Kokyar Refo Iso Knam ro Kakaku
Ro fyor iwara isof ro baboine, snonkaku ḇerama ro moḇ, keret, ma er ḇebor sikyar Refo iso knam ro kakaku. Baboine, snonkaku ḇebor simarisen sifawi na. Mboi, ḇesesya skara sasar Refo ya kukro soḇe nama namnis ḇa kwar ḇaido naser mafafu monda. Moḇsa kwara rai? Wakyar wos ḇero Refo ya ke?
ROI ḆEFNAI FA KOKYAR WOS ḆERO REFO YA
Rosai ḇefnai fa wakyar wos ḇero Refo ya kyaku? Rupa radine: Bebati kuker snonkaku oso kawan kwar, mam mboi dankar Au ro swaf oso ḇaḇeri, na wakyar faro i ḇae. Inja, wakyar Refo ima imnis ra snonkaku ḇeankarkar ḇa ani ke? Kwara roi ḇeḇeso nane.
Ḇefas Sya Sankarkar Ḇa
Ḇefas Refo sya sankarkar ḇaḇeri, sfas sasar ma soasuser ḇa sena. Raris Yunus i, fyas soasuser ḇa ḇyena. (Yunus 1:1-3) Ro syap ḇyedi, doḇe Allah ḇyuk samamyai ḇe i, mboi ikofenḇair ḇa moḇsa fyadwer kakara ḇesasar ḇyena rai. (Yunus 4:1, 4, 10, 11) Wos ḇekaku ro manfasfas Refo sya nfasnaiḇair siswar kaku faro kakaku ya.
Anun Ḇyena Namnis
Anun ḇepyum ro Refo ya namnis ḇesya kwar ke? Imboḇae. Rupa ra, mam rosai Refo ikofen kuker wis ḇepyum koḇena faro snonkaku ḇesesya isoine, ”Roi ḇeḇor mkomarisen insa snonkaku sifrur faro mko, rarirya mkakfrur faro si kako.” (Matius 7:12) ”Kankarem ḇemyaren nari nafrur fa ḇinkwan ro masasor ya, ḇape wos rarmomen nafnai masasor.” (Amsal 15:1) Inja, kakaku sfas ro Refo ya namnis kaker isof ro baboine.
Namnis ro Sarisa Na
Mansasewar fawawi sya sisrow roi nabor ro taun ḇe taun kwar, roi anna nfasnai snonkaku, moḇ, ma sarisa sap ro Refo na namnis kaku. Kwarapan farfyar oso ine. Refo doḇe ro Nehemia fafisu ḇyedi, snonkaku Fenisia ḇeraker Tirus ḇeḇarek ro Yerusalem sya sun in ma roiebor sairirya monda fa sboḇ na.—Nehemia 13:16.
Mnuk ine kyaku ke? Imbo. Mansasewar fawawi sya sisrow kwar snonkaku Fenisia sya roiebor sena ro Israel, roi nane nfasnai kaku er risuru suine sufrur farḇaḇyan. Oso wer ido, ro Yerusalem, sḇai kwar mom-mom ro in ḇero Soren Fadu. Inja, sikyar ḇeboḇ in ansya sun na ro moḇ ḇeḇinkwan kaku. Rofyor sisrow roi nane, sarjana oso ikofen ḇo doḇe, ”Wos ḇero Neh[emia] 13:16 fyasnaiḇair snonkaku Tirus sya sboḇ in ro Yerusalem ima roi ḇekaku nairi.”
Namnis kuker Fawawi Dunya
Refo ima syap agama ma sarisa. Mboi, fyor dawos roi ḇekur ḇe fawawi dunya, namnis kaku radiri. Mam roi oser ine.
Ro taun ri 3.500 naiwara, Refo ikofenḇair supswan ine kyain ro moḇ ḇemkei. (Ayub 26:7) Ine iḇese kuker snonkaku ro fafisu naiwara ḇeyoḇe supswan ine ipyar ro war yabori, ḇaido waw ḇebamantar oso syopan i. Imbape, ro taun ri 1.100 rofyor sfas syap Ayub ramnai, snonkaku sya sikyar kaker snar supswan ine kyain ro farsyos ḇa. Mboi, roi oso isya syopan i. Taun utin rikyor mura, isoine ro taun 1687, Isaac Newton fyasḇair ro syap ḇyedi ḇo doḇe supswan ine iyaryar ro moḇ ḇemkei kuker samambraḇ gravitasi na. Roi isrow ro baboine imnis kuker rosai Refo ikofen ḇepon kwar ro taun ri 3.000 naiwara!
Roi Ikofen Ḇepon Na Nkaku
Roi Refo ikofen ḇepon kwar namnis kam ke? Mam kakaku oser ine: Yesaya ikofen ḇepon kwar snar mnu Babilon nari ikarḇaken.
Roi Ikofen Ḇepon Kwar: Ro abad war Masehi ḇaim, Yesaya fyas ro Refo ḇo doḇe Babilon ima mnu ḇesambraḇ kaku. Mboi, nari simkok i ma snonkaku oso ḇaḇeri na ḇeḇarek ro moḇ anya wer. (Yesaya 13:17-20) Dapḇair kako snonsnon ro snonkaku na ḇemkok mnu ani, isoine Kores. Ikofen kako moḇsa na Kores ifrur warḇeki ani fa isyor raya. Ma doḇe kedwa ḇeba ro mnu ani nari srir i fa dores monda ḇo sken i ḇa.—Yesaya 44:27–45:1.
Ndarirya: Swaf taun ri 200 mura, raja Persia ryama kyakok mnu Babilon. Snoriso? Kores. Snar samswen kaku fa sisun ḇe mnu Babilon kukro Warḇeki Efrat isya, inja Kores iwan sordade ḇyesi fa sbai dwas insama war ya idaf ḇe moḇ ḇese. Ifrur rarirya insama war ḇekaki ani isyor isof ro wepur, rarirya Kores sordade ḇyesya bisa simbran ro dona ḇe mnu ani. Fafisu sisun mundum, snonkaku Babilon sya srir kedwa ya fa dores monda! Inja, Kores sordade ḇyesya sisun ro kedwa ani ḇo skakok mnu ani.
Mboi, snonkaku sya na sḇarek kaker ro mnu Babilon ani ke? Kawasa sya sḇarek kaker ro mnu ani swaf abad riḇeso. Mboi baboinema, mnu Babilon ḇye kerker kwar. Moḇ ine kyain fanam ro sup Bagdad, Irak. Roi nane nfasnaiḇair rosai Yesaya ikofen ḇepon kwar, ndarirya kaku. Inja, kokyar rosai Refo ikofen kwar na, ma kokyar faro roi ikofen kuker ras ḇarpon iyama kako.
