KWARAPAN Ausya mam felem ro bin oso ḇefnak pyum musik ma wamarisen kaku dirya. Sfasnai rofyor ibaba kaker, fyor fyarkor fa ifnak sonker. Rasras ifnak ker sonker na rawo ifnak pyum. Mam rofyor sfasnai isya idisen ro panggung, imbran farma ḇe moḇ nakam, ma sifawi i ro sup nakam. Mam ro fafisu idisen pyum kaker rawo ro pupes felem ani ḇyesinan kwar ma imar.

Felem ine farfyar ḇekaku ro snonkaku ḇemar kwar ani. Snonkaku ani imbude ima artis, ḇefnak sonker, snonkaku ḇefawinanem, atlit, ma ḇesena. Komam ido snonkaku ansine kam sifrur roi ḇepyum nabor kwar, mboi mura nari simar. Imbape, sḇe mansar binsar ḇa ma simar ḇa ido, roi risai nari sifrur wer?

Imbude koḇesneso kaku rofyor kokara roi ine, mboi ine iso nari ḇekur kokame. (Pengkhotbah 9:5) Kosewar nyan kaku fa kofrarbur roi ine, mboi na komkeibur ro marmar ya ḇa ma koḇe mansar binsar. Syadi wer, kokandor ḇo komar snar koduf marḇak ma kosmai roi ḇemun. Refo ikofenḇair koma komnis raris kamayow ro arwo babo ḇerama ”knik monda raimnai ipromes”.​—Yakobus 4:14.

Snar snonkaku ḇebor sifawi na simar ras risai monda, inja skara ḇo soḇe, ’Mkorama kan ma kinem, snar nari meser komar’. (1 Korintus 15:32) Mboi, snonkaku ḇekenem rarirya sna kakyar noḇa. Rofyor sismai samswen ḇemarḇak ḇaido dafduf, imbude insape skara ro mankunsi, ’Rosai ḇefnai fa kokenem kawan ḇa?’ Ro moḇ risaiso kosmai kankarem faro kankenem ine?

Baboine, snonkaku ḇebor sya sikyar faro fawawi dunya. Snar dokter ma aryawin na napyum syadi, snonkaku ḇebor na sikenem kawan. Ma snonkaku ḇefawinanem ono sisya sisewar kaku fa sfawi roi ḇefrur fa snonkaku koine kokenem kawane. Imbape sisewar kwar rariryano, fakfuken ya irya kaker, Rosai ḇefnai fa snonkaku koine koḇe mansar binsar mura komar? Na kokyar kaku ras oso marmar ya ipromes ke? Farkarkor ḇerama ine nari fyasnaiḇair nakam ma nakarem fakfuken ine, Rosai ḇefnai fa kokenem kawan ḇa?