NA WAFAWI KAKU RARISO KANKENEM BEDI RO RAS ḆARPON IYAMA KE? Snonkaku ḇebor sifawi snar kankenem sena sap na kwar. Rofyor sifrur roi oso ḇaḇeri ido, na sikofen monda ”Ine iso roi yasma nairi.”

Ḇesesya sfafko snar smam dunya ḇeḇarḇor ine ma roi ḇenapes ḇa na, inja skara na ipyum wer ḇa kwar. Snonkaku sḇensewar kwar fa sifrur mnis samswen ya, ḇape mamamun, ḇaḇeḇarḇor, rim ḇeba, ma dafduf nasya komam ker na. Inja skara ḇo soḇo, ’Rosai ḇefnai fa yamor yasae kaku fa yafrur roi nane?’

Kakuḇae, roi oso nasya ro bandi samambraḇ koḇena ḇeyawyae aw kofrur kwar na. (Pengkhotbah 9:11) Imbape, ras ḇarpon koḇena moḇsa ndrai? Refo fyasnaḇair snar mankunko iso ḇekinfir nari kosma kankenem fyoro Allah ḇyeasas na ke roḇa. Ine ndrama ro roi kokinfir ro kirine.

Moses, ḇefarkin er Israel fafisu iwara, ikofenḇair ḇe er Israel sya rofyor sisun ḇaim ro Sup Ḇaḇeasas, ”Yor fa mkokinfir kwar, kankenem ma marmar, barakas ma fafras. . . . Mko ma romawa mkoḇesya fandun fa mkokinfir kankenem insama na mkokenem pdef. Mkoswar kaku Yahwe Allah mkoḇedi, mkomnaf wos Ḇyena, ma mkosouser pdef faro I.”​—Ulangan 30:15, 19, 20.

”Yor fa mkokinfir kwar, kankenem ma marmar, barakas ma fafras. . . .

Rofyor Allah ḇyuk ḇaḇemkei ḇe er Israel sya ro ḇaḇewomen ro Masir, ḇyuk swaf ḇe si fa sisma kankenem ḇepyum ḇe snonkaku ḇemkei ro Sup Ḇaḇeasas ya. Ḇape, roi nane kam na sisma ḇeri na ḇa. Insama sisma barakas ani ido, fandun fa ’skinfir kankenem’. Nyan ya iso kuker ’siswar Allah I, simnaf wos Ḇyena, ma sisouser pdef faro I’.

Kirine, roi kokinfirna namnis kame, ma rosai kokinfir nari fasnaḇair ras ḇarpon koḇena. Rofyor kokinfir fa koswar Allah, korower rosai ikofenna, ma kosouser faro I, nefasna kokinfir kokenem fyoro ro firdaus ḇero supswan. Rarirya ido, rosai monda fandun fa kofrur ya insama koso nyan nane?

Saswar iso Allah rari ḇepon kaku Ḇyedi. Kuker papoik ḇesren ro Allah, Manwawan Yohanes fyas, ”Allah ikada isaswar.” (1 Yohanes 4:8) Snar iso ḇefrur fa fyor sifuken Yesus i parenta ḇeba risai ḇefandun kaku syadi ya, ikofen, ”Waswar [Yahwe], Allah ḇedi, kuker snembri ḇesiper ma kuker [kankenem] bedi ḇesiper ma kuker karkara ḇena ḇesiper.” (Matius 22:37) Allah imarisen saswar koḇena nasae ro sne koḇena, inema kosouser monda ḇa snar komkak ḇaido sidif ko. Ḇape, rosai ḇefnai kaku kokinfir fa koswar Allah I?

Yahwe saswar Ḇyedi faro snonkaku sya imnis ra sinan ḇeswar romawa ḇyesya. Imbape sima snonkaku ḇenapes ḇa, mboi sinan ḇesaswar ido nari fyarkor, ḇyuk wos ḇebuk marasrisen, ḇyuk fafnoḇek, ma isonek romawa ḇyesi insama romawa ya isma aski ma payamyum ro ras ḇarpon ḇyedi. Rosai sinan sya sor ro romawa sesya? Iso simarisen insama romawa sya siswar si ma siso mnis rosai sfarkor ḇe si na, nanekam faro faḇaḇye mankun sena. Rarirya kuker kma koḇedi ro nanki. Imarisen koḇesyowi roi ifrur na kam ḇe ko kwar na.

Ro wos ḇekaku sḇuk fa sfas Refoya, wos ”komnaf” kyurfasna ”kosoasuser”. Ine iso fafisu kokofen, ”Fandun fa rwower Kamam Awin su.” Inja komnaf Allah wos Ḇyena ine kako kyurfasna kofarkor ma kosoasuser Allah wos Ḇyena. Snar na korower ḇeri Allah dawos ḇe ko ḇa, inja na korower Allah I kuker kowasya ma koso rosai ikofen ro Refoya.​—1 Yohanes 5:3.

Komnaf Allah wos Ḇyena ima nefandun kaku. Iso ḇefnai fa ikofen, ”Snonkaku sikenem snar mamamiya dererḇa ḇape ro wos oser-oser ḇesasyar ro Allah sḇari.” (Matius 4:4) Ras ḇe ras kofandun anan. Ḇape ḇefandun kaku syadi yaiso kofamfom rur koḇedi kako. Fandun fa kona fawawi kuker Allah I. Raja Salomo ḇefawinanem fyasnaḇair rosai ḇefnai ya, ”Fawawinanem ḇyuk fadadiren, raris pipi ḇyuk fadadiren, ḇape fawawi ḇewarpu fawawinanem ḇyuk fainda fa fyadiren kankenem ḇena ya.” (Pengkhotbah 7:12) Fawawi ma fawawinanem ḇerama ro Allah na nekadaunwarek ko ma nafnoḇek ko fa kokinfir kuker fawawinanem insama kosma kankenem fyoro ro ras ḇarpon iyama.

Artikel ḇepon ya dap Yesus sararḇer ḇyedine: ”Snar kedwai ḇefyos ma nyan ḇemkei ḇa ḇeyun faro kankenem ya, kawasa ḇesma i sya sibor ḇaḇeri.” (Matius 7:13, 14) Rofyor kombranuk nyan ḇeradirya, ipyum syadiya kombranus kuker snonkaku ḇefawi pyum nyan ani insama sro ro moḇ srayoḇ ya. Inja, infa kosma kankenem fyoro ido, fandun fa kofanam pdef kuker Allah I. (Mazmur 16:8) Roi ine kyurfasna ḇe?

Ro ras ḇe ras fararur nabor nasya komarisen kofrurna. Roi nanekam nafrur ko fa kona swaf ḇa fa kokara rosai Allah imarisen ro ko na. Iso ḇefnai fa Allah ḇyuk anun swarapepen, ”Rarirya, mkokara naḇye kaku, mkokenem rariso, mkomnis awer snonkaku ḇefawi royoḇa, mboi mkokenem imnis snonkaku ḇemamkarkir, mkofandun fafisuna kuker aunos, snar fafisu ine fafisu ḇeḇarḇor.” (Efesus 5:15, 16) Inja, insama kofanam pdef kuker Allah I, fandun fa kofakapon I ro kankenem koḇena.​—Matius 6:33.

Na kofrur roi oso ḇaḇeri fa kofadwer roi kofrur ro fyor iwarana, ḇape ras ḇarpon koḇena ma snonkaku koswar sya, ndramuma ro ko. Refo fyasnaḇair Allah Yahwe, Kma koḇedi ro nanki, iswar fafaya ko ḇa. Ikofenḇadir kako rosai imarisen ro ko na. Mam rosai Nabi Mikha fyas na:

”Snonkaku, ikofenḇadir ḇe au kwar rosai ḇepyum ya. Rosai Yahwe dor ro au ya? Dor ro au fa wafrur roi ḇenapes, sna saswar kuker ḇaḇye ma souser, ma fasna sne ḇerun rofyor wambran kuker Allah bedi!”​—Mikha 6:8.

Nari wamarisen wasma undangan ro Allah Yahwe fa wambran kuker I ke? Wamarisen ido, nari wasma barakas pdef isof fyoro-fyoro. Payamyum bena ro ras ḇarpon iyama, mankundawso ḇekinfir ya!