Kawos kwar kankarem faro fakfuken, Allah Ima Manseiri? Kofarkor kwar snar snonsnon ḇyediso Yahwe ma rari ḇeba syadi ḇyediso saswar. Kofarkor kwar rosai ifrur kwar ḇe ko ma rosai na ifrur ḇe ko ro ras ḇarpon iyama. Imbude kofarkor roi nabor kwar ro Allah I. Ḇape, na kofuken rofyor kofawi Allah ido, rosai fainda ya ḇe ko?

Yahwe ḇyeasas, ”Swewar I nido, nari ḇye mankundi fa wasrow I.” (1 Tawarikh 28:9) Inja, rofyor wasewar ma wafawipyum Allah ido, na wamarisen ḇebati fanam kuker I. (Mazmur 25:14) Ine ipyum kaku! Ḇape rosai fainda ya snar ḇebati fanam kuker Allah I?

Kankenem ḇefo kuker aski. Yahwe iso ”Allah ḇaḇeaski.” (1 Timotius 1:11) Rofyor ḇebati kuker Yahwe ma wafrur parenta ḇyenakam ido, na wasmai aski, pararei, ma swaruser ḇedi naknon. (Mazmur 33:12) Allah I kako na ifnoḇek au fa wakrenḇur samswen ro ḇaḇebati ḇeḇyeba na, insama nwa rari-rari ḇepyum, ma ḇinkwanbur kenem ḇebye ḇa ro dunya ine. Inja na wamarisen kako kuker manḇefas Mazmur wos ḇyena ḇekofen, ”Faro aya fanam ḇe Allah ima roi bepyum kaku.”​—Mazmur 73:28.

Na fyaduru ma myamwarek pyum au. Yahwe ḇyeasas faro kawasa Ḇyesyakam, ”Yabuk anun kuker Mkasi myam yoḇ Au.” (Mazmur 32:8) Ine kyurfasnai Yahwe myamwarek ko oser-oser ma ḇyuk ḇe ko rosai kofandun kam na. (Mazmur 139:1, 2) Rofyor ḇebati fanam kuker Allah kwar ido, na insape wafawi Allah imarisen ifnoḇek au ḇesya kwar ro ras ḇe ras.

Kankenem ḇepyum ro ras ḇarpon iyama. Allah ḇyuk ḇe au kankenem ḇefo kuker aski ma marisen monda ḇa. Ḇape, ḇyuk kako ḇe au fafisu ḇepyum kaku ro ras iyama. (Yesaya 48:17, 18) Refo ya doḇe, ”Kankenem ḇekain fyoroya isoine, mboi ssmambaḇir aw werer Allah ḇenapes, ma ssmambaḇir Yesus Kristus wawan kwar ani.” (Yohanes 17:3) Ro dunya ḇefo kuker kandera ine, saneraro Allah ḇyuk ḇe ko imnis raris yor ro wai, ”ḇyeḇemsawer isof ro sorenya ropukya.”​—Ibrani 6:19.

Kofarkor nabor kwar roi ḇefnai fandun fa komamḇir kaku Allah ma koḇebati kuker I. Mḇoi, infa wasmai informasi nabor syadiwer ido, wor Saksi-Saksi Yahwe sya ḇaido, mam situs nkoḇedi jw.org/bhw.