Yesus doḇe, ”Er oso nari ḇyembroḇ ma isampum er ḇese ma [karajan] oso nari ḇyembroḇ [karajan] ḇeseya, ma rim ḇeba kaku nari myun ma ro moḇ nabor dafduf kapyowi ma basbiser isya.” (Lukas 21:10, 11) Sarisa Yesus ikofen nane na nejadi kam ro swaf oso ma nbeḇair ’Allah Karajan Ḇyedi fyanam kwar’. Komam roi nane nejadi kam kwar ro supswan ine ḇesiper ke? Rwama komam roi nane.

1. MAMUN

Ro taun 1914 ya, mamun oso ikpef ḇo ifrur susa snonkaku sibor ro moḇ ḇebor na. Manfawawi sya soḇe taun 1914 ima taun ḇefandun kaku ḇefadwer ḇeri kankenem snonkaku sya. Kukro? Ine iso randak kaku mamun ḇeba ikpef ro supswan ine. Oso wer ido, sḇuk romamun ḇebor kaku. Rupa ra tengkwaja, bom udara, senjata moser, gas ḇemamur, ma romamun ḇese. Mura, mamun ḇeba ḇesuru ikpef wer. Fafisu ya, sifrur ma sepake randak bom atom ro mamun ine. Ro taun 1914 ḇebo, mamun nakpef ker ro moḇ oso ḇaido moḇ ḇese ma nmun snonkaku riyuta.

2. TATAWAI

Encyclopædia Britannica doḇe ro taun nakam, tatawai ḇeba ri 100 nafnai fa ”roi nabor namkok”. Lembaga Survei Geologi Amerika ikofenḇair ḇo doḇe ”imnis fasfas sifrur kwar ro taun 1900 ya, na tatawai ḇeba ri 16 nejadi ro swaf taun oser”. Sino skara barbor ro tatawai sap nane nabor mankenem, mboi baboine sna roieḇor ḇepyum kwar fa sḇukimam ḇepon tatawai ya. Rariryano, tatawai ḇekur ro supswan ḇesiper ro baboine nafnai kandera kaku ma snonkaku sibor simar.

 3. BASBISER

Basbiser myun ro supswan ine ḇesiper kukro mamun, skaraw pipi na, samswen fa sisewar kumpan, rokaker sker na namarem ḇa, ḇaido jadi fa sifawi ḇepon ḇa sup na samsam syadi ke roḇa. Program Pangan Dunia faro taun 2018 ikofen, ”Ro supswan ine ḇesiper, snonkaku yuta ri 821 san mnis ḇa ma yuta ri 124 sibiser kaku.” Ro taun nakam, romawa sisyadi ro yuta ri 3 simar kukro sna roḇean ḇepyum fa san ḇa. Ro taun 2011, roi nane nafnai fa ro supswan ine ḇesiper, barbor ro romawa ḇemar sya fanam persen ri 50.

4. DAFDUF ḆEFARPAMPAM

Organisasi Kesehatan Dunia ikofenḇair, ”Ro taun 2001 ḇebo, dafduf ḇefarpampam naisya nabore. Dafduf ḇekur snonkaku ro fafisu naiwara raris kolera, sampar, ma penyakit kuning, nkur wer ro baboine warpu dafduf ḇebabo ḇeyun marmar raris SARS, flu, MERS, Ebola ma Zika.” Manfawawi ma dokter sya sfarkor fa sifawi dafduf anna, mboi sifawi mnis ḇaim aryawin ḇesrow faro dafduf nakam.

5. FARARUR ḆAḆEḆARYAS RO SUPSWAN ḆESIPER

Yesus ḇyeḇair sarisa ḇese wer ḇo ikofen ḇepon radine, ”Ma ankinem ḇepyum kuker Karajan ine nari sḇaryas na ro supswan ine ḇesiper, insama ḇyesaksi faro er syakam, insape papupes ya ryama.” (Matius 24:14, NW) Fafisu ine, kawasa sya siḇor famfnom kukro samswen ḇekur si na. Ḇape, kawasa sisyadi ro yuta riwar ḇeraker er nakam, sisya sḇaryas ankinem ḇepyum Karajan Allah faro snonkaku ḇero sup ḇeba ri 240 ma ro wos nasyadi ri 1.000.

Aḇyair ḇaido sarisa Yesus ikofen anna, komam nasnai kwar ro baboine. Rosai ḇefnai fa komam roi ine fyandun kako? Kukro Yesus doḇe, ”Rofyor mkomam roi ḇeḇor anna ndarirya ido, irya mkofawi Allah [Karajan] ḇyedi fyanam kwar.”​—Lukas 21:31.

Aḇyair Yesus ikofen ani ma oras sap ro Refo kwar nafnoḇek ko fa kofawi Allah ḇyawes Karajan Ḇyedi ro nanki kwar ro taun 1914. * Ro fafisu anya kako, ryem Roma Ḇyedi, Yesus Kristus i fa ḇyepoik ḇe Raja. (Mazmur 2:2, 4, 6-9) Kero wer, nari Karajan Allah ḇyepoik supswan ine, ma myunpres pamarenta ḇesena kam ma ifrur supswan ine ḇe firdaus insama snonkaku sya sḇarek isof fyoro ro na.

Inja, wos ḇero nadi Yesus fyarkor ḇe ko kwar nari ndarirya: ”[Karajan] Bedi ryama kada, Marisen bedi ryarirya kada Ro supswan ine imnis ro boiyaswa.” (Matius 6:10) Ḇape, fafisu Karajan Allah ḇyepoik ro taun 1914 isof ro fafisu ine, rosai ifrur kwar ya? Ma rosai na ḇejadi fafisu Karajan Allah derer ḇyepoik snonkaku sya ro ras naiwama?