LUZIA WEMIN RASAR ḆYEDI IMAR. Rofyor ibaḇa kaker, ismai dafduf polio, dafduf ḇefarpampam ḇemun sistem saraf (ḇar oso ḇefararur fa ḇefara baken snonkaku). Fafisu ḇyeumur 16, bos ḇyeja ikofen ḇe i, ”Allah ḇyuk dafduf ine ḇe Au snaro wasoasuser ḇa ma wafrur pyum snami ḇa.” Taun ḇe taun ramnai, Luzia iswarepen kaker fafisu anya sne ḇyedi ikar kaku.

FAFISU DAMARIS IFAWI IDUF KANKER OTAK, kmari ifuken i, ”Rosai wafrur kaku ya inja waduf radineni? Ausya wafrur roi ḇeḇyeḇa oso di, inja Manseren ḇyuk samamyai ḇe Au.” Damaris ḇyesanekar fafaya ḇa rofyor ryower kmari ikofen rarirya.

Fyor iwara isof ro rasine, snonkaku sibor sikyar snar Allah ḇyuk dafduf ḇe snonkaku fa myun si. Syap Manners and Customs of Bible Lands ikofenḇair snonkaku ḇero abad randak sya sikyar snar ”ḇeduf sya sismai samamyai snar sasar mankun sena ḇaido snar kina sesya sasar sena.” Syap Medieval Medicine and the Plague ikofen ro Abad Pertengahan (500-1500 M), ”snonkaku ḇeḇeso sikyar snar Allah ḇyuk dafduf fa myun snonkaku ḇefrur sasar kwar sya.” Imnis raris, ro abad ḇe 14, snonkaku yuta ri yuta ḇero Eropa sya simar snar dafduf ḇefarpampam oso. Ine nfasnaiḇair Allah ḇyuk dafduf fa myun snonkaku ḇeḇarḇor sya ke? Ḇaido, snar bakteriya fyarpampam si kwar raris dokter sya sikofen na ke? Imbude wakfuken, kaku Allah ḇyuk dafduf fa ḇyukimun snonkaku ḇefrur sasar sya fa sekandera ke? *

WAKARAPAN: Rosai ḇefnai fa Yesus ḇyuk pararei ḇe snonkaku ḇeduf sya fafisu Allah ḇyuk dafduf ma ḇaḇekandera fa ḇyukimun snonkaku sya? Ine kyurfasnai Yesus ḇyesanowarek Allah snemuk Ḇyena ke? (Matius 4:23, 24) Yesus ipok ifrur rarirya ḇa. Ikofen, ”yafrur ḇesya kwar rosai ḇefrur i marisen na” ma, ”yafrur roi ḇeḇor kam Mami syoser faro ayana kwar”.​—Yohanes 8:29; 14:31.

Refo fyasnaibos kaku snar Allah Yahwe ima ”inapes ḇesya kwar”. (Ulangan 32:4) Imnis raris, Allah na ipok fa ifrur pesawat oso isapi ḇo snonkaku utin ḇero dori sya simar monda snar imbe myun snonkaku oser ḇero pesawat ani dori! Abraham, Allah manfamyan ḇesouser Ḇyedi, ifawi Allah ima inapes. Doḇe Allah nari ”myun pres snonkaku ḇenapes fnoḇek snonkaku ḇeḇarḇor sya ḇa”. Ikofen ḇo doḇo na ”pok” ifrur rarirya ḇa. (Kejadian 18:23, 25) Refo ikofen kako snar Allah ”nari ifrur roi ḇeḇarḇor ḇa”; ipok fa ”ifrur roi ḇesasar” ḇa.​—Ayub 34:10-12.

Allah ḇyuk ḇaḇekandera faro sasar koḇena ḇa. Yesus mankundi ikofenḇair roi ine rofyor i kuker manfamyan ḇyesi sisrow snon ḇepraf oso fyor ḇyeḇeaben ya. Manfamyan ḇyesi sifuken faro i, ”Guru, snaro snon ine ipraf rofyor ḇyeḇeaḇenya, snar mankundi sasar ḇyena roḇa ido snari ma kmari sasar suḇenake?” Yesus kyarem, ’Snon ine sasar ḇyenaḇa ma sinan ḇyesuyaḇa kako, ḇape snar fararur-fararur Allah nari neḇefasna roi.’”​—Yohanes 9:1-3.

Fafisu anya snonkaku sna kakara ḇesasar ḇo soḇe Allah I ḇebuk dafduf na. Yesus manfamyan ḇyesi sikandor kaku rofyor Yesus ikofen snon ani ipraf rofyor ḇyeḇeaben snar sasar ḇyena ḇa ḇaido sasar ro sinan ḇyesuya ḇa. Inja, Yesus ḇyuk pararei ḇe snonkaku ḇenkamor praf ani monda ḇa, ḇape ifrur mnis kaḇer kakara ḇesasar sena ḇekofen  snar ḇaḇekandera ndrama ro Allah I. (Yohanes 9:6, 7) Baboine, snonkaku ḇekandera dafduf ḇemarḇak sismai sneprei snaro sifawi Allah ḇyuk kandera ḇe si ḇa.

Refo ikofenḇair ḇe ko

• ”Snar oso ipok ifrowes Allah ḇa, ma Allah kako ifrowespan manseirya ḇa kako kuker roi ḇeḇarḇor na.” (YAKOBUS 1:13, NWT) Nasnai kaku, ”roi ḇeḇarḇor” snonkaku sismai na ma sekandera ro abad ḇe abad raris dafduf, fafardun, ma marmar nari napromes.

• Yesus Kristus ”ḇyuk pararei faro snonkaku ḇeduf si.” (MATIUS 8:16) Kuker ḇyuk pararei ḇe snonkaku ḇeduf ḇerama ḇe i sya kam, Yesus fyasnaiḇair rosai nari Karajan Allah ifrur faro snonkaku sya ro supswan ḇesiper.

• ”Nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako. Roi ḇeḇor ḇekwar napromes.”​—FASASNA FARO YOHANES (WAHYU) 21:3-5.

Rosai ḇefnai fa snonkaku sismai kandera ma susa nabore? Ro abad ḇe abad snonkaku sibor simarisen sifawi kankarem ro fakfuken anine. Allah I ḇa ido, mansei kaku ḇefrur snonkaku sekandera ya? Kankarem faro fakfuken ine nari neḇeyawos ro artikel ḇeuser ya.