Kokame kona samambraḇ fa kofawi ma koḇaḇir snonkaku ḇese sneḇaḇir sena ḇaido rosai sismai na, ma kowasen rariso rofyor mankun koiso ḇesmai fafisu ḇeradirya. Ahli kesehatan mental oso, Dr. Rick Hanson ikofen, ”rofyor koḇeaben, kokam kona samambraḇ ḇeradine.”

WAKARAPAN: Rosai ḇefnai fa snonkaku sna samambraḇ ḇeradirya, mboi aiwan ḇaido rokakerna aroḇa? Refo ikofenḇair snar Allah ifrur snonkaku sya imnis fanir Ḇyedi. (Kejadian 1:26) Rarirya kona samambraḇ fa kofasnai Allah rari-rari Ḇyena ma kofrur rosai imarisen na. Inja, rofyor kofnoḇek snonkaku ḇese snar kofawi kaku samswen sena, ine fyasnaiḇair koso Manḇedaw ḇesaswar koḇedi, Allah Yahwe nyan Ḇyena.​—Amsal 14:31.

Allah ifawi kaku sneḇaḇir koḇena ma imewer kaku myam koḇekandera ri. Fafisu iwara, er Israel sḇewomen ro Masir ma sekandera kaku. Ramnai, sbarek ro moḇ ḇeḇeurs ḇa fafisu taun swaf ri 40. Refo ikofen, ”Rofyor sesusa, I kako ḇyesusa.” (Yesaya 63:9) Komam kada, Allah ifawi kandera sena monda ḇa, ḇape ḇyaḇir kandera sena kako. Allah ikofen, ”Yafawi kaku kandera sena.” (Keluaran 3:7) ”Mansei monda ḇepan mko ima span mkamor Ayesuine.” (Zakharia 2:8) Inja, fyor ono sisya sifrurduf ko ido, Allah kako dakḇaḇir rarirya.

Imbude koḇaḇir kosyus ḇa fa kosmai Allah sawarwar Ḇyeja, ḇape Refo ḇyuk kakakyar ḇe ko snar, ”Allah ibasyadi ro kosnesna ma ifawi roi ḇeḇor kam.” (1 Yohanes 3:19, 20) Allah myambir kaku ko syadibur mankunko bardi. Ifawi kaku swaruser, sneḇaḇir, ma roi kosmai na. Iswar kaku ko.

 Refo ikofenḇair ḇe ko

• ”Rofyor wor, Aya, Yahwe, nari yakarem; rofyor wor fafnoḇek, nari yakofen, ’Aya isya rodine!’”—YESAYA 58:9.

• ”’Snar yafawi rosai imbe yafrur ḇe mko na,’ rarirya Yahwe wos Ḇyena, ’Yamarisen yaḇuk ḇaḇeaski, mboi kandera ḇa, insama mkosmai payamyum ro fafisu iyama ma saneraro. Nari mkor Aya ma mkorama fa mkoḇenadi ḇe Aya, ma nari yamnaf mko.’”​—YEREMIA 29:11, 12.

• ”Waser mkarui ayena ro kirbat Bedi. Snar roi nanekam neḇefas ro syap bedi?”​—MAZMUR 56:8.

Rofyor kofawi Allah ifawi pyum rosai kosmai na ido, na nafnoḇek ko fa kofarmku ro samswen kosmai na ke? Mam Maria farfyar ḇyedi.

”Yaḇaḇir kankenem ine myarḇak ma naḇyeḇa kaku. Sne yedi ikar kaku snaro romawa yedi ḇeḇeumur taun ri 18 ryoe fyor taun risuru ḇyesewar kaku fa iprei ro dafduf kanker ḇyedi. Yamsor Yahwe I snar ifnoḇek ma ḇyuk pararei ḇe romawa yedi ḇa!

”Taun riwonem ḇyenande, yakofenḇair ḇe bati oser ro sidang ḇemarisen ḇerower farfyar yena. Yafawar nabor ḇe i snar Yahwe iswar aya ḇa. Bati yedine ryower pyum kaku aya ma imeruk farfyar yena ḇaḇeri. Ramnai, insape ḇyuk mnuk oser ḇenuk kaku sne yedi, isoine 1 Yohanes 3:19, 20, ḇekofen, ’Allah ibasyadi ro kosnesna ma ifawi roi ḇeḇor kam.’ Fyasnaiḇair snar Yahwe ifawi pyum kaku kandera koḇena.

”Rariryano, yamsor pdef kaker! Ramnai yawasya Mazmur 94:19, ḇekofen, ’Rofyor makakakya irup aya, Buk sneprei ma kananon ḇe aya.’ Yaḇaḇir mnuk ine sfas kaku ḇe aya! Ḇarpurya, yamarisen snar yakofenḇair rosai yaḇaḇir na ḇe Yahwe I. Yafawi ryower ma ifawi pyum sneḇaḇir yena.”

Komarisen kaku snaro kofawi Yahwe ifawi sneḇaḇir koḇena! Ḇape, rosai ḇefnai fa kandera nabor nasya kaker? Allah ḇyuk samamyai ḇe ko snaro kofrur sasar ke? Nari Allah ifrur roi oso fa ifrur kandera nakam namnai ke? Nari kawos roi nane ro artikel ḇeuser ya.