Fafisu taun risyaran kwar, snonkaku oso ḇaḇeri ifawi kaku moḇsa dafduf ine ikren raya. Inja, snonkaku riyuta sya simar kukro dafduf ḇefarpampam ine nkur si. Mboi ḇarpur muma, ḇesasewar fawawi sya sisewar fa sifawi dafduf ine. Sismai roi ḇefnai fa dafduf ine fyarpampam iso snar roi sor ḇe kuman, raris bakteri ḇaido virus. Fawawi nane nafrur fa snonkaku ḇebor sḇinkwan ro roi ḇefnai dafduf ine ma siprei. Inja, fawawi ḇekaku nane nafrur fa snonkaku miliar sya sikenem kawan ma siprei syadi.

Kofawi roi ḇefandun syadi ḇese wer ima ipyum kako ke? Raris fakfuken ḇeḇeso nane:

• Allah ima manseiri?

• Yesus ima manseiri?

• Karajan Allah ido rosairirya?

• Moḇsa ras ḇarpon iyama na ḇyerai?

Snonkaku riyuta sya sismai kankarem faro fakfuken anna kwar. Nane nafrur fa kenem sena napyum syadi. Au kako bisa wakmnis ra si.

Imbude wafuken, ’Bisa yafawi kakaku kuker roi nakam ke?’ Kakuḇae, koḇe kosmai kakaku kuker roi nabor nama syamswen syadi. Kukro?

Snonkaku ḇebor sikyar mankun ḇa faro pamarenta, ḇefarḇaḇyan, ḇaido ḇekofenḇair abar sya. Kawasa sya sikyar mankun ḇa kukro ḇekofen sya imbude mankun kakara senairi, sikofenḇair roi ḇekaku kam ḇa, ma sankarkar. Snar kawasa sya sikyar ḇa kwar ma roi sawos na nkaku kam ḇa mura, simewer srower roi sawos anna monda ḇa mboi sikyar ḇa kako faro roi ḇekaku na.

Imbape, bisa wasmai kankarem ḇekaku faro fakfuken ḇefandun kaku ro kenem ine. Rariso? Kuker mam ro fawawi wasmai ro ras ḇe ras na.

Ro fafisu nakam, na swewar ker kakaku ya. Kwarapan Jessica fawar ḇyena. Doḇe, ”Inai yedi ipok fa dan kacang kermkun oḇaḇeri, dan kermkun ido na imar.” Inja, fandun fa Jessica ifawi kaku roḇean ḇepyum faro inai ḇyanine. ”Roi ḇerandak kaku iso yawasya pyum fasfas ḇero roḇean na fa yamam rosai sḇukifrur na. Ramnai, yasewar fa yafuken ḇe pabrik ḇefrur na. Yafuken pyum kako ro moḇ ḇese fa yafawi pabrik ani sboḇ roḇean ḇepyum na.”

Sasewar Bena faro kakaku ya imbude nefandun mankun ḇa raris Jessica i, mboi bisa waso nyan nane fa wasmai kankarem ḇekaku na, raris:

• Swewar kakaku ḇyena.

• Swewar fa wafawi nabor wer.

• Swewar knam ḇekaku ro rosai wakyar na.

Wafrur radine ido nari wasmai kankarem ḇekaku faro fakfuken ḇebor ro kenem Bena.

Rofyor Jessica syewar kakaku ro Refo, ifrur raris moḇ syewar fa myam pyum roḇean ḇe inai ḇyani. Doḇe, ”Snar yawasya pyum ma yasewar myaren fa yafawi wos ḇero Refo ya, ine nafnoḇek aya fa yasrow kakaku ya.” Raris Jessica i, snonkaku riyuta sfarkor fa sfawi kwar rosai Refo ikofen ḇekur faro fakfuken nane:

• Rosai eḇedari kokenem ine?

• Snonkaku ḇemar sya moḇsa sḇerai?

• Rosai ḇefnai fa koḇekandera?

• Rosai na Allah ifrur fa ipyos kandera nakam?

• Rariso insama kosmai marasrisen ro kina koḇedi?

Na wasmai kankarem ḇekaku faro fakfuken nane ma ḇesena kuker wawasya Refo ma swewar ro situs www.pr418.com.