María, Raúl, Arne, ma snonggaku ḇesesya soḇe nadi ima hadiah ḇepyum kaku dirya. Rofyor senadi, sawos ḇe Manseren Allah I, sikofen kasumasa faro I, ma sor fafnoḇek ro I. Sima sikyar kaku faro rosai Refo ikofen faro nadi ya: ”Ma komsik ḇo kora faro Allah, snar kokyar imnaf fararyor koḇena, rofyor kor rosairya wer imnis kuker marisen ḇyedi.”​—1 Yohanes 5:14.

Ḇape, ḇebor sya kako sikyar manggun faro wos anine ḇa. Raris, Steve ḇefawar ḇo ḇeyoḇe, ”Fyor yaḇeumur 17, bati rikyor ayeskoya sro kame. Oserya oto ifrarpum i, ma suyawer sumbrur ro soren ya. Yakmom kaku rosai ḇefnai fa nakam ndarirya. Yaḇenadi yor insama yasmai kankarem ro Allah I, ḇape  yasmai kankarem noḇa. Inja yakara, ’Rosai ḇewar fa yaḇenadi ya?’” Snonggaku ḇebor soḇe nadi sena neḇekarem ḇa. Inja, seḇirḇar ḇo soḇe senadi ido, kaku na sismai payamyum oso ro nadi ya ke roḇa.

Sia skara rarirya kako snar skara Manseren ifawi roi nakam, fandandun sena ma samswen ḇekur si na. Inja soḇe, sfawar roi sḇaḇir anna ḇe Manseren I ḇoi nari sismai royoḇa.

Ḇesesya skara ḇese wer ḇo soḇe Manseren imewer kyarem nadi sena kukro sasar sifrur fyor iwara na. Mam Jenny fawar ḇyedi. Doḇe, ”Yaḇaḇir ayama snonggaku ḇemnis risayaḇa. Randak iwara yafrur sasar nabore. Inja, yamewer yaḇenadi ḇe Manseren I snar yafrur sasar nabor kwar.”

Au ido kwara rarso? Ausya ḇaḇir kako na wasmai royoḇa fyor benadi ke? Imbape, Refo ḇyuk kakakyar ḇe ko snar nari kosmai payamyum ro nadi ya. Ma, kokyar kaku faro wos ḇero Refo kuker nadi. * Mgorama kosewar fa kofawi rosai Refo ikofen kuker fakfuken nane:

• Kaku Manseren ryower nadi koḇena ke?

• Rosai ḇefnai fa nadi nono Manseren Allah kyarem na ḇa?

• Moḇsa insama nadi koḇena neḇekarem rai?

• Payamyum risai kosmai ro nadi ya?