Blessing * ryaḇe sup Eropa snar sḇeasas nari sḇuk fararur ḇe i fa fyamankor snonkaku sya snonburyam sena. Ḇape ras risamfur siwayam i, sifrur makakak ḇe i snar nari smun kina ḇyesi, ramnai sidif i fa fyararur ḇe bin ḇefrur farḇuk.

Blessing kyara nari ismai kumpan euro ri 200 isof ro 300 ro roḇ oser fa ḇyukbak nyaki ḇyena ḇe insar ḇeḇuk fararur farḇuk barborya euro ri 40.000. * Blessing fyar, ”Yakaraker fa yafrar yabur monda, mboi yamkak nari smun kina yesi. Inja yawarai.” Farfyar ḇyenane imnis kuker snonkaku yuta rifyak ḇeyaksun ro industri seks internasional sya.

Pasi barek kur ri 4000 aniwara, snonkbor ḇenir ḇe Yusuf, naek ḇyesi sḇoḇ i. Ḇarpurya ḇyarek ro snon ḇebarara oso rum ḇyedi ro Masir. Yusuf ima iḇese ro Blessing i, snar ro randakya tuan ḇyedi ifrurpyum i. Ḇape rofyor tuan ḇyedi swari dembuk i, Yusuf pyampumi inja skursof pyumi ḇa ḇo soḇe iḇe ifrur farḇuk kuker tuan ḇyedi swari. Inja sisuni ro bui ma sfesi kuker rante mankarmomen.—Kejadian 39:1-20; Mazmur 105:17, 18.

Yusuf ima women oso ro fafisu iwara, mboi Blessing ima women oso ro fafisu ine. Ḇape suma snonkaku sḇoḇ ḇe women kwar ro fafisu iwara. Farḇaḇyan ine nafrur fa sfandun snonkaku sya ḇa mboi sifrur snonkaku sya raris roḇebor insama si-smai kumpan nabore.

Ro fafisu mamamun ya, napyan syadi ḇe er-er sya fa sismai women. Sino soḇe ro fafisu Raja Masir Tutmose III kyafyo sup Kanaan, dun snonkaku ri 90.000 fa sewomen. Snonkaku Masir sya siwan si fa sfararur ro tambang, sḇawes rum-rum nadi sena, ma sifrur got fa warya idaf ro na.

 Ro papoik Kekaisaran Roma, mamamun ya kako nafrur fa sismai women sya sibore, ma fyorno ido siwan si fa sores ro ḇarpon kaku ro mamamun ya. Ro abad randak ya, barbor ro women ansine fanam ḇe peser ro kawasa ḇero mnu Roma sya. Women ḇebor ro Masir ma Roma sya sifrurpyum si ḇaḇeri. Rupa ra, women ḇefararur ro tambang ḇero Roma sya, sna swaf pasi barek ri 30 monda fa sikenem.

Fafisuya ḇyenande mura, sifrurpyum si ḇa. Ro abad 16 isof ro 19 ya, ḇaḇaḇoḇ women rofandu Afrika ma Amerika ima farḇaḇyan ḇeḇuk kumpan nabor ro supswan. UNESCO ikofenḇair, ’Skor mboi snon, bin, ma romawa sya barbor seja yuta ri 25 isof ro 30, sun fasis si ma sḇoḇ si. Sino soḇe snonkaku syaran riutin simar rofyor sifrur marandan ro soren Atlantik. Snon oso ḇenir ḇe Olaudah Equiano, iso ḇemkei ro ḇaḇewomen ine ikofen bo doḇe, ”Fararar ro bin sya, ma kankanes ḇefrur saneso ro snonkaku fanam siḇe simar sya nafrur fa fafisuya ifrur makakak fafayaḇa, ine samswen fa yafasnaibair na.”

Faḇye kaku, ḇaḇewomen ima farfyar ḇefrur saneso ro sarisa marandan kankenem snonkaku monda ḇa. Organisasi Buruh Internasional ikofenḇair snar snon, bin ma romawa sya se yuta ri 21 syadi sfararur raris women kaker, ma sḇak si kuker ḇaḇyak ḇekasun ḇaido sḇak si ḇaḇeri. Baboine, women sya sfararur ro tambang, pabrik tekstil, pabrik batu tela, moḇ sifrur fararur farḇuk, ma sḇemanfyan ro snonkaku ḇese rum sena. Roi ḇeradine sidwarekna mboi rya nabor syadi kaku wer.

