Oser ro fasfesepen ḇefanam kaku ro snonkaku sya iso fasfesepen ro fandu romawa ḇesaper mnis sya. Sna fasfesepen ḇepyum kaku. Nancy Segal, direktur ro Pusat Penelitian Anak Kembar ikofen, romawa ḇesaper mnis ḇeḇeso sya na ”sifawiyae pyum si rofyor oser ro ḇesaper ansi ikofenḇair nabor ḇaim ḇe ḇesaper sumin ḇyedi.” Nancy mankundi nya srar ḇesaper. Bin oso ikofenḇair fasfesepen ro fandu i ma srar ḇesaper ḇyedi. Doḇe, ”Numa nufawiyae kaku nu.”

Rosai ḇefnai fa snonkaku ḇesaper sya sifawiyae kaku si? Moḇ sḇarek rona ḇeyawyae si ma moḇ sinan sesya sfaduru si rai. Ḇape, ḇefandun kaku iso gen sena isoine sun rari ro sisnas si ma sikmas si.

WAKARAPAN: Manḇedaw koḇedi, Allah I, ifawi rariso ifrur gen ḇepyum kaku ro snonkaku koine. Inja, I ḇefawi kaku ko syadibur mankunko ḇardi. Manḇefas Mazmur Daud ikofen, ”Kwawef aya ro sne kapar awin ayedi. Kor yena nayokefbur Au ḇa fyor wafrur aya ro moḇ ḇekankunes. . . . Mka Bedi myam aya iba syadi fyor yaḇe warwar kaker; ḇar ḇyenakam neḇefas ro syap Bedi.” (Mazmur 139:13, 15, 16) Inja, Allah I monda ḇefawi pyum gen koḇena ma roi ḇeḇejadi ro kankenem koḇena ḇefasnai rari-rari koḇena. Rarirya, kokyar kaku snar myambir kaku ko isof ro roi ḇekasun na.

Daud ḇyenadi ḇo doḇe, ”Sye Yahwe yo, Auso ḇemam mnis kaku aya, ma Auso ḇemambir kaku aya. Wafawi fyor yakain ma fyor yores. Wafawi swaruser yena ro moḇ ḇeḇinkwane. Woso nsae ro sḇadon ayena ḇaim, wafawi na kwar, sye Yahwe.” (Mazmur 139:1, 2, 4) Yahwe ifawi kako roi ḇero kosnemna, iba syadi ”ifawi marisen ro sne ya ma swaruser”. (1 Tawarikh 28:9; 1 Samuel 16:6, 7) Rosai kofarkor ro mnuk nane ya?

Fyorno ido, ro nadi koḇena kokofenḇair kam ḇa roi ḇero kosnesna ma swaruser koḇena. Ḇape, Allah myam rosai kofrur na, ma ifawi kako rosai ḇefnai fa kofrur roi ani. Allah ifawi kako komarisen kofrur roi ḇepyum, imbape kofrur rarirya ḇa snar kona samambraḇ ḇa. Allah ryir saswar ya ro sne koḇena. Inja, imarisen ifawi roi ḇero swaruser koḇena ma marisen ḇepyum ḇero sne koḇena.​—1 Yohanes 4:7-10.

 Refo ikofenḇair ḇe ko

• ”[Yahwe] myamepen ḇeso marisen ḇyenasya, ma imnaf nadi sena; ḇape isampum ḇefrur ḇarḇorsya.”​—1 PETRUS 3:12.

• Allah ikofen, ”Nari yafrur au fa wafawi ma yafasnai ḇe au moḇsa nyan wambran kaku na. Nari yaḇuk ananun kuker mka ayedi myam ḇe au.”​—MAZMUR 32:8.

Fyor komambir kaku Allah ido, na nafnoḇek ko fa kofarmkuepen fafisu kosmai samswen na ke? Kowasya farfyar ro Anna, ḇerama ro Nigeria. Fyawar ḇo doḇo, ”Yakorwanan kaku kankenem yedine ḇyemaeja snar kenem yedine ifo kuker samswen ma ḇaḇeḇirḇar ya. Ayaine kabom risaya, ma inaimkun yedi ḇyarek ro rum ḇeduf snar ismai dafduf hidrosefalus (cairan nafo ro otak ḇyedi). Ro fafisuya kako soḇe yakduf kanker payudara ma fandun fa yaḇeoperasi, kemoterapi, ma radioterapi. Ine nmarḇak kaku snar aya ma inaimkun yedi nudufkam ḇo nubarek ro rum ḇeduf.”

Rariso Anna ifarmku rai? ”Yakarauser wos ḇero Filipi 4:6, 7, ḇekofen, ’saswar-ḇaḇye ro Allah, ḇesyadi ro kakara, nari nfaduru sne ma kakara bena.’ Fafisu yawasen mnuk ine, yaḇaḇir yafanam kaku kuker Yahwe I snar ifawi kaku aya syadibur mankundaya bardi. Naek srar ro sidang jemaat ayesya kako sḇuk wos ḇesambraḇser aya.

”Yasewar kaker fa yaprei ro dafduf yedi, mboi aya ma inai yedi nuprei mankun kwar. Nufarkor fa nupok nuna kakara ḇeḇyeḇa awer rofyor samswen nasya snar Yahwe isaramper nu ḇesya kwar. Nusmai wos ḇebuk kakakyar ro Yakobus 5:11, ’Nkap si ḇeḇeaski, isoine si ḇefarmku kwar; ma mkomnaf kwar ro Ayub farmku ḇyena ma mkofawi ro ḇarpurya rosai Manseren fyasos faro i kwar, snar Manseren saswar ḇyedi iba ma ifo kuker saneso.’” Yahwe ifawi kaku Ayub samswen ḇyena, inja kokyar kaku Yahwe ifawi kako samswen koḇena.