Snonggaku Ḇesouser faro Manseren Allah Nari Sismai Barakas
Nabi Moses ikofen ḇo doḇe kosouser faro Manseren parenta Ḇyena ido, nari kosmai barakas ro I. (Ulangan 10:13; 11:27) Mboi, kosouser kukro komgak nari Manseren myun ko ḇa. Kofawi rari ḇepyum Ḇyena nafrur fa ko swar ma komarisen kosouser I. Inja, komewer kofrur I fa fyafko. Refo ya doḇe, ”Koswar Allah inja koḇeuser [parenta] ḇyena.”—1 Yohanes 5:3.
Mboi moḇsa kosouser faro Allah nari nun barakas rai? Komam roi risuru suine.
1. KOFAWINANEM
”Aya, Yahwe, iso Allah mgoḇedi, ḇefarkor mgo faro payamyum mgoḇena, ḇefarkin mgo ro nyan ḇefandun fa mgombran ro na.”—YESAYA 48:17.
Manseren Yahwe iso Ḇefrur konya, inja ifawi pyum ko ma fyasos farkankin kofandun na. Komarisen isaramper ko fa kokinfir pyum nyan kenem koḇena ido, kofarkor Refo insama kofawi roi Allah imarisen na, mura kofrur na ḇeri.
2. KONA MARASRISEN
’Ḇemarisen sya siso ḇemnaf Allah wos ḇyena ma ḇeḇeuser na.’—LUKAS 11:28.
Snonggaku ḇebor ḇero baboine, sna marasrisen ḇekaku kukro sisouser faro Allah. Kokarapan fawar ro snon oso ḇeraker Spanyol. Ima imsor fasawsaw ma ifrur pyum swari ma snonggaku ḇese ḇa. Ras oso, iwasya fasfas ro Nabi Moses ḇekur Yakub roma ḇyedi, Yusuf i. Ima imyaren asuser kaku, mboi ḇedar ḇyesi sifrur pyum i ḇa, sboḇ i ḇe women ma sisun i ro bui. Imboi, Yusuf ifrur pyum pdef, imyaren asuser, ma ḇyuk ampun. (Kejadian, fasal 37-45) Snon insandi doḇe, ”Yakarauser Yusuf fawar ḇepyum ḇyenane, inja yakfasnai frur pyum, myaren asuser, ma yamsor fasawsaw wer ḇa. Kirine, yana marasrisen kaku ro kenem ayedine.”
Refo ḇyuk wos farkin nabor ḇekur moḇsa kofrur pyum snonggaku ḇesesya rai. Nari komam roi ine wer ro awawos ḇerama ine.