Snar women ḇebor sya sifrurpyum si ḇaḇeri inja sisewar fa simkei. Ro abad randak SM ya, gladiator Spartacus ma women ri 100.000 syadi sḇembroḇ faro papoik Roma ḇape nun roi oḇa. Ro abad ḇe 18 ya, women ḇero myos Karibia ro Hispaniola sya sores fa spampum tuan sesya. Sewayam women ḇefararur ro yaf tebu kuker rarmomen ḇefrur fa sekandera ma nafnai mamamun sipil ro swaf pasi barek ri 13. Naiso ḇefnai fa Haiti sya sores ro mankunsi ḇe er oso ro 1804.

Ḇape Eksodus ḇaido Ḇaḇesasyar snonkaku Israel ro sup Masir, ima marandan ro ḇaḇewomen ḇeba ḇemkeibos ḇeri ro sarisa kankenem snonkaku sya. Imbude kawasa yuta rikyor ḇaido er ani ḇesiper simkei ro ḇaḇewomen ro sup Masir. Kakuḇae sima siḇye fa simkei. Refoya fyasnaiḇair kankenem sena ro Masir ’ro fafisu fararur ḇemarḇak  sena oser-oser, sifrurpyum si ḇaḇeri’. (Keluaran 1:11-14) Firaun iwan fa smun kapira sesya insa nadwarek si fa sibor marsir awer.—Keluaran 1:8-22.

Ḇaḇemkei snonkaku Israel ro sup Masir ima roi ḇefrur kanandor kaku snar Allah mankundi ḇefnoḇek si. Allah ikofen ḇe Moses i, ”Snar yafawi kaku sne ḇefafardun ḇekur si na. Nari yado fa yafaspar si ro snonkaku Masir.” (Keluaran 3:7, 8) Ro ras anya, snonkaku Yahudi ḇero moḇ sairiryakam sifrur munara Paskah ro pasi barek nakam fa sḇukiswarepen sarisa ani.—Keluaran 12:14.

Refoya doḇe, ”Roi ḇenapesḇa na . . . nasya ro Yahwe, Allah koḇedi ḇa.” Ine nḇuk kakyar ḇeko snar Allah ima ḇyeḇefadwer ḇa. (2 Tawarikh 19:7; Maleakhi 3:6) Allah iwan Yesus i ’fa ḇyaryas ḇaḇemkei faro snonkaku ḇeḇemanfyansya ma ḇaḇemkei faro snonkaku sewayamsya’. (Lukas 4:19) Ine kyurfasna ḇe ḇaḇemkei ro ḇaḇewomen ḇekaku nakam ke? Roḇa. Allah iwan Yesus i fa ḇyuk ḇaḇemkei faro snonkaku ḇewomen ro sasar ma marmarya. Ikofen wer, ”Napnapesya nari ḇyuk ḇaḇemkei faro mko.” (Yohanes 8:32) Ro baboine, Yesus farkarkor ḇenapes ḇyena nḇuk ḇaḇemkei ḇe snonkaku sya ro nyan ḇebor.—Mam kotak ” Imkei ro Ḇaḇewomen Oso Ḇese”.

Rarirya kako, kuker nyan ḇese Allah ifnoḇek Yusuf ma Blessing su fa sumkei ro ḇaḇewomen. Na wawasya Yusuf farfyar ḇyenane ro Refo ro syap Kejadian fasal ḇeḇe 39 isof ro 41. Blessing sasewar ḇyena fa imkei inema roi ḇefnak risyaḇa.

Rofyor Blessing ibur ro sup oso ḇero Eropa, ryaḇe Spanyol. Rodiwa isrow kuker Saksi-Saksi Yahwe ma fyarkor Refo kuker si. Dun snemuk fa ifrur mnis kankenem ḇyena, ismai fararur ḇepyum ma dor insar ḇeḇuk fararur ani fa syabu nyaki ḇyena ro paik ḇe paik. Ro ras oso, Blessing ismai telefon ro insar ani. Ikofen ḇe Blessing i snar ipyos nyaki ḇyena kwar ma dor maf faro i. Rosai ḇefnai ya? I kako dakfarkor Refo kuker Saksi-Saksi Yahwe sya kwar! Blessing ikofen bo doḇe, ”Napnapesya nḇuk ḇaḇemkei ḇeko kuker nyan ḇefrur kanandor kaku.”

Allah Yahwe fyafardun rofyor myam sifrurpyum snonkaku Israel sya ḇa ro sup Masir ḇewomen; ro baboine kako ḇyabir rarirya rofyor myam sifrurpyum snonkaku sya ḇa. Kakuḇae, insama ḇaḇewomen nakam namnai indo fandun fa kawasa snonkaku sya sfadwer ḇeri kenem sena. Ḇape Allah ḇyeasas nari ifrur roi ine ḇe snonkaku sya. ”Kowaf rosai Allah ḇyeasas kwar, isoine nanki ḇebabo ma supswan ḇebabo, ro moḇ kosma ḇaḇenapnapesya.”—2 Petrus 3:13