Ro farkarkor ḇepon ya, kofawi kwar Manseren Allah nari myunpres snonggaku ḇeḇarḇor ma roi ḇeḇyeḇa ḇero dunya ine. Inja kokyar kaku ine na ndarirya. Rosai ḇefnai ya? Snar Refo manggundi ikofen ḇo doḇe:

”Supswan ine ma roi ḇeḇor kawasa sirmomen ro ina nari napromes.”​—1 YOHANES 2:17.

Kokyar kako snar nari ono sisya sismai kankenem, snar mnuk ani doḇe:

”Snonkaku ḇefrur Allah marisen ḇyena, ikenem faswef isof fyoro-fyoro.”

Insama kosmai kankenem, fandun fa kofrur Manseren Allah marisen Ḇyena. Infa kofawi rosai monda Manseren Allah marisen Ḇyena. Fandun fa komamḇir ḇepon I resari.

Yesus doḇe, ”Kankenem ḇekain fyoroya, isoine mboi ssmambaḇir aw werer Allah ḇenapes.” (Yohanes 17:3) Inja insama komkeibur ras mamun Manseren Ḇyedi ma kokenem fyoro-fyoro ido, fandun fa komamḇir kaku Allah. Kokofen Allah ima isya ma kofawi roi ḇeḇeso kuker I ima nasrow kwar ke? Aroḇa. Mboi koḇebati kukri indiso. Fyor imbe koḇebati kuker snonggaku oso ido na kobuk swaf koḇena kuker i. Imnis rarirya kako, fyor komarisen koḇebati kuker Allah I na kobuk swaf koḇena fa komambir I kuker kofarkor Refo. Inja, mgorama komam kakaku riḇeso ro Refo na ḇefnoḇek ko fa koḇebati kuker Manseren Allah I.

Insama kokenem pdef fandun fa konan ro ras ḇe ras. Ḇape Yesus doḇe, ”Snonkaku sikenem snar mamamiya dererḇa ḇape ro wos oser-oser ḇesasyar ro Allah sḇari.”​—Matius 4:4.

Yahwe wos Ḇyena nasya ro Refo yadori. Rofyor kofarkor na ido, na kofawi rosai monda Allah ifrur faro fafisu iwara, ro kirine ma ras ḇarpon iyama.

Rofyor komambir Allah I, nadif ko fa kosouser faro I. Mboi fyorno ido samswen fa kofrur na snar kosya kona rari-rari ḇepyum ḇa nono kaker. Iso waḇaḇir ya ido, bisa benadi wor fafnoḇek ro Yahwe I.

Mampan fawar ro bin oser kap monda i ḇe Sakura, randak ya kenem ḇyedi naḇyeḇa kaku. Ḇape fyor fyarkor randak Refo ya, insape ifawi Allah imarisen insama ’ḇyinggwan bur fararur farbuk’. (1 Korintus 6:18) Sakura ḇyenadi dor samambraḇ ro Manseren Allah, ḇarpurya ibur kenem ḇeḇyeḇa ḇyena. Ḇape ḇyesewar roi ine kaker. Fyawar ḇo doḇe, ”Rofyor yakara roi ḇeḇyeḇa na ido, yaḇenadi ḇeri ḇe Yahwe I yakofen roi yaswaruser na, snar yafandun fafnoḇek ḇyedi fa yapampum karkara ḇeḇyeḇa ani. Yaḇaḇir Yahwe kyarem nadi yena. Ma yafanam syadi kuker I.” Raris Sakura i, snonggaku riyuta sisya sfarkor Refo fa smambir kaku Manseren Allah I. Inja, Allah byuk samambraḇ ḇe si insama sibur kenem ḇeḇyeḇa sena ma sifrur imarisen.​—Filipi 4:13.

Komambir pyum Allah I kada, nari fyanam syadi kuker ko. (Galatia 4:9; Mazmur 25:14) Bon ya, nari komkeibur ro pupes dunya ine ma kokenem ro dunya babo. Inja, kankenem ro dunya babo ya imnis rariso? Ro farkarkor ḇeuser ya nari kawos roi ine.