Rofyor Kwara fa Waḇe Wamar Monda
FAFISU oso waḇor famfnom rawo waḇe wamar monda ke? Kwara rarirya ido, wamnis ra Adriana i. Iduf dafduf makak syadadi, ine nafrur i fa ḇyesneso ma rya imewer ikenem wer. Dokter doḇe iduf dafduf ḇefrur fa ḇyesneso kawan kaku.
Kwarapan fawar ro snon oso ḇeraker sup Jepang ḇenir ḇe Kaoru. Ima dakfaduru sinan ḇyedi ḇedafduf ker. Doḇe, ”Fafisu ani, yaḇor famfnom kaku kukro fararur ayena ro kantor na. Yamewer yananri, ma yaḇor yenef mnis rari. Inja, yakara yamar mura kada insape na samswen ayena namnai ḇeri.”
Snon oso ḇeraker sup Nigeria ḇenir ḇe Ojebode doḇe, ”Yaḇesneso ker rawo muniwara yakain yakanes. Injariso, yasewar nyan fa yamun mankundaya.” Mboi, ipyum kukro Ojebode, Kaoru, ma Adriana skomun sko ḇa. Fama faḇye kaku, komam kada ro taun ḇe taun snonkaku sibor smun mankunsi fa simar.
MOḆ RISAI NA KOSMAI FAFNOḆEK
Sibor ḇemun mankunsi siso snon sya. Roi ḇefnai ya iso, simai fa sor fafnoḇek. Yesus ikofen ḇo doḇe snonkaku ḇeduf sya sima sfandun dokter. (Lukas 5:31) Inja, rofyor kwara waḇe mun mankundaw ido, wamai awer fa wor fafnoḇek. Ḇebor ḇeduf radine sya sismai pararei ro dafduf sena kukro sinem aryawin ḇesrow kaku. Ojebode, Kaoru, ma Adriana skokam skoraḇe dokter ma kirine siprei mankun kwar.
Imbude dokter na ḇyuk aryawin oroḇaido dawos myaren fa ifnoḇek snonkaku ḇeduf ani. Ḇeduf ansine sakfandun fafnoḇek ro kina ma bati sesya. Bati ḇepyum koḇedi isoine Allah Yahwe I. Ḇyuk fafnoḇek ḇepyum ro Wos Ḇyena, Refo ya.
FAFISU SAIRI INSAPE SAMSWEN NA NAPROMES?
Snonkaku ḇeḇor famfnom sya sfandun swaf kawan fa siprei, ma sisewar fa sifrur samswen sena fa namnis kuker sfadwer moḇ sikenem raya. Ausya wakḇesewar fa pampum dafduf Bena ido, mam faro fafisu ḇepyum ro ras ḇarpon iyama raris rosai Ojebode ikyar na. Doḇe, ”Yawaf fafisu wos ḇero Yesaya 33:24 ryariri. Wos ro dine doḇe fafisu isya nari snonkaku oso ḇaḇeri ro supswan ine ikofen ’yadufe.’” Imnis ra Ojebode i, Au kako wakyar Manseren Allah wos Ḇyena ḇekur ḇe ’supswan ḇebabo’ ro moḇ anya nari ”dafduf nasyaḇa” kwar. (Fasasna faro Yohanes 21:1, 4) Ine kako nkur faro ḇeduf dafduf makak syadadi sya. Roi kwara fa waḇe wamun mankundaw nanya, nari napromes isof fyoro. Nari waswarepen na ḇaḇeri, nsae ro snembri wer ḇa kwar.—Yesaya 65:17.