Allah Snonsnon Ḇyediso? Allah mankundi ikofen, ”Ayaine Yahwe. Iso snonsnon Ayedi.” (Yesaya 42:8) Refo dap Allah snonsnon Ḇyedine fanam rarwan ri 7.000. Mboi, ro terjemahan Refo ḇebor sfadwer snonsnon ine kuker nasan monda, raris ”Manseren”. Allah imarisen bebati kuker I, inja dor Au fa wor snonsnon Ḇyedine.​—Mazmur 105:1.

Yahwe Nasan Ḇyedi. Refo dapḇair Yahwe I kuker nasan Ḇyena, raris ”Allah”, ”Ḇepoik Syadi”, ”Manḇefrur”, ”Mami”, ”Manseren”, ma ”Manḇepoik”. Nadi ḇebor sfas ro Refo na, sap Yahwe I kuker nasan ḇesyowi snonsnon Ḇyedine, Yahwe.​—Daniel 9:4.

 Moḇ Allah Isnai Raya. Allah ima rur rirya. (Yohanes 4:24) Refo doḇe ’snonkaku osero ḇaḇeri ḇemam Allah kwar’. (Yohanes 1:18) Refo ikofenḇair roi Allah ḇyaḇir na. Snonkaku sya bisa sifrur fa ḇyesneso ḇaido imarisen.​—Amsal 11:20; Mazmur 78:40, 41.

Allah Rari Ḇepyum Ḇyena. Allah ima inapes faro snonkaku syakam ḇeramaker er ma moḇ sairirya kam. (Farfyar 10:34, 35) Nya kako sne ḇenaḇye, isawarwar, imasasor fasaw ḇa ma ifo kuker saswar soasuser ma kakaku. (Keluaran 34:6, 7) Mboi, Allah rari ḇepyum kaku Ḇyena nama fyak monda.

Papoik. Snar iso ”Allah Ḇepoik Syadi”, inja papoik Ḇyena nakaki syadi fa ifrur rosai ikofen na.​—Kejadian 17:1.

Fawawinanem. Allah fawawinanem Ḇyena nakaki syadi ro mansei monda. Inja Refo doḇe I ’monda ḇefawinanem syadi’.​—Roma 16:27.

Nanapes. Allah ima ifrur roi ḇekaku ḇesya kwar. Roi ifrur na namnis kaku, ma inapes ḇesya kwar.​—Ulangan 32:4.

Saswar. Refo doḇe Allah ima isaswar. (1 Yohanes 4:8) Allah fyasnai saswar Ḇyena monda ḇa, mboi iso knam ro saswar ya. Roi ifrur nakam ndramuma ro saswar ya, ma nbuk payamyum ro kankenem koḇena ras ḇe ras.

Allah Imarisen Ḇyebati kuker Snonkaku Koine. Allah ima Kma ḇesaswar koḇedi ro nanki. (Matius 6:9) Kofasnai kakyar faro I kada, na ḇyebati kuker ko. (Mazmur 25:14) Inja, Allah dor ko fa kofanam faro I ro nadi ma koḇuk makakwarek koḇena kam faro I kukro fyaduru ko.​—1 Petrus 5:7; Yakobus 4:8.

Yesus Ima Allah Dirya Ḇa. Yesus ima iḇese kukro derer monda Allah ifrur ḇepon ḇeri. Iso ḇefnai fa Refo dap i ḇe Allah Roma Ḇyedi. (Yohanes 1:14) Yahwe ifrur Yesus i raposa, ḇyuk Roma oser baken Ḇyedine fa ḇye manḇekir ro fararur fa ifrur roi ḇese nakam.​—Amsal 8:30, 31; Kolose 1:15, 16.

 Yesus Kristus ikofen ḇa ima Allah dirya. Kakuḇae, Yesus ikofen ḇo doḇe, ”Yaramuma [ro Allah] ma iso ḇewan aya.” (Yohanes 7:29) Rofyor Yesus dawos ḇe manfamyan oser ḇyedi, dap Yahwe I ḇe ’Mami ayedi ma Mami mkoḇedi’ ma ”Allah ayedi ma Allah mkoḇedi”. (Yohanes 20:17) Yesus imar raposa, Yahwe ḇyawes i fa ikenem ro nanki ma ḇyuk papoik ḇe i fa ḇyepoik.​—Matius 28:18; Farfyar 2:32, 33.

Yesus Kristus Bisa Ifnoḇek Ko fa Kofanam faro Allah

Yesus ryama ḇe supswan ine fa fyarkor ko insama kofawi Kmari. Yahwe mankundi doḇe, ”Ine iso Roma Ayedirya, Yaswar i. Mkorower i.” (Markus 9:7, Terjemahan Dunia Baru [NW]) Yesus myambir syadi Allah ro snonkaku ḇesesya. Doḇe, ”Snonkaku oso ḇaḇeri smambir manseiso Kma ani, Roma ya derer. Nari smambir manseiso Kma ani rofyor Roma ya imarisen ikofenḇair Kma ya kada.”​—Lukas 10:22, NW.

Yesus fyasnai pyum kaku Allah rari-rari Ḇyena. Yesus iso pyum Kmari rari-rari Ḇyena, inja bisa ikofen, ”Mansei ḇemam aya kwar ido, myam Kmaya kwar kako.” (Yohanes 14:9) Yesus dun snonkaku sya faro Allah kuker fyasnai Kmari saswar Ḇyena ro wos ma kenem ḇyena. Doḇe, ”Aya ine kada nyanya ma napnapes ma kankenem. Snonkaku oso ḇaḇeri ḇerama faro Mami, rofyor imbranuk ro ayaḇa.” (Yohanes 14:6) Ikofen wer ḇo doḇe, ”Snonkaku ḇesyom kaku sya nari sisyom Mami kuker farkankin rur ḇesren ma imnis kuker kakaku, snar Mami syewar snonkaku ḇemarisen ḇesyom I kuker nyan ḇerarirya ḇae.” (Yohanes 4:23, NW) Kwarapan kada! Yahwe syewar snonkaku ḇemnis raris Au ḇemarisen ḇefawi kakaku kuker I.