”Sye Yahwe, isof fafisu risai yor fafnoḇek? Fafisu risai nari rwower aya? Isof fafisu risai yor fafnoḇek? Fafisu risai nari faspar inko bur ḇaḇeḇarḇor ya?” (Habakuk 1:2, 3) Wos nane ndrama ro Habakuk i, snon ḇefrur pyum ma Allah imarisen dirya. Wos ḇyenane nfasnaiḇair nya kakakyar kuf ḇa ke? Aroḇa! Allah ikofenḇair ḇe Habakuk i snar dap oras ya kwar fa ifrur kandera nakam namnai.​—Habakuk 2:2, 3.

Rofyor mankunko ḇaido kina koḇesya ono sisya sekandera, imbude ḇesesya soḇe Allah isaryar fa ifrur roi oso ḇaido ifnoḇek fasaw ko kada. Ḇape, Refo ḇyuk kakakyar ḇe ko snar ”[Yahwe] nari isusu asas ḇyedi ḇa, mboi snonkaku ono sisya skara rarirya, ḇape ikḇaḇ faro mko, snar imewer oso ryo, mboi insa snonkaku kam simbror ma skaḇer.”​—2 Petrus 3:9.

Fasawdam! Yesus ikofenḇair snar syos oso isya nari ḇemam aḇyair ḇefasnai ”papupes supswan ya”. (Matius 24:3-42) Yesus ḇardadi ḇyedine nejadi kwar ro fafisu koḇedine. Ine nfasnaiḇair fasawdam nari Allah ifrur kandera ro snonkaku sya kam namnai. *

Ḇape, rariso Allah ifrur ḇaḇekandera nakam namnai rai? Rofyor Yesus isya ro supswan, fyasnaiḇair Allah nya papoik fa ifrur snonkaku kandera sena namnai. Komam roi ḇeḇeso ḇefasnaiḇair roi inena.

Rim Ḇeba: Rofyor Yesus ma manfamyan ḇyesi sisya sayun ro Danosen Galilea, skandor monda wamdoḇer myun si ma kerokada wai skoḇeja imsar. Ḇape, Yesus fyasnaiḇair snar i kuker Kmari suna samambraḇ fa sufrur swan ya ibrin. (Kolose 1:15, 16) Yesus ikofen monda, ”Wamnai! Wa-brin!” Inja, ”Wam anya imnai beri ḇo danosen anya iḇrin dam.”​—Markus 4:35-39.

Dafduf: Snonkaku sya sifawi Yesus bisa ḇyuk pararei ḇe snonkaku ḇepraf ma ḇemanis sya. I kako ḇyuk pararei ḇe snonkaku mandai, ḇeduf pado, ma dafduf ḇesena. ”Ḇyuk pararei faro snonkaku ḇeduf [sya kam].”​—Matius 4:23, 24; 8:16; 11:2-5.

Basbiser: Kuker papoik ismai ro Kmari, Yesus ifrur roḇean nabor fa ḇyukifan snonkaku ḇebor sya. Fafisu ifarmyan ro supswan, Refo fyas rarwan risuru ḇyuk anan ḇe snonkaku syaran sya.​—Matius 14:14-21; 15:32-38.

Marmar: Yahwe nya papoik fa ḇyawes kaḇer snonkaku ḇemar kwar sya. Refo ikofenḇair snar fafisu iwara Yesus dakḇawes snonkaku ḇemar rikior. Oser ro ḇyawes anskoya imar ras rifiak kwar.​—Markus 5:35-42; Lukas 7:11-16; Yohanes 11:3-44.