Randakya komam kwar farfyar kuker snonkaku ḇekinsor oso ḇerama ro Delfi, ḇeyankar raja Kroesus i. Inja ḇarpur mura raja ḇero Persia kyafyo i. Ḇape ine iḇese ro rosai Refo ḇyardi kuker raja Persia ani. Rosai ḇyardi nakam nejadi mnis kaku isof bar ḇekasun na.

Taun 200 rofyor ḇardadi ani neḇefas kwar ramnai, insape raja ani ḇyeḇeaben. Nabi Yesaya ikofenḇair snonsnon ḇyedi kwar, isoine Kores i, ma ikofenḇair nyan rariso nari ikafyo kota Babilon ḇesambraḇ ani.

Yesaya 44:24, 27, 28: ”Ine iso roi Yahwe ikofenya, . . . ’Ayaiso ḇekofen faro war ḇedo, ”Wamayow, ma warḇeki bena kam nari yafrur na fa nasyor”; Ayaiso ḇekofen faro Kores i, ”Iso manfarandows yakanow dirya, ma nari ifrur marisen yena kam”; Ayaiso ḇekofen faro Yerusalem, ”Nari ḇyeḇebawes kaḇer,” ma faro bait, ”Fondasi bedi nari ḇyeḇebawes.”’”

Manfawinanem sejarah oso ro Yunani ḇenirḇe Herodotus fyas, Kores sordade ḇyesya sibai dwas fa sḇukidarbai Warḇeki Efrat ḇeyar kota Babilon. Snar Kores aw ḇyenane, sordade ḇyesya bisa sisun ḇe kota ani kuker simbranuk ro war ḇesyor ani. Rofyor simkok Babilon ramnai, Kores fyaspar kawasa Yahudi ḇeḇewomen ro kota ani ma iwan si fa skaḇer ma sbawes Yerusalem ḇeḇemkok ro 70 taun aniwara.

Yesaya 45:1: ”Ine iso roi Yahwe ikofen faro snonkaku ryem ya, faro Kores i, ḇeyuf ḇramin raku ḇyedi fa kyafyo er ḇero ḇarpon ḇyesi, fa dun raja-raja romamun sena, fa ḇyas kedwa ḇero ḇarpon ḇyedi, insama kerwa-kerwa ḇeba anna nari neḇeken ba.”

Snaro kerwa ḇeba ro mnu ani nabas, inja sordade Persia sya bisa sisun ḇe kota ani. Rofyor snonkaku Babilon sya sifawi kwar rosai Kores imbe ifrurna ido, nari siken kerwa ḇeba ḇera ḇe warḇeki ro kota ani. Ḇape ro roḇ ani, siken kerwa ḇeba anna ḇa.

Ḇardadi ḇeba kaku ine, oser ro fandu ḇardadi ḇebor ḇeḇejadi kwar isof ḇar ḇekasun na. * Rosai snonkaku sya skinsorna, ndramuma ro allah ḇekaku ḇa. Ḇape ḇardadi ḇero Refo ndramuma ro Allah ḇekaku, ḇekofen, ”Ro randakya yakofenḇair kwar rosai nari ḇeḇejadi, ma  ro fyor iwara yaḇeḇair kwar rosai ḇeḇejadi ḇaim na.”​—Yesaya 46:10.

Allah ḇekaku, ḇenirḇe Yahwe, I monda bisa ḇefrur ḇardadi nakam ndarirya. Knam ro snonsnon Ḇyedi isoine ”Iso Ḇefnai Ḇedar fa Ndarirya.” Snonsnon ani fyasnai nya samambraḇ fa ifawi rosai ḇeḇejadi ro ras ḇarpon iyama imnis kuker marisen Ḇyedi. Nafrur kokyar kako snar rosai ḇyeasas nakam nari ndarirya kaku.

Wamarisen wafawi rosai Refo ḇyardi kuker fafisu koḇedine ke? Taun 2000 ḇepon iwara, Refoya ḇyardi snar ”ro ras ḇepupes fafisu ḇesamswen ma ḇeḇyeḇa” nari nasya. Ras ḇepupes faro rosai? Ine faro supswan ma snonkaku sya ḇa, ḇape faro roi ḇedwarek, ḇaḇewayam ma kandera snonkaku sisma ro taun syaran ma syaran. Mkorama komam ḇardadi riḇeso kuker ”ras ḇepupes” ine.

2 Timotius 3:1-5: ”Ro ras ḇepupes . . . , snonkaku sya nari siswar mankunsi ḇardi, siswar pipi, sararer mankunsi, skara mankunsi sisambraḇ syadi, sanonef, sisampum sinan sya, sifawi sikofen kasumasa ḇa, sisouser ḇa, sifawi saswar ḇa, simewer ḇaḇeaski ya, simarisen skoryae snonkaku, sfarmkuepen mankunsi ḇa, sirarmomen, simewer roi ḇeḇye, simarisen sḇoḇ min sesi, siḇrusna npakrek, simarares si, siso marisen sena monda, ḇape siswar Allah ḇa. Soḇe sisyom ḇe Allah I, ḇape simewer siso farkankin ro Allah rur ḇesren Ḇyedi”, Kitab Suci Terjemahan Dunia Baru (nwt).

Mankundaw ido, wamam kwar rari ḇeradine nasya kwar ro snonkaku ḇero fafisu ine sya ke? Wamam kwar snonkaku ḇero moḇ koḇarek ya siswar mankunsi, siswar pipi ma sararer si ke? Wamam kwar snonkaku sya sor syadadi ma simewer sifararur kayam kuker ḇesesya ke? Na wamam kako romawa sya sisouser sinan sesya ḇa. Osower ido, snonkaku ḇebor sya siso marisen sena monda, ḇape siswar Allah ḇa. Ras ḇe ras, komam roi nane naḇyeḇa syadi wer.

Matius 24:6, 7: ”Nari mkomnaf rakrok mbroḇ ma ḇaryas embroḇ. . . . Er nari sikḇawes sisampum er ḇese, ma [karajan] sisampum [karajan] ḇese na.”

Sikofenḇadir snar ro taun 1914 monda snonkaku yuta ri 100 simar snar mamamun ya. Barbor ro snonkaku ḇemar ansine indokada sibor syadi ro snonkaku ḇero sup ḇebor sya. Kokara kada, snonkaku sibor sekandera ma sesaneso kaku! Ḇape komam ido, sup ḇebor na simnai ro mamamun ya ḇa.

Matius 24:7: ”Nari basbiser isya.”

Program Pangan Dunia ikofen, ”Kakuya supswan ine bisa ḇyuk roḇean nabor kaku faro snonkaku oser-oser. Ḇape, snonkaku yuta ri 815—ḇaido snonkaku oser rofandu snonkaku risiw sisya sibiser ro roḇ nakam. Ma snonkaku oser rofandu snonkaku rikior sna gisi ḇemnis ḇa. Taun ḇe taun romawa yuta rikior simar snar basbiser ya.

Lukas 21:11: ”Rim ḇeba kaku nari myun.”

Ro taun ḇe taun, rim ḇeba ḇeḇejadi kwar nasyadi ro 50.000. Ma 100 ro rim ḇeba anna nafrur fa rumna namkok, ma rim ḇeba kaku ḇeḇejadi ro taun ḇe taun. Sino sikor, rofandu taun 1975 ma 2000, rim ḇeba ine nafnai fa snonkaku ri 471.000 simar.

Matius 24:14: ”Ankankinem Ḇeḇye ro [Karajan] ine nari ḇye ḇeḇaryas ro supswan ḇesiper fa ḇyesaksi faro er sya kam, raimnai insape awar papupes ya.”

Saksi-Saksi Yahwe ḇeḇe yuta riwar syadi sya, kirine siḇaryas ankankinem ḇeḇye Karajan Allah ro sup ḇeba ri 240. Siḇaryas ankakinem ḇeḇye ine ro kota, mnu-mnu kasun na, sup yadori, ma bon na. Ḇardadi ani ikofen, rofyor Allah doḇe fararur ine namnai kwar ido, ”insape awar papupes ya” ryama. Rosai knam ro wos ine? Ine kyurfasna karajan snonkaku sya nari ḇeḇefadwer kuker Karajan Allah. Asas rosai monda ro baḇ Karajan Allah nari ifrur fa ndarirya? Wawasya wer artikel ḇeuserya.