Sasuref ḇeḇeso na ḇyemaeja kaku snar ḇeḇukya ima nya nasan ḇekaki ḇaido snonkaku oso kosyo wi kaku. Sasuref ḇese, imbude sikowes kuker kumpan kermkun sena, ḇape na ḇyemaeja kaku snar ndramuma ro kina ḇesawarwar ḇaido bati ḇekaku koḇedi. Ine iso ḇeḇejadi rofyor Russell ḇyuk sasuref ḇe Jordan, ḇeḇeyap ro artikel randak ya. Inja sasuref fasaspar ya imnis kuker nyan ḇeradine kako ke?

Oser ya, Refo doḇe ”Allah fyasna saswar ḇyedi ro kosnesna snar iwan Rumkun oser ḇyedi ḇesupswan ine insa kuker Rumkun ḇyedi kosma kankenem.” (1 Yohanes 4:9) Ine iso ḇefrur fa sasuref ani ḇyemaeja kaku. Osoḇaḇeri ḇena papoik iba syadi ro Allah I. Manḇefas Ibrani ḇefas mazmur fyasnaiḇadir Allah I radine, ”Au, ḇenir ḇe Yahwe, au monda ḇekaki syadi ro supswan ḇesiper.” (Mazmur 83:18) Insama kaksmai sasuref ro mankun ḇekaki syadi, koma koḇenaḇye ḇa.

Suru ya, Allah iso ’Kma koḇedi’. (Yesaya 63:16) Snaro? Iso ḇeḇuk kankenem ḇeko. Fyadurupyum ko kako raris kma ḇesawarwar fyaduru romawa ḇyesi. Rofyor Allah dap kaḇer manfamyan Ḇyesi ḇekenem ro fyor iwara raris Efraim i, ifuken, ”Efraim ima roma oso ḇesyowi kaku faro aya, roma oso yaswar kaku ḇa ke? . . . Sne ayedi iryaḇ faro i. Ma kakuḇae nari yaswar i.” (Yeremia 31:20) Allah ḇyabir rarirya kako faro manfamyan ḇesyom faro I ro baboine sya. Ima Manḇedaw ḇepoik syadi koḇedi monda ḇa, mboi ima Allah ma Bati ḇefnoḇek ko pdef. Iso ḇefnai fa sasuref sairiryakam ḇeramuma ro I ḇyemaeja fafayaḇa!

Sasuref ḇeḇeso na ḇyemaeja kaku rofyor snonkaku ḇeḇukya, sidif i ḇa, mboi ḇyukna kuker sne ḇesiper. Snonkaku ḇefaḇri mankunḇa nari ḇyuk roi oso mboi dor kaḇer na ḇa.

Allah ḇyuk Rumkun Ḇyedi faro fandandun koḇena snar iswar ko. Refoya doḇe, ”Allah fyasna saswar ḇyedi ro kosnesna snar iwan Rumkun oser ḇyedi”. Fainda ya iso? ”Insa kuker Rumkun ḇyedi kosma kankenem.” (1 Yohanes 4:9) Allah ifrur roi ine snar sidif I ke? Oroḇaḇeri! ”Snonkakusya sisma ḇaḇemkei snar Yesus Kristus”, ine iso Allah ”saswar ḇyeja” fyasnai yoḇ ko.—Roma 3:24.

Rosai ḇefnai ya? Refoya doḇe, ”Allah fyasna saswar ḇyedi maroko rofyor Yesus imar warek ko, rofyor koisya roi sasarya kaker”. (Roma 5:8) Saswar ḇefaḇri mankunḇa naiso ḇefrur fa Allah ifnoḇek snonkaku ḇeryarḇa, ḇeboryae, ma ḇefo sasar. Koḇenaḇye ḇa fa kosmai saswar ani, ḇaido kosambraḇ fa koḇak kaḇer ḇe I ḇa. Sasuref ḇyukna nfasnai saswar ḇeba kaku Ḇyeja ro sarisa kankenem snonkaku.

Sasuref ḇeḇeso na ḇyemaeja kaku snar snonkaku ḇeḇuk sasuref anna syewar marḇak fa ifrur roi nabor kwar fa ḇyuk roi anna. Rofyor snonkaku oso imarisen ḇyuk roi myanen kaku ḇeko ido, nari koḇesyowi kaku sasuref ani snar ifrur roi ḇeba kwar fa ḇyuk roi anna ḇeko.

Allah ”ḇyuk kwar Rumkun Mandos ḇyedi”. (Yohanes 3:16) Ḇyuk roma iswar ḇesesya ḇa. Ro swaf pasi barek syaran fyor Allah ifrur supswan farsyos ḇeba ine, Yesus fyararur kayam kuker I ma ’ḇye mankun ḇepon syadi imarisen kaku’ ya. (Amsal 8:30) Yesus iso Allah ”Rumkun saswar ḇyedi” ma ”fanir ro Allah kopok komamba”. (Kolose 1:13-15) Mankun osoḇaḇeri ḇena fasfesepen ḇefanam kaku ro Allah ma Yesus Su.

Ḇape, Allah ”mankundi Rumkun ḇyedi iswariḇa”. (Roma 8:32) Roi ḇepyum kaku ro Yahwe ismaiya iso ḇyuk faro ko. Sasuref osoḇaḇeri ḇeba syadi ro sasuref ine.

Sasuref ḇeḇeso na ḇyemaeja kaku snar kofandun kaku na, syadiwer rofyor kofandun na ro fafisu anya kako. Rupa ra, na wakofen kasumasa faro snonkaku oso ḇemarisen ḇeḇakpyan Au ro rum ḇeduf snar swambraḇ fa ḇak na ḇa! Na kwara rariso, inema roi wafandun kaku na ke?

”Snonkaku kam simar snar ḇaḇeoser kuker Adam, rarirya kako nari sikam sikenem wer, snar ḇaḇeoser kuker Kristus.” (1 Korintus 15:22) Koinekam Adam kpu up ḇyesiko, inja kokam ’komar’. Na kopok kofrarbur ro dafduf ma marmarya ḇa, kopok koḇeoser kaḇer kuker Allah I ma kopok komkeibur ro sasar koḇena ḇa. Ma koma snonkaku ḇesambraḇ ḇa siko, inja nari kopok fa koḇuk ’kankenem’ ḇe mankunko ma ḇesesya. Refo ikofenḇair roi ḇefnai ya, ”Snonkaku oseroḇaḇeri rofandu si na ḇefaspar naek ḇyedi ḇaido ḇeḇuk faro Allah fasaspar faro mankundi . . . Inja pok fa neḇeḇak ḇa isof fyoro-fyoro.” (Mazmur 49:7, 8) Koma kofandun kaku farfnoḇek snar kosambraḇ fa koḇuk farsarser fasaspar ḇeradine ḇa. Mankunko monda indo, na koḇor koḇerari.

Snar Yahwe saswar ḇeba Ḇyedi, nafrur fa ḇyakpyan rosai kofandun fa ḇefaspar kankenem koḇena, inja roro Yesus i ’kokam kokenem wer’. Rariso farsarser fasaspar ḇyuk roi ine rai? ”Yesus rik ḇyena, nfasren sasar ḇeḇor koḇena kam.” Imbo, kakyar faro Yesus rik ḇyena nbas kedwa ḇeyun ḇe payasyos ro sasar ma nun ḇe kankenem fyoro ya.  (1 Yohanes 1:7; 5:13) Ma rosai nari ḇyuk ḇe snonkaku koswar ḇemar kwar sya? ”Snonkaku oser ifnai fa marmarya syun ro supswan ine, rarirya kako snar snonkaku oser [Yesus] ifnai fa kaḇakḇok ro marmari ḇyeḇeḇuk faro snonkakusya kako.”—1 Korintus 15:21. *

Sasuref osoḇaḇeri ḇeramuma ro mankun ḇekaki syadi ḇaido ḇeknam ro saswar ḇeba kaku syadi ro Yesus farsarser fasaspar ḇyena. Snonkaku osoḇaḇeri ḇeḇuk nabor syadi ro rosai Allah Yahwe ḇyuk faro ko na. Ma sasuref osoḇaḇeri ḇeḇuk rosai kofandun kaku fa nḇuk mkei ḇeko ro sasar ma marmarya, ḇape farsarser oser monda. Kaku ḇeri, sasuref osoḇaḇeri ḇemnis kuker farsarser fasaspar ḇeba kaku ine.