Rofyor kofawi pyum snonkaku oso rari ḇyena kwar ido, nari koḇebati fanam kuker i. Rarirya kako, rofyor kofawi pyum Yahwe rari-rari Ḇyena kwar ido, nari koḇebati fanam kuker I. Yahwe rari-rari Ḇyena kam napyum fafaya ḇa, rari rifyak ḇepyum ḇyena isoine: papoik, fawawinanem, nanapes, ma saswar ya.

”Sye Yahwe, Manseren Ḇekaki Syadi! Au iso ḇefrur farsyos ma supswan kuker papoik ḇeba Bena.”​—YEREMIA 32:17.

Fasasna ro Allah papoik Ḇeba Ḇyena nasnaibos kaku ro ḇraur Ḇyena. Rupa ra, wores ro bandi ḇo warires fyor daresya iḇa ido, rosai ḇaḇir ro baken kif bedi? Samsam ori ya. Mansei ḇefrur ori ya? Yahwe I. Kakuya samsam ḇyena indokada 15.000.000°C. Ro detik oser ido, ori isasyar energi ḇemnis kuker syaran ma syaran bom nuklir ḇekpef na.

Ḇekakuya, orine ikasun syadiḇur ro mak syaran ma syaran ḇero farsyos iyaswa. Peneliti sya sisewar fa sifawi mak ḇeba kaku, ḇenir ḇe UY Scuti. Ḇaḇa ḇyedi indokada 1.700 ro oriya. UY Scuti ine iba fafaya ḇa, inja rofyor kofadwer oriya kuker mak ine ido, ḇaḇa ḇyedi bisa iserandum oriya ma planet ḇesena isof planet Jupiter. Imbude ine na nafnoḇek ko fa kofawi pyum Yeremia wos ḇyena ḇekofen, Allah Yahwe ifrur mandep ma supswan  ma kako farsyos ḇeba ine kuker papoik ḇeba Ḇyena.

Rariso kosmai fainda ro Allah papoik Ḇyena. Snonkaku sya sfandun Allah ḇraur Ḇyena, imnis raris ori ma roi ḇero supswan ine. Osower ido, Allah ḇyuk papoik Ḇyena faro fainda snonkaku koine oser-oser. Moḇsa ifrurna rai? Ro abad randak Yahwe ḇyuk papoik ḇe Yesus i fa ifrur mujisat ḇekaku. Kowasya, ”snonkaku ḇepraf sya smam, manis sya simbran, ḇeduf pado sya seḇefasren, ḇepro sya simnaf, ḇemar sya siḇer si”. (Matius 11:5) Rariso kuker ko ro baboine? Refoya ikofen, ”Ḇyuk samamḇrab faro snonkaku ḇemḇrus sya.” Ikofenwer, ”Snonkaku ḇekyar faro Yahwe nari sisamḇrab kaḇer.” (Yesaya 40:29, 31) Allah na ḇyuk samamḇrab beba kaku kokara ḇaim na fa nafnoḇek ko insama kofarmku pdef ro samswen kosmai ro kankenem koḇena. (2 Korintus 4:7) Au kako wamarisen fa ḇebati kuker Allah ḇeswar kaku ko ma ḇebuk papoik ḇeba Ḇyeja fa ifnoḇek ko fyor kosmai samswen.

”Ḇraur bramin ḇena nabor fafaya ḇa, sye Yahwe! Roi nakam Wafrurna kuker fawawi Ḇena.”​—MAZMUR 104:24.

Kuker kofarkor nabor syadiwer roi Yahwe ifrurna, na mankunko komanen kaku Allah fawawinanem Ḇyena. Farkarkor oso sap ḇe biomimetik ḇaido biomimikri. Ilmuwan ro bidang anine sisewar fa sifawi Yahwe ḇraur Ḇyena fa sifarari Yahwe ḇraur ḇyena fa sifrur teknologi ḇepyum kaku, ine raris lem isof ro pesawat.

Komam kada Allah fawawinanem Ḇyenane nasnaibos ro baken koḇena ine. Kwarapan, imnis raris kapira mkun oso moḇ isur iḇa raya. Ḇyekapira ḇaim, iryewen ro sel oser ḇyebon, ma ḇeser kode genetik ḇefandun kam na. Ramnai sel anya ikpef fa ibor ma namnis kame. Mura, sel-sel anna nefararwe ma neḇesisye. Bon ya ḇye sel utin ma utin imnis raris, ḇye sel rike, iyawer ido ḇye sel saraf, ma nayawer ido nḇe sel kor na. Organ-organ ḇero baken namnis nsae ma naswara nambran kwar imnis fungsi ḇyena. Ro paik risiw monda, sel randak ḇaido ḇekaku anya iryewen ma ḇyekapira mkun kuker sel ḇeborna. Allah ḇaḇefawinanem Ḇyena nasnaibos ro ḇraur ine. Inja, snonkaku ḇebor sya sikyar faro rosai Refo ikofen, ”Yasyom sandik Au snar wafrur pyum kaku aya ma yapyum fafayaḇa.”​—Mazmur 139:14.

Rariso kosmai fainda ro Allah fawawinanem Ḇyeja? Manḇedaw koḇedi ifawi rosai kofandun na insama kosmai aski. Snar nya fawawinanem ḇekaki ma ḇepyum, inja bisa ḇyuk ḇe ko anun fawawinanem ro Wos Ḇyena, Refoya. Imnis raris, byuk anun ḇe ko fa ’koḇuk ampunyae’ ḇesya kwar. (Kolose 3:13) Anun ine ḇyefainda kaku. Peneliti oso fyas ḇo doḇe koḇuk ampunyae nari nafrur kenef pyum, tekanan darah koḇena nek ḇa, koḇedepresi ḇa, ma na kokrenbur dafduf ḇesena. Allah ima ḇyefawinanem, ḇyuk fafnoḇek ma anun ḇepyum  faro ko imnis ra bati ḇefrur pyum. (2 Timotius 3:16, 17) Na wamarisen wakna bati ḇerarya ke?

”Yahwe iswar nanapes.”​—MAZMUR 37:28.

Allah ifrur roi ḇepyum ḇesya kwar. Refoya ikofen, ”Pok fa Allah ḇenapes ifrur roi ḇeḇarḇor, ma Ḇepoik Syadi fa ifrur roi ḇenapes ḇa!” (Ayub 34:10) Manḇefas Mazmur i kako ikofen, ”Na Ḇemankara kuker nanapes.” (Mazmur 67:4) Snaro, ”Yahwe myam kosnesna” ma sino sipok sankar I ḇa. Ima bisa myam roi ḇekakuna ma ḇyemankara imnis kuker rosai snonkaku sya sifrurna. Osower ido, Yahwe ifawi roi nakam ma bisa ifrur snemuk ḇesrow kaku. (1 Samuel 16:7) Allah myam ḇaḇenanapes nakam ma roi ḇebarbor ḇero supswan ine, ma ḇyeasas fyoro werḇa nari, ”snonkaku ḇeḇarḇor sya seḇepyosbur supswan ine.”​—Amsal 2:22.

Ḇape, Allah ima ḇyemankara kuker masasor ḇa. Refoya ikofen, ”Yahwe ima isawarwar ma nya sneḇenaḇye,” iḇa syadi, fyasnaina faro snonkaku ḇeḇarḇor ḇemarisen ḇemḇroḇ sya.​—Mazmur 103:8; 2 Petrus 3:9.

Rariso kosmai fainda ro Allah nanapes Ḇyena? Manwawan Petrus doḇe, ”Allah myam rarwas snonkaku ḇa. Snonkaku oser-oser ro er rosairya kaker, ḇeyararyof ma ḇeḇesyowi Allah kuker napnapes imarisen si.” (Farfyar ro Manwawansya 10:34, 35) Kakubae koma korama ro keret, er, farkarkor roḇaido arasai nabor ke roḇa, na kona fainda ro Allah napnapes Ḇyena snar myamfarfir snonkaku ko ḇa.

Snar Allah imarisen fa kona fawawi ma fainda ro nanapes Ḇyena, inja ḇyuk ḇe ko sneuser. Refoya fyasnaiḇair sneuser ima imnis sasoser ’neḇefas ro kosnesna,’ ḇeḇair ḇe ko rosai ḇesasar ma ḇesasar ḇa na. (Roma 2:15) Fainda ḇyenaiso? Sneuser ḇeḇefari pyum na nafnoḇek ko fa koḇinkwanbur fararur ḇesasar na. Ma rofyor kofrur sasar ido, na sneuser ine ifnoḇek ko fa kombror. Osower ido, kuker kofawimnis Allah nanapes Ḇyena nari nafnoḇek ko ma nari kofanam syadi ḇe I!

”Allah ikada isaswar.”​—1 YOHANES 4:8.

Allah fyasnaiḇair papoik, fawinanem, ma nanapes Ḇyena. Ḇape, Refo ikofenḇair ḇa Allah ima papoik, fawawinanem, ḇaido nanapes. Ikofen monda ima isaswar. Rosai ḇefnai ya? Snar Allah nya papoik, ine nafnoḇek I fa ifrur rosai rirya monda. Fawawinanem ma nanapes Ḇyena fyarkin nyan moḇsa ifrur roi nakam. Ḇape Yahwe saswar Ḇyeja nadif rosai monda fararur ifrurna. Saswar nawyae rosai monda ifrur nakam.

Yahwe nya roi nakame rariryano, saswar Ḇyedi nadif I fa ifrur snonkaku ma malaikat sya. Imarisen insama sismai fainda ro saswar ma ḇaḇefaduru Ḇyedi. Kuker sawarwar Yahwe fyasos supswan ine ḇe rum ḇepyum faro snonkaku sya. Fyasnai saswar Ḇyedi ḇesya kwar faro snonkaku syakam kuker ”ḇyuk ori faro snonkaku ḇarḇor ma ḇeḇye sya ma ḇyuk mekemya dado faro snonkaku ḇenapes ma ḇenapesḇa.”​—Matius 5:45.

Osower ido, ”Manseren saswar ḇyedi iba ma ifo kuker saneso.” (Yakobus 5:11) Yahwe fyasnai sawarwar Ḇyeja faro snonkaku ḇena sne ḇesiper ḇeḇensewar fa ḇemambir I ma ḇefanam syadi ḇe I. Yahwe myam snonkakusya oser-oser. Kakuya, ’I ḇefaduru ko.’​—1 Petrus 5:7.

Rariso Kosmai Fainda ro Allah Saswar Ḇyeja? Komarisen kaku rofyor komam oriya syun. Koraryaḇ kaku fafisu korower kamamḇrif ro kapira oso. Koḇesyowi kaku saswar ro min koḇesi. Roi nanekam imbude rya nefandun mankenem ḇa, ḇape roi anna nafur fa kankenem koḇena nḇemaeja syadi.

Ko kako kosmai fainda ḇese ro Allah saswar Ḇyeja: nadi. Refo idif ko fa, ’Koraryof rosairya wer kako, mboi mkofasna roi ḇeḇor kam marisen mkoḇena faro Allah ro nadi ma fararyor kuker kafkofen kasumasa.’ Imnis ra kamam ḇesawarwar, imarisen kowaira ḇe I fa kosmai fafnoḇek ro samswen kosmaina. Snaro, Yahwe Allah ḇena saswar ḇeba kaku, ḇyeasas nari ḇyuk, ”saswar-ḇaḇye ro Allah, ḇesyadi ro kakara.”​—Filipi 4:6, 7.

Ibye kada roi kofarkor kwar anna, na nafnoḇek ko fa komambir pyum kaku Allah rari rari Ḇyena raris papoik, fawawinanem, nanapes, ma saswar. Insama komambir syadi Allah I, mkorama kofarkor rosai Allah ifrur kwar na ma rosai nari ifrur na faro Au.