KENEM ro baboine namnis Sinan marisen Ḇyena ro randak ya ḇa. Ifrur supswan ine faro snonkaku ḇesyom faro I, ḇemarisen fa fyarkin si, ma ḇefasnai rari-rari ḇepyum Ḇyena. Allah imarisen sismai marasrisen rofyor siryur kayam ḇe kina, sisrow roi ḇebabo, ma sifrur supswan ine ḇe firdaus.

• ”[Allah] na ifrur mamamun ro supswan ine fa namnai.”​—Mazmur 46:9.

• ”Fafisuya imnis kwar fabuk samamyai faro snonkaku . . . ḇefrur farmambriwer supna!”​—Fasasna 11:18.

• ”Snonkaku osoḇaḇeri ḇeḇarek ro diwa nari ikofen, ’Yadufe.’” —Yesaya 33:24.

• ”Snonkaku yakinfir sya na siso ḇesmai marisen ro fararur sena.”​—Yesaya 65:22.

Moḇsa ḇardadi nane na ndarirya? Allah kyanow Roma ḇyedi, Yesus i, fa ḇye Raja ḇemnis kaku na ḇepoik ro nanki ḇe supswan ine. Refo dap pamarenta ḇyena ḇe Karajan Allah. (Daniel 2:44) Refo doḇe, ”Manseren Allah nari ḇyuk faro [Yesus i], karapesa . . . , ma nari ḇye [Raja].”​—Lukas 1:32, 33.

Yesus ifrur mujisat nabor rofyor ryo supswan fa nfasnai kankenem snonkaku sena nari napyum syadi ro fafisu ine fyor ḇyepoik ḇe Raja.

• Yesus ifrur dafduf nakam naprei, ine fyasnaiḇair rariso na ipyos raryar ḇa ro snonkaku koine.​—Matius 9:35.

• Yesus ifrur swan ya fa ibrin, ine fyasnaiḇair moḇsa na kyadaunwarek snonkaku koine kuker fyara samambraḇ ro supswan ine.​—Markus 4:36-39.

• Yesus ḇyuk ananan ḇe snonkaku risyaran sya, ine fyasnaiḇair na fyasos pyum rosai snonkaku sfandun na.​—Markus 6:41-44.

• Yesus fyadwer war ya ḇe anggur ro ras munara fakawin, ine fyasnaiḇair kaku na ifnoḇek snonkaku sya fa sismai marisen ro kenem sena.​—Yohanes 2:7-11.

Moḇsa na kenem Bena imnis Allah marisen Ḇyena rai? Roi oso fandun fa wafrur ya. Refo doḇe fandun fa wasrow ”nyan ḇeyun faro kankenem ya, kawasa ḇesma i sya sibor ḇaḇeri.”​—Matius 7:14.

Rosaiso nyan ḇeyun faro kankenem ya? Allah doḇe, ”Aya, Yahwe, iso Allah mkoḇedi, ḇefarkor mko faro payamyum mkoḇena, ḇefarkin mko ro nyan ḇefandun fa mkombran ro na.” (Yesaya 48:17) Kombran ro nyan ine ido, na kokenem pyum syadi.

 Yesus ikofen kako, ”Aya ine kada nyanya ma napnapes ma kankenem.” (Yohanes 14:6) Kofrur rosai ikofen na ma koso nyan ḇepyum ḇyena kada, nari kofanam faro Allah ma kankenem koḇena napyum syadi.

Moḇsa wasrow nyan ḇeyun faro kankenem ya rai? Agama nabor naisya, mboi Yesus ḇyuk swarapepen ḇo doḇe, ”Nari mkoḇo snonkaku ḇeyor Ayaḇe: Manseren, Manseren! siso nari ḇesun ro Ḇaḇesasoser Boiyaswa, roḇa kaku, mḇoi ḇeḇeuser Kma Yedi marisen ḇyena ro boiyaswa sikada.” (Matius 7:21) Ikofen kako, ”Nari mkomam bir si ro bon sena.” (Matius 7:16) Refo na ifnoḇek Au fa wafawi kaku agama ḇekaku ya.​—Yohanes 17:17.

Moḇsa koso nyan ḇeyun faro kankenem ya rai? Fandun fa wafawi kaku ḇeḇuk kankenem faro snonkaku sya: Manseiri? Snonsnon ḇyediso? Rosai imarisen ya? Rosai ifrur ḇe ko na? Rosai imarisen fa kofrur na? *

Allah imarisen fa snonkaku sifrur fararur nabor syadi, sanan, sifnak, ma sfaduru kina sesya. Komambir Yahwe I ma koḇebati kuker I. Kofasnai saswar koḇena faro I kuker kofrur marisen Ḇyena. Yesus ikofen, ”Kankenem ḇekain fyoroya, isoine mboi ssmambaḇir aw werer Allah ḇenapes.”​—Yohanes 17:3.

Kofarkor fa kofawi roi Allah imarisen ḇe ko fa kofrur fararwei riḇeso. Rya ine syamswen. Mboi rarirya ḇa, inema marandan ḇeyun marisen kaku, imnis ra kofrur marandan ḇesena, kuker kun nyan ḇepon ya. Waḇe wafawi pyum syadi Allah ido, Saksi-Saksi Yahwe simarisen sḇuk farkarkor Refo ḇeyor ḇaḇyak ḇa ro oras ma moḇ wamarisen ya. Swewar nabor wer ro situs nkoḇedi ro www.pr418.com/bhw.