adam sasar ḇyena imnis ra ifrur mnai rosai Allah fyasos ḇe snonkaku sya. Rosai nari Allah Yahwe ifrur na?

Yahwe nari ifrur rosai riryakam imnis kuker rari-rari Ḇyena. Dor Adam ma Eva su fa sukamar rosai sufrur na. Bape, fyasos saneraro ḇepyum ro fafisu iyama faro romawa ma kpu suḇesya. Snar Yahwe fawinanem Ḇyena inja fyasos ḇeri nyan ḇesae faro samswen ani. (Kejadian 3:15)  Roro Yesus i, nari ḇyuk ḇaḇemkei faro snonkaku sya ro sasar ma marmar. Rosai knam ya?

Insama komkei ro sasar ya, Yahwe iwan Yesus ḇe supswan fa, ”ḇyuk kankenem ḇyedi fa ḇyuk ḇak namuk kawasa ḇeḇor.” * (Matius 20:28; Yohanes 14:6) Yesus fyarser kankenem ḇyedi faro snonkaku sya snaro inapes raris Adam. Bape iḇese kuker Adam i, Yesus isoasuser pdef isof imar. Mura Yahwe ḇyawes kaḇer Yesus ḇe nanki. Adam jadi fa ḇyuk kankenem fyoro faro romawa ma up ḇyesya. ”Raris snonkaku sibor sḇesasar snar snonkaku oser ḇaḇeyuk ḇyena, rarirya kako nari snonkaku sibor sikenem imnis Allah marisen ḇyedi, snar snonkaku oser ḇeḇeyuser Allah marisen ḇyena.” (Roma 5:19) Ḇape roro Yesus farsarser ḇyedine, Allah ḇyuk saneraro kankenem fyoro ro supswan faro snonkaku ḇesoasuser sya imnis Allah asas Ḇyena ro randak.

Kofarkor nabor kwar kuker nyan Yahwe ifrur mnis kaḇer Adam ḇaḇembroḇ ḇyedi. Na komam oso ḇaḇeri ḇedwarek Yahwe I fa ifrur rosai imarisen na; wos Ḇyena nari ”ifrur fa ndarirya.” (Yesaya 55:11) Ko kako kofarkor snar Yahwe iswar kaku ko. ”Inekada saswar: Koi ḇeswar kwar Allah i ḇa, ḇape Allah i ḇeswar ko kwar, inja iwan Rumkun ḇyedi insa kuker i kosma ḇaḇepayasyos ro sasar koḇena.”​—1 Yohanes 4:9, 10.

Allah ”Mankundi Rumkun ḇyedi iswariḇa, mboi ḇyuki faro fandun koḇenakam.” Inja, na kokyar Allah na ḇyuk ḇe ko, ”roi ḇesena” ḇyeasas kwar na. (Roma 8:32) Allah Ḇyeasas rosai na ḇyuk ḇe ko?Wawasya pdef.