Rosai ḇefnai fa komarisen kokenem fyoro? Refo ikofenḇair ḇe ko snar Sinan ryir kwar marasrisen ine ro kosnesna. (Pengkhotbah 3:11) Refo ikofen kako ”Allah ikada isaswar”. (1 Yohanes 4:8) Allah ḇena saswar ryir ro kosnesna marisen fa kokenem fyoro. Mboi, mankundi ḇyuk kankenem fyoro anya ḇe ko ḇa nanema napyum ke?

Kakuḇae, snonkaku oso na imewer imardi. Refo fyasnaiḇair marmar ya ḇe ”mbroḇ” komewer kaku diri. (1 Korintus 15:26) Snonkaku koine kam nari komar. Sia simar rofyor sbabo kaker, ḇesesya simar fyor sḇe mansar binsar kwar. Snonkaku ḇebor simkak rofyor skara faro marmari. Nari kokeibur ro mbroḇ marmar ine ke?

Moḇsa ḇaḇir rai fyor wafawi Sinan ima imewer komardi? Ro syap Kejadian ro Refo Allah ikofenḇair marisen Ḇyedi iso snonkaku sya sikenem fyoro ro supswan ine. Allah Yahwe ifrur supswan ine ma roi snonkaku sfandun nakam fa sikenem ma sismai marisen. Mura ifrur snonkaku ḇerandak Adam i, ma ryir i ro moḇ ḇepyum kaku ro supswan, moḇ anya sap i ḇe Yaf Eden. Ramnai, ”Allah myam snar roi ifrur nakam napyum fafayaḇa.”​—Kejadian 1:26, 31.

Allah ifrur Adam i imnis kaku. (Ulangan 32:4) Adam swari, Eva, i kako dakmnis kaku, kakara ma baken ḇyena namnis. Yahwe dawos yoḇ su, ”Mukapar  roma kpu sya fa sibor syadi, insama supswan ine ifo ma mkoḇepoik na, ma mkoḇepoik faro in ḇero soren, aiwan ḇeroḇ, ma aiwan ḇekenem ro bande.”​—Kejadian 1:28.

Insama supswan ine ifo kuker Adam ma Eva romawa suḇesya, sfandun oras. Eva nari kyapar romawa suḇesya, ma romawa ansi nari skapar pampam isof ro supswan ine ifo raris Allah marisen Ḇyedi. (Yesaya 45:18) Yahwe nari ḇyuk ḇe Adam ma Eva fa susmai kankenem ḇerarirya fa sumam romawa suḇesya ma kpu suḇesya monda ma sumam sifrur supswan ine ifo ḇa ido, ine nsun ro swaruser ke?

Kwarapan kako, fararur susmai ya iso suḇepoik faro aiwan sya kam. Adam ḇyuk snonsnon faro aiwan sya, ma nefandun oras nabor. (Kejadian 2:19) Insama ifrur aiwan sya sikunem, fandun fa fyarkor fa ifawi si ma fyawi moḇsa ifaduru si raya. Ine nan oras nabor syadi kaku ro ḇyuk snonsnon ḇe si.

Inja, Sinan I ḇyuk akurfasnai fa sibor ro supswan ma suḇepoik faro aiwan sya, ine kyurfasnai Sinan I ifrur Adam ma Eva su fa sukenem fyoro. Syadi wer ido, Adam ikenem fyoro kaku.

Refo fyasnaiḇair snonkaku ḇekenem kawan kaku syadibur ko ro baboine. Refo ikofen ḇo doḇe, ”Ras kankenem ḇyena kam nasof ro 930 taun.” Ḇarpur mura, sfas na ro syos ro snon riwomen eḇese ḇekenem kawan syadi ro 900 taun! Siso Set, Enos, Kenan, Yared, Metuselah, ma Nuh. Sikam sikenem ro Nuh fafisu ḇyedi rofyor Fabruḇ ḇeba ya ḇaim, ma Nuh ikenem isof ro ḇyeumur taun ri 600 kwar rofyor Fabruḇ ḇeba ya ḇaim. (Kejadian 5:5-27; 7:6; 9:29) Rariso sna umur ḇekwan ḇeradirya?

Snon ansine sikenem fanam kuker fafisu snonkaku simnis kaker. Adam ma Eva suna kankenem ḇemnis. Ine iso ḇefrur fa umur sena nakwane. Mboi moḇsa kankenem ḇemnis ine ḇyefesepen kuker kankenem ḇekwan kaku? Ma rariso marmari nari ipromes rai? Insama wasrow kankarem ḇyena, ḇepon kaku ya iso fandun fa wafawi rosai ḇefnai fa koḇe mansar binsar mura komar.