Refo ikofenḇair snar malaikat oso ḇyembroḇ faro Allah ḇo doḇe Allah ima ḇyepoik snonkaku koine kuker payamyum ḇa. Ḇarpur mura, kofawi malaikat ḇembroḇ ine ḇe Setan Ibiris i. Ikofen wer ḇo doḇe Allah fyarkin ma ḇyepoik snonkaku koine ḇa kada, na kokain pyum syadi. Faḇye kaku, sinan ḇepon koḇesuya, Adam ma Eva su, suyakso Ibiris nyan ḇyena ma suyakmbroḇ faro Allah.​—Kejadian 3:1-6; Fasasna 12:9.

Adam ma Eva sumewer Allah ḇyepoik su, inja roi nane nafnai fa suḇarek ro Firdaus anya wer ḇa, mura sudafdufe ma sukenem fyoro ḇa. (Kejadian 3:17-19) Muniwara, roi sufrur anya nafnai kandera faro romawa up suḇesya kako. Refo doḇe Adam ifrur sasar, inja ’sasar ya syun ḇe supswan ine, ma snar sasar ani, ifnai marmar’. (Roma 5:12) Sasar ya dun samswen ḇese wer. Refo doḇe, ”Snonkaku sḇepoik snonkaku isof sismai kandera ro mankunsi.” (Pengkhotbah 8:9) Rarirya, snonkaku sya imbe sḇepoik mankunsi ido, nari sismai kandera ker.

Refo doḇe snonkaku ḇepoik randak kaku snoriso Nimrod. Snon ine imewer Yahwe ḇyepoik si. Ro fafisu Nimrod ikenem ya, snonkaku ḇena papoik sya sḇuk sasar papoik sena. Indokada taun ri 3.000 naiwara, Raja Salomo fyas ḇo doḇe, ”Yamam snonkaku ḇekandera sya mkarui sena, mboi oso ḇaḇeri ḇeḇuk sneprei faro si. Ḇefrur kandera sya sḇepoik.”​—Pengkhotbah 4:1.

Komam kenem ḇeradine ro baboine kako. Ro taun 2009 ya, PBB sya sikofen ḇo soḇe ”roi oser ḇefnai kaku fa roi ḇeḇarḇor nabor naisya” komam ro baboine iso, pamarenta ḇebor syadi sya sḇepoik pyum ḇa.

Snonkaku ḇero dunya ine sfandun pamarenta ḇepyum syadi ma ḇepoik ya sḇepoik kuker nyan ḇepyum. Sinan ḇefrur konya, ikofen kaku roi ine ḇepon kwar!

Manseren Allah fyasos Karajan ḇaido pamarenta oso kwar fa nari ḇyepoik fadwer pamarenta snonkaku sya kam. Karajan ani derer monda ’nari ḇeyores nako pdef isof fyoro-fyoro’. (Daniel 2:44) Snonkaku riyuta senadi fa sor Karajan anine. (Matius 6:9, 10) Mboi, ḇepoik ro karajan ine na Allah demir ḇa. Ryem snonkaku oso kwar fa nari ḇye Manḇepoik. Manseiri?