Kofarkor fa Kofawi Manseren Allah roro Nabi Ḇyesya
Ro fafisu naiwara, Manseren Allah ikofenḇair angginem ḇefandun faro snonggaku sya roro nabi Ḇyesya. Rosai kofarkor ro angginem anya? Isoine na kofawi moḇsa kosmai barakas ro Sinan I rai. Rwama kofarkor ro Manseren Allah nabi rikyor Ḇyeskoya.
ABRAHAM I
Manseren Allah ima inapes ma imarisen ḇyuk barakas faro snonggaku syakam.
Manseren Allah ikofen faro nabi Ḇyedi Abraham i ḇo doḇe kina ḇero supswan syakam nari sismai barakas ro i.—Kejadian 12:3.
Rosai kofawi ro roi ine? Manseren Allah iswar kaku snonggaku koine. Imarisen ḇyuk barakas faro snon, bin, ma romawa ḇesouser faro I syakam.
MOSES I
Manseren Allah fyasnai sawarwar ma ḇyebarakas snonggaku ḇesewar kaku fa ḇefawi pyum I.
Allah Ḇepoik Syadi ḇyuk samambraḇ faro Moses i fa ifrur mujisat ḇeba kaku. Mboi, Moses dor faro Manseren Allah ro nadi ḇo ikofen radine, ”Wafnoḇek aya fa yafawi nyan Bena, insama [yafawi pyum] Au ḇesya kwar ma yafrur snembri imarisen.” (Keluaran 33:13) Manseren imarisen faro Moses fararyor ḇyenane, mura ḇyebarakas i fa fyawi pyum kaku Sinan nyan kakara ma rari-rari Ḇyena. Rupa ra fafisu anya, Moses ifawi snar Manseren Allah ḇefrur roi ḇebor nakam, ima isawarwar ma ifrur pyum.—Keluaran 34:6, 7.
Rosai kofawi ro roi ine? Kokame isoine bin, snon, ma romawa kosewar kaku fa kofawi pyum Manseren Allah ido, na imarisen ḇyebarakas ko. Ro Refo ya, Sinan ikofenḇair ḇe ko nyan fa kosyom I ma fyasnai imarisen kaku fa ḇyebarakas ko.
YESUS I
Yesus iswar kaku snonggaku sya, inja ḇyuk pararei faro ḇeduf syakam
Kofarkor ro rosai Yesus ifrur na ma farkarkor ḇyuk na ido, nari kosmai barakas ḇekain fyoro ro Manseren Allah.
Refo ikofenḇair ḇe ko insama kofawi pyum farkarkor ro Yesus i ma kankenem ḇyena. Manseren Allah ḇyuk samambraḇ ḇe Yesus i fa ifrur mujisat ḇeba nabor kaku. Rupa ra, ḇyuk pararei faro ḇepraf, ḇeproi, ma ḇepapipen sya. Isyadi wer, ḇyawes kaḇer snonggaku ḇemar kwar sya. Roi ḇepyum nane naiso nari Manseren Allah ḇyuk faro snonggaku koine ro ras ḇarpon iyama. Inja rosai na kofrur kaku insama meser kaksmai barakas anya kako? Yesus ikofenḇair nyan ḇyena. Doḇe, ”Kankenem ḇekain fyoroya, isoine mboi [sifawi pyum] aw werer Allah [ḇekaku], ma [sifawi pyum] Yesus Kristus wawan kwar ani.”—Yohanes 17:3.
Yesus ima isawarwar kaku, imyaren asuser, ma ifrur pyum. Naiso eḇedari roma inai babo ma ḇesinan kwar sya, simarisen siso Yesus fararyor ḇyenane, ’Mgofarkor ro aya, snar aya yamyaren asuser ma sneri ikaki ḇa ma rur mgoḇesi nari sismai kananon.’ (Matius 11:29) Ro fafisu anya, kawasa sya sifrur pyum bin sya ḇa. Imbape, Yesus ima ifrur pyum si ma ḇyesyowi si.
Rosai kofawi ro roi ine? Yesus iswar kaku snonggaku sya. Fyasnai nyan ḇepyum fa koso na kuker kofrur pyum snonggaku ḇesesya.
YESUS IMA MANSEREN ALLAH RISYA ḆA
Refo ikofenḇair snar Manseren Allah ima oser monda, imboi Yesus ima manwawan ḇeyun angginem ro Manseren Allah. (1 Korintus 8:6) Yesus manggundi doḇe Manseren Allah ima iba syadi ro i ma iwan i fa ryama ḇe supswan ine.—Yohanes 11:41, 42; 14:28. *
^ par. 17 Imbe wafawi nabor syadi wer ḇekur Yesus i, mam ḇar ḇe 8 ma 9 ro syap Apa Kunci Kehidupan yang Bahagia? naisya ro www.pr418.com/id